TAKTYRMYŇ SEN,

ÝA TERS GELEN TÄLEÝIM

Nagma bolup siňdiň meniň kalbyma,

Aýtsana men senden neneň däneýin?!

Bilmedim-dä, ýazlanmy sen alnyma,

Aklym ýetmez oýunlarna pelegiň,

Takdyrmyň sen, ýa ters gelen täleýim?!

Nar deýin gyzaryp duran ýaňaklaň,

Aklym alar gözleň, badam gabaklaň,

Bagt ýüzügmi, dakarmyka barmaklaň,

Aklym ýetmez oýunlarna pelegiň,

Takdyrmyň sen, ýa ters gelen täleýim?!

Näzijek ellerňi alamda ele,

Ajaýyp arzuwlar gelerdi dile,

Belki bir gün, toý tutarys biz bile,

Aklym ýetmez oýunlarna pelegiň,

Takdyrmyň sen, ýa ters gelen täleýim?!

Nepesiňden dem alyplar gansadym,

Ataş bolup şol nepesde ýansadym,

Bagtymmy sen, salgymmy sen bilsedim,

Aklym ýetmez oýunlarna pelegiň,

Takdyrmyň sen, ýa ters gelen täleýim?!

Baýramgeldi TÄÇMYRADOW

GEDEM GYZ

     Nowgül çagyň söýüp seni ýürekden,

     Aşyk boldum ömre bagt gatan gyz.

     Boýdaşlaryň başy bogulýar kem-kem,

     Aşyk oglan urýar saňa gadam gyz,

     Tekepbirlik etmesene gedem gyz.

     Nesibe diýýärsiň, söz aýtsam saňa,

     Agşam düýşde görýän pikirden ýaňa,

     Bilmedim nesibäň galarmy maňa,

     Aşyk oglan urýar saňa gadam gyz,

     Tekepbirlik etmesene gedem gyz.

     Nesibedir diýip gitmeziň ýaly,

     Aşyk gözlerimden ýitmeziň ýaly,

     Bagtyň özge bilen çatmazyň ýaly,

     Aşyk oglan urýar saňa gadam gyz,

     Tekepbirlik etmesene gedem gyz.

Baýramgeldi TÄÇMYRADOW

Bu gün ýüregime erkim ýok meniň,

Ene, ýene seni göresim gelýär.

Düýşümde görsemde keşbiňi seniň,

Ene, ýene seni göresim gelýär.

Mährem keşbiň, göz öňüme getirsem,

Ýüzüm, ýalanjykdan, ýylgyryp gülýär.

Ýüregime kine alyp otyrsam,

Ene, ýene seni göresim gelýär.

Ýada salsam ýoklygyňy jahanda,

Gözüm ýaşa dolýar, bagrym dilinýär.

Kalbym mähir küýsän wagty haçanda,

Ene, ýene seni göresim gelýär.

Seniň ýoklugyňy boýun alsamda,

Suratyňy görsem içim ýylynýar.

Indi gaýdyp gelmejegňi bilsemde,

Ene, ýene seni göresim gelýär.

Ýüregmi gysdyrýar, sensiz ýaşaýyş,

Muny bile-bile ýürek elenýär.

Munda aýralykdan ýok eken gaçyş,

Ene, ýene seni göresim gelýär.

Bu dünýäden baky ýümdüň gözüňi,

Diýip şahyr balaň gyzahyny sözlär.

Aňda janlandyryp nurly ýüzüňi,

Ene, ýene seni göresim gelýär.

Ykbalyň oýnuna aldanan ýürek,

Durmuşdan doýan deý, nalaýar indi.

Ol gara gözlere awlanan garak,

Ajy gözýaş döküp, aglaýar indi.

Sagadyny sanap geçip dur günler,

Sypaýandyr, şamar saçlaryn ýeller,

Saçynyň taryna degmedik eller,

Alaçsyz, "hoş" diýip, galgaýar indi.

"Ýene gaýdyp geler" diýip ýanyma,

Umytly göz bilen garap ýoluna,

Oturýaryn, hergiz salyp aňyma,

Ýatlamalar göwnüm, çaglaýar indi.

Bolmandy köp wagt aýralyk güne,

Henizem ýadymda, şol gün, şol sene,

Näçe islesemde, ýaraşmak ýene

Ol günleri dolap, bolmaýar indi.

Bilmedim nirede, kim onuň bagty,

Haýsy nesibeli bolarka bagtly,

Juwan göwnüň, gülüp gezmeli wagty,

Ýürek öz-özüni, daglaýar indi.

