(dowamy)

Biz biek-biregi hiç göremzok ahyry. Emma nädeýin, men sensiz ýaşap bilmerin.

-Has dogusy, meniň telefonymsyz diýseňiz-le-diýip, ol sözümi ýaňsa aldy.

–Emma, näme-de bolsa, sizden muny eşitmek ýakymly. Biziň söhbedimize ilkinji gezek gammalar päsgel berenokdy. Daň atyp, jahan ýagtylyp gelýärdi. Men birwagtlar sazçylyk mekdebinde okandygym üçinmi-nämemi, kelläme, ynha, şu meňzetmeler geldi: “Durmuşyň belentli-pesli gammalary, munuň özi ak we gara tutularyň, gündizleriň we gijeleriň, ýagty günleriňdir erbet tutuksy günleriň yzygiderliligi ýaly bir zatdyr...” Men:

-Sizi haçan görüp bilerin?-diýdim.

–Aslynda, görüşmäli diýip, dogry diýýäňiz. Bu yşk-söýginiň iň asylly görnüşidir. Birek-birege telefon arkaly ýakynlaşdyk. Bu hem aragatnaşygyň iň gowy görnüşleriniň biri. Ol:

-Birtaraplaýyn aragatnaşyk-diýdi. Siz maňa jaň edip bilýärsiňiz, a men bolsa ýok.

-Şonuň üçin hem men sizi görmeli. Aýdyň, nirede ýaşaýaňyz? Häziriň özünde ýetip baraýyn.Ol gussaly:

-Haýyş edýän-diýdi.

-Meni şatlykly duýgularymdan mahrum etmäň. Maňa, köplenç, teklip edýärler. Eger ýene şeýle diýseňiz, siz bilenem salamlaşmagy bes ederin. Ol biraz dymyp, soňra ýene-de sözüni dowam etdi:

-Bilýäňizmi näme, men soňky wagtlarda size juda öwrenişipdirin. Ynanaýyň, siz adamym wepat bolandan soň, ilkinji gezek meniň özüme ýakyn saýan, mährem adamymsyňyz.

*****Ýanwaryň ikisinde täze iş ýerimde işe başladym.Uzak gün kiçi-girim bolmadyk bir makalany redaktirläp, harp ýygyja eltip berdim-de:

-Ertire çenli taýýar bolsun-diýdim. Diwanhananyň öňünde işçileriň atlary we telefon belgileri ýazylan ullakan sanawnama asylgydy. Men oňa ýüzleý göz gezdirdim-de, hamala birden nätanyş jemendäniň içinde tanyş ýüze duşan ýaly bolup, tisginip gitdim.Kätipden:

-Welizada diýýänleri kim?-diýip soradym.Ol:

-Harp ýygyjymyz-diýdi.

–Hä, näme häzirjek oňa makalaňyzy tabşyryp gaýtdyňyzmy?Men penjireden daşary seretdim. Şol goýun gözli harp ýygyjy basgançaklardan düşüp gelýärdi. Belent ökjeler tyrk-tyrk edip seslenýärdi, bu şol 35 ölçegli köwşüň ökjeleriniň sesidi. Bu hut ertekä çalym edýärdi. Täleý bizi edarada birek-birege duşurdy. Emma ol bu barada hiç zat bilenokdy. Indi ol ýazuw enjamynda meniň beren makalamy ýazyp oturanynda, oňa makalany göçürtmek üçin gelen ýigidiň mendigimi hyýalyna-da getirmez. Emma ol meniň mendigimi bilýär, emma meniň oldugymy bilmeýär.Maňa özümi ele almak kyndy, bu täzeligi oňa diýseň aýdasym gelýärdi. Oňa awtomat telefondan jaň etdim, özem ilkinji gezek oňa ir bilen daň atmazdan jaň edişimdi. Emma telefon dymýardy. “Zyýany ýok. Gowusy, hemişeki wagtda jaň ederin, goý, oslagsyz sowgat bolsun” diýip oýlandym.Gije oňa jaň edip:

-Salam. Iki sagat öň size jaň etdim-diýdim.

-Näme üçin beýle ir? Men joramyňkydadym, olarda biraz işlemek isläpdim-diýip, ol geňirgendi.Men gülmekden zordan saklanyp:-O nähili iş?-diýip soradym.

-Ynha, ony öýe-de alyp gelmeli boldum. Täze müdirimiziň tabşyrygy.

-Täze müdir diýýäňmi?

-Hawa, bu gün redaksiýamyza täze bölüm müdiri geldi.

-Hä, şeýlemi-diýip, men ýene zoraýakdan gülmäni saklandym.

–Hawa, onsoň ol nähili adam eken?

-Walla, näme diýjegimi hem bilemok, maňa-ha ýaramady-diýdi.

–Birhili, ulumsyrak ýaly. Elbetde, birinji gezek özüňde galan täsirler arkaly baha bermek kyn. Emma her niçik-de bolsa...Bu gepleri eşidip, men aňalyp galdym. Onuň özüm hakda beýle pikire geljekdigini hyýalyma-da getirmändim:

-Size onuň nämesi ýaramady?

-Bu gürrüňi goýaly-la, ilkinji täsirler, köplenç, ýalňyş bolýar. Belki, ol gowy adamdyr. Uzyn boýly, syratly ýigit. Daş görnüşi hem gelşikli, ýöne tekepbirräkmikä diýýän... Adama boýdan-başa tiňkesini dikip garaýar. Gürleşende-de başlyksyrap: “Bu makala ertire taýýar bolsun” diýýär.Onuň özüniň kesbi-käri barada ilkinji gezek aýdyp oturyşydy. Men mundan peýdalanyp, onuň nirede işleýändigi barada soraşdyryp oturmadym. Çünki onuň aýtjak zatlaryny özüm hem bilýärdim.Soňra onuň özi:

-Hawa, aýdyp oturyň-diýdi.

–Täze işe başladyňyzmy?

