sabyrly
09.10.2024 12:18
Sen ýadyma düşdüñ...
Ne gözel ukymyñ böwrüni deşdiñ.
Bir ýerden damagma dykyldy kesek,
Ýetim çagajygyñ gözleri deýin,
Çäresiz kalbym.
Unudyp bolýarmy görsek, görmesek,
Kän ertirler geler şu gün ölmesek.
Ýalňyzlygym senden wepaly çykdy,
Yşgyma bürenen akja gargalar,
Gözlerim çokdy.
Üstünde gezýänñe ýer namys etse,
Gursakda göterdim, sesim çykmady.
Aýyplaryň gelip gapym jyklady,
Bakmadym...
Bazara çykaran gylyklañ gördüm,
Hatda seniñ üçin, men gözli kördüm...
Sen hakda aýdylan myş-myşlarada,
Gulagym dykdym,
Gözlermiň görmeýän ýerlerne bukdum.
Men saña köñlümiñ köşgüni berdim,
Ejiz tarapymdan yşk bilen urduñ.
Senem söýen dälsiñ, men deý özüñi,
Her gün bir uçutdan özüm okladym,
Seni ýokladym.
Saña duşsam aýtjak sözlermiñ baryn,
Setirlemde sakladym.
© Süleýman Teķäýew
9
55
sabyrly
07.10.2024 20:57
Şatlygyma gam düşüpdir,
Ýürejigim çölleşipdir,
Çukurlaşypdyr dertlerim.
Gözlem yşyk gözläp sermenişipdir.
Geñgörüşipdir,
Içimden bakan.
Kimleriñ gözünde, düşüpdir baham.
Dahanym ezildi gussañ ýagşyna,
Haýran sagatlaryñ gyssanaýşyna.
Hemmeler bir ýana meñ özüm birýan,
Barýan,
Ýol-ýodanyñ nemli ýerinden.
Serimden bugaryp akýar saçlarym.
Dilimde dogaly sanawaçlarym,
Ýolum aç meniñ!
Diliñe bitmeýär ähli aýdanyñ,
Başga zadam elden gelmez nädeýin.
Aýyplarym desşik tapsa sümüljek,
Gözüñ ýumup gitseň, geçýär diýseler,
Ýere gömüljek.
Berdaşym galmady ýeke çümmüjek.
Düzüldi kalbyma çekýän ejirim,
Üzüldi Umydym baglan zynjyrym.
Başgalara syr bermäge utandym,
Kagyzym, galamym size tutundym.
Gutardym...
© Süleýman Teķäýew
6
35
sabyrly
26.09.2024 19:32
Men ýalandan, ýananlardan,
Ýadadym ýalany ýasaýanlardan,
Ýalan ýaşaýanlardan,
Ýaşyrýanlardan.
Göwnüm her bir söze ynanýanlardan.
Iblisiñ içinde görýän perişde,
Herişde mañlaýym urýan boşluga,
Üzülmez bergim bar geçen ýaşlyga.
Öz toslan zadyma ynanyp bilýän,
Kä özümden gorkup añalyp bilýän.
Şlýapadan towşan çykarýanlar köp,
Iñ arzan bahadan satylýar edep,
Sosial ulgamlar bolupdyr mekdep.
Ýaşym üç onlukdan aslyşýar häli,
Ömrüm uzak düýşiñ içinde ýaly,
Içimde ýaşaýar ýene bir däli.
Ruhum kararsyzyñ baryp ýatany,
Pikirlermiñ ýok belli bir watany.
Hatarly ýollarda sabrym gutardy,
Birmeñzeş däldigime nebsim utandy,
Ýüze gülüp dili bilen atdylar,
Köçede gygyryp ýalan satdylar,
Näme etse özlerine etdiler.
Hemme bilýändir,
Dünýe ýeke günde kezzap bolmandyr,
Ýalançy adyny ýatyp almandyr.
Soñsuz ýola birek biregi süýräp,
Barýarys nirä?!