Aýtýarlar ol hakda, ýalandan, çyndan,

Eştýärin il-günden, ilen-çalandan,

Unutsada meni, söýýärin çenden,

Arman, özgä bagtyn baglaýar indi.

Munda gözüm ýetdi, bir zada bu gün,

Süýtde agzy bişen, üflärmiş suwun,

Bir gezek ýalňyşyp, aldanan göwün,

Ykbalyň oýnuny, aňlaýar indi.

Şeýle bir gün geler, söýmerin menem

Edil seniň meni söýmeýşiň ýaly,

Şeýle bir gün geler, şol gün gelende

Söýmerin men seni isleýşiň ýaly.

Söýmerin men seni, meni söýseňde

Duýmaryn söýgüňi, duýaý diýseňde

Görmerin men seni, görünmen saňa

Meni görmek isläp batsaňda gama

Undaryn hem asla ýatlaman seni,

Alýan bolaýsamda sen diýip demi,

Şeýle bir gün geler, demem gerekmez

Sen näçe söýseňde, senem gerekmez

Belki-de söýmersiň meni ýenede

Ýigrenersiň, öňkiden has beterräk

Belki söýersiň sen, söýgi saňada

Derdin berer, gidersiň has beterläp.

Şeýle bir gün geler, söýmerin seni

Şeýle bir gün geler, duýmaryn seni

Şeýle bir gün geler, görmerin seni

Şeýle bir gün geler, undaryn seni

Şeýle bir gün geler, şol gün gelende

Söýmen, duýman, görmen, undaryn diýip

Aýdan sözlerime düşünersiň sen

Şonda galarsyň sen bar zady bilip

Hemem galarsyň sen göz ýaşly aglap

Gözýaşlaryň bilen kalbyňy daglap

Birje görmek isläp gözlärsiň meni

Bir seni söýýäni, şol güne çenli.

Gözlärsiň bakyp sen asmana sary,

Bolsada al asman bir boşluk mawy,

Tapmarsyň gojaman ýeriň ýüzünde,

Ýataryn bir topbak toprak düzünde.

Şeýle bir gün geler, menem söýmerin,

Islesemde söýüp bilmerin seni,

Söýmerin men seni, şeýle gün geler

Söýeýin men seni şol güne çenli.

Synlap meniň yşga düşüp ýörşümi,

Boýun egýän ýaly, uly bir güýje,

Ýyldyrym çakdyryp, guýup ýagşyny,

Asman gözýaş dökýär, hasratly gije.

Yşga salyp, oýun guran ykbalym,

Çekdirdikä maňa nähili bije,

Asman gözýaş dökýär, görüp meň halym,

Zeminem çygjarýar, hasratly gije.

Bilmedim, bijämde utuldymmy men,

Ýada oýnamakda, galdymmy gijä,

Ýyldyrym çakyp dur, ýagtyldyp ýeri,

Göýä gündiz deýin hasratly gije.

Ýylgyrdy, bir pursat ýyldyrym deýin,

Şol ýylgyryş üçin öwrüldim 'hije',

Ýagtylypdy bu garaňky dünýäm meň,

Soň ýene dolandy, hasratly gije.

Birje gülüşine ýagtylan dünýäm,

Arzuw etdiripdi, bolmak bileje,

Senli arzuw bilen ýüregmi dilýän,

Gaýgy-gamdan doly, hasratly gije.

Ýyldyzlara garap, eden arzuwlam,

Hemmesi öwrülip barýarlar keje,

Arzuwlarmy hasyl etjek ýyldyzlaň,

Hiç biri görnenok, hasratly gije

Aýam görünmeýär, ýyldyzlar bilen

Uly ýyldyzlaram bolmaly nije,

Boşapdyr, tüm gara bulutly asman,

Meni ýalňyz goýup, hasratly gije.

Aý ýyldyzsyz, asman, zemin gyýylýar,

Diňe sen begenýäň, bu hala birje

Ýer, asmanyň, gözýaşlary duýulýar,

Meňki duýulmaýar, hasratly gije.

Söýüp, ýalňyz galan ýüregme dözmän,

Saňa goşgy ýazdym men ýarygije,

Ýene başarmadym, sen hakda ýazman,

Adyna goýsamda, "Hasratly gije".

Hawa, dogry, ýazdym ýene sen hakda,

Adyň bolmasada, sen bar diňeje,

Sen bolduň kalbymda ýitip giden Aý,

Menem Aýsyz galan, hasratly gije.

Men seniň garaja gözlerňi söýdüm,

Gözleriňde, bu giň dünýäni gördüm,

Ýöne welin, saňa söz aýdyp bilmän,

Şol seniň daşyňdan guwandym ýördüm.

