awadan
07.05.2025 13:33
Bagtly ene durmuşynyň bir güni (hekaýa)
3-nji bölüm
Bi­bi ýö­ri­te süýt bi­şir­mek üçin ni­ýet­le­nen ki­çi oja­ga süýt ga­za­ny goý­dy, ga­za­ny ýuw­dy, tä­ze süý­di ga­za­na gu­ýup, oja­gyň aşa­gy­na ot ber­di. Kör­pe gy­zy Gö­ze­le bol­sa or­ta ýa­zy­lan sa­ça­gy ýyg­na­ma­gy bu­ýur­dy.

Ogul­na­bat ene ýe­le­ji­re­di­len äh­li otag­la­ry sy­ryp sü­pür­di. Soň­ra mal­lar üçin be­de eder ýa­ly og­ly Sa­par bi­len mel­lek­den ýo­run­ja or­du­lar. Oru­lan ot­la­ry mal ýa­ta­gy­nyň ýa­nyn­da bas­gy­la­nyp heň­le­mez ýa­ly gü­neş­li ho­wa­da ser­gin şe­ma­la se­riş­di­rip goý­du­lar. Ol iş­ler­den soň­ra Ogul­na­bat ene Bi­bi gy­zy­na kir ýuw­mak üçin ho­wuz­dan suw da­şap ber­me­gi bu­ýur­dy. Ene uly le­ge­ni dol­du­ryp du­ran ça­ga­la­ry­nyň eşik­le­ri­ni ýuw­ma­ga baş­la­dy, Bi­bi gy­zy ýuw­lan eşik­le­ri ýüp­den asyş­dy­ryp ser­mä­ge hem-de kir ýü­pün­de öň­ki se­ri­len eşik­le­riň gu­ran­la­ry­ny ýyg­naş­dyr­ma­ga kö­mek et­di.

Gün guş­luk­dan agan­soň, Ogul­na­bat ene gyz­la­ry bi­len düýn­ki ge­ti­ri­len po­mi­dor­dan ba­tyr­ma na­ha­ry­ny taý­ýar­la­ma­ga gi­riş­di­ler. Gü­nor­ta na­ha­ry ýe­tiş­ýän­çä, mal­la­ry­na, to­wuk­la­ry­na ot-suw ber­me­gi hem og­ly Sa­pa­ra tab­şyr­dy.


Enä­niň şol iş­läp ýör­şü­ne: «Bili­mi bir ýa­za­ýyn» di­ýip, çem ge­len ýer­de otur­ma­sy bol­maz­dy. Ol eý­wan­da düýn­ki My­rat og­lu­nyň ekin meý­da­nyn­dan ge­ti­ren po­mi­dor­la­ry­ny göz­den ge­çi­rip, has go­wy bi­şen­le­ri­ni, ýum­şag­rak­la­ry­ny saý­lap, ha­myr ja­ma ge­çi­rip goý­dy. Po­mi­dor­la­ry ýuw­mak üçin ho­wuz­dan iki-üç bed­re suw çek­di, po­mi­dor go­ýult­ma­gy­ny ýap­jak ban­ka­la­ry­ny ýu­wuş­dy­ryp taý­ýar­laş­dyr­dy, özi hem ça­ga­la­ry­nyň ýa­ny­na ge­çip, gü­nor­tan­ky uku­sy­na al­mak üçin bi­raz sa­lym gy­şar­dy.

Soň­ra öý­län guş­luk ça­ýy­ny iç­mek üçin çäý­ne­ge guş­dyr­nak gök ça­ýyn­dan dem­len­di. Or­ta ýa­zy­lan sa­ça­ga süý­ji-kö­ke bi­len tam­dyr çö­re­gi go­ýul­dy. Ça­ga­la­ry gü­nor­tan uku­syn­dan oýa­nyp, el-ýü­zü­ni ýuw­du­lar-da, sa­ça­gyň ba­şy­na ge­çip, öý­län­ki guş­luk ça­ýy­ny öz mäh­ri­ban ene­si bi­len iç­di­ler.

Ogul­na­bat ene sa­çak­da çö­rek­le­riň aza­lan­dy­gy­ny gör­di-de, tam­dy­ra çö­rek ýap­mak üçin eý­wan­da du­ran un hal­ta­dan ha­myr ja­my­na un al­dy. He­mi­şe­ki­le­ri ýa­ly, eý­wan­da ken­di­ri­gi ýa­zyp, un ele­mä­ge baş­la­dy. Og­ly Sa­pa­ra bol­sa mal­la­ryň otu­na-su­wu­na se­ret­me­gi, gyz­la­ry­na bol­sa po­mi­dor go­ýult­ma­gy üçin saý­la­nan po­mi­dor­la­ry dog­raş­dyr­ma­gy tab­şyr­dy. Ene ha­my­ry­nyň ýugrymy ma­za­ly ýe­ti­rip al­ýan­ça di­ýip, ba­sy­ryş­dy­ryp goý­dy.

Soň­ra uly ojak­da du­ran ga­pak bi­len ýa­pyl­gy ga­za­ny ýuw­dy. Gyz­la­ry­nyň dog­ran po­mi­dor­la­ry­ny bol­sa ga­za­na gu­ýup, oja­gyň aşa­gy­na ot ber­di hem-de gy­zy Bi­bä ga­za­nyň ýa­nyn­da bol­ma­gy, bi­şi­ri­len süýt­den bol­sa ga­tyk ba­syr­ma­gy tab­şyr­dy.

Dowamy bar ☘️
8
93
0
awadan
05.05.2025 09:32
Bagtly ene durmuşynyň bir güni (hekaýa)2-nji bölüm
Soň­ra ho­wu­zyň ýa­ny­na ba­ryp, çak­laň­ja ho­wuz bed­re­si­ni alyp suw çek­mä­ge dur­dy. Çe­ken suw­ly bed­re­si­ni sag eli­ne, onuň ýü­pü­ni bol­sa çep eli­ne alyp, oja­gyň ýa­ny­na gel­di. Oja­gyň üs­tün­de du­ran ga­za­na bed­re­den aza­jyk suw egis­di.

Ge­çen ýyl­ky pag­ta ýy­gy­myn­dan soň­ra ýyg­na­lan go­wa­ça çöp­le­rin­den oja­ga sa­lyp, bir bö­lek ka­gy­zy ýa­kyp, oja­gyň odu­ny tu­taş­dyr­dy. Go­wy ýa­nyp baş­lan oduň üs­tü­ne bol­sa, üzüm töň­ňe­si­niň iki-üç sa­ny­sy­ny at­dy. Ga­za­nyň düý­bün­dä­ki ýy­lan suw bi­len ga­za­ny ýu­wuş­dyr­dy. Ga­zan ýu­wan su­wu­ny bol­sa, sag eli­niň aýa­sy bi­len sy­ryş­dy­ryp, ga­zan­dan da­şy­na serp­di-de, ho­wuz bed­re­sin­dä­ki su­wy ga­za­na guý­dy. Ki­çi­räk çak­laň­ja ho­wuz bed­re­si bi­len üç ge­zek gat­nan­soň, ga­za­nyň su­wy do­la ýa­kyn bol­dy.