© Süleýman Teķäýew
11
64
sabyrly
08.09.2024 13:19
Çaga gözüm bilen dünýä sereden,
Kämillik açary eziz mekdebim.
Ýaşlygmyñ ýazyna şaýatlyk eden,
Hoş gal deñ duşlarym, kitap depderim.
Ylym terbiýeden ýetirdiñ ýüküm,
Bilýänin gysganman paýlan mugallym.
Sagbollaşyp gitmek ýeñil däl eken,
Çeken azaplarñyz bir size mälim.
Çagalyk gol bulap çagyryp durmaz,
Süýji oýunlardan almarys lezzet.
Ýetginjeklik bize ynjalyk bermez,
Kime bagt berer, kimlere ezýet.
Duýgulam oýarýar soñky jañ sesi,
Ýollarymyz arzuwlara äkider.
Yza dolap getirmez ol, hiç kesi,
Synaglar ynsany taplap, berkider.
Atylan seçme deý gideris herýan,
Täzeden bir ýere üýşmek kyn bolar.
Sanalgy günleri ýele sowurýan,
Uly, kiçi aladalar kän bolar.
Söýüp deñänim siz göwher daşyna,
Kalplary, kalbyma kybapdaşlarym.
Ýetenmizde Göroglynyñ ýaşyna,
Duşmak nesip etsin klasdaşlarym.
© Süleýman Teķäýew
10
72
sabyrly
01.09.2024 11:54
Lezzetli ukymy setire çalşyp,
Ýöredýän galamym dişimi gyjap,
Bir gözel mar bilen ýatdy çolaşyp,
Namysyn aldawa, ýalana harçlap.
Oglan iş bitirdi, yzyn ýitirdi,
Suwa gaçan duza dönäýdi birden.
Gyz özüne satyn aldy oturdy,
Ýumruk deý, ýüregne sygmajak derdin.
Döredi içinde kiçijik ynsan,
Haçana çen saklanar ol, gizlenip.
Dünýäleri sowgat berjek mähriban,
Salgym boldy tapylmady gözlenip.
Oba gezdi gepden doly çanagy,
Hossarlary ýere girdi ölmezden.
Kim günäli, Ene-Ata çagamy?
Başy daşa urýas bilip, bilmezden.
Aýyrtmaklyk çäre boldy şo pursat
Kalbynyñ parçasyn gopardy lukman.
Eneden çagadan soralman rugsat,
Kowuldy dünýäden bir bölejik jan.
© Süleýman Teķäýew
19
88
sabyrly
23.08.2024 11:16
Gözleňde özümi owadan görýän,
Ýyllar görk-görmegim ogurlap gitdi.
Belki-de, sen maňa teselli berýäň,
Aýna bakdym, baryn dogrulap aýtdy.
Men diýen wagtymdan oba göçüpdir,
Mañlaýymda görünipdir joýalar.
Şemala daranýan saçlam düşüpdir,
Maňa dertlerimden düşen paý olar.
Göwnüm Şükür bagşyň sazyny çalýar,
Döwrüň ýyndamlygna ýetip bilmerin.
Kalbym kämillerden rahatlyk alýar,
Barym bilen kabul edäý dilberim.
Dillerime derek sözlär galamym,
Bilýäň-ä içimi, gulplanan sandyk.
Asla köçesinden geçmen ýalanyň,
Utanjaňlygymam könelen endik.
Seni özüňdenem gabanyp ýörün,
Öýkeläp bilemok ýigrim dört sagat.
Hoşamaý sözüňe gabaryp ýörün,
Sol ýanyna bakýan, möhüm däl syrat.
Sabrym dünýä sygjak, bilmen özgerip,
Öňde ömrümiziň sowulmaz ýazy.
Iki dünýe söýjegiñe söz berip,
Ýedi ölçäp kes-de, bolaýgyn razy!
© Süleýman Teķäýew
17
28
sabyrly
20.08.2024 11:02
Düýşlerimde
Düşlediň.
Maňa heniz beýle ýakynlaşmadyň.
Sussupes ruhumyň keýpi göterler,
Taryplara ýuwan ýaly setirler,
Aradan aýryldy kilometrler.
