okyyjy
08.01.2025 13:03
Aýtsam dostym, eýýäm niçe wagt bäri,
Göwnüm tomus güni gary küýseýär?!
Gar ýagdy, derdime tapmadym däri
Göwnüm gül gunçaly bagy küýseýär.
Ynha, ýagmyr ýagýar dünýäni ýuwup,
Hasratly ýüregmiň agysyn duýup.
Göwnüm damjalary ýasama saýyp
Güneşli sapaly çagy küýseýär.
Güller açmaz bahar bilen bakyşman,
Siller akmaz gökde bulut çakyşman,
Duýgularym orta ýolda tapyşman,
Kalbym çöli, beýnim dagy küýseýär.
Ýigitlik ýalkymyn saçdy başymda,
Gözeller perwana boldy daşymda,
Däli gownüm, bir pelleden aşamda
Jahyllykda galan ýary küýseýär.
Durdymyrat Amangeldiýew
7
23
okyyjy
29.12.2024 06:50
12-iň jaňyn urar sagadyň dili,
Dünýä höküm eder Ýanwaryň ýeli.
Ýoluna sepeläp arzuwdan güli,
Täze ýyla gadam uralyň, dostlar!
Bezesin törleri goňşylar, dostlar,
Şanyna aýdylsyn gutlaglar, tostlar,
Içilsin şerbetler, iýilsin tortlar,
Täze ýyly garşy alalyň, dostlar!
Täze ýyla şatlyk bilen ätläliň,
Geçen ýyly ýagşylykda ýatlalyň,
Gussalaň, gaýgylaň bagryn otlalyň,
Kinäni Sibire süreliň, dostlar!
Ýaşlarymyz – ekram, edenli bolsun,
Ýaşulular – sagat bedenli bolsun,
Işlerimiz batly gadamly bolsun,
Atlary dört nala goşalyň, dostlar!
Millet - bir daragtdyr,
Her kim - bir ýaprak,
Taýpa-tire - şaha,
Welaýat - baldak,
Atamyz – Watandyr,
Enemiz – toprak,
Hiç kimsäni ýetim saýmalyň, dostlar!
Dyzynda oglanjyk, gyzjagaz bile,
Öýňüzi bezesin – ata hem ene ,
Iki elti ýüz urmasyn jenjele,
Gelinleri – ýaşmak bezesin, dostlar!
Gyzlarymyz – erkli bolsun erkine,
Haýa, şerim – görmek goşsun görküne.
Türkmen aga gyzyn bermez her kime,
Söýgiň arkasynda duralyň, dostlar!
Ýaşy ýeten juwan öýlensin-çyksyn,
Ykbal ýüzlerine ynsaply baksyn,
Allam nikalarny arşda çatsyn,
Sallançagy bäbek bezesin, dostlar!
Bagtdan berk binýatly gurulsyn öýler,
Saglykdan berilsin tükenmez paýlar,
Rysgaldanam alyp dürli serpaýlar,
Bereket – saçagy bezesin, dostlar!
Döwlet – ojagňyza bolsun örkli,
Üstünlik hem şatlyk size söýekli,
Aýdanlarymyň hemmesine gerekli –
Agzybirlik hökmün ýöretsin, dostlar!
Ine, bäş minutdan 12 saz çalar,
Täze ýyl ýylgyryp nazaryn salar.
Köne ýylam bizden razy bolar,
Bizem oňa ak ýol diläliň, dostlar!
Ýurdumyzy äkideliň has öňe,
Gülledeliň,
Watan - güllesin diňe.
Adyny goşalyň aýdyma, heňe,
Türkmenistan –
dünýä ýaň salsyn, dostlar!
7
74
okyyjy
23.12.2024 04:06
Söýgiň nämedigni bilýän adam ýok.
Ýöne men şonda-da bir zada belet:
Söýmek üçin söýülmegiň gerekdir,
Söýülmegiň üçin söýmegiň gerek.
Kyn daldir «Söýýärin, söýýärin!» diýmek.
Söýdürmegi weli başarmaz her är.
Hemme zatdan belent bolsa-da Söýmek, Söýülmek belentdir Söýmege görä.
Ikisi birleşse ümzügiň öňe.
Biri aýra düşse - ümzügiň yza...
Watana söýgümi,
Halka söýgümi,
Ýa dosta söýgümi,
Ýa gözel gyza –
Hemmesi üçinem Kämillik gerek.