Mäh­ri­ban ene iş­läp ýör­şü­ne, in­di­ki ug­ru­ny mal ýa­tak­la­ry­na ta­rap gö­nük­dir­di. Ýa­ta­ga go­laý­lap gel­ýän enä­niň aýak se­si­niň çyg­şyl­dy­sy­ny du­ýan syg­ry hyň­ra­nyp, ça­la­ja mo­la­ýan ýa­ly ses et­di. Ogul­na­bat enä­niň Sa­kar­çä­ge et­ra­by­nyň «Çö­ňür» oba­syn­da ýa­şa­ýan er­kek do­ga­ny An­na aga­nyň be­ren bu ma­ly her ýy­ly­na sag­dyn gö­le ber­ýär­di. Özi hem süýt­li sy­gyr­dy. Ogul­na­bat ene syg­ry­na, onuň gö­le­si­ne, hu­ruş­lyk üçin sak­la­nyl­ýan tok­lu­la­ry­na ot dö­küş­dir­di. Mal­lar üçin iým sak­lan­ýan jaý­dan elin­dä­ki ja­my­na iým alyp, to­wuk­la­ry­ny hem iým­le­di.

Ol taň­ka­nyň gaý­nan su­wun­dan hem hum çäý­ne­ge çaý dem­le­di. Er­tir­lik üçin sa­çak ýa­zyp, ary ba­ly­ny, gar­pyz to­şa­by­ny, mes­ge, süýt we dü­ýe ýüň sa­ça­gy­na do­la­nan tam­dyr çö­re­gi­ni goý­dy.

Soň­ra işe ug­rat­mak üçin il­ki bi­len My­rat og­lu­ny oýar­dy. Uly og­ly daş çy­kyp, el-ýü­zü­ni ýu­wuş­dy­ryp sü­pü­rin­di-de, er­tir­lik çaý-çö­re­gi­ni edin­mä­ge otur­dy.

Bagt­ly maş­ga­la­nyň be­re­ket­li sa­ça­gy­nyň ba­şyn­da ene­li-ogul bo­lup, düýn­ki «Ýa­sy­de­pe» meý­da­nyn­dan ge­ti­ri­len po­mi­dor­lar ba­ra­da gür­rüň et­di­ler. Bi­raz soň­ra ola­ryň söh­bet­deş­li­gi­ne Mu­ham­met hem ge­lip go­şul­dy. Er­tir­lik edi­nen do­gan­lar öz kä­be­le­ri­ne sag bol­sun aý­dyp, ta­ga­myň ha­ky­na tö­wir oka­dy­lar hem-de iş­li-işi­ne ug­ra­dy­lar. Soň­ra sa­çak ba­şy­na do­gan­la­ryň beý­le­ki­le­ri hem üý­şüp er­tir­lik edin­di­ler. Ene ça­ga­la­ry­nyň ýor­gan-dü­şek­le­ri­ni ýyg­naş­dy­ryp, otag­la­ry şe­mal­lat­mak üçin pen­ji­re­le­ri açyş­dyr­dy.

Ogul­na­bat ene Sa­par og­lu­na çaý-çö­re­gi­ni iýip bo­la­nyn­dan soň­ra, syg­ry­ny pa­da goş­ma­gy ýat­lat­dy-da, eli­ne süýt bed­re­si­ni alyp, mal ýa­ta­gy­na ta­rap ug­ra­dy. Syg­ry­nyň gö­le­si­ni goý­be­rip iý­di­ren ba­dy­na, çe­kip aýyr­dy­da, ozal­ky­la­ry ýa­ly, «höw­lüm, höw­lüm» di­ýip, bed­re­sin­dä­ki aza­jyk suw bi­len syg­ry­nyň ýel­ni­niň em­zik­le­ri­ni ýu­wuş­dy­ryp, süýt sag­ma­ga dur­dy. Soň­ra syg­ry­ny pa­da ug­rat­mak üçin şa­hyn­dan daň­lan ýü­pü­ni çöz­di-de, ýa­tak­dan çy­kar­dy.

Dowamy bar ☘️
9
90
0
awadan
30.04.2025 11:17
Bagtly ene durmuşynyň bir güni (hekaýa) 1-nji bölüm
dy.

Kim­le­riň ga­py­syn­da at­lar kiş­ňe­ýär­di, kim­le­ri­niň­ki­de bol­sa it­ler üý­rüş­ýär­di.

Oba­ny suw­lan­dyr­ýan akar ýa­byň ýa­ka­syn­da ha­tar bo­lup otu­ran öý­le­riň bi­rin­den Ogul­na­bat ene how­la çyk­dy. Bu Gel­di aga­la­ryň bagt­ly maş­ga­la­sy­nyň öýü­di.

Ogul­na­bat ene bi­len Gel­di aga­nyň ag­zy­bir, bagt­ly maş­ga­la­syn­da uly og­ly Me­ret Wa­tan öňün­dä­ki gul­luk bor­ju­ny ýe­ri­ne ýe­ti­rip ýör­di, ikin­ji og­ly Ba­zar bol­sa paý­tagt­da ýo­ka­ry okuw mek­de­bi­niň ta­ly­by­dy, uly gy­zy Baý­ram­gö­ze­li bol­sa oba içi­ne dur­mu­şa çy­ka­ryp­dy­lar.

Ogul­na­bat ene ag­şam­lyk na­ha­ry­na gi­jä ga­lyp ge­len, daý­han bir­le­şi­giň gök-bak­ja­çy­lyk bö­lü­min­de iş­le­ýän My­rat og­lu­ny hem iý­di­rip-içi­rip, özü­niň he­mi­şe­ki dynç al­ýan ýe­ri­ne ge­çip gy­şar­dy. Ene dü­şe­gi­ne ge­çip, ho­ja­ly­gyň er­tir­ki ýe­ri­ne ýe­ti­ril­me­li hy­syr­dy­ly iş­le­ri ha­kyn­da pi­kir edip, uka git­di.