Bu mahal täsin bir oýnuň başyny başlaýandygym barada pikirem edemokdym, emma haýsydyr bir içki duýgularym meni dogrymy aýtmakdan saklady we oňa şeýle jogap berdim:

-Ýok, bilýäňmi näme, pikirimden dändim. Öňki iş ýerimde galdym.Irden ilkinji gezek Medinäni, meniň Medinämi gördüm. Dogry, düýn men ony görüpdim. Emma düýn onuň adaty ýüz keşbi bardy, başga zenanlardan o diýen bir üýtgeşikligi ýokdy. Adaty ýüz-keşp... Oňa gaty owadan diýse-de boljakdy, ýöne, näme üçindir, ýüzi salykdy, tutuksy bir gözellikdi. Hawa, ol düýn şeýledi. Bu gün bolsa, ähli zat başgaça. Ýygan kagyzlaryny saýhallap oturyşyma, oňa ogryn bakýardym. Onuň maňa düýbünden nätanyş daş görnüşi bilen ýakymly sesiniň arasynda, hakyky barlygy bilen telefondaky barlygynyň arasynda özara utgaşyklyk, sazlaşyk gözleýärdim. Elimden geleninden mylaýym, salyhatly bolmaga, oňa aýratyn üns bilen hoşamaýlyk etmäge çalyşýardym hem-de “Ol üýtgeşikligi duýarmyka” diýip oýlanýardym. Ony bilmek üçin agşama, telefon arkaly boljak söhbetdeşligimize garaşýardym.

*****

-Men size ilkinji täsirler aldawçy bolýar-diýipdim-ä-diýip, ol haýran galyjylyk bilen pikirini paýlaşdy.

–Täze bölüm müdirimiz örän açykgöwünli, mylaýym adam bolup çykdy.Ilkinji täsire-de ynanybermäň, onuň hem aldamagy gaty ähtimal-diýip, men degşen boldum.-Ýok, ýok, düýn onuň gözlerine bakyp bilmändim. Bu gün bolsa, bakdym...

-Men: “Gör-le muny, haçan bakdyka? Men duýmadym” diýip oýlandym.

-Bilseň, onuň gözleri şeýlebir dury, şeýlebir akylly...

-Eýýäm men sizi ondan gabanyp başladym. Bu oýnuň başy, ynha, şeýle başlandy. Men bu oýnuň kadalaryny bilýärdim, ol bolsa ähli zatdan bihabardy. Indi meniň elimden geljek zat ýokdy. Hadysalar akymy edil poçta gutusyna atylýan hatlar mysaly, meniň gözegçiligimden, ygtyýarymdan çykypdy.Iň möhümi, indi men gürleýşimi, äheňimi, düşünjelerimi üýtgetmeli bolýardym. Telefonda bir adam, işde bolsa başga bir adam bolmaly bolýardym. Hersiniň öz gylyk-häsiýeti, öz ruhy dünýäsi bardy. Iş ýerimde hem bütinleý başga adamdym.Ýagşy niýetli, mylakatly, ýeri gelende talapkär. Ol bolsa telefonda maňa özüm barada gürrüň berýärdi we gürrüň berýärkä her bir hereketimiň, her bir ädimimiň, her gezekki ýüz keşbimiň nähilidigine seljerme işlerini geçirýäne meňzeýärdi. Öňler özüm gürrüňe başlaýardym, emma soňky wagtlarda muňa zerurlyk galmandygyna göz ýetirdim. Onuň özi Seýmur mugallym hakda gep aýtmakdan, onuň gürrüňini etmekden birjigem ýadanokdy. Rüstem bilen bolsa, gijäniň birmahaly uzakdan-uzak söhbetleşýärdi. Emma Seýmur bilen hiç wagt Rüstem hakda gürleşmezdi. Umuman, onuň telefondaky durmuşy barada hiç kim hiç zat bilenokdy. Muňa bolsa begenjegimem, gynanjagymam bilemokdym. Käte maňa ol düýbünden biperwaý garaýandygy üçin, bu barada hiç kim bilen gürleşmek islemeýän ýaly bolup duýulýardy. Käte-de tersine, ol muny eziz, syrly bir duýgy hasaplap, hiç kime äşgär etmek islemeýän bolsa gerek diýip düşünýärdim. Bu örän geňdi, pikirlerim, duýgularym garjaşykdy. Göz öňüne getirip görüň, men-Seýmur, ony telefonly durmuşyndan gabanýardym. Gije jaňlaşanymyzda bolsa, onuň Seýmur hakda berýän tükeniksiz gürrüňleri meniň-Rüstemiň gaharyny getirýärdi. Bir gezek oňa:

-Geliň, birek-birege sen diýip ýüzleneliň. Biz indi köpden bäri tanyş ahyry-diýdim.Aňyrdan: -Bolýa-diýen jogaby eşitdim.

-Sag bol, haýyrly bolsun!-diýip, men muňa çaga ýaly begendim. Indi Medine “meň” bilen “sen” diýip, “onuň” bilen bolsa “siz” diýip gürleşýärdi.Şol gün birden, özem ilkinji gezek meniň özüm hakda, özümiň ikinji menim hakda özge bir şahs ýaly pikir edýändigim kelläme geldi.

(dowamy bar)

Awtomat telefonlar jezalandyrylmazlygyň, eden-etdiligiň, jogapkärçiliksizligiň alamatydy. Olaryň üstünligi bombalaýjy uçaryň ýaragsyz gäminiň üstündäki üstünligine meňzeýärdi. Biler bolsaňyz, öýümde telefonymyň ýokdugyna gaty gynanýardym. Elime düşen iki köpügi “Hajy Gara” ýaly, nebsewürlik bilen jemläp, ýygşyryp goýýardym. Tanyş-bilişlerden hem iki köpüklik toplaýardym, mümkinçilik bolandan pul böldürip, ýerine iki köpüklik alýardym. Indi men her gije onuň bilen jaňlaşyp durýardym. Özem gijäniň birmahal çagy edýärdim. Bu mende eýýäm endik bolup galypdy. Beýle görnüşdäki söhbetdeşlige: onuň biraz ýadaw, biraz kinaýaly, biraz gussaly sesine, diwaryň aňyrsyndan eşidilýän birmeňzeş gammalara, radionyň batly sesine, uçaryň güwwüldisine gurşalan arakesmelere diýseň öwrenişipdim. Indi men o hakda käbir zatlary bilýärdim. Adynyň Medinedigini, ýeke ýaşaýandygyny, goýun gözdügini, köwşüniň ölçeginiň otuz bäşdigini bilýärdim... Şolardan başga hiç zat bilemokdym.Bir gezek:

-Siz näçe ýaşyňyzda?-diýip soradym.Ol:

-Men eýýäm garry kempir. Birgiden agtyjaklarym hem bar-diýdi.