Men seniň mylaýym sözlerňi söýdüm,

Ýakymlyja sesiň, ýüregme guýdum,

Diňlemedi kalbym, senden özgäni,

Bir seni diňledim, bir saňa uýdum.

Men seniň edýänje näzlerňi söýdüm,

Näzleriňde mähir, söýgüni duýdum,

Näziň çekip, göwnüň almak isledim

Onuň ýerne, men öz ýüregmi goýdum.

Men seniň şar gara saçlarňy söýdüm,

Şamar saçlaryňy, ýaýyşyň söýdüm,

Hyýalymda seniň zülpleriň darap,

Saçyň her taryna bir çemen bogdum.

Men seniň uzynja boýlarňy söýdüm,

Söýgim beýan edip ýazýaryn aýdym,

Ýazdym, ýene ýazýan, ýazaryn ýene

Elimde galamym, dilimde adyň.

Men seniň gyrmyzy lebleriň söýdüm,

Seniň şirin-şeker dilleriň söýdüm,

Söýdüm ýaňaklarňy, aý deý ýüzüňi,

Çeper keşde çeken elleriň söýdüm.

Men seniň owadan ýüregiň söýdüm,

Söýüp, söýgiň otly köýnegin geýdim

Ne men söýgüm aýtdym, ne-de sen duýduň,

Duýmasaňda meni, men seni söýdüm.

NÄTANYŞ GÖZEL

(Ýarym degişme)

Okuwdan soň bardym öňki duralga

Öz özüme diýip indibir düzel

Şol pursat gözlerim düşdi  bir gyza

Meni maýyl etdi nätanyş gözel.

Bilmedim adyny, özi nireden

Parhy näme, ol gyz şeýle owadan

Sönen ýüregimi ýakdy ýaňadan

Meni maýyl etdi nätanyş gözel.

Nirä gitjegini sorajak boldum

Birden awtobusyň gelýänin gördüm

Bolşundan ol gyzyň münjegni duýdum

Meni maýyl etdi nätanyş gözel.

On üçlik geldide durdy öňümde

Indi ykbal aty meň öz elimde

Wah aýtjak sözlerim galdy dilimde

Meni maýyl etdi nätanyş gözel.

Duralgada durka saçlaryn darap

Awtobusa mündi uz basyp ýöräp

Göz astyndan maňa ogrynja garap

Meni maýyl etdi nätanyş gözel.

Awtobusa mündük yzly-yzyna

Ol birinji münüp bakdy yzyna

Gözlerim düşende gara gözüne.

Meni maýyl etdi nätanyş gözel

Ol gyz münüp durdy agzynda gapyň

Menem münüp durdum ol gyza ýakyn

Gözlerim doýmady şol gyza bakyn

Geni maýyl etdi nätanyş gözel.

Salam berdim salamymy almady

Tanyşjakdym tanyşlygym bolmady

Ol gyz maňa asla ýüzem bermedi

Meni maýyl etdi nätanyş gözel.

Içimden oýladym belki ýary bar

Öýmesä ýok, bilmen belki äri bar

Şeýle gözel ýaradypdyr Biribar

Meni maýyl etdi nätanyş gözel.

Şeýle pikir bilen barýardym dymyp

Düşmeli ýerime ýetemde baryp

Awtobusdan düşmän galypdym doňup

Meni maýyl etdi nätanyş gözel.

Düşüp bilmän awtobusyň agzyndan

Geçip bilmän şol gözeliň näzinden

Gitdim awtobusly onuň yzyndan

Meni maýyl etdi nätanyş gözel.

Barmaly ýerimiz şeýle çet eken

Bir gyz diýip okuw çykdy kelleden

Bilmedim duşanym gülmi ýa tiken

Meni maýyl etdi nätanyş gözel.

Geldik ol gözeliň düşmeli ýerne

Hiç zat ýok seretsem daş töweregme

Biziň ikijigmiz düşüpdik diňe

Meni maýyl etdi nätanyş gözel.

Awtobus ýöräpdi düşürip bizi

Soragly bakýardy ol gyzyň gözi

Birden sorag berip dillendi özi

Meni maýyl eden nätanyş gözel.

Sorady "name üçin meň bilen düşdüň?"

Jogap berdim "seniň yşgyňa düşdüm"

Seň yşgyňa düşüp bir goşgy goşdum

Meni maýyl etdiň nätanyş gözel.

Sözüm soňlamankam sözümi kesdi

Soňra çyny bilen güldi ep-esli

Ýylgyrşy açylan bägül deý misli

Meni maýyl etdi nätanyş gözel.

Gülki soňlanmaka bir ses eşdildi

Biziň garşymyza bir maşyn geldi

Gülküsini goýup maşyna eňdi

Meni maýyl eden nätanyş gözel.