Kämilliksiz söýgi bolmandyr öňem.
Ýokdur ol häzirem, ertirem bolmaz.
Diňe kämil söýgi Hasraty ýeňer.
Diňe kämil söýgi Şatlygy ýeňer.
Nama gerekmişin Şatlygy ýeňmek?
Söýgüni suwjardyp ýörmeziň üçin
Şatlygyňy egsip bilmegiň gerek.
Söýgi bar ýerinde Şatlygam gerek.
Ýöne ol gerekdir öz çeni bile.
Öz iliňe hözir berdigiň däldir,
Bu dünýäden gülüp geçeniň bile.
Başa iş düşende Hasratam gerek.
Ýöne olam gerek öz çeni bile.
Öz iliň hasratyn çekdigiň däldir,
Bu dünýäden aglap geçeniň bile.
Şer iş bar ýerinde Ýigrenjem gerek.
Ýöne şolam gerek öz çeni bile.
Öz iliňe peýda etdigiň däldir.
Bir biweje gargap geçeniň bile.
Diňe Kämilligiň öz çeni ýokdur,
Şony islemegiň öz çeni bile.
Ol ne-hä suwjarar, ne-de suwjardar
Öz çeninden aňryk geçeniň bile.
Nireden geçse-de – geçiber bile.
Gorkma, eltjek ýerne özi beletdir.
Dünýäniň ýüzünde ähli zat üçin
Serhet bardyr weli, Ol biserhetdir.
Kerim Gurbannepesow
5
76
okyyjy
19.12.2024 18:43
Nurundan ýaradan iki azyzy,
Bugdaý iýp, behiştden aýrylmadymy?!
Üç ýüz ýyl agtaryp, sergezdan bolup,
Adam How eneden aýrylmadymy?!
Adam ogly hiç bolupdyr baş bilen,
Ýuwdy ýüzün gözden akan ýaş bilen,
Abyl atdy ol Kabyly daş bilen,
Aga inisinden aýrylmadymy?!
Ybraýym pygamber dünýäge geldi,
Arzuwarman bilen Hajary aldy,
Musulman bolanlar kişdige doldy,
Nuh öz kowumyndan aýrylmadymy?!
Ol hakyň Töwratyn okygan Musa,
Zamanynda ýokdy olar dek resa,
Bibi Merýem oglyhezreti Isa,
Gaçyp, kapyrlardan aýrylmadymy?!
Pygamber äleme patyşa boldy,
Zebur okap, halka nesihat kyldy,
Bir güni göwnüne menmenlik geldi,
Dawut öz oglundan aýrylmadymy?
Dawut öldi, zürýadyna ýer galdy,
Hudaýymdan şoňa bir ýüzük geldi,
Nurdan bolan ýüzügini döw aldy,
Süleýman tagtyndan aýrylmadymy?
Ýakup aglap aýrylandyr gözünden,
Hiç peýda tapmady aýdan sözünden,
Arzy Gambaryndan, güler ýüzünden,
Ýusup Züleýhadan aýrylmadymy?
Pygamber Çaryýar ýaşyn dökerden,
Şyhlar sopusyndan, şalar nökerden,
Zenbur asalyndan, toty şekerden,
Bilbil gülüstandan aýrylmadymy?
Görogly beg, tälim algyn ussatdan,
Ýagşy, ýaman hemme geçer syratdan,
Leýli Mejnunyndan, Şirin Perhatdan,
Wamyk Uzrasyndan aýrylmadymy?
"Görogly beg" dessanyndan
6
49
okyyjy
18.12.2024 15:25
Azaşaly biz bileje del düýşleriň arasynda,
Agtaraly ýorguduny ertirleriň adasynda.
Süzüp içeli durmuşy hyýallaryň badasynda,
Baglamasyn hiç bir böwet wysallaryň ýodasyny.
Ylagaşlasak ýetişeris arzuwlaryň ak atyna,
Jogap ýazaly geljegiň bize ýollaýan hatyna,
Aýralygy agzama:ly, duş gelmäli halatyna,
Gel bozaly köne dünýäň öňden gelýän kadasyny.
Her kim ýazar öz ömründe, öz ömrüniň kitabyny,
Köpler ýüzüne dakynar özgeleriň nikabyny,
Satyn alynmadyk yşgyň ýapyp bormy dükanyny,
Satyp bormy heýem yşgy nagtyna ýa nesýesine.