Men onuň dury sesinden meniň beren sowalymy ýaňsa alýandygyny, şeýle-de öz ýaşy, iş ýeri, maşgalasy hakda gürrüň bermek islemeýändigini aňdym. Özi hem menden bu zatlar hakda soranokdy, emma ýigrimi dokuz ýaşymdadygymy, sallahdygymy, ylmy edarada işleýändigimi bilýärdi. Diňe adymy bilenokdy. Näme üçindir, hakyky adymy aýtman, oňa özümi Rüstem diýip tanyşdyrypdym. Özüm hem: “Belki, onuň hem hakyky ady Medine däldir” diýip güman edýärdim. Men:-Hawa, onsoň biz haçan duşuşarys-diýdim.Ol:

-Duşuşyp nätjek?-diýdi.-Näme, telefonda gürleşmek erbetmi? Sizi bilemok welin, meniň üçin-ä, iň gowusy, telefon arkaly söhbetdeşlik. Durmuşymda täze bir zat peýda bolýar. Belli sagatlarda özüme jaň edilerine garaşmagy gowy görýärin. Jaň edýän adamy tanamamsoň, ony öň hiç ýerde görmämsoň, onuň bilen açyk iç döküşip bilýärin, ol hem ýüreginde näme bolsa maňa arkaýyn diýip bilýär. Ol hem meni hiç wagt görmänsoň, göz öňüne-de getirip bilmeýär. Näme, bu erbetmi? Duşuşyp, bir-birimizi halamasak, ähli zat puja çykar, bozular. Birek-birege göwnümiz ýeten ýagdaýynda-da, ýene ähli zat üýtgär, adaty, lenji çykan bir zada öwrüler. Geliň, iň gowusy, gatnaşyklarymyzy şu ýagdaýda dowam edeli. Ynanaýyň, bu iň gowusy. Hany, öz işleriň barada gürrüň bersene! O meseläňiz nähili boldy? Dawaňyzy diýýän. Hemme zat ýerbe-ýermi?

-Ýok. Arzamy ýazdym. O ýerden gitjek.

-Waý, nirä?

-Entek bilemok. Siz näme maslahat berýäňiz?Ol jogap bermedi. Gulagyma uçaryň güwwüldisi eşidildi...

*****

Täze ýyly Feruzlarda garşyladyk. Täze çatynjalar-Rasim bilen Farida hem gelipdiler. Sagat on ikä on minut galanda hemmämiz onuň gelniniň joralary bilen ähli zehinini, başarnygyny siňdirip ýazan saçagynyň başyna geçdik. Men hemmelerden giç gelipdim. Howa diýseň sowukdy, garly, ýagyşly köçeden gelen adama, öýüň ýylylygy hem, ýagtylygy hem diýseň hoş ýakýardy. Sagat on ikiniň zaňyny uranda, biz birek-biregi gujaklap, Täze ýyl bilen gutladyk we birek-birege bagt, üstünlikler arzuw etdik. Feruz bolsa bu ýyl taryhy ýyl bolar, ýagny Seýmur öýlener diýip öňdengörüjilik etmäge başlady. Bulgurlary çakyşdyranymyzdan soň, Feruz meni bir gyra çekdi. Biz ýanaşyk otyrdyk.

-Men seň saglygyňa şerbet içýän. Mert, tutanýerli, emma biraz adalatly, ünsli, hoşamaý bolgun. Seniň durmuşa ak ýürekli garaýşyň bar. Sen içiňden üstümden gülýän, belki-de, ýigrenýän bolmagyň hem mümkin. Belki-de, men, seret, ynha bular üçin-diýip, ol ýalpyldap duran täzeje öý goşlaryna yşarat etdi:

-Ýa-da Samiýanyň gymmatbaha paltosy üçin wyždanymy satandyryn öýdýänsiň-diýdi.

-Ýok, men hiç wagt wyždanymyň tersine giden däldirin. Muňa ynanyp bilersiň. Soňra ol:

-Emma-diýip sägindi, soň ýene-de sözüni dowam etdi.-Emma adamyň akyl-huşy ýerinde bolsun. Her demde horaz ýaly orta okdurylmasyn. Dogry, kän ýan bermeli, käte ylalaşmaly bolýarsyň. Käte zoňtarlyk etseň, käte sözüňde berk durmaly bolýarsyň. Bilýäňmi näme, durmuşyň özi şeýle, käbir işlerde ylalaşmak gerekdir. Munuň üçin köp zat gerek däl ahyry.

-Belki, sen mamlasyň-diýdim.

–Ýöne, ynha, meniň üçin hasap-hesip işleri diýseň çynlakaý iş. Bir-de yza çekil, bir-de öňe çyk, meniň beýle türgenleşikden başym çykmaýar.Ol elini owkalaşdyryp:

-Täze ýylda nirede işlemekçi?-diýdi.Men:

-Gazetde-diýdim.

–Düýn buýruk çykypdyr.

-Bolýa, özüň bil, emma menden sorasaň-a, sen ýalňyşdyň.Soňra ol roýalyň başyna geçip, saz çalmaga durdy, gelni-de hiňlenip başlady.Bu meniň radiodan eşiden aýdymlarymyň biridi. Birden meniň gammalar, soňra-da onuň radiosy ýadyma düşüp, birhili boldum.Ornumdan gozganjyrap:

-Men nutuk aýtmak isleýän-diýdim.Oturanlar hiç wagt nutuk aýtmandygym üçinmi-nämemi, aňk-taňk bolup, maňa seretdiler.

-Ynha, biz bu ýerde bileje otyrys we hemmämiziň keýpimiz kök. Emma geliň, şu pursatlarda ýeke galanlaryň näme edýändigi barada pikir edeliň. Meselem, nobatçylar, ýol gözegçileri.

-Kim, kim?-diýşip, oturanlaryň hemmesi birden seslendiler.

-Demir ýol gözegçileri diýýän.

–Hawa, ýol gözegçileri otlularyň gatnaw tertipnamasyny gowy bilýärler we sowuk, syrgynly gijelerde somalyp oturan kepbelerinden çykyp, otlyny geçirip goýberýärler.Hemmeler gülüşdiler.Feruz maňa manyly garap, derrew ýerinden turdy:

-Häzir Seýmuryň öýkelemegi mümkin. Gülmäňizi bes ediň. Bu çynlakaý mesele. Demir ýol gözegçleriniň saglygyna diýdi dälmi, Seýmur? Hany, bulgurlaryňyzy alyň.Hemmeler bulgurlaryny eline aldylar.

Ýok-diýip, men kellämi ýaýkadym.

–Ýol gözegçileriniň saglygyna diýmek islemändim. Gürlemäge goýmadyňyz. Men başga bir ynsan üçin badaňyzy götermegiňizi towakga etjekdim. Eger ýene-de şeýtseňiz, menden gaty görmäň.

