Paradise
27.03.2022 14:21
SÖÝMÄGE BAHANA ARAÑ!
Söýmäge bahana araň!
Bize ýaşaýyş dek söýmek derwaýys.
Adamlaryň göwnümize ýaraýşyn.
Gybatlara, duýgulara bermän üns.
Peslerdenem gowulyga garaşyň.
Ýagmyrlary ýeriň bagty hasaplaň,
Zeminiň gaýmagy saýyň dumany.
Gussasyn, şatlygyn gursaga gaplaň,
Söýüň hatda hasraty kän zamany.
Söýüň eneleri, nesillerini,
Ol nur çarýarlar, ýaşaýşa many.
Nesiller dünýäni özgerdip ýörler,
Enelermiz dogurýarlar dünýäni.
Söýgi adasyna öwrüň Ýer şaryn.
Söýgi bilen böwsüň tümi, doňagy.
Söýgüden utanyp, unutsyn kärin,
Ýigriminji asryň Garaçomagy.
Söýmäge bahana araň!
Bir bolar-bolgusyz tow düşse ara.
Çözsün düwni köneleriň ündewi.
Biz birek-birege näbelet däl-ä
Hemmämiz şu dünýeli.
Gurbandurdy ORAZOW.
52
112
4
Paradise
22.03.2022 19:20
Iki müň on sekiz köneje bina, Üýtgeşik tötänlik duşyrdy bizi. Bir-biregiň gözlerinde jemlendi, Bizi saklap duran dünýäniň ýüzi. Baharyň bir güni jaň etdi maňa, Oýun-oýun bilen tanyşan boldyk. Şeýdip
65
229
14
Paradise
11.03.2022 01:05
ÝÜREGE ÝÜZLENME
Menzilimiz — ynam, umyt, bakylyk,
Ýeň bermek bolmaýar, ýetmeli pellä.
Çünki ak ertirler berdi çakylyk,
Sagymyz, solumyz, ýolumyz del däl.
Duşýan şowsuzlyklaň bereli merkin,
Ýolumyzdan ürküzmesin zenzele.
Gowşama, ýüregim, gowşatma erkiň,
Biz ir-u-giç ýeteris şol menzile.
Haýyrdan, zyýandan paýymyz ýetik,
Şujagaz ömürem köp zat öwretdi.
Täze ýara alyp, könämiz bitip,
Durmuş bizi ýara bilen höwür etdi.
Ýat boldy ýakynlar, dost boldy ýatlar,
Kösenip öwrendik ýaşamagy biz.
Ykbaly ýyladýar gursagy otlar,
Gursagy köz edip ýaşamaly biz.
Söýgi bilen gazanylýar bakylyk,
Ýöne olam mümkin diňe seň bile.
Şonuň üçin düzüw Päli şa kylyp,
Gel, howlukman, ýeteli şol menzile
46
35
0
Paradise
10.03.2022 00:44
Eý, hiç mahal hasyl bolmajak hyýal,
Niçik dözüp bilýäň sen meni gama!
- Biziň aramyzda söýgi mümkin däl,
Dost bolup galaly…-diýýärsiň maňa.
Diýýärsiň:-bu bolşuň geňlärler iller,
Diýýärsiň:-birneme rahatlan, köşeş!
Silmi ol, gaýadan gaýdanda siller,
Gara daglar bilen gurmasa söweş!
Silmi, derelere urunup her ýan,
Hana tapmasa ýa ýitip gitmese?!
Eýsem, söýgümi ol
Salymyn bermän
Bagtyna ýa hasratyna ýetmese?!
-Men saňa dost bolup bilerin diňe-
Diýýäň:-haýyş- sen hem şu ýagdaýda gal!
Ezizim, açygyny aýdaýyn saňa,
Biziň aramyzda dostluk mümkin däl!
Nämä gerek bir-biregi aldamak,
Nämä derkar bize sözlemek ýalan!
Sen maňa dost bolup seretseň her çak,
Men bakaryn aşyk gözlerim bilen!
Ynjasaň-da, begenseň-de näler sen,
Bu duýgy-baýlygym, alyp giderin.
…Sen meni ýigrenip garrap galarsyň,
A men seni söýup ölüp giderin!
Tirkeş Sadykow.
51
61
6
Paradise
08.03.2022 20:45
EJE
Eje, sen hakynda şygyr döretsem,
Mähriň setirlerme sygmajak ýaly.
Mähir bilen bir ýylgyryp seretseň,
Daglaryň garlary erejek ýaly.
Şygyr dünýäsine gadam basmagma,
Seniň söýgiň egsilmez güýç berendir.
Çagajykkam aýdyp beren hüwdüleň,
Ylham bolup ýüregime siňendir.
Kitabyň üstünde goýup başymy,
Uklap galan çagym käte gijeler.
