Bazygär ýeri däl yşgyň meýdany

Munda käte otly köýnek geýmeli

Aklym haýran eden niçik söwda bu

Eger söýjek bolsaň çyndan söýmeli

Bir pursatlyk bu dünýäni gülleden

Göz öňümde galdy elwan öýmeli

Ömür ýatlamadan çykyp bilmedim

Eger söýjek bolsaň çyndan söýmeli

Erkiň gidip demiň deme gelende

Edebi eşretden öňde goýmaly

Söýgi päk bolanda galar belende

Eger söýjek bolsaň çyndan söýmeli

Biri diýdi sen bolmasaň senem jan

Häzirki gyzlara şeýle diýmeli

Söýgini ownatsaň aşyklar ynjar

Eger söýjek bolsaň çyndan söýmeli

Söýgi hasap bilen diýdi bir gelin

Eýýäm gelejegiň gamyn iýmeli

Yşgym bilen oýun etme dur gözel

Eger söýjek bolsaň çyndan söýmeli

Ýogsa oň çekmeli azaby bardyr

Hem guzaby bardyr ýanyp köýmeli

Ýürekden söýýäne mähirdir nurdyr

Eger söýjek bolsaň çyndan söýmeli

Söýgi Allaň adamlara peşgeşi

Manysyzdyr başarmasaň duýmagy

Meniňem ýaşlara etjek haýyşym

Eger söýjek bolsaň çymdan söýmeli.

Diňle meni, saňa aýtjak sözüm bar,

Men seni bir ömür unudyp bilmen.

Haýyş!

Maňa:

"Meni unut" diýme ýar,

Sebäbi men seni unudyp bilmen.

Sen menden daşlaşdyň arany açyp,

Sebabin aýdaýda, dözdüň sen niçik,

Näçe uzaklara gitseňde gaçyp,

Barybir men seni  unudyp bilmen.

Seni unutmaklyk islämok özüm,

Isläýsem-de, tutup bilmerin sözüm,

Ähli zada anyk ýetip dur gözüm,

Men seni hiç haçan unudyp bilmen.

Ýagyş ýagýar, ýene seni ýatladyp

Ýagyşda ezilip, seni ýatladym...

KAKAŇ BOLMASA!

Bu durmuşda, bagtly güne barmak kyn,

Öňüňde ýol boljak, kakaň bolmasa!

Dört aýakdan, iki aýaga galmak kyn,

Çagakaň gol boljak, kakaň bolmasa!

Mydam bir zat kemter ýaly ýaşarsyň,

Eginleňde eklenç ýükün daşarsyň,

Tomusda gaýnarsyň, gyşda üşärsiň,

Kömür deý çog boljak, kakaň bolmasa!

Çagalygyň geçer gider oýunsyz,

Ykbal atly agylda bir goýunsyň,

Bu durmuşyň girdabyna boýunsyň,

Bal bilen ýag boljak, kakaň bolmasa!

Bu durmuş aňsat däl, örän kyn eken,

Käbir tanyşlaňdan, ýat ýakyn eken,

Gün deýin gowuryp, ýakýan kän eken,

Saýaly bag boljak, kakaň bolmasa!

Sözlerim soňlaýyn öte gitmesin,

Kakasyzlyk kimsä nesip etmesin,

Diňe bir ýetim däl, mydam ýekesiň,

Arkaňda dag boljak, kakaň bolmasa!

BGT

KAKA, ÝENE ÝÜZ MANATJYK BERSENE...

(Talybyň kakasyndan pul sorap aýdan sözlerinden)

Kaka, ýene ýüz manatjyk bersene,

Öňki bereniňi sowundym eýýäm,

Sen diýseňde: "Azyrajyk sowagör"

"Bolýa" diýip, ýele sogurdym eýýäm.

Kaka, ýene ýüz manatjyk bersene,

Indi tygşytlyja sowaryn hökman,

Soňra senden pul soraman bir aýlap,

Eger, galan pulum almasa dekan.