-Eý-how, gör, sen nähili? Ýeri-ýer...

-Men bir adamyň, bütinleý ýalňyz bir adamyň saglygyna içmek isleýärin. Ol şu pursat ýeke özi radionyň öňünde otyr. Ol ähli radioýaýlymlaryň ähli gepleşiklriniň tertipnamasyny bilýär. Ýol gözegçisiniň otlulary garşylaýşy ýaly, ol hem radiotolkunlardaky ähli tomaşalary garşylaýar. Tutuş älem onuň otagynda, ýöne tutuş dünýä bilen bile bolsa-da, ol ýalňyz...Men şerbetli bulgury boşatdym. Hemmeler geňirgenip maňa garady, emma hiç zat diýmediler. Birazdan soň bolsa, bütinleý başga zatlar barada özara söhbede berildiler.

*****

Dälize çykyp, telefon belgilerini aýladym-da garaşyp başladym. Telefon dymýardy. Men: “Ine, saňa gerek bolsa, demir ýol gözegçisi. Biderek ýere sen onuň aladasyny edýärsiň. Ol hem bir ýerlerde Täze ýyly garşylaýandyr. Ýöne näme üçin garşylamasyn?” diýip oýlandym. Soňra ýene jaň etdim. Onuň täze ýylyny Moskwa wagty bilen gutlamak isledim. Jogap bermedi. Ýene bir sagatdan soň jaň edip, Praga wagty bilen gutlamak isledim. Ýene-de jogap bermedi. Ýene bir sagat geçdi. Haýsy wagt bilen onuň täze ýylyny gutlamak isländigimi bilemok, belki-de, Grinwiç wagty bilendir, ýene-de oňa jaň etdim.Ahysoňy irden sagat ýediň ýarynda onuň mylaýym sesini eşitdim.Howlukmaç:

-Sizi Atlantika wagty boýunça Täze ýyl bilen gutlaýaryn-diýdim. Düşünmedi öýdýän, men hem näme diýjek bolandygymy düşündirip oturmadym.Ol gülüp:

-Hä-ä, bu sizmi?-diýdi.

–Ýaňyja gapydan girip durşum.

-Bilýän. Uzak gije size jaň etdim.

-Bir joramyň öýündedim.

-Munuň ähmiýeti ýok-diýdim.

–Täze ýylyň ilkinji sagatlarynda size möhüm bir zat aýtmak isleýärin. Men sizi gowy görýärin, özem juda gowy görýärin.

-Şeýlemi?-diýip, ol güldi.

–Diýseň şatlykly habar. Ynha, muňa baýramçylyk sowgady diýse boljak.

-Siz meň üçin gymmatlysyňyz, ezizim. Güneşim, gözümiň nury-beýle pursatlarda näme diýilýändigini hem bilemok, emma men hiç kimi beýle gowy görmändim. Dogrusy, hiç kimi beýle sulhum almandy. Bilýärin, munuň size gülkünç bolup duýulmagy hem mümkin.

(dowamy bar)

******

(dowamy)

Elbetde, ertesi men oňa jaň etmedim. Uzak gün ownuk-uşak işler bilen başagaý bolup, ähli zady unutdym. Birnäçe günden soň iş meýilnamam ara alnyp maslahatlaşylýarka, barlaghananyň müdiri bilen hem tersleşdim. Şol bir wagtyň özünde, ol meniň ylmy ýolbaşçymdy. Maslahatdan soň dostum Feruz meni öýlerine alyp gitdi. Biz bir institutda işleýärdik.Ol ýolboýy maňa akyl öwretdi:

-Näçe mamla bolanyňda-da, gaharlanma, her bir zat üçin ganygyzgynlyk etme. Hakykaty ýüze çykarmagyň dürli ýollary bar. Hemmäni özüňe duşman etmek bilen, hiç kimi ynandyryp hem, hiç zat gazanyp hem bilmersiň-diýdi.

–Gördüň-ä, adam açyk bir zat “pyşgyranok”. Sen oňa meselä her taraplaýyn seretmändigiňi aýt. “Bu meselä ýene bir gezek göz aýlasaňyz, meniň bilen razylaşarsyňyz” diý. Ýogsa seniň ýaly “nadansyňyz”, “jahylsyňyz” diýiberseň...Şoňa görä-de...

-Şoňa görä-de, hawa näme? –diýdim. –Seniň akyl bermeleriň meniň ýüregime düşdi.Feruz:

-Görýän welin, häzir seň bilen adam ýaly gürleşip boljak däl öýdýän. Gowusy, bize gelip çaý içeli-diýdi.

*****

Biz içeri girenimizden, onuň gelni:

-Bilýäňmi näme?-diýip gürrüňe başlady. –Ogluňyz öz-özünden “eje”, “kaka” diýip başlady. Bilmedim nireden bilýär?! Bu sözleri hiç birimiz oňa öwredemizok ahyry...Ol golaýda bir ýaşy dolan ogly hakda aýdýardy.Beýleki otagdan öý eşiklerini geýnip çykan Feruz:

-Hawa, dogrudan hem, bu geň zat-diýdi.-Özüň bilýäň, men täze nazaryýet oýlap tapdym. Meniň pikirimçe, dili ilki çagalar döredipdirler. Hawa, ulular däl-de, çagalar. Biz ulular bolsa, olaryň döreden sözlerini ulanýarys. Seýmur daýysy, sen öň bir ýerde şeýle eýjejik çagajyk görüpmidiň, kimiň şeýle ogly bar, hä? Meniň bolsa bu wagt beýle gepler gulagyma ilenokdy, näçe jan etsem-de, şol günki telefon belgileri ýadyma düşenokdy. Iň soňky iki belgi ýadymdady, ilkinji belgi hem ýadymdady, onuň yzyndaky belgi welin, hiç ýadyma düşenokdy, üçünji belgi bolsa noldy. Men:

-Maňa seret, Samiýa, hol gün agşam sen haýsy belgini diýipdiň-ä?-diýip soradym.

-Haýsy agşam? O nämäniň belgisi?Bilşiňiz ýaly, uzak düşündirmeli boldum. Daşymy gallap, akyl öwretmäge başladylar.Ahyrsoňy gapydan çykyp barýarkam Samiýa:

-Seýmur, ýadyma düşdi-diýdi.

–Dokuz diýipdim. Bu her gün özümiň işe gatnaýan trolleýbusymyň belgisi-dä.

*****

-Alo, salam. Bu men.

-Salam. Kimsiňiz?