Oba­da uly maş­ga­la­da ho­ja­ly­gyň gün­de­ki gaý­ta­lan­ýan yzy­gi­der­li hy­syr­dy­ly iş­le­ri­ni wagt­ly-wag­tyn­da ýe­ri­ne ýe­tir­mek ýe­ňil-ýel­paý iş däl. Çün­ki oba dur­mu­şyn­da enä­niň bir gün­de ýe­ri­ne ýe­tir­ýän işi­ni, aý bo­ýun­ça ha­sap­la­saň, iň ýo­ka­ry aý­lyk zäh­met ha­kyn­dan pes bol­maz.

Ogul­na­bat enä­niň ha­çan ýa­typ, ha­çan tur­ýa­ny hem bel­li bol­maz­dy. Ol daň atyp, Gü­nüň şöh­le­si Ýer ýü­zü­ne öz nu­ru­ny paý­lan­dan soň, tä iň­rik ga­ra­lyp, Gün do­ly bat­ýan­ça, he­re­ket­de ge­zer­di. Ol bir gör­seň-ä, kir ýuw­ýan­dyr, bir gör­se­ňem ha­myr ýug­rup otu­ran­dyr ýa-da öz ba­la­la­ry­nyň ala­da­sy bi­len­dir.

To­mus pas­ly­nyň soň­ky aýy­nyň ikin­ji on­gün­lü­gi­di. Ogul­na­bat ene he­mi­şe­ki­le­ri ýa­ly, daň­dan sä­her bi­len oýan­dy. Maş­ga­la­syn­da ösüp gel­ýän ça­ga­la­ry­nyň ýa­tyş­la­ry­ny syn­lap dur­şu­na, öz per­zent­le­ri­ne sag­lyk, ag­zy­bir­lik, uzak ömür, go­wy adam­lar bo­lup ýe­tiş­mek­le­ri­ni hem-de ola­ra bagt­ly dur­mu­şy ar­zuw et­di.

Ogul­na­bat ene ag­şam­ky na­har­dan ga­lan-ga­çan­la­ry, süňk-saňk­la­ry, bi­raz ga­taň­sy çö­re­gi alyp öý­den daş çyk­dy. Işik­dä­ki tap­ça­ny, onuň aşa­gyn­da goý­lan pil­ler­dir orak­la­ry, ça­ga­la­ryň uç­ýan hiň­ňil­di­gi­ni hem-de ho­ja­ly­ga de­giş­li beý­le­ki äh­li zat­la­ryň ýer­be-ýer­di­gi­ni bi­rin-bi­rin göz­den ge­çir­di. Şol wag­tam mel­le­giň aýa­gu­jun­dan ke­si­len jon­nuk guý­ru­gy­ny bu­laý­laş­dy­ryp, Až­dar at­ly iti yl­gap gel­di. Ogul­na­bat ene it ýa­ta­gy­na ta­rap ýö­nel­di. Itiň ýa­la­gy­na elin­dä­ki ge­ti­ren çö­re­gi­ni, süňk­le­ri­ni at­dy. Až­dar bi­raz ga­tan tam­dyr çö­re­gi­ni lak-luk at­dy-da, ga­tyr­da­dyp süňk­le­ri ge­mir­mä­ge baş­la­dy.
Soň­ra ene tam­dyr bi­len ýa­na­şyk du­ran ojak­la­ryň kü­lü­ni aras­sa­la­dy. «It-pi­şik ýa­laý­ma­syn» di­ýip, düýn giç­lik düň­de­rip go­ýan ga­za­ny alyp, or­ta­ky oja­gyň üs­tü­ne goý­dy-da, ga­za­nyň ojak­da jaý­dar, gy­ra­deň otu­ry­şy­ny çe­pe-sa­ga ça­la­ja aý­laş­dy­ryp bar­la­dy.

Dowamy bar ☘️
9
145
0
awadan
22.04.2025 19:50
Dünýä şeýle guralan (hekaýa)2-nji sonky bölüm
Işannuruň bagtyna, öýleriniň golaýyna baranda, gum gögerçini pisint pasyrdap, Ogulla çykdy. Ýagdaýy eşiden gyz, özünde oňa bolan hiç hili duýgynyň ýokdugyna garamazdan, il-günüň, ýurduň halas bolmagynyň hatyrasyna dolanyp geljegi gümana bolan mert ýigidiň päk söýgüsiniň hormatyna başyndaky öýme ýaglygyny onuň münüp gelen bedewiniň — Garagünäniň boýnuna daňyp, şeýle sözleri gysganman aýtdy:
— Sag-aman gidip gel… Paryzdepe saňa garaşar…
Ol: «Men saňa garaşaryn» diýmän, şäheriň adyny tutdy. Onda-da bu söz — gyz sözi düşnüklidi. Indi ýigide ölüm ýokdy…
Ýigit gidişi ýaly kän eglenmän, mähelläniň arasyna dolanyp bardy. Garry seýis öz gardaşyny ýowuz ýola ugratmaly bolýanyna gynanyp, atynyň boýnuny gujaklady.
— Birinji okdan aman sypsaň, ikinji oka at ýetdirmez. Sag-aman giňlige çyksaň, düýe agynan urpajyk guma ýeteňde öwrüm etgin, halas bolanyňy bilerimiz ýaly. — Soňky sözüni ol pyşyrdap aýtdy: — Ata gamçy çalmagyn…
Mähelläniň bary gözara tarap eňdi. Birhaýukdan kiçijik tüweleý ýaly çalaja tozan dik asmana göterildi. Tozany görüp, indi niçeme günden bäri ýylgyrmak diýlen zat ýat bolan mähelläniň ýüzünde çalaja ýagtylyk göründi. Şol ýagtylyk paryzdepelileriň ýüzünden soň-soňlaram aýrylmady.
Ýow gaýtaryldy. Işannuram, bedew atam iline dolandy. Ýöne gyz sözünden dändi. «Paryzdepäniň aman galmagy üçin şeý diýmeli boldum» diýdi.
Bir gün Ogulla bilen Işannuruň arasynda şeýle gürrüň boldy:
— Öňräkden bäri seni gowy görüp ýörün…
Işannuruň sesi ysgynsyz çykdy.
— Bilýän, ýöne özümiň seni gowy görüp bilmeýänimem bilýän…
— Seniň üçin oda girdim…
— Ýürege giren bolsaň, has gowy bordy.
Şeýle günleriň birinde ýene bir şumluk ýaýrady: «Işannur obadan çykyp gidipdir. Özem, «Söýlüp ýaşalmadyk dünýede, ýaşamak nämä gerek» diýýämişin.
Işannuruň halyna gynansa-da, gyz öz ýüregine emr edip bilmedi. «Eger şol wagt men oňa ýyly söz bermedik bolsam, Paryzdepe heläk bolardy. Men oň aman-sag dolanmagy üçin, il-günüň sag-salamat bolmagy üçin öz ýüregimi aldap, şeý diýmeli boldum. Hak iş üçin ýalan sözläýseňem bor-a» diýip, ol öz göwni bilen jedele girdi.
«Sen söýgi hakda söz açdyň-a» — diýip, göwnem ýeň bermedi.
Ogulla sesini çykarmady. Göwni ýene hüjüme geçdi: «Sen özüňkini dogry edip, paryzdepelileriň ýüzüni ýere salmandygyňa ynamyň barmy?».
Ogulla-da ýeň bermedi: «Bar. Azajygam bolsa, ýürek gozganaýsa, ol däl-dä».
«Näme, ýürek gozganyp-gozganmaz ýaly, söýgem ylymdyr öýdýärmiň?! Ýaşaberseň, söýersiň».
Şol günden başlabam bujurygy çykan günleriň gapysy giňden açyldy. Entek beýle bir güýçli ýel bolup duranokdy, ýöne boljagy ikuçsuzdy. Şonuň üçinem Ogulla gündizlerine ertirki günüň näjüre boljagyny sähranyň ýüzüne seredip biljek bolýardy. Niçikmi, goýun-geçi pyşgyryp, burnuny arçaberse, onuň owadan gaşlary ünjüli çytylýardy. Bu janly tebigatyň üýtgejekdigini aýdýardy. Guşlar hatara düzülip, çöp-çalama münüberselerem, ol ýene kör keýplenýärdi. Bu görnüş harasadyň öňüsyrasyndaky alamatdy.
Gijelerine ol birsyhly Aýa seredýärdi. Aý agyllaberse, onuň ýüregine dowul düşmek bilen bolýardy. Sebäp Aý agyllasa, şemal kybla aýlanýardy. Kybladan öwüsýän şemal has gorkulydy, Ogullanyň ýüregi ýaly geçirimsizdi. Ol hiç bir zada eglişik etmän, öňünde duran zatlaryň baryny süpürip taşlaýardy. Harasat gopjak bolanda, ilki sähra saralyp, agyr dymýardy. Soňam aşyrym-aşyrym ýeller öwsüp başlaýardy. Gyz şeýle ýellerde öýüň jygyldysyna diň salýardy. Göwnüne gara ýel ony göterip, hol beýläk zyňyp goýberjek ýalydy. Öý ikibaka guduraýan ýeliň öňünde, süňňüni saklap bilmän titreýärdi, yranýardy, uklary ýerinden sypaýjak-sypaýjak bolup jygyldaýardy. Ýöne entek ýerindedi.
9
138
6
awadan
21.04.2025 19:20
Dünýä şeýle guralan (hekaýa)1-nji bölüm
Garry seýsiň sesi ysgynsyz eşidilse-de, düşnüklidi:

— At bir adamyny ýowdan alyp çykar, kimem bolsa biri halas bolmaly. Kim?

Bu söz duşman sütemindenem agyrdy. Onda-da çenini bilýän oguzlara. Haýsy oguz: «Sen gal, men gideýin» diýer. Ýöne halas bolmak üçinem «çüw, atym» diýip, atyň böwrüni debsiläp gidibermeli däldi. Sen bagta töwekgellik, onda-da uly töwekgelçilik edip, ajal bilen ýüzbe-ýüz bolmaly. Eger sen ony başarmasaň, dünýe bilen hoşlaşjak ýeke seniň gara başyň däl. Bütin Paryzdepäniň ykbaly saňa bagly. Hemmäni oýlandyrýan şoldy. Şonuň üçinem mähelle agyr dymýardy. Hatda doýagarna emmeden doýmadyk iňňäbäbegem ene gursagynyň gürsüldisine düşünýän ýaly aglanokdy. Ýöne garry seýis kimdir biriniň halas boljagyny gaty ynam bilen aýdýardy.

— Entejik oguz iline atam gerek bolar, seýsem… Bir adam halas bolmaly bolsa, goý, garry seýis başyny gutarsyn…

Bulutlary böwsen ýyldyrym ýaly bu güňlenç ses ýüzdenem gowrak ýaşan oguz gojasynyň sesidi. Böwet ýarylansoň, ýapaşakdan gaýdylan ýaly boldy.

— Garry seýsiň agtygy mirasdüşer azat bolsun!

— Ýok, ýaş Melike ata atlansyn!

Garry seýsiň goluny götermegi bilen gowurdy peseldi. Ol bir zatlar diýjek bolup, dodaklaryny müňküldetdi. Soňam agzyndan şeýle sözleri çykardy:

— Ertirki gün hakykaty ýazar ýaly, mollaçyr ýigitleriň biri ata atlansyn…

Paryzdepede eline galam alýan ýetikdi. Şonuň üçinem şolaryň biri «Men hatdat» diýip orta çykar öýdüldi. Ýöne çykan bolmady. Garry seýis sözüni üçünji ýola gaýtalady. Entegem mähelläniň tolgunyp durşudy. Bu has erbedi boldy. Sebäp duranlaryň ýüzi birmeňzeş bolmasa-da, hesretleri birdi. Adamlar hataly ýaly, ýüzlerini has aşak sallady.

Garry seýis ýene bir zatlar diýjek bolanda, mähelläni itenekleşdirip, hortap ýigit orta çykdy. Onuň ýüzi uzakdaky sähra ýaly sargyltdy. Öte horugandanmy ýa bolşumy, hereketem gowuşgynsyzdy. Ýöne çaganyňky ýaly aýdyň gözleriniň gyrasynda saklanyp galan gamgynlyk, oňa bolan garaýşy — nebsagyrma ýaly bir zady oýarýardy. Ol dünýeden hiç zat hantama bolman, öz arzuwy bilen ýaşap ýören Işannurdy. Käte onuň goşgy beýlekem goşaýmasy bardy. Adamlar onuň goşgularyny hernä gamgyn pursatlary ýatlardylar. Soňam agyr dymşyp: «Şuň goşgusyny diňleseň, Hudaýyň ýanyna barýan ýaly bolýaň…» diýerdiler. Onuň goşgulary uly dünýä ýüzlenip aýdylýan setirlerdi. Işannur sözi şundan başlady:
— Men hatdat däl, bükülen barmaklarymam, gaty gyssamasalar, zordan sanaýan. Sowat meň ýaly pukara oglan götärden agyrrak telpek… Eger il-ulus unasa, şo ýumşa synanyp göreýin.