Ädilmesiz ädimlerem ädilýär,
Alma ýaňaklardan posa gädilýär.
Gujagmy bezeýär Jennet jemalyň,
Tapyşdy taýyna teşne bu ýürek,
Ýüpek saçlaryňda taýýar ellerim,
Iň süýji lezzetden datdy leblerim,
Gelmegiňe kän garaşdym leglegim...
Çaýymyzy süýji gürrüňläp içdik,
Arzuwlardan ganat ýasanyp uçduk.
Gözleriňde mähir, dişiňde gülki,
Eliň aýasynda ýüregmiň mülki,
Men seniňki, sen meniňki.
Sensiz kalbym,
Ýarym göwün bir ýetim,
Dünýäm seniň bilen bolar büs-bütin.
Meýletin,
Bedenim terk etdi ruhum,
Uky ýarym ölmek dälmi ahbetin?!
Hanha saçyn ütüp otyr aýralyk,
Ar alyp bilmedi intizar edip.
Bagtyň çür başyndan aýak sallaýas,
Gaýgy-gussalaryň jaňyn almaýas.
Galgaýas,
Yşyklar bürän asmanda,
Nämeler bolmaýar ýürek islände.
Oýarmaň,
Sagadyň dili süýşmesin,
Küýsediňmi,
Düýşlerimde düşlediň!
© Süleýman Teķäýew
15
36
sabyrly
14.08.2024 11:58
Şäherde säher.
Daşarda tomus dur,
Kalbymda bahar.
Uka batan jaýlar açanok gözün,
Käbirleri bolsa, eýýämden oýa,
Aman örenine şükürler diýe,
Elin açyp, Kybla bakdyrýar ýüzün.
Tämiz howa bilen ýuwýaryn ýüzüm.
Ýüregim ýuwýaryn ýagşy niýete,
Saýlanyp bir çete,
Synlaýan söýüp.
Turuň kuwwatlanyň,
Aýňalyň diýip,
Kofe ysy gapylary kakyp ýör.
Irdenki ýygnaga jemlenen guşlar,
Seýil baglarynda aýak çekipdir.
Ulaglar başlady sesli gohuna,
Aladalar gaýyşyp ýör ýollarda.
Bir bölejik umyt ne hyýallarda,
Ýat tutan goşgusyn aýtýar ýadaman,
Başy göge ýeten ene guwanýar,
Ullakan ýürekli kiçi adama.
Özün aldap gelýär gije gözeli...
Öýüne howlukýar il barýar işe,
Gözi açyk halda, ýol çyralary,
Imrindi düýşe...
© Süleýman Teķäýew
23
37
sabyrly
03.08.2024 22:11
Ejizje bedenim,
Ejirden doly.
Ýama-ýama ýaralarmyñ sargysy,
Ýazgydymyñ köýen ýaly algysy,
Bolýan ýerim,
Dertlileriñ salgysy.
Belki göwnüme...
Halym gören şükür eder gününe,
Allany ýatlap.
Galñan gussalarym,
Gaýýan bentlerim,
Hasabyn ýitirdi hasap depderim.
Gözümden umydyñ jadysy gaçdy,
Edýän arzywlarym adatylaşdy.
Ömrüm çolaşdy.
Sabrymyñ suwuny sykyp içdiler,
Kiçijik dünýämi ýykyp geçdiler.
Kaýyllyk baryndan geldimi rüstem,
Deñ boldy zeminiñ aşagam, üstem,
Dürtsem,
Duýmaýar, janly jesedim,
Görnüp duran zady ýazmak aýyp däl,
Wah, nädeýin,
Men Hezreti Eýýup däl.
Ybraýymam däl men, ody gülleden,
Synalarym doldy gurşun gülleden.
Gülmeden kesilen kemis ýüregim,
Hajymelik,
Hassalyk,
Sordy ýiligim.
Eldäki ýaragym kagyzdyr galam,
Bir gün bolar tamam,
...Hekaýam.
Galaýsam aman!
© Süleýman Teķäýew
15
21