-Derrew unudaýdyňyzmy? Ýadyňyzdamy, men size jaň edipdim. Mundan üç gün öň. Özem hut şu mahallardy.

-Onda sesiňiz başgady-diýip, ol kinaýaly gürledi:-Belki-de, bu gezek tanyşmak isleýän başga kişidir. Geçen gezek öýlenen ýigidiň bir öýlenmedik dosty ýalňyzlykdan arz etmek isleýändir. Belki-de, siz telefon oýnap, bezzatlyk edýänsiňiz.

-Ant içýän, şol ýigit men. Indi nähili, tanadyňyzmy?

-Hawa, indi tanadym. Men size başga adamdyr öýtdüm, bagyşlaň-diýip, ol arkaýynlaşdy.

-Bilýäňizmi näme, men hakda ýalňyş pikirde bolmasyn diýip, jaň edeýin diýdim.

-Jaň edeniňiz gowy bolaýdy, meniň hem bu agşam erbet ýüregim gysardy. Radiom döwüldi.

-Siz hemişe şeýle giç ýatýaňyzmy?

-Hawa, gijäň bir wagtyna çenli radio diňleýän. Emma bu gün onuň hem çyrasy köýdi. Indem, walla, däliremegiň bäri ýany bolup otyryn. Şu pursat tutawaçdan, göýä, uzakdan eşidilýän ýaly pianinonyň sesi eşidildi.

-Siz sowallaryma jogap bermegi halamaýarsyňyz, ýöne aýtsaňyzlaň, gijäň bir wagty pianino çalýan kim?

-Hä-ä-diýip, ol güldi. –Bizde däl, goňşularda. O bir ýüregedüşgünç gyzjagaz, ir ertirden gijagşama çenli şeýdip, saz bilen meşgullanýar. Diwarlarymyz diýseň ýuka, dogrusy, bu gammalardan bizar boldum. Diňe radiom işleýän wagty onuň sesini eşitmeýärin.

-Siz näme üçin radio diňleýäňiz?

-Radioýaýlym meniň üçin öýümiň içi ýalydyr. Ynha, bu ýerde hemişe gijeki konsertler berilýär.Şu pursat men onuň radionyň nurbatyny ýuwaşja towlap, radiotolkunlaryň üstünden gezdirýän näzik, inçe barmaklaryny gören ýaly boldum.

-Ynha, bu ýerde bolsa, ummanyň aňyrsyndan nähilidir bir üzlem-saplam sazlar eşidilýär-diýip, ol sözüni dowam etdi.

-Bu ýerde äpet gomlaryňdyr tupanyň sesi eşidilýär. Bu ýerde kimdir biri düýbünden düşünip bolmaýan dilde gürleýär. Bu ýerde ýbolsa, hemişe alagowur sesler eşidilýär. Alyp baryjy degişýär, adamlar gülýärler, çapak çalýarlar, men olaryň diline düşünmeýärin, emma hemmeler gülüşýärler, radiotolkunlar eräp giden ýaly bolýar, sykylyk çalýarlar, meniň hem muňa diýseň göwnüm açylýar.Ynha, bu ýerde bolsa yşk-söýgi hakda gepleşikler berilýär. Erkek we aýal bir-biri bilen syrly pyşyrdaşýarlar. Men olaryň mikrofonda dem alyşlaryny hem eşidýärin. Radio-ajaýyp dünýä. Hyýalymda tutuş dünýä-gijeki asman, aýdymlardyr jadyly mukamlar, sahnalardyr uçarlar otagyma kürsäp girip gelýän ýaly bolup duýulýar.

-Uçarlar diýýäňizmi?

Ol:-Gulak asyň-diýdi.

Onuň dymyp gulak asmaga başlandygyny duýdum. Men hem gulak asdym we bir salymdan uçaryň güwwüldisini eşitdim. Men: “Geň zat, bu uçar meň öýümiň depesinden hem uçup geçermikä? Onuň öýi haýsy tarapdaka, şäheriň haýsy künjegindekä?” diýip oýlandym.Ol birden:

-Radiotolkunlar bilen uçarlaryň arasynda nähilidir bir ýakynlyk bar. Şeýle dälmi?-diýip, ol ýene-de dymdy.Indi tutawaçdan uçaryň güwwüldisi däl-se, ýene-de hälki birsydyrgyn gamma sesleri eşidilýärdi. Ol ara düşen dymyşlygy bozup:

-Diňe men zol gürläp otyryn, siz bolsa dymýaňyz-diýdi.

–Siz hem maňa bir zatlar diýiň-dä!Men oňaýsyz ýagdaýa düşdüm. Soňra özümden biygtyýar bu keseki zenana işdäki ýakymsyzlyklar, iň ýakyn dostum Feruz bilen soňky wagtlarda oňuşmaýandygym, ylmy ýolbaşçymy näme üçin halamaýandygym, bu gün ýygnakda oňa agzyma gelenini diýendigim we başga-da, oňa hiç bir dahyly bolmadyk zatlar barada aýdyp, içimi dökdüm. Näme üçin bulary oňa gürrüň berýändigime bolsa özüm hem düşünemokdym. Özüme erk edip hem bilemokdym. Birden ýerliksiz ýaňrap başlanymy duýup, derrew özümi ele aldym-da, onuň bilen hoşlaşyp, tutawajy ýerinden asdym.Öýe dolanyp gelýärkäm, bu waka hiç kimiň ynanmajakdygy barada oýlandym. Dogrudan-da, tanamadyk, heniz özüni bir gezek hem görmedik kişiňe nädip ýüregiňi açmak bolar? Bar bilýänim: ol radio diňlemegi gowy görýär, goňşusy bolsa hemişe pianinoda saz çalýar.

