garlawac
04.08.2024 02:13
Golaý gelme penjirämiň öňüne,
Basgylama gök otlaryň üstüni.
Men seni söýüpdim, söýüpdim öňler,
Rahatlan, aglama, söýemok seni.
Janu-tenden ýaman gynanýan saňa,
Ýöne sen oýun etme gözellik bilen.
Neçün rahatlyk bereňok maňa,
Hem neçün özüňi horlaýarsyň sen?
Barybir men seňki bolup bilmerin,
Häzir men hiç kimi söýemok, eziz!
Söýmesem-de, gyýylýaryn halyňa,
Aýryl penjirämiň öňünden, eý, gyz!
Akmaklykdan söýen ekenim seni,
Ýatdan çykar, seretmän geç deňimden.
Söýmesem-de, gyýylýaryn halyňa,
Aýryl, aý, gyz, penjirämiň öňünden.
© Sergeý ÝESESIN
Terjime: © Atamyrat ATABAÝEW
14
73
garlawac
27.07.2024 17:11
Kän görsem-de gözel-gözel adamy,
Belki, görmedim men daşdanam boýuň.
Bilmesek-de kimdigiňi, adyňy,
Eýýäm bezäp goýduk ýaşajak öýüň.
Dostumyň salgyndan seni gözleýän,
Alysdan, alnymdan seni gözleýän.
Bu gözel dünýäniň gözel ýerinde,
Bilýärin, gezýärsiň sen meni gözläp.
Biriniň bakyşy syrly görünse,
Gozgalaň tapýansyň gyzlardan gizläp,
Menem ilden gizläp, saňa garaşýan,
Menem gözläp-gözläp saňa garaşýan.
Gaýnyňam aýap ýör gowja zatlary,
Diýip: «Sowgat bolar gelnime, guzym»
Näbelli gyz, bilemizok razmeriň,
Belki, dar, gysga bor, belki-de, uzyn.
Enem saňa diýýär: «Şol meniň ertäm»
Enemiň ertesi haçan gelerkäň.
Gelsene aýlardan, ýyllardan aşyp,
Ýyllar seni juda haýal getirýär.
Gel, bu ojak saňa ozaldan aşyk,
Onda saňa duş gelmedik mähir bar.
Geljegim seň bilen bile gelmeli,
Gel gyz, sen barybir bize gelmeli.
Italmaz Akmyradow.
17
227