Elbetde, ýigidiň howply ýola gadam urmagy hormata mynasypdy. Ýöne söýginiň öz ýoly bardy. Wadanyň, gyz sözüniň göni gelen terki ajaly saklaýanlygy barada eşidipdim. Işannuram şonuň üçin bu dünýede ýaşamagyň, azajygam bolsa, ýeňilräk bolmagy üçin, ýene-de ýaşasynyň gelýänligi üçin şeýdendir. Belki-de, ýyly söz eşitse, dünýeden gitmegem özüne beýle bir agyr bolmazlygy üçin şeýdendir. Ýigit ýumşy bitirmäge ugramazdan öň mähelleden biraz puryja diledi. Her näçe kyn görselerem, halaýyk onuň diýenini kabul etmeli boldy. Şeýdip, agyr ýoluň ýolagçysy arzymanynyň ýanyna ugrady.

Dowamy bar ☘️
12
177
0
awadan
18.04.2025 16:09
Ýar sowgady (hekaýa)2-nji bölüm
Ol gyzyň maşgalasy ak öý ýasamak, torba-çuwal, haly-palas dokamak bilen meşgul bolýardy. Hut şonuň üçinem ol howla köpleriň işleri düşüp durýardy. Amanam olara bäş-alty gezek baryp gördi. Ol tanyşlaryndan ýa-da garyndaşlaryndan biriniň şol howla işiniň düşenini bildigi, kömek bahanasy bilen, oňarsa olara goşulyşyp giderdi. Ilkinji gezek şeýle haýyş bilen ýüz tutanlarynda, kyn görenem bolsa, ol öýdäki gyza gözi düşen pursatyndan soň ähli zat üýtgäpdi. Ine, şeýle saparlaryň şowly geçenlerinde-de Aman ol gyz bilen salamlaşyp ýa-da iki agyz söz atyşyp galardy.

Ýüreklerde yşk ody tutaşanda, diliň sözlemegine zerurlyk barmy näme?! Amanam ol gyza söýgi bildirip ýeke agyz söz aýtmasa-da, arada bir ataşyň tutaşandygyndan ýürekleriň ikisi-de habarlydy. Hatda soňky wagtlar bu ýagdaýy gyzyň ýeňňesi, Amanyň daşgynrak garyndaşy Ogulsadabam aňyp ýördi. Juwanlara guwanç bilen bakýan gelin bir gün onuň «janyny barlap görmek» maksady bilen bu barada sözem açdy. Ýigidiň hiç bir zady inkär etmän, çala ýylgyryp oňmagy bilenem ol köňlünde dörän gümany öz ýanyndan berkitdi goýberdi. Aman arzymanynyň adynyň Aýnadygynam şondan soň iň ýakyn hossaryna öwrülen garyndaşyndan — ol gyzyň ýeňňesinden eşidipdi.

Daýylarynyňka tarap barýan ýigidiň serinden dürli pikir gelip geçýärdi: «Ejem edil şu wagt daýymlary ýadyna saldy welin, ýa Aýnaly gürrüňden habarly bolup ýörmükä? Ogulsadap daýzam aýdaýdymyka ýa oňa?».

Oglan howlularynyň deňinden geçip barýarka, Aýna gelnejesi bilen ak öýüň gamşyny dokap durdy. Gyzyň işden ünsüniň sowlup, säginenini görüp, bir üýtgeşikligi aňan ýeňňesi köçe tarapa seredende, Amana gözi düşüp, çalaja ýylgyrdy.

Tutuş obanyň gürrüňi şol bolar-da, pälwan ýigidiň yzly-yzyna iki ýola uçran şowsuzlygy Aýna gyza ýetmezmi?! Esasanam, ol Amanyň sussunyň basylyp, göreşden tutuşlaýyn ýüz öwrüp ýörendigini eşidende, öz ýanyndan oňa garaçyny bilen duýgudaşlyk edipdi. Nähilidir bir ýol bilen ony goldasy gelipdi. Ýöne nädip?

Baldyzynyň ýüregini okamagy soňky wagtlar mazaly öwrenen Ogulsadap ahyrsoňy onuň diliniň daňysyny çözdürdi. Gyz ýüregini açdy. Şeýdibem olar öz ýanlaryndan maslahat biçdiler.

Daýysynyňkydan gaýdyp gelende öýlerinde Ogulsadap gelniň bardygyny gören Aman haýran galdy. Ogulsadap aýak üstünden sowlansyran bolsa-da, habarlyja gelendigini üm bilen mälim etdi. Ol Amana owadan gülli elýaglygy uzatdy.

— Kimdendigin-ä aýdybam oturjak däl. Ýörite iberdi. «Göreşe çykanda ýanynda bolsun» diýdi.

Oglan şondan soňky günleriň nädip geçýänini-de duýanokdy. Onuň bar pikiri çaltrak toý bolup, göreşe çykmak baradady. Şonuň üçinem ol çynlakaý taýýarlyk görüp başlady.

Goňşy obadaky Araz çopanyň toýunda Amanyňam göreş tutjakdygy baradaky habary her kim bir hili kabul etdi. Kimler onuň ýeňjegine ynansa, Amandan baýrak tama etmeýänlerem az däldi…

…Aman pälwan göreşe çykmazdan öň jübüsine elini sokdy. Ak gyzyň ak arzuw, päk niýet, gyzgyn söýgi bilen beren elýaglygyna eli degip, güýjüne güýç goşulan ýigit ynamly ädimler bilen orta çykdy. Ýar sowgadyndan süňňüne ornaýan täsin güýç Amanda üýtgeşik, düşündirip bolmajak täsir döredýärdi. Onuň çäksiz ynamdan doly, ýanyp duran gözlerine gözi düşen garşydaşynda nähilidir bir gowşaklyk emele gelen ýaly boldy. Aman bu bolşa hiç düşünmän duran garşydaşynyň guşagyndan mäkäm tutdy-da, bilini üzülere getirip, şatyrdadyp özüne çekdi.

Dowamy bar ☘️
8
111
1
awadan
17.04.2025 22:40
Ýar sowgady 1- nji bölüm (hekaýa)
Aman bu günem ýykyldy. Ony öz deňemigi, Akýaýladan gelen pälwan ýigit ýykdy. Hernä göreş meýdany ýumşaksy bolansoň, kelemenläp, juda batly gaýtsa-da, Amanyň zeper ýeten ýeri bolmady. Ýykan pälwan ýigidiň daşyny bile gelen ýoldaşlary alyp duransoň, onuň golundan çekenem bolmady. Özi turdy, özi gaýtdy. Ol diňe köpçüligiň içinden bir ýaşulynyň: «Ýykylan göreşden doýmaz» diýipdirler, belki, indiki toýlarda ýykarsyň, ruhdan düşme» diýen göwünlik beriji sözlerini eşidip galdy.