Gelen ol gözeliň söýeni eken

Gitdi ýüregime çümdürip tiken

Ýenede men boldum yşk ýükün çeken

Meni däli etdi nätanyş gözel.

Galdym ortasynda bir uly ýoluň

Maşynda ýazykdy "bagtly boluň!"

Yzlarynda galdym gowşuryp golum

Muňa kaýyl etdi nätanyş gözel.

Bu zatlaryň neneň  bolanyn bilmän

Oturdym ep-esli özüme gelmän

Ahyr bildim, aýtsam üstümden gülmäň

Meni maýyl etdi nätanyş gözel.

Asyl ol gyz özgä gaçan ekeni

Gaçyp öz bagtyny açan ekeni

Meniň göwnüm gökde uçan ekeni

Meni maýyl etdi nätanyş gözel.

AGŞAMKY SÖÝGI

(DEGIŞME)

Söýgi sözün aýtdym bir gözel gyza

Ilkinji gezekde aldy sözümi

Öýlerne ugratdym ol gözel gyzy

Gyz gitýänçä aýyrmadym gözümi.

Aýly gije aý astynda barýarys

Aý kimin gözleri şuglasyn saçýar

Ikimizem bu söýgini görýäris

Gyz maňa sessizje ýüregin açýar.

Ol gyzyň gözleri düşende göze

Gijeler öwrülýär ýagty gündize

Şol pursat dilim däl meniň gözlerim

Seni söýýän diýýär bakyp ol gyza.

El tutuşyp barýas ýolda bileje

Söýgiden söz açyp ýöräp çalaja

Asmandaky aý hem şaýat bu söýgä

Söýgi çenden aşdy bu aýly gije

El tutuşyp barýas ýoluň ugruna

Ahyry ýetdik biz ýoluň soňuna

Şol gije gowuşdym men öz ýaryma

Diňe şol ýazlypdyr meň ykbalyma

Ykbalyma ýazlan gyzy bilemsoň

Ondan söýgi sözlerini alamsoň

Lebinden bir posa alasym geldi

Men ol gyzy çyn ýürekden söýemsoň

Men onuň elinden hasam berk tutdum

Gyz birden tisginip seretdi maňa

Inçe bilden dutup özüme çekdim

Şol wagt gyz özün tabşyrdy maňa

Şeýle golaý geldi dodaklar maňa

Ol gyz gorkmaýardy seretsem oňa

Bu meniň bolanym üçin şeýledir

Başga biri bolsa şeýdermi näme

Bal ýaly lebleri has golaý geldi

Menem golaýladym ol gyza garşy

Ol gyzyň lebleri aklymy aldy

Meni däli etdi ol gyzyň bakşy

Dodagym dodagna ahyry ýetdi

Bu goşgyň gyzykly ýerine ýetdi

Leblerinden sordum misli şokolad

Ýöne welin birden jyrlaýdy sagat.

Oýansam şokolad  leblere derek

Agzymda ýelekli ýassygyň ujy

sagat  gurnap goýmak nämäňe gerek

Ýaňky gören düýşim şeýlebir süýji.

Meň turanym gowy bolaýdy ýogsam

Süýji lebden süýji kesel boljakdy

Eger şu jaňda men turmadyk bolsam

Indiki jaňaçen ýassyk dynjakdy.

MENDEN BAGTLY TAPYLMAZ

Ýene goşgy goşup, waspyňy etsem,

Gije göze uky girmez, ýatylmaz.

Saçlaryň taryny, sypalap öpsem

Bu dünýäde, menden bagtly tapylmaz.

Öpsem gözleriňden, soň maňlaýyňdan,

Soňra sagdan, onsoň sol ýaňagyňdan,

Iň soňunda öpsem gyrmyz lebiňden,

Bu dünýäde, menden bagtly tapylmaz.

Lebleriňden sorup, aşaklap gaýtsam,

Seň ysyňmyş, gülüň ysydyr öýtsem,

Bägül ysy gelýän boýnuňdan öpsem,

Bu dünýäde, menden bagtly tapylmaz.

Bägül ysy kükän boýnuňdan öpüp,

Seň öňüňde goşa dyzymy epip,

Öpsem men näzijek elleňden tutup,

Bu dünýäde, menden bagtly tapylmaz.

Şondan soň razy men, gitsemde ýitip,

Razy öläýsemde ajalym ýetip,

Topragmyň üstünde aglasaň ýatyp,

Bu dünýäde, menden bagtly tapylmaz.

(Iki dünýä, menden bagtly tapylmaz.)

Baýramgeldi Täçmyradow