Her ýürekde bir bendi bar
Bak, garynjaňam derdi bar.
Bu ömür saňa bendiwan,
Yrylybam, yrylmadyk.

"Söýme diýýäň "
- Elimdemi?
Heý, bir kelläň ýerindemi?!
Kömürdemi, demirdemi
Yrylybam, yrylmadyk.

Meňzeş - ýürekleň urmasy,
"Ýok" diýip boýnuň burma, şu!
Gerekmi "süýjiň burmasy",
Yrylybam, yrylmadyk.

Gülkileriň