Aman ýeke özi pikire çümüp ýatyşyna, düýnki toýda ýykylyşyny ýatlady. Ony ýene-de der basdy, howpurgatdy. Ol ýatakdaky goçlaryň birini tutagada, boýnuna hopba edip, howlynyň içinde aýakýalaň o ýan, bu ýan ylgady. Endam jany suw-sil boldy, ýumşady. Diňe şondan soň az-kem göwni göterildi.

Şeýdip aradan birnäçe gün geçdi. Birneme ýeňlişiň yzasy aýrylyşdy. Şol günleriň birinde-de goňşy obada — Goşaderekde toý bolýandygy, uludan göreş tutuljakdygy baradaky habar gulagyna degdi. Habary eşidendenem, sähel ikirjiňlenmän, göreşe taýýarlanmagy ýüregine düwdi.

Bu gezek Aman täzelikde esgerlikden gelen pälwan ýigit bilen billeşmeli boldy. Emin olary köpçülige tanyş edensoň, göreş başlandy. Iki pälwanam bir-birine emel baryny urdular. Bisabyrraklar olary: «Göreşip bilmeýän bolsaň, orta bir çykmaly däl-ä», «Ýykylmakdan gorkup, emel ulanybilmän durjak bolsaň, bärde işiň ýok» diýen ýaly gyjytly sözler bilen gyssamaga başladylar.

Näme üçindir Aman ol sözleri hut özüne aýdylýan ýaly duýdy. Ünsi sowuldy. Esasanam, soňky sözler degnasyna degip, ses çykan tarapa seretdi. Edil şol wagtam, ünsüniň sowlanyndan peýdalanan garşydaşy ony şeýle bir pyrlap goýberdi welin, Aman garşylyklaýyn emel ulanmaga-da ýetişmedi. Birhili, töwerek-daş pyrlandy-pyrlandy-da, Aman ýagyrnysyny ýere berdi ýatyberdi.

Nobatdaky bişowlugyň täsiri hiç bir zat bilen deňär ýaly bolmady. Ol indi özüne pälwan diýip ýüzlenmeklerini üstünden gülmek diýip hasap etdi. Hakykatda welin, her kim oňa duýgudaşlyk bilen seredýärdi. Şonuň bilen bir wagtda-da obadaşlary ondan entek-entek uly-uly ýeňişler hantamadylar.

Oglunyň halys ruhdan düşüp barşyna ýüregi ezilen ejesi bir gün halys jandurmazlyk edip oňa ýüzlendi:

— Balam, pälwan ýigide beýdip ýörmek aýyp bor! Pälwanlyk diňe ýeňiş däldir. Mertligem diňe ýeňiş bilen däl-de, ýeňlişi kabul etmegi başarmak bilenem kesgitlenýändir. Göreşdir bi, oglum. Edil durmuşdaky ýaly, şowly ýerem bolar, şowsuz ýerem. Onsoňam, entek seniň tejribäň ýetik däl-ä. Kakaňam pälwan adyny alyp, ýagyrnysy ýere degmez derejä ýetýänçä, kän şaty görendir. Ine, örüden gelse, özem gürrüň berer saňa. Beýdip oturyşyňy görse, ol halamaz. Şonuň üçinem öýden çyk, gezim et.

Aman ejesiniň aýdanlaryny sesini çykarman diňläp oturdy. Ejesi bir zat ýadyna düşen ýaly oňa seretdi.

— Aman jan, daýyňlara-da gidip gelmelidi welin… Şoňa özüň gidäýseň-ä gowy bordy — diýip, sakyndy. — Ýagdaýym ýok diýseňem, özüm gidäýmesem…

Her näçe islemese-de, Aman daýylaryna gitmäge boýun boldy. Munuň özüne ýetesi sebäbi-de bardy. Onuň sebäbi obanyň günorta çetinde ýaşaýan daýylarynyň öýleriniň golaýyndaky beýik çarbagly howludy. Has dogrusy, şol howluda ýaşaýan uzyn boýly, inçe billi, suraýy owadan gyzdy. Birki ýola salamlaşyp, şonçarak gezegem çalarak gürleşip görenini hasaba almasaň, Amanyň ol gyza dahylly ýeri ýokdy diýseňem boljak. Ýöne ýürege o zatlary düşündirip bolýamy?

Dowamy bar ☘️
7
150
2
awadan
15.04.2025 14:05
Hekaya - Gyz jigi 6- nji bölüm
- Jaý üçin pul tölemeli dälmidiň?
- Tölemeli. Ynha, berjek diýip, eýesini aldap ýörün. Pulsyzlygymy bileli bäri oňam niýeti gowy däl. Özem azar berýär sen oňly gyz däl diýip. Aý, bir oňatja kwartira tapsam, o taýdanam gaýdaryn-la...
Häzir ýüzünde-gözünde gussa diýlen zadyň jinnek ýaly-da alamatlary bolmadyk Seýýaranyň betbagytlygyna Allagyň agysy tutdy.
- Eger kwartira gerek bolsa men, ine, ertiriň özünde tapyp beräýerin – diýip, ol ejiz adamyň gününe rehimi inýän kişi hökmünde aýtdy. Aýtdy-da, tapyp beräý diýen sözleri eşitmek umydy bilen Seýýaranyň gözlerine seretdi. Elbetde, edil şol wagt Seýýara-da oňa seredip durdy. Gyzyň gözlerinde Allagyň ilki gören zady namutlyk boldy. Soň özüne meňzeşlik gördi. Göwnüne bolmasa, onuň gözleri-de, burny-da Allagyňka çalymdaşdy. Hut şo pursatdan başlabam bu gyz Allagyň gözüne onuň mundan on ýedi ýyl çemesi ozal ykbalyň emri bilen näbelli ýerlere düşmeli bolan ganybir uýasy Senem bolup görnüp ugrady. Ykbal, belki, Allak bilen Senemi şu gün şu ýerde ýüzbe-ýüz bolmaga emr edendir. Hiç kes şuňa heňe gelmejek zat diýip bilmez!
Allagyň içki howsalasy artdy. Ol ýere bakyp, ýaňky aýdanlarynyň tersine gürledi:
- Aý, ýok, men-ä kwartira tapybilmen... Meň başga-da işim kän-ä. Sen meni bagyşla! Özüň bilýäň, okuw döwri hemme zada ýetmek kyn bolýar. Boş kwartira kändir-le. Çynyňy edip bir günjük gözleseň tapdyrar...
Seýýaranyň ýüz keşbi üýtgedi. Ol Allagyň göni bäbenegine bakdy-da, gatyrganyp:
- Bolşuň nähil-ä? – diýdi. – Kim saňa şu wagt kwartira tapyp ber diýýä?
Şu sözleri diýip, gyz, megerem, nähek ynjydylandygyny hereketlerinde-de mälim etmek maksady bilen kesä bakdy.
Allak galpyldady.
- Sen maňa dogry düşün! Men okuw döwri dert-alada köp diýjek bolýan. Mydama ýetişiksiz gara günde... Häzirem bir ýere gitmeli-dä... Men gidäýeýin! Bolýamy?
Gyz oňa adatdan daşary geňgalyjylyk bilen seretdi.
Allak jalbarynyň jübesine el urup, ondan esli ownuk pul çykardy. Olary Seýýaranyň eline tutdyrdy-da, şeý diýdi:
- Me, al şulary!
Seýýara äm-säm halda:
- Bi näme? – diýdi.
- Al! Ýygna! Gerek bor... Ýöne sen menden gaty görme! Bolýamy? Men indi gelmen. Ýaňam aýtdym-a, meň ýaman işim kän... Başga zat üçindir öýdäýme! Işim kän. Ýetişibilemok... Gaty göreňok dämi? Men onda gidäýjek.
- Düşünmedim? Nirä gitjek? Nämüçin gitjek? Ýa men bir zat diýip, göwnüňe degdimmi? Hä? Nämüçin?.. Düşündirip git! – diýip, gyz eňredi.
Howanyň çigrekligine garamazdan, Allak derledi. Çyny bilen burçak-burçak derledi. Ol maňlaýynyň derini eli bilen sylyp:
- Ýok, göwnüme degeňok. Oň üçin däl – diýdi.
- Onda nämüçin?
- Aýtdym-a işim kän diýip... Bolýa onda, sag bol! Men gitdim. Menden gaty görme! Bolýa?
Jogaba derek gyz diňe baş atdy. Şundan soň Allak sapandan sypan ýaly boldy. Çalt-çalt ýöräp, gaýralygyna tutdyrdy. Hol aňryk baransoň, hyrra öwrülip, yzyna seretdi-de, taýak atym daşlykda henizem sarsman duran gyza tarap gaýtdy. Onçakly golaýa-da gelmän:
- Meň penjegimi bersene! – diýip, boýnuny burdy.