Eje, başym sypap, örtüp üstümi,
Çyrany öçürip gidýäň nijeler?
Arzuwçyl gyzyň men, bilýäň ahyry,
Arzuwma ýeterin, senem ynanyaň.
Çagalyk müçesin geçenem bolsam,
Aýazbaba ynanşym deý ynanýan.
Çäksiz yhlas berýän öwütleriňden,
Nusga alyp hyzmat etsem Watana.
«Tüweleme, özüň ýaly yhlasly»
Jümleleri getirerin adyňa.
Ömrüň uzak bolsun, görjegiň gowy,
Maňa bu barlygy peşgeş berenim.
Perzentlik borjumy ödemek üçin
Ömrümboýy hyzmatyňda gezerin.
Öwrenmeliniñ güller yaly owadan gozel gyzlary we gelinleri.Baýramynyz gutly bolsun.Guler ýüzüñiz solmasyn.Durmusynyzam dunýäñizem, bagtynyzam bahar bägulleri yaly owadan bolsun.Gijade galdym... Yene bir gezek bayramynyz bilen.....
51
67
4
Paradise
03.03.2022 22:04
Okap Ezizowy gijelerine,
Ýok, ol garaşanok idelerine.
Sowapdyr söýgiden,
Sowapdyr yşkdan,
Gussa surat çekdi didelerine.
Höwri mawy asman, asuda asman,
Agşam Aý şuglasy bagryna basýar.
Dost boldy ýyldyzlar, dost boldy gije,
Ýöne näm üçindir, ýüregi gysýar.
Barybir arzuwjyk uçgun mysaly,
Kalbynyň törüni eýelän ýaly.
Düşünsede agyr, bilsede agyr,
Şeýledä jogapsyz söýginiň haly.
Goşgy bilen derdin ýeňmäge çalşyp,
Soň-soň kitap bilen gidipdi alşyp.
Görmekden gaçypdyr, görkden gaçypdyr,
Nirde şadyýanlyk, nirede gelşik?!
Gussa surat çekdi didelerine,
Sowapdyr söýgiden,
Sowapdyr yşkdan....
Azajyk garaşýar idelerine,
Okap Ezizowy gijelerine...
50
47
3
Paradise
01.03.2022 20:09
MART DUÝGULARY
Şygry bilen gelýär ýazyň howasy,
Goşgyň bogny pyntyk bolup ýarylýar.
Ýürek gürsüldände wagtyň owazy,
Sagadyň sesi deý howa garylýar.
Goşgularmy aldym ýazyň joşundan,
Yşnagymy yşka daglap nije men.
Ine, ýene zyba gyzlaň gaşynda,
Söýgi sözlerinden baglaýan çemen.
Gözýetimde älemgoşar hal atar,
Hal atar gyzlaryň ýaňagna çenli.
Iň agras ýigde-de özün haladar,
Ýogsa-da kim duýýar serden geçenni,
Kim söýmeýär kellesini sämedip?!
(Aşygyň işini Alla oňarsyn!)
Göz bir penjiredir,
ondan äňedip,
Bahar eljirese neneň oňarsyň?!
Düýşe girýär perileri uçmahyň,
Ýazyň ýüpek ýakymyna baksana!
Martyň howasynda yşka uçradym,
Näme boldy, ne döw çaldy aklyma?!
Garlawaçlaň gaşa meňzeş näzini,
Kalbym goşgy üçin bahana bildi.
Ýaş oglan deý aşyk häli-häzirem,
Türkmeniň al-elwan baharydyr bi.
Öz-özüm oýlanýan başymy atyp,
Neneň kämil bu duýgynyň gurluşy.
Her ýazda topraga artýar hormatym,
Her ýazda täzeden söýýän durmuşy.
Men diýerin, „Seni söýýän!“ diýerin,
Ýaza aşyk bolan gizlemez syryn.
Ömrüni poeziýa baglanlar deýin,
Menem öz ömrümiň şahyrydyryn.
Ýaz möwsümi tebigatyň zehini,
Her bir pasyl berekedin getirýär
Söýginiñ al-elwan baharydyr bi,
Aşyk-magşuklary bagta ýetirýär.
48
42
2
Paradise
24.02.2022 20:05
Synlap tylla günüñ batyp barşyny,
Aslyşyp zor bilen dagdan-depeden.
Bildim günleñ meni terk edýänini
Ýeke-ýekeden...
Ýöne gün adam däl, dogar ýene-de,
Säher ýene guşlar joşup ses eder.
Uzar barar, ak günleriñ kerweni,
Ýeke-ýekeden..
Geçibersin günler, ýöne siz beri,
Göwne degip gybat etmäñ keseden.
Çünki adamlaram gidip barýar-a
Ýeke-ýekeden...
