flowers_
21.08.2024 20:47
![]()
(dowamy)
Gaýragoýulmasyz ömürde gaýra goýulýan günler...
Aýgül Garaýewa.
Mysaly daşdan gözläp oturjak däl, çagakaň dünýäni duýşuň bilen, häzir belli bir ýaşy arka atanyňdan soňky duýjak bolşuň deň däl.
Ýadyma düşýär, çagakam durmuşyň meniň üçin täsinliginden ýaňa «Hemme adamlary gujaklap biler ýaly çaltrak ulalsamdym. Olaryň hemmesine özümi gowy gördürip, kömek etsedim» diýen ýaly arzuwlary edýärdim.
Daşary ýurtly ýazyjylaryň biriniň dünýäni öz bolşy ýaly ajaýyp görnüşde diňe çaganyň duýup bilýändigi, mümkin bolsa, özümiziň çagalyk duýgularymyza ýygy-ýygydan gaýdyp gelip durmalydygymyz hakyndaky ýazan iňňän täsirli eserini okap, pikir edýän, eger men çagakam şeýle arzuwlary eden bolsam, çaganyň dünýäni duýup bilşem hakyky bolsa, diýmek, meniň arzuwlarymdaky mähre teşne adamlaryň, kömege mätäç adamlaryň bardygy dogry bolmaly. Ine, şol adamlar bar hem diýeli, ýöne şol men hany?! Men öz-özümi ýitiripdirinmi?!
Aýyn bolmasa, «bäş günlük dünýä» diýmäge öwrenişipdiris. Dünýä bäş günlük bolsa, onda bu hallyň-sallyňlar näme?! Düýn elimiz degmän görüp bilmedik ýerlerimiz çar tarapdan bize seredişip otyrlar, ol ýerlerde bolsa müňlerçe adamlar. Ähli ýerde biziň öz ornumyz bar. Barmaly, görmeli, öz ykbalyň eçilýän her bagtly pursatyna mynasyp eýe bolmaly.
Bagt baýlykdadyr öýdýän bolsaň, bar, giden mal-mülk toplajak bolup ýakynlaryna ýeterlik mähir-muhabbet eçilmedik adamyň ýanyna, ony diňle. Hem-ä, onuň derdi egsiler, hem özüň baýlyk hakdaky eden pikirleriň bärdengaýtma, telekdigine göz ýetirersiň, ýa ol hakda öň ýetik sagdyn düşünjäň bar bolsa, ony berkidip gaýdarsyň.
Ýa-da goňşusynyň durmuşyny özüniňkiden bagtly saýyp, öz-özüni kemsidip ýörene duşup, onuň hem bagtlydygyny, ýöne goňşusynyňka meňzeş däl-de, başga, özboluşly bagtyň eýesidigini düşündirip bilseň-ä, has gowy. Bu meger, ol ynsanyň täzeden dünýä inmegine barabar täsin pursat bolup aňynda galar.
Bagtsyz adamyň ýoklugyna bolsa, özüm-ä edil her säher Günüň parlap dogjakdygyna ynanyşym ýaly ynanýaryn. Ýöne ol adamyň özi öz bagtyny duýup bilmese, ol nädip başgalara bagtly görünsin. Bagt hem, biziň sandygyň düýbüne oklanyp, haçan geýiljegi belli bolmadyk täze köýnegimiz ýaly, onuň ýüreginiň çuň düýbünde ýygrylyp ýatan bolaýmasyn?!
Şonuň üçin özümiziň, bir-biregiň bagtyny sözüň göni manysynda görüp bilmegi başaralyň! Pasly-bahara çalymdaş ömrümiziň her gününiň toýdugyna düşünip, gaýragoýulmasyz ömrümiziň gaýra goýlan gününe garaşyp, sandykda ýatan täze lybaslarymyzy geýip, ýürek töründe ýygrylyp ýatan öz bagtymyzyň elinden tutup, daşaryk — dünýä çykalyň!