Awtory - Kakamyrat Atayew
9
141
3
awadan
14.04.2025 10:52
Hekaya - Gyz jigi 5-nji bölüm
- Şonda aldadym. Men detdomskiý.
Dünýäniň güýze gaplanandygy häzir diňe çyplaň adama bildirjekdi. Allak çal penjegini gyzyň egnine atdy. Ol şuş-şu wagt gyza sorag äheňinde näme-de bolsa, bir zat diýmelidigine düşündi. Näme sorajagyny welin bilip bilmedi.
- O ýere nedip düşenimi özümem bilemok – diýip, Seýýara aýtdy.
- Nirä?
- Şo ýere, detdoma... nädip düşenimi bilemok. Gaty kiçi ekenim. Detdomam kän bir göz öňüme gelenok. O ýerden meni ýeke ýaşaýan bir aýal alypdyr. Hiç kimi ýok ekeni. Hossarsyz bir zat. Özem ýaman baý. Puly ýere-göge syganok. Ýöne gysyk. Puluny o dünýä alyp gitjek ýaly, şo-ol aňyrsyna basyp ýatyr. Özem öň, ynanmarsyň, iki gezek äre barypdyr. Ikisi bilenem kän ýaşaşmandyr. Aýrylyşypdyr. Aýrylyşmandyram-da, masgara bolup kowlupdyr. Oňam sebabi çagasy bolanok ekeni. Hudaý uran heleý-dä. Özüň bilýäň-ä, çagaň bolmasa...
Allagy ähli zatdan beter Seýýaranyň geçmişi gyzyklandyrýardy.
- On ýedi ýaşaýançam şoň elinde boldum – diýip, Seýýara Allagy gyzyklandyrýan gürrüňe geçdi. – Ýöne o heleý ýaman erbet ekeni. Göwnüne ýakmaýan bir iş etseň, bir urýa, bir urýa, Hudaý saklawersin. Ony-muny almak üçin pul sorasaňam urýar. Özem bir dili hapa, iki gulakly eşider ýaly däl. Maňa eje diýeňok diýibem urýardy-da, ynansaň. Onsoň bir gün gaçdym.
- Kim bilen?
Seýýara gülüp:
- Şol aýalyň öýünden gaçdym diýýän – diýdi.
- Onsoň?
- Onsoň kwartirant bolup ýaşap başladym. Jaýyň eýesi ýaş oglan ekeni. Aýaly, çagalary bar. Özem maşynly-zatly. Onam aldadym. Uçilişede okaýan diýdim. Özümem uzakly gün şäherde kaňkap ýörýärdim.
- Puly nireden tapýardyň?
- Ol aýalyňkydan gaçyp gaýdamda ähli puluny alyp gaýtdym-a.
- Onsoň?
- Onsoň şeýdip gezip ýördim. Bir günem pulum gutardy. Aç ölmejek bolsaň bir zat etmeli-dä. Gymmatbaha köýneklem bardy. Hemmesini satyşdyrdym. Ýene pulum gutardy. Onsoň köwüş magazine girdim-de, gyzlaň gymmatbaha köwüşleriniň birini ogurlap goýberdim. Bazara çykarybam satdym. Ýöne sowup ýörseň, pul diýeniň derrew gutarýar-a. Ýene şo magazine bardym. Ýene şo köwüşden birini aldym. Magazinden çykyp barýarkamam tutuldym. Magazinçi seredip duran ekeni-dä. Her zadam bolsa, şo gezek magaziniň içinde kän adam ýokdy. Ýogsam dagyn, masgara...
- Magazinçi hiç zadam diýmedimi onsoň?
- Diýmezmi?! Magazini içinden ýapdy-da, içki jaýyna saldy. Menem bir gorkýan, bir gorkýan. “Jan agam, näme etseň et, ýöne urma” diýip ýalbarýan. Hem aglaýan. “Şu gezek zat degme, indi gaýtalaman” diýýän. Ýaman doňýürek ekeni...
- Ýaş oglanmydy ol?
- Aý gaty bir ýaşam däl.
- Onsoň?
Gyz utanjyrady. Az salym dymansoň, ýarym pyşyrdy bilen:
- Zorlady – diýdi. Şonda Seýýaranyň sojaýandygy duýuldy. Ol başardygyndan özüni dürsäp, dowam etdi.
- Ogurlan köwşümem elime tutdyrdy-da, çümmükläp, hapa-hapa sögdi. Soňam kowup goýberdi. “Şu töwereklerde göräýsem hamyňy sypyryn” diýdi...
Allak gyzyň egninden tutup, gujaklady-da, ony köşeşdirmek niýeti bilen:
- Ol aýal soň seni gözlemändirmi? – diýdi.
- Gözlemezmi? Gözläpdir. Milisýä aýdypdyr. Bir gezek ýitenleň syraty asylýan tagtada öz suratymy gözüm bilen gördüm. Boýumyň näçedigini özüm bilemok welin, şolar bilýän ekeni. Suratymyň aşagynda boýy 165 cm diýip ýazypdyrlar.
- Onsoň?
- Onsoň şeýdip ýaşap ýörün. Bir köpügem pulum ýok. Oňa-muňa iş sorap bardym. Käsinde iş ýok. Iş bolan ýerde-de dokument soraýarlar. Mekdepleň birinde pol süpürijilik işi bar ekeni. Dokumentem soranoklar. Ýöne direktory haramzada ekeni.
- Hä, näme diýýär?
- Dokumentsizem bolsaň, işe alaýyn diýýä. Ýöne diýýä, men näme diýsem etmeli borsuň diýýä. Niýeti gowy däl-dä. Aňyrrakda sür diýdim. Ýogsam, tekiz pulum ýok.