Soňky döwür bir wagyr bar, ömür eken üç günlüjek.
Düýn, şu gun, hemem ertirmiş, olam, geljek ýa gelmejek,
Eger gelseň seniň bilen bäş gün doly ömür sürjek,
Başyna ýapsyn zamana täze döwrüň modasyny.
Durdymyrat Amangeldiýew
4
56
okyyjy
08.12.2024 09:56
ÝAZMASY AGYR DÜŞEN GOŞGY
Bütin oba garaşyp dur.
Ýola bakýar hemmeler.
Atasy pyşyrdaýar:
“Geler. Geler. Geler”.
Gelnejesi pyşyrdaýar:
“Gelermikä? Kim biler...”
Agasy göwünlik berýär:
“Geler-le... hökman geler”.
Gök toraññyñ saýasynda
Ýüzläp adam dymyp dur.
Çekizeli ak haltadan
Turşy damja damyp dur.
Ýygnanyşdy babadaşlar,
Içginler hem daşgynlar.
Ne signal bar, ne şowhun-
Dymyşyp dur maşynlar.
Geldi dürli maşynlar -
Gyzyl, sary, ýaşyl, ak.
Geldi garaşylmaýanlar.
Garaşylýan gelenok.
Göýä pikir hem etmän
Bu gürrüñler babatda.
Ak guş kimin irkilip,
Ene ýatyr tabytda.
Göterlerne garaşyp dur
Köpi gören agaç at.
Ene ýatyr üstünde
Giñ mañlaýly, Agajet.
Şol enäniñ ogluna
Garaşyp dur hemmeler.
Geldi tanyş, nätanyş -
Geldi şondan öññeler.
...Ol henizem gelenok.
Meger, häzir ýoldadyr.
Đñ söýgüli ulagy
Samolýot däl, "Wolgadyr”.
Ýöne weli uçurýandyr
Samolýota deñeçer.
Şondan yza-ha galmaz,
Oñarsa öñe geçer.
Ol henizem gelenok...
Meger, häzir ýoldadyr.
Ýa-da iki eli hem
Ullakan stoldadyr.
Tüweleme, uly adam
Bolup gitdi indi ol.
Ýañy bolsa has ullakan
Bir stula mündi ol.
“Sypaýmasyn birden!” diýip,
Oturandyr ýapyşyp.
Owadanja gelinler
Çaý çekýändir çapyşyp.
Üýtgeşikdir öñündäki
Kişmiş, kemput, şokolad.
Ýa gök çaýyñ humaryna
Ýazýandyr bir doklad.
Ýok, ýok, özi doklad ýazmaz,
Ýazýandyrlar başgalar.
Ýaranjañlar her sözüne
Ellerin çarpyşarlar.
Ol bolsa özi ýazýan dek
Gülümsirär, ýylgyrar.
Ýazanlar onuñ deregne
Utanjyrar, ýygrylar.
...Ýigrimi ýyl mundan ozal
Gutarypdy bir WUZ-y.
Ony oña gutardan hem
Tabytdaky ezizi.
Güýzde pagta ýygypdy.
Gyşda körek çöpläpdi.
“Oglum ullakan okuwda!”
Buýsanç bilen gepläpdi.
Howdan gurdy, gazy gazdy
Laýa batyp dyzyndan.
Ýygnanjasyn lükgeläp
Ibererdi yzyndan.
Ogly üçin ak mütgelden
Bir haltajyk tikindi.
Üçlügini, manadyny,
Şaýysyny, köpügni-
Artdyranja puljagazyn
Atdy şonuñ içine.
Şeýde-şeýde kyrk ýaşynda
Ak çozupdy saçyna.
Ogly okuwyn gutardy.
Ene dertläp ýykyldy.
Ol şonda sypap otyrdy
Bir gözeliñ çokulny.
Dakýardy enäñ pulundan
Her barmagna bir ýüzük,
Gulagyna teneçir,
Bilegine bilezik.
Söýüşdi, gujaklaşdy.
Paýtagtdan jaý tutundy.
...Enesinden utanmady,
Ene ondan utandy.
Ene käte paýtagta
Gezmäge gelen wagty,
Gelni diýdi: “Ýok etsene
Bu porsy garabagty!”