Goja zemin içre bir hakykat bar,
Göz ýetirer geçmişine es eden.
Hemme zat döreýär, ýitýär ähli zat,
Ýeke ýekeden..
Kakamyrat REJEPOW
49
102
11
Paradise
23.02.2022 22:10
HAKYKY SÖÝGI
Owadan baharyň ajap möwsümi,
Daş-töwerek oglan bilen gyzlardy.
Maňa säwlik bilen sataşan oglan,
Bakyşlaňdan ýüzüm ot deý gyzardy.
Deň-duş joralamdan salgymy sorap,
Soňam ençe sapar idäpsiň meni.
Ýalňyş düşen bolup, belgime aýlap,
Bahanajyk tapyp aldapsyň meni.
Ýöränimde ogryn-ogryn esedip,
Gör, näçe saparlar synladyň, oglan?!
Ýüregime şugla saçyp keseden,
Asyl söýgiň özi senmidiň, oglan?!
Kalba hyruç berýär joşan duýgulam,
Menem seni jandan eziz söýüpdim.
Gözlem ýene söýýändigim duýdurar,
Gyza söýgüsini aýtmak aýypdyr.
Seniň päk söýgiňe sowuklyk bilen
Jogap berip, täleýimden sowsam-da.
Ýene hanjar deýin bagryňy dilip,
Yşkym joşup gursagyňy böwsende.
Sowgat edip, ýüregiňi getirdiň,
A, men boldum söýýäniňi duýmadyk.
Şahyr bolmasaňam, waspym ýetirdiň
Söýgi siňen jümleleri aýnadyp...
Garşy çykarma-da seredip durman,
Bu gün güller bilen ýolumy kesdiň.
Ýüregmiň eýesi, eý, sada ýigit,
Seniň yşkyň bütin ömrüme besdir!
47
139
20
Paradise
17.01.2022 16:49
WYSAL
Bu kenara kän gelerdik öňlerem,
Iki ýana towsaklardyk...
Çaga-da!
Deňiz şazadasy saýyp özümiz,
Haşamlap, kän “köşk gurardyk“ çägeden.
Kä pessejik depe ýasanardyk-da,
Oýnardyk biz „salam-salam“ oýnuny.
Balykgulaklardan monjuk düzerdik –
Suw perisi, goý, bezesin boýnuny.
Akja kagyzlardan gaýyjak ýasap,
Arzuwlarmyz salardyk-da gabardyp.
Tereň tolkunlara ataryp ony,
Yzyndan birgeňsi garap galardyk.
Garaşardyk gara çynymyz bilen,
Deňiz düýbi bize dür berer diýip.
Tylla balyk eşider-de dilegmiz,
Gyrylmajak ganat-per berer diýip.
Öwrülip şol pursat Symrug guşuna,
Göwnümiz asmanda ganat kakardy.
Ýyllar geçdi...
Bu oýunbaz tolkunlar
Bizi ýaşlyk kenaryndan çykardy.
Ýyllar geçdi...
Çyndan syzmak isledim,
Dünýäniň şekýetmez bakylygyny.
Geldim ýene bu arzyly kenara,
Alyp çarlaklaryň çakylygyny.
Eý-ho, siziň çynyňyzmy, gözlerim?!
Daňa ýakyn görlen bir düýş mysaly...
Gör-le, hakyt maňa gujak açyp dur
Şo-ol çagalyk arzuwlarmyň wysaly.
Ne gudrat! Şo-ol çäge öýjagazlarmyz
Her biri köşk bolup çykdy öňümden.
Şo-ol tylla balykdan soran ganatym
Pasyrdap çykdy-da aşyk köňülden –
Meni bu mekana seýle äkitdi,
Bakan ýerim – läle-reýhan, gülmeňiz.
Deňiz arzuwlarmy eşden ekeni –
Kenara düzüpdir ähli dürlerin.
Tolkunlarda ýollan gaýyjaklarmyz
Bagta gerlen ýelken bolup gelipdir.
Gijelerne howum basan tolkunlar
Şirin jana melhem bolup gelipdir.
Ýaşlygna dolanan gojaman deňziň
Heser tapan tolkunlary güýjäpdir.
Bilmen, çagalygmyň dady siňipmi –
Hatda onuň suwlary-da süýjäpdir.
Gelýär ýeller suw atyny debsiläp,
Kalbym kerwen-kewen kelama gelýär.
Biz oýnapdyk „salam-salam“ oýnuny,
Gör-ä, bu gün dünýe salama gelýär.
Arzuw hasyl bolmak üçin dörärmiş –
Arzuwlarmyz ganat açyp asmana,
Jennetiň bir künjün alyp gaýdypdyr
Gözel Awazany bagra basmaga...
Kakamyrat REJEBOW
51
34
1
Yene yükle