*****

Bu hekaýa gatnaşyjylaryň bir-telefon. Men telefonlar hakda hem kelam agyz aýtmak isleýärin. Umuman aýdanyňda: soňk wagtlarda men telefonlar hakda köp pikir edýänden boldum. Hyýalymda olaryň hersi özbaşdak keşbe eýe ýaly bolup duýulýardy. Barlaghanamyzyň müdiriniň otagynda, stoluň üstünde gap-gara telefon bardy. Her gezek ony görenimde, simleri dag jynslaryny ýumurmak üçin ulanylýan simsapagy ýatladýardy. Müdiriň hemişe ynjalyksyz, howsala düşüp oturandygyny, gorkuly gözlerini görenimde bu telefon onuň partlaýjy minanyň deregine goýlan ýaly bolup duýulýardy. Ol her bir jaň sesine, her bir gymylda üşerilýärdi. Belki-de, bir gün oňa jaň edip, seni işden çykarypdyrlar ýa-da aýalyň gaçyp gidipdir diýerler...Megerem, bu mina-telefon oňa şol erbet habarlaryň biriniň gelen pursady partlaýjak ýaly bolup duýulýan bolsa gerek.Diwanhanada-da telefon bardy, emma ýasy tegelejigi belgisiz, göýä, möhürlenen ýaly, işlemeýän gap-gara tegelek bir zatdy. Ol hem tekersiz ulag, salgysy görkezilmedik hat ýaly, gözüme kömege mätäç ejiz bir zat bolup görünýärdi. Misli diýenedijiligiň, baknalygyň, gowşaklygyň alamaty ýalydy. Saňa jaň edip bilýärler, emma sen hiç kime jaň edip bilmeýärdiň. Bu hili telefonlara meňzeş awtomat telefonlar hem bardy. Olar ýasy tegeleksiz telefonlaryň bütinleý tersinedi. Sen-ä jaň edip bilýäň, emma saňa jogap berip bilenoklar. Jaň et, agzyňa gelenini diý, seni tapjak gümanlary ýok. Awtomat telefonlar jezalandyrylmazlygyň, eden-etdiligiň, jogapkärçiliksizligiň alamatydy.

(dowamy bar)

Bu gije seniň telefonyň hemişelik öçdi. Diňe adamlar däl, telefon belgileri hem ölýän eken. Durmuşda köp-köp belgileri unudýarsyň: passportyň, dostuň awtoulagynyň belgisini, iň soňky aýlygyňy, öz ýaşaýan şäheriň ilat sanyny, Aýa çenli bolan aralygyň ölçegini...hemmesini unudýarsyň. Diňe şu bäş belgiden ybarat telefon belgisini unudyp bilmersiň. Ol seniň üçin tapylgysyz peşgeşdi. Bu bäş belgini, onuň sesidir telefon tutawajyndan gelýän benewşe gülüniň hoşboý ysyny hiç wagt unudyp bilmersiň....

Käte men gap-gara telefonyň tutawajyny hut roýalyň gapagyny açýan ýaly emaý bilen galdyrýardym. Käte-de ony tabydyň gapagyny ýapýan ýaly ägälik bilen ýerinde goýýardym. Indi bolsa bu belgi ýok. Ýok, bar, diňe meniň üçin ýok. Indi ol meniň üçin girmek gadagan edilen bir meýdançady. Barmaklarymyň aşagynda, telefonyň ýasy tegeleginde ýerleşýän bu bäş belgi, indi meniň üçin aşmasy kyn menzillere, çakrymlara, parsahlara öwrülipdi.Men bu menziliň bäşden dördüsini geçip bilerin, ýagny diňe dört sany belgini aýlap bilerin, emma iň soňkusyny welin, hiç wagt aýlap bilmerin. Seň belgiň meň üçin açary ýiten gulply gara gapy.

Maňa seni görmek hökman däldi.Jaň ederdim-de, sesiňi eşidenimden:

-Barmaklaryň üşäp gidipdir, ezizim!-diýerdim.

Sen bolsa derrew munuň sebäbini aýdyp bererdiň. Men seni göremokdym, emma deňziň ýakasynda ýaşaýan adamlaryň deňzi gowy görmese-de, hemişe ony duýuşlary ýaly, seni uzakdan hem duýup bilýärdim. Birdenem edil şol deňiz gaýyp boldy-da duruberdi... Müň gezek gaýtalanan, lenji çykan hadysa: men, sen, ol, soňra-da telefon. Bu zatlaryň bary Rasimiň toýy güni başlandy..

******

-Biz bäş kişidik-diýip, Feruz sözüni dowam etdi. –Hälki: “Olar bäş sanydylar” diýen kino bar-a?! Şoňa meňzeş. Men, Kemal, Myrat, Rasim we Seýmur. Bizi ýeke-ýekeden eýelediler, boýnumyza boýuntyryk saldylar. Hawa, özünem, ine, şular-öz hanymlarymyz saldy. Häli öýde-de birtopar çaga-çuga, gazan-tabak diýen ýaly derdeserler bar. Hawa, biziň başymyzdan külpet inderdi, özem erbet indi.

Hemmeler gülüşdiler.

-Ynha, bu gün dostumyz Rasim hem sallah ýigitleriň hataryny terk edýär. Nätjek-dä. Elbetde, men degişýän. Rasim, Farida bagtly boluň. Men size bagtly durmuş, uzak ömür, jan saglyk arzuw edýärin. Ogully, gyzly boluň. Siziň saglygyňyza bada göteripdik, ýene-de götereliň. Ine, bu badany bolsa, aramyzdaky soňky “mogikan” –gadyrdan dostumyz Seýmuryň saglygyna götermegiňizi isleýän. Ol ýaş, sallah ýigit bolup, biziň ýitiren “jennetimiziň” iň soňky wekili hökmünde köňlümize teselli berýär. Sag bol, bilbil bol, ýöne kapasada bolma.Hemmeler maňa bakýardylar, kikir-kikir gülküleriň, badalaryň şaňňyrdysynyň arasynda özüme tanyş ýüzleri görýärdim. Olaryň ýüzlerinde şatlyk,birazajygam haýran galyjylykly garaýyşlar bardy. Myhmanlar dagansoň hemmämiz-Feruz, Kemal, Myrat dagy we olaryň gelinleri bilen bilelikde öýümize dolandyk. Şäheriň gijeki, boşlaň köçelerinden ýöräp barşymyza, Feruzyň gelni meniň golaýyma süýşdi:

-Hawa, Seýmur, haçan siziň toýuňyzda oturarys?

Men:-Bu golaýlarda-ha däl-diýdim.

-Näme üçin? Ýa-da sen bu tentegiň gepine ynanýaňmy?-diýip, ol adamsyna gysmyljyrady.

–Näme-de bolsa, sen maşgala durmuşyny jähennem saýýan bolmaly.

-Ýok-la, ol özüne mynasyp gyzy tapyp bilenok-diýip, Feruz gürrüňe goşuldy.

-Dogry dälmi? Eşidýäňizmi ýigitler. Geliň, Seýmura özümiz gelinlik tapalyň. Seniň üçin Bakuwyň iň naýbaşy gyzyny tapsak, öýlenermiň, hä?