Kaka, ýene ýüz manatjyk bersene,

Biraz gerek zatlam bardy almaly,

Hemmesini özüm sowammok ahyr,

Munda okuwyňam paýy bolmaly.

Okuw, talyplaryň ýaşaýyş jaýy,

Okuwdan daşaram çykyp dur ýene,

Dogry, size pul gazanmak aňsat däl,

Men bolsa sowýaryn, ekýän deý ýere.

Ýöne, gury ýere sowamoga pul,

Okuwma bermeli onuň ýarsyna,

Galanja pulmada iýip içerin

Kaka, ýene ýüz manatjyk bersene.

BGT

SOŇLANMADYK SETIRLERDEN

***1***

Yşgyň derdi ezýär ejiz ýüregi

Bu zatlaryň sebäpkäri dünýe däl

Awara durnalar bezeýär gögi

Awara men ýöne welin durna däl...

***2***

Tygşytlaýda menem, ekenomçy gyz

Tygşytlaýşyň ýaly her bir manady

Göýä dynaýjak deý, belli bolmadyk,

Bu ömrümiň, aýy, güni, sagady...

***3***

Ýene-de güýz geldi ýaprak saralyp

Olam geçer gider günler sanalyp

Ýöne ara düşen zalym aýralyk

Soňlanmaz güýz deýin, gitmez sowrulyp...

***4***

Gidirdim erkimi, aldyrdym elden

Salamym ýollaýan öwüsýän ýelden

Dymma, sowalyma jogap ber, dillen

Meni söýýäňmi ýa söýen bolýaňmy?!...

***5***

Durmuş mekdebinde söýgi dersinden

Meň ilkinji alan baham ikidi

Sebäbi ýürekden söýen gözelim

Söýýän diýip maňa ikilik etdi...

B.G.T

AŞGABADYŇ JUWAN TALYP GÖZELI

Misli dolan Aý deý nurana ýüzli,

Garamyk gözleri, gaşy sürmeli,

Şirin- dilli, mylaýym sözli

Aşgabadyň juwan talyp gözeli.

Saçlary şamardyr, zülpleri tar-tar,

Alma deý gyrmyzy ýaňaklary bar,

Gül tahýa görküne gözellik gatýar,

Aşgabadyň juwan talyp gözeli.

Hünji dişin gizlär, gülgün lebleri,

Ýylgyrşy ýatladar, elwan gülleri,

Hünärlidir akja, näzik elleri

Aşgabadyň juwan talyp gözeli.

Uzyn boýly, inçe billi perizat,

Seni görenleriň, bolar göwni şat,

Kysmatyňda bolsun bagt diýilýän zat,

Aşgabadyň juwan talyp gözeli.

B.G.T

LEBABYŇ GÖZELI, ÄRSARY GYZY

Name diýip wasp etsemkäm men seni,

Gül keşbiň ýatladar bahary-ýazy,

Husnuň bilen bezeýäň bu dünýäni,

Lebabyň gözeli, Ärsary gyzy.

Gözleriň gülüp dur, mydam şadyýan,

Kirpikleň ok deýin, gaşlaryň keman,

Badam gabaklaryň bar mahy-taban,

Lebabyň gözeli, Ärsary gyzy.

Inçe bilden geçer, şamar saçlaryň,

Gül ysyn ýaýradar degre daşlaryň,

Pisse dodaklarňy dişlär dişleriň,

Lebabyň gözeli, Ärsary gyzy.

Assadan näz atyp, messan gezer sen,

Telbe bolan ýigitlere dözer sen,

Nazenin sen, şirin sözli gözel sen,

Lebabyň gözeli, Ärsary gyzy.

Görküň deýin gözel bolsun bagtyň:da,

Gözellikler duýulýandyr adyňda,

Kalbyňdaky bolsun mydam alnyňda,

Lebabyň gözeli, Ärsary gyzy.