14
23
flowers_
21.08.2024 20:43
![]()
Gaýragoýulmasyz ömürde gaýra goýulýan günler...
Aýgül Garaýewa.
«Durmuş syrly, täsin, hiç bir zady öňünden bilip bolanok» diýip, elli iki käkelesegem, öz käbir bolşumyz ýadymyza düşse, güljegiňem bileňok, gynanjagyňam.
Täze köýnek alyp, onam «Entek däl, nesip bolsa, soň bir gün geýerin» diýip, özümizden gysganyp, aýap ýörşümiz ýa-da nirädir bir täsin, gözel ýerlere gitmäge, gezelenç etmäge ýagdaýymyz doly ýetip dursa-da, «Bor-la, bu ýyl däl, indiki ýyl giderin» diýip, özümize Hak tarapyn «Al, ýaşa! Özem lezzetli hem manyly ýaşa!» diýip berlen süýji ömrüň bir aýyny, belki-de, tutuş bir paslyny ýüregimizdäki bitäýse-de bolup duran arzuwlaryň wysalyna ymsyndyryp geçirişimiz, hälki, durmuşy syrly hem täsin saýyp oturan akylly kişiniň etjek işine meňzeşmikä?!..
Aslynda, durmuş reňbe-reň, ýöne ol käte-käte nämüçindir bizi ýokardaky ýaly oýlara iterip, solak, birsyhly, ähli günler biri-birine meňzeş ýaly duýulýar. Ýogsa, günler biri-birine meňzär ýaly, hatda ýene birnäçe minutdanam biz bilen nähili täsin ýagdaýyň bolup geçjekdigini bilemzok ahyry! Onda näme, dogup-döreýşi keramata çalymdaş ynsan, täsinligiň, gudratyň güýjüne ynanyp bilmez derejede küteläýýärmi?! Biz beýle biparhlygyň sebäbini nireden gözlemeli?! Elbetde, öz içimizden, kalbymyzdan, ýüregimizden...
Pygamberimiziň «Ilki niýet, soňra amal» diýşi ýaly, ähli zat ýagşy niýetden başlanýar.
Niýet bolsa içiňde, has dogrusy, ýüregiňde döreýär. Ýaramaz duýgularyň ýürekde döräp öç alşynyň geňligini diýsene! Olar niredendir bir ýerden, haýsydyr bir kindiwanja ýaramazlygyň — ýerliksiz sözüň, bigelşik hereketiň netijesinde tüweleýläp gelýär-de, seniň içiňde uly bir harasada öwrülesi gelip dur. Ýöne ýagşy sözleriň, ýakymly hereketleriň esasynda döreýän şeýle duýgular welin, edil çyg odunyň ýanjak bolşy ýaly... Hatda öz-özüňi içden yzarlap otursaň, şeýle bir ýagdaýlaryň üstünden barýarsyň: seniň gaşyňda süýji dilli biri hut ertekä çalymdaş zatlary gürrüň berip otyr. Sen onuň bir sözüne ynansaň, onusyna, a belki, kyrkysyna ynanaňok. Göwni üçin «Hä, hawa» diýip otyrsyň. Belki şol wagt seniň ýüregiň oňa ynanasy, şol ynamyň neminden suwlanasy, seniň gursagyňda güle dönüp paşyrdap açylasy gelýändir. A sen bolsa, ol ynamy bokurdagyňdan aşak geçireňok. Diňe dilde «Hä, hawa»... Goý, ol sözleriň ýary dogry bolaýsyn, saňa ýarym erteki, ýarym çyna ynanmaga näme päsgel berýär?! Ýaman zada ynananyňdan, ýagşy zada ynananyň gowy dälmi nä?!
15
38
flowers_
21.08.2024 10:40
Maňa juda üýtgeşik.