Men:-Gürrüňi bolmaz!-diýdim. –Ýöne bir şert bilen:ony häziriň özünde tapyp bermelisiňiz. Ertire galsa, peýdasy ýok. Pikirimdem dänerin.Kemal:-Gadyrdanym-diýdi. –Gijäň bir mahaly saňa gelinligi nireden tapaly? Onsoň hem sen biwagt çagy ýeke özi köçede entäp ýören gyza öýlenmersiň ahyry?

-Düşnükli. Aňryýany bilen mamlasyňyz. Onda bu gürrüňe şu ýerde nokat goýalyň.

Meniň bir teklibim bar. Geliň, Seýmura telefon arkaly gyz tapalyň. Honha, golaýjakda telefon tünegi hem bar.-Ajaýyp pikir. Emma meniň iki köpükligim ýok.

Ýerli-ýerden maňa iki köpüklik uzatdylar.Men mähetdel etmän, telefon tünegine girdim:-Baş üstüne, aýdyň. Feruz ilki sen aýt!

Feruz:-Kelläňe gelen belgileri aýlaber. Meselem-diýip, birden sözüniň yzyny aýtman dymdy. Biraz ikirjiňlenip durdy-da:-Aý, ýok, gardaş-diýdi. –Bilýäňmi näme, bu örän jogapkärli iş. Soň bir gün gaýneneň bilen oňuşmasaň, ömürboýy eliň meniň ýakamda bolar.

Men:-Meniň bir teklibim bar-diýip, hemişe orta bir teklip oklap ýörýän Feruzyň gelni gepe goşuldy.-Hiç kimiň jogapkärçilik çekesi gelenok dälmi?! Geliň, onda şo jogapkärçiligi paýlaşalyň. Herimiz bir belgiden aýdalyň.Hemişe gelniniň teklibini goldaýan Feruz:-Tüýs bolaýdy. Iki-diýdi.Men iki belgisini aýladym.Gelni:-Dokuz-diýdi.Kemal:-Nol-diýip, gelnine garady. –Indi seň nobatyň.-Men...bilmedim-dä...Bolýa, goý, dört bolaýsyn!Myrat:-Bäş-diýdi,

Diňe Myradyň gelni gürlemäge ýetişmedi, çünki tutawaçdan üzlem-saplam zoguldy sesler eşidildi.

-Meniň geljekki gelinligim uklap ýatyr öýdýän-diýip, men wäşilige saldym.Hemmeler gülüşdi. Men tutawajy şakyrdadyp ýerinden asdym.Soňra ýene-de ýolumyzy dowam etdik. Ýuwaş-ýuwaşdan her kim öz öýüne sowuldy, näme üçindir, juda ýekesiredim. Deňziň kenaryna gitdim, uzak wagtlap bireýýäm çolaran giň köçede gezim etdim. Birdenem, hälki, bir sagat mundan öň oýun-degişme bilen aýdylan telefon belgileri ýadym düşdi. Gije sagat ikidi. Men golaýdaky telefon tünegine girip, deşige iki köpüklik okladym-da, belgileri aýladym. Aňyrdan zenan sesi eşidildi. Bu ukuly ses däl-se, biraz ýadaw, gijäniň bir mahaly özüne jaň edilmegine geňirgenýän zenan sesidi.-Aýdyberiň, diňleýän.

-Gowumyň?

-Gowumyň? Siz kim?

-Bu men... Geliň, tanyş bolalyň. Men kesgin jogaba garaşýardym. Şu pursat hut ýüzüne şarpyk çalynjak ýa-da öňünde bat bilen gapy ýapyljak adamyň ýagdaýyna düşüpdim. Emma şarpyk hem çalynmady, gapy hem ýapylmady. Ol öňküsi ýaly ýuwaşlyk bilen:

-Bu wagt tanyşmak üçin biraz gijräk bolaýmasyn?-diýdi.

-Asla beýle däl. Tersine, tüýs wagty. Men ýaňyja iň ýakyn dostumyň toýundan çykdym. Ol meniň iň soňky sallah dostumdy. Özem maňa onuň toýundan däl-de, ýasyndan gelýän ýaly bolup duýulýar.

-Waý, waý. Näme üçin beýle diýýäň? Özüň heniz öýlenmediňmi?

-Ýok. Siz näme? Siz durmuşa çykdyňyzmy?

-Tanyşlygyň başky pursatlaryndan köp zady biljek bolýaňyz, öýdýän-diýip, ol güldi.

-Meni bagyşlaň. Men...ötüki, telefon bezzatlaryndan däl. Bilýäňizmi näme, men diňe...näme üçindir, özümi diýseň ýalňyz duýdum-da, kimdir biri bilen gürleşesim geldi.Bolýa, ýöne meniň telefon belgimi nireden aldyňyz?

-Bu bütinleý tötänlikde boldy. Kelläme gelen belgileri aýladym, bolany şü.

-Geň galaýmaly, gaty täsin öz-ä.

-Bilýäňizmi, dostlarym gidensoň, özümi diýseň ýalňyz duýdum.

-Bolýa, munuň aýby ýok.

-Siz bilen duşuşyp bolmazmy?

-Ýok, ýok, bu mümkin däl. Geliň, şeýle gürleşeli. Häzir gaty giç. Öýüňize gidiň-de, uklap, dynjyňyzy alyň. Ertir oýananyňyzda hemme zat ýerbe-ýer bolar. Walla, ynanaýyň.

-Ýöne men sizi görmek isleýän. Iň bolmanda gürleşmek isleýän.

-Indi telefon belgimi bilýäňiz. Irden turanyňyzdan soň, meniň bilen gürleşesiňiz gelse, baş üstüne, jaň edip bilersiňiz!

-Çynyňyzmy?

-Hawa, çynym. Indi bolsa, gijäňiz rahat bolsun!

-Siziňem. Men ertiriň özünde size jaň ederin. Belki, siziň üçin hem gülkünçdir, emma tutawajy asyp, boşlaň köçelerden ýöräp barşyma, indi menem ýeke däl ýaly, meniňem durmuşymda kimdir biri peýda bolan ýaly bolup duýulýardy. Ernim bir ýere ýygnalman ýylgyryp gelýärdim.

(Dowamy bar)

Sensizlikde her sekundym asyrka,

Neneň dözýäň aýralyga, asyl-ha?

Her bir sözüň ýüregimden asylsa,

Belki-de bilýänsiň, belki bileňok.

Gowy däl ýagdaýym.

Aldap bilemok.

Kalpdan çyksa duýgularyň tebigy,

Wagt bolmaz ähli ýaraň tebibi.

Sensiz bolsam "şowsuzlygyň garyby"

Belki-de bilýänsiň, belki bileňok.