Dowamy bar ☘️
9
117
0
awadan
13.04.2025 16:08
Hekaya - Gyz jigi 5-nji bölüm
Ejesi bes etmändir. Tirsegi bilen äriniň böwrüne hürsekläp:
- Bar, git-de, şo söýgüliň ýanynda ýat! – diýipdir.
- Men saňa näme diýdim? Ä?.. Nä ikilenç gaýtalatjak bolýaň? Hä? – diýip, kakasy böküp ýerinden turupdyr.
Ejesi:
- Herrelme! Sesiňi bat beren bolup, adam gorkuzaryn öýtme! Men hakykaty aýdýan. Ýalanmy eýse? – diýip, goýar ýerde goýmandyr.
Şeýle bolansoň, kakasy:
- Hakykaty men aýdyp bereýinmi saňa? – diýip, eline agyr esger kemerini alypdyr.
Allak bilen onuň uýasy Senem aglaşypdyrlar.
Ertesi daň atandan ejesi bilen kakasy itiň içegesi ýaly, täze bir uzyndan bulaşyk dawanyň hersi bir ujundan tutupdyrlar. Tutupdyrlar-da, onuňam çözgüdini çagalaryň hem goşlaryň paýlaşygyndan gözläpdirler. Üleşik olaryň hersini bir ýere zyňypdyr. Senem ejesi bilen şäherde ýaşap başlapdyr. Allak bolsa obada – kakasynyň ýanynda galypdyr.
Soň, bir sähetli gün kakasy Allaga ýüregi sahawatdan hem mähirden eýlenen oňat eje tapyp beripdir. O-da Allaga üç sany jigi dogrup beripdir. Täze jigileriniň ikisi gyzjagaz bolup, olar Allaga meňzäpdirler üçünjisi bolsa oglanjyk bolup, ol Allagyň täze ejesine çekipdir. Şeýdip, ýagşy-ýaman işleriň ençemesi Allagyň gözüniň alnynda bolup geçiberipdir.
Şonuň ýaly ýagşy-ýaman işleriň ençemesine Senemem şaýat bolupdyr. Uzyn-uzyn günleriň birinde ejesi oňa täze kaka tapyp bermekçi bolupdyr. Emma kaka boljak tarap il içinde “Öňki ärinden galan çagasy” diýen gepiň bardygyny, ýaman ýeri-de, şol gepiň kän bir halanyp barylmaýandygyny, eger Senemjik bolmadyk bolanlygynda onda bu meselede hiç hili ikirjiňlenmäniň bolup bilmejekdigini aýdyp, närazylyk bildiripdir. Senemiň ejesi bolsa, heniz başynyň ýaşdygyny, görjeginiň öňdedigini, gül ömrüni dul geçirip bilmejekdigini, şeýdäýmese, dagy başga alajynyň ýokdugyny, onsoňam çaga diýlen zadyň täze ärindenem bolmak mümkinçiliginiň bardygyny, şol sebäpli-de, näçe eý görýänem bolsa, gyzjagazynyň bu ýerde päsgelçiliginiň güýçlidigini kişiň ýanynda aýtmasa-da, öz ýanyndan ýürejigi bilen boýun alypdyr. Garasaý, kaka boljak tarapyň närazylygy Senemi çagalar öýüne eltip taşlapdyr.
A Allagyň kakasy bu zatlary mahaly bilen bilmändir. Wagtynda bilenligindemi? Onda onuň Sneme hut özüiniň täzeden kaka çykjakdygyna kim şübhe edip biler?! Seneme welin gaty basym eýe tapylypdyr. Dünýeden zürýatsyz ötüp gitmeli bir bende ony gyzlyga alypdyr. Şeýdibem Allagyň kakasy hyrçyny dişläp galypdyr. Ynha, indi näçe ýyldyr, bu töwereklerde henize-bu güne çenli Senemden habar bilýän ýok. Galanynam wagt görkezer-ä diýýä adamlar. Kim bilýä-dä?
O mahallar Allak dördüni dolduryp, ýaňy bäş ýaşyna giden ekeni. Senemem onuň bilen basdaş. “Adyň näme?” diýlen soraga “Şenem” diýip, jogap berip bilipdir. Ýöne Allagyň özi-hä bu zatlary bilenok. Diňe eşitmiş.
Seýýara sözünde durdy.
- Gelmersiň öýtdüm welin, gelýädiň-aý – diýip, Allak aňyrdan seýkin basyp, ýetip gelen gyza garap, dylym-dylym etdi. Onsoň ýuwaşlyk bilen ýöräp ugradylar. Nobatdaky çatrykdan saga sowlup, esli ýöränlerinden soň Seýýara:
- Allak! – diýdi.
- Näme?
- Allak, saňa bir zat aýdaýynmy?
- Aýt!
- Gaty görmezmiň?
Allak geňirgenip:
- Nämäni? – diýdi.
- Aýtjak zadymy?
- Hm, hany, entek bir aýt, göreli. Gaty görüp, näme...
Seýýara ýaýdandy.
- Aýt-da indi, adamlary serim-sal edip goýma-da – diýip, Allak gyssady.
Seýýara aýdyp goýberdi:
- Düýn men seni aldadym.
- O nähili?
- Aldadym-da.
Allak böwrüne doňuz diňini saldy.
- Näme diýip?
- Düýn bar-a?
- Hawa?
- Men bar-a?
- Hawa?
- Biriniň ýeke gyzy diýdim – ä?
- Hawa?

Dowamy bar ☘️
8
84
0
Yene yükle