Perwana pursatlaň,ýyndam ýyllaryň,
Aý-günleriň bir-birine ilteşip,
Ömür kerwenimi idip barmasy —
Maňa juda üýtgeşik!
Agyp-dönüp duran däli göwnümiň
Mahal-mahal ähli zatdan çetleşip,
Ýersiz-ýere özün ýalňyz duýmasy —
Maňa juda üýtgeşik!
Ýyndam atlaň beýge bökjek bolanda,
Bat almaga biraz yza süýşmesi —
Kä yza tesmeleň manysy dälmi,
Bu-da juda üýtgeşik!
Açylmadyk syr deý nätanyş günler,
Durlar, honha, bosagamdan jyklaşyp.
Olaryň gujagna alňasap barşym —
Maňa juda üýtgeşik!
Gökden düňderilip gaýdýan ýagyşlaň
Bu baglaryň anbaryna ys goşup,
Begenç gözýaşlarma meňzäp ýagmasy —
Maňa juda üýtgeşik!
Ynha, abşarylyp ýören adamlar,
Erte görseň, gumdur — ýeke üýşmejik.
Garaz, tutuş barlyk, bu uly dünýä
Juda-juda üýtgeşik!
Kakamyrat REJEPOW.
16
38
flowers_
20.08.2024 21:26
Hasap we netije.
«Eý nebsim, iliñ gülküsini, ýañsylamasyny, arkadan edilýän we günibirin ýetirilýän ýalan-ýaşryk gürrüñleri ýatlap, ýüregiñe agram salyp, her bir zady hasaplap oturma. Matematikadan ussat adam hem, durmuş meselesinde köp halatda gömük adam bilen des-deñdir. Hiç wagt öz aklyña, ukybyña, başarnygyña, baýlygyña, tanyşlaryña, ýakynlaryña, gara güýjüñe bil baglap, gözsüz batyrlyga esaslanma, özgeleri kemsitjek, gaýgylandyrjak, hasrata batyrjak sözleri aýtma, öz bähbidiñi, göwün islegiñi, nebsiñi ileri tutup, ýaşyrynlyk bilen ikiýüzli hereket etme, iliñ-günüñ şowsuzlygyna begenme, hesretli gününe heşelle kakma!
Döwran diýmek, aýlanyp duran döwür diýmekdir. Wagty gelende durmuş her kime gülüp bakar, şonda düýnki tekepbirler, şu günki ulumsylar har bolar, aýagyñdan çakan garynjany mynjyradyşyñ ýaly, ol päliýamanlary pelegiñ özi pyrlandyryp goýberer. Şonuñ üçin her bir zady hasaplap oturma, ýokarda biri bardyr, ähli zady şonuñ Özi hasaplap oturandyr. Ähli zadyñ dogry netijesini hem Şol çykarýandyr. Sen bolsa hiç zat hasaplama, birden hasabyñy ýitirip, hem bulaşyp, hem ähli zady bulaşdyryp oturma!
Ähli zady öz pikirñe muwapyk getirjek bolup, dünýäni düñderäýme. Hasabyñda bärden gaýtsañ, köp zat gözüñe artykmaç görüner, köp zady alnyñdan aýrasyñ geler. Emma Hudaýyñ ýaradan dünýäsinde artykmaç zat ýok-da, ýerli-ýerinde goýulmadyk zat köpdür. Hasabyñda öte geçseñ, köp zady gaýtadan ýugurjak bolarsyñ, göwnüňe jaýlamak islärsiñ. Emma, hiç haçan döräli bäri togalak bolan Ýer şaryny dörtburç şekile getirip bolmayar!
Ähli zady Hudaýa tabşyr!
Hudaýyñ hasaby örän takdyrdyr!
Ol örän adyldyr!