Ogly diýdi: “Ýakymsyz
Ysyñ bar-la, jan eje.
Bu eýýamda arassa
Bolmaly myhman, eje!”
Ene diýdi: “Wah, jan ogul,
Her niçe porsasak-da,
Ulalansyñ, ýetişensiñ
Şu porsuja gujakda...”
Soñra bolsa uzak gije
Ýorganynda aglardy.
Dañyñ atarna mähetdel,
Otla tarap ylgardy.
...Şeýde-şeýde günler ötdi,
Aýlar ötdi nobatly.
Edeni şowuna boldy.
Durmuş ony aýnatdy.
Her sözünde bir oýun,
Her elde bir desmaly-
Bir ýyl bäri saklap otyr
Has uly bir stoly.
Bu gün bolsa enesi
Amanadyn tabşyrdy...
Gelen telegrammany
Stolunda ýygşyrdy.
Ony aýalyndan başga
Görkezmedi hiç kime.
Är-heleý karara geldi:
“Barsak bor-la üçüne!”
#3000 harpdan köp bolsa goýup bolmaýanlygy sebäpli goşgyny iki bölek edip goýmaly boldy.
dowamy bar...
6
55
okyyjy
07.12.2024 18:40
Kiçijik şäherler
Men kiçijik şäherleri söýýärin!
Ol ýerde hemme zat sadadan-sada.
Uly şäherlerde tapylgysyz zat,
Bu ýerde ýer bolýar myhmanhanada.
Bu şäherde hemme tanyş, mähriban,
Hilesi ýok, allary ýok gepinde.
Onuň bir çetinde güläýse biri,
Derrew eşidýärler beýle çetinde.
Bu kiçijik şäherjigiň göwni giň,
Ol bagyşlap bilýär, gynaman jany.
Ilki: «Ajap şäher, owadan şäher!»
Soňam «Oba!» diýip, çykyp gidýäni.
Bü ýerde kän hapa işler edilmez,
Asylly işlerem edilmez kelte.
Çüňki bütin şäher anygna ýeter,
Ýerden tylla halka galkanda erte.
Bu şäherde dul gapysy kakylmaz,
Gyzylmy-ak, mele şerapdan doýup.
Bu şäherde gündiz ýagty söýerler,
Garaňky gijäni parahat goýup.
Bu şäherde söz diýeniň — namysdyr.
Şoň üçinem ikilik ýok gepinde.
Onuň bir çetinde aglaýsa biri,
Derrew eşidýärler beýle çetinde.
***
il
Il diýeniň — işçi, daýhan, şahyrdyr...
Iliň elmydama oňatdyr päli.
Ýöne adam diýen ýalňyşýar käte,
Olar perişde däl ýalňyşmaz ýaly.
Olar ýalňyşýarlar. Boýun alýarlar.
Emma ýürekleri oňat pällidir.
Giden ildir — işçi, şahyr, daýhanlar...
Il diýeniň bolsa, ýalňyşýan däldir.
***
Giderin, giderin,
Uzakdyr ýollar,
Söýerin. Işlärin.
Aglap-gülerin.
Kim men? Näme
Gadym dünýäň ýüzünde?
Men bulary ölemden soň bilerin.
Aýagymy düzdüm döwrüň aýagna.
Sesine ses goşdum beýik döwrümiň.
Bir aladam; näçe sahap bolarka,
«Saýlanan günleri»
Ýaşan ömrümiň?
***
Sen örtenme aýralykdan, ezizim
Bilýäň ahyr gylygyny kärimiň.
«Şol gidişi, köwlenmeýär öýüne,»
Diýip, alyp durma öýüň tärimin.
Men ýetmän ölmerin seniň ýanyňa,
Bararyn ajalyň syrtmagyn kertip.
Senden näçe menzil daşlaşan bolsam
Şonça-da seň bilen ýaşaryn artyk.
***
Günlerimiz,
Ömürlermiz ötinçä
Merjen dänesi deý düzülmelidir.
Söýgüde
duýgular bolmaly inçe,
Çala galplyk etseň, üzülmelidir.
Söýginiň derdine hormat goýmaly,
Şo dert bilen önýär tämiz duýgymyz.
Biz
elmydam
hesret çekip söýmeli,
Degýän bolsa şol hesrete söýgimiz!
Gurbannazar Ezizow
11
83