Gowy däl ýagdaýym.

Aldap bilemok.

Ýasamadan has ýasama gülkileň

eýesikäm,

şolam ýarar, gör, kime.

Öwrülmeseň şor maňlaýmyň görküne,

Belki-de bilýänsiň, belki bileňok.

Gowy däl ýagdaýym.

Aldap bilemok.

Sen diýýärkäm ykbalymyň taýyny,

Haýyş, berme, ýalňyzlygyň paýyny.

Ýyldyz däl-de, isleýärkäm Aýymy,

Belki-de bilýänsiň, belki bileňok.

Gowy däl ýagdaýym.

Aldap bilemok.

Ylham GURBANALYÝEW

Nobatdaky Edebiýat agşamy.

Gelerin, görerin diýseňiz!

...Hemişekilerinden ir oýandy. Töweregi üçin, ony tanaýanlar üçin geňlikdi. Ol bu gün gerinmedi hem. Toýa, özem öz toýuna taýynlyk görýän ýalydy bolşy. Hemişe bulam-bujar edip turup gidýärdi, a bu gün emaý bilen, usullyk bilen, juda tertiplilik bilen ýorgan-düşegini ýygnady. Indi bir aýdyr, ýatanda gapdalynda saklaýan gülgüne gyz ýaglygyny üýtgeşik bir mähir bilen sypady. Birenaýy ýylgyrdy. Bu ýylgyryşda kän-kän ýatlamalaryň, kän-kän arzuw-hyýallaryň ýatandygyny bilmek üçin oňa azajyk beletlilik ýeterlikdi. Beýleräginde ýatan portfelini eline aldy. Ony açyp, kimdir birleriniň suratlaryny çykardy. Gözüniň alnynda, ine, birnäçe adamyň keşbi dur suratlara siňen. Her suraty eline alanda ýüzünde üp-üýtgeşik duýgular peýda boldy. Hem ýylgyrdy, hem bozuldy. Içinde, ho-ol içiniň bir künjeginde düşündirip bolmaýan titremeler döredi. Galpyldady... Birdenem hasyr-husur suratlary ýygnady-da, adaty däl hereketleri bilen mübtela boldy. Otagyndaky çalam-çaş bolup ýatan eşiklerini tertipläp başlady. Asgyçdan asmalylaryny asdy, epläp goýmalylaryny epledi. Ýöne, näme üçindir, ýuwmalylaryna, ütüklemelilerine üns bermedi. Olary hem edil bolmaly ýerlerindäki ýaly ýerlerde ýerleşdirdi. Eline bir ýazylyp gutarylmadyk ýandepderçäni aldy. Agdaryşdyrdy. Käbir sahypalarda ýylgyrdy, käbir sahypalarynda azajyk gussa batdy. Ony hem emaý bilen ýerinde goýdy-da, portfelindäki suratlara ýene elini uzatdy, özem bialaç... Otagyndaky işlerini tamamladym etdi-de, aşaky gata düşdi, maşgalasyndakylaryň öýde bolanlary bilen salamlaşdy, özem adaty däl duýgy bilen. Öýde dällerine hem gaýybana salam berdi, salam aldy...

Hammama girdi. Ömrüne namaz okamadyk, şonuň üçin täret hem almadyk halyna, bir kemini goýman täret aldy...

Ertirlik naharyny edinmedi. Iň gowy görýän eşiklerini geýdi: iň gowy görýän köýnegini, penjegini geýdi, iň gowy görýän galstugyny dakyndy. Atyr sepindi. Birkemsiz taýyn boldy köpe çykmaga. Çykdy. Ýürekdeşdir öýdýänleriniň ýanyna bardy, adaty gümür-ýamyr etdi. Ýöne hoşlaşanynda welin, üýtgeşik bir duýgular bilen hoşlaşdy. Gün öýle boldy. Hemişeki gelýän naharhanasyna geldi. Ýene, adatdakylar ýaly, nahar iýmedi, kofe içdi, köp içdi. Heziller edip çilim çekdi. Iňrik garaldy. Öýlerine gelip, agşamlyk naharyny iýdi ýakynlarynyň KÄBIRI bilen. Öz otagyna geçdi. Iň bir tämiz eşiklerini geýdi we birnäçe wagtdan bäri peýläp ýören ýerine ugrady...

...Ertesi ony iň bir gowy sözler, ýatlamalar bilen soňky ýoluna ugratdylar. Şeýdibem birnäçe Arzuwlar, Umytlar, Hyýallar eýesiz galdy...

✏Sapa HOMMADOW

Çaga kalbyň bilen gelip dünýäme,

Gussalarmy oýun bilen ýapansyň.

Joşgun berip, röwşen berip her ýana,

Güýzde gelen müdümilik baharsyň.

Enaýy, eýjejik gözellik sendiň,

Senden görk alan deý gülleriň bary.

Garaşmadyk wagtym, duýdansyz geldiň,

Ykbalyň näbelli sowgady ýaly.

Dürli soraglardan bulaşýar kelle,

Duýguly dünýäde sermenýän tentek.

Jemin jemlemeli, aýtmaly pille,

Ynjarsyň öýdübem eýmenýän entek.

Kalbyn görkezmäge pursat araýar,

Ilkibaşdan gödek diýip öýdeniň.

Günbe-günden has tutaşýan, köreýän,

Neneň aýdyp bolar "seni söýdüm"-i?

Ylham GURBANALYÝEW

Owadan, päkize arzuw-hyýala

Meň ýüregim üýtgemejek watandy.

Bu gün şol paşmadyk arzuwlam üçin

Öz çagalyk ýyllarymdan utandym.

Uzak menzilleriň külpeti hakda

Dek bäş ýyl owalam etmändim pikir.

Ýöne ýamanlaryň duşuşy ýaly,

Oňatlaram duşdy, Hudaýa şükür!

Şükür, ýolda ga:ldyrmady ykbalym,

Köp ýerde ýykyldym, şonça-da turdum.

Hossarsyz bolmadym agyr günlerde

Hem dostsuz bolmadym ýeňletjek derdim.

Setirlem ezilse, duýgulamdandyr,

Gursagymda öýlänçi bar diňmedik.

Şoň üçinmi, köplenç, öz derdim bile

Gamgyn-gamgyn aýdymlary diňledik...

Bilsemem, bilmedik boldum käteler

Aşyma duýgulaň awy gatanny.

Çünki meň ýüregim, ykbalym, dünýäm

Arzuwlara müdimilik watandy.

✏Sapa HOMMADOW