Şonuñ üçin hem, eý nebsim, meniñ ýalñyşlyklarymy hem, ýagşylyklarymy hem hasaplap oturma. Adamyñ edýän her bir işi , isle ýagşylyk, isle ýamanlyk bolsun, edil her bir söwdagäriñ banka goýýan goýumy ýalydyr. Uzak wagt geçmänkä Beýik hasapçy ony birnäçe esse göterimi bilen bize gaýdyp berýär welin, biz öz hasabymyzyñ öteräkdigini ýa-da kemterdigini añlaýarys. Gel gowusy, hasapsyz ýaşap bolmaýan bu durmuşda diñe özümize gerekli zatlary hasaplap ýaşabereli. Iñ dogrusy hem şudyr.»
Rahmet Gylyjow.
22
222
flowers_
15.08.2024 10:29
SAŇA AÝDASYM GELEN SÖZLERIM...
«Nireden ýadyma düşdüň?» diýme sen,
«Salam!» diýmek üçin düşdüm ýadyňa...
«Tallaryň boýnuna tama öýmesin
saraý» diýmek üçin düşdüm ýadyňa.
Ýogsa, men böljekmi ünsüň-üşügiň?
Tekepbir bolsamam, bilýän düşünip.
«Gül göwnüňden öýke buldun düşürip,
ýagaý» diýmek üçin düşdüm ýadyňa.
Göwnüňe degenin geň görüp ýören,
Göwnüm nämelere döz gelip ýörer?!
«Men — Adam bolmagy öwrenip ýören
zenan» diýmek üçin düşdüm ýadyňa.
Men maý tapsam, ugramakçy barybir...
Hiç bilemok adamlara garylyp.
«Bir gün ýarpy eser goýsam, ýarysyn
ýazaý» diýmek üçin düşdüm ýadyňa.
Biz bir gelýäs,
kepil ýokmuş ýenäge.
Bigadyrlyk bu gümanyň sebäbem.
Men welin, zat tapman seni deňäre,
«Halal!» diýmek üçin düşdüm ýadyňa...
© Aýgül Garaýewa.
18
40
flowers_
14.08.2024 11:20
Bir ýola asmana uçdum, ynanyñ,
Bagtyñ gapysyny açdym, bir ýola…
Şonda maña ganat berdi ynamym,
Yşk meni şol hala saldy bir ýola.
Bir ýola bar zadyñ deñinden ötdüm,
Ýapdym gaýgy-hasratlaryñ işigin.
Bir ýola ykbaly serpaýdyr öýtdüm,
Düşüp ýorgudyna süýji düýşümiñ.
Bir ýola ynandym, ynandym çyndan,
Söýeniñe degýä diýip ömrümi.
Şol gezek, bir ýola… Bagt gapysyndan,
Ogurlatdym gaýyp ýören göwnümi.
Ähli zat kem-kemden geldi durkuna,
Oýandym, ynanyñ, ynanmañ hala…
Ömrüm gussa ýesir aldy durşuna,
Şondan soñ gam baky myhman hulkuma,
Ynamym bürendi şar gara şala,
Sebäp…
Yşk meni unutdy birden, bir ýola.
Gülşirin Hanowa.
20
23
flowers_
12.08.2024 18:28
Salam Öwrenmeliň ajaýyp agzalary!
Bu gün Öwrenmelide 1 ýaşapdyryn, ýagny 1ýyl bolupdyr şu programma agza bolanyma🤗.
Gar, ýagyş diýmän, yssy, sowuk diýmän, arman-irmän, ýaltanman öwrenmelide bir ýyl bäri ýaşapdyryn:)
Uly ýaşly, kiçi ýaşly Ynsanlar bilen söhbet etmek ýa-da sessizje oturyp teswirleri okamak meniň üçin gyzyklydy.(dawalyrak günler has hem gyzyklydy😁).
Indi, Sizden men baradaky pikirlerinizi teswirlerde galdyrmagyňyzy islesem köp zat isledigim bolmazla:)
(Gowy, erbet umuman garaýşyñyzy bilmek isledim, bu hem bir ýatlama bolardy maňa))
28
334
flowers_
06.08.2024 18:16
KERIM GURBANNEPESOW: “WESÝETLER BOÝUNÇA”
Çagakak «Aglamak utanç!» diýdiler.
Jahylkak «Aldamak utanç!» diýdiler.
Şeýdip endik etdik aglamazlyga.
Şeýdip endik etdik aldamazlyga.
Diýdiler: «Köplükde gägirmek aýyp».
Diýdiler: «Köçede sygyrmak aýyp».
Diýdiler: «Meýlisde geçmäkäň töre,
Hakyň barmy? Törüň özünden sora!»
Ýene-de diýdiler: «Ulalyp ýaşyň,
Garaja gyl bilen basyrlar döşüň».
«Döşüňe bitýänçä şol gyl – diýdiler.
Günäňi geçerler, ogul!» diýdiler.
«Döşüňe bitensoň şol gyl – diýdiler,
Döşüňe mynasyp bolgul!» diýdiler.
Diýdiler: «Dünýäde nämedir gyt zat?»
Üç gezek diýdiler: «Ussat! Ussat! Ussat!»
«Näçe gyt bolsa-da ussat – diýdiler,
Çyn şägirt ondanam gyt zat!» diýdiler.
«Öwrenip ilkinji harpy – diýdiler,
Gomalar şägirdiň galpy!» diýdiler.
«Galp şägirtden boluň hüşgär!»
«Emer-de, emjegňi dişlär!» diýdiler.
Ýene-de diýdiler: «Ulamy-kiçä,
Öljegňi bilseň-de, ýalbarma kişä!»
«Diňe bir adama ýalbar!» diýdiler.
Onuňam adyna dilber diýdiler.
«Aýyp däl näzini çekmek – diýdiler,
Näzden ýüzün sowan – akmak!» diýdiler.
«Ýene iki merde ýalbarmak bolar –
Diýdiler – ene hem atadyr olar».
«Ataňa ýalbarsaň – galkynar ruhy».
«Eneňe ýalbarsaň – kemeler ahy»,
«Kim etse şolara tagzym – diýdiler,
Işi rowaç, ýaşy uzyn!» diýdiler.
...Ýene kän edepleň tutdular adyn.
Diýdiler: «Gabanma özgäň şöhratyn!»
«Gabanma zehiniň ezelligini!»
«Gabanma öz joraň gözelligini!»
«Gabanma öz äriň gerçekligini!»
«Gabanma öz gelniň alçaklygyny!.
Ne näzlerin, ne-de sözlerin gaban,
Diňe oýnaklatsa...
gözlerin gaban!»
Diýdiler: «Erkekden belentdir aýal!»
«O nämüçin?» diýip berdiler sowal.
Jogabyn berdiler: «Gutaryp ömrüň,
Ýagty dünýä bilen hoşlaşsaň bir gün –
Aýal är ojagyn saklar – diýdiler,
Söýgiňi müň kerem haklar!» diýdiler.
«Çagalaryn iýdir, geýdir – diýdiler,
Şeýdip ýaş ömrüni köýdir!» diýdiler.
«Emma beýdip bilmez erkek – diýdiler,
Bu babatda pesdir entek!» diýdiler.
«Altmyşdan, ýetmişden geçse-de saly,
Gözlerin ýumdumy eziz aýaly –
Ýatdan çykyp wepa, ygrar – diýdiler,
Ikinjiň gözlegne ylgar!» diýdiler.
...Diýdiler, diýdiler, diýdiler kän zat.
Käbirisi aňsat. Köpüsi kyn zat.
Aňsadyn – hemmeler başar – diýdiler,
Kynyn başarmakda iş bar – diýdiler.
Kyn hem bolsa,
Şudur wesýet – diýdiler.
Diňe kyn zat –
Şol mukaddes! – diýdiler.
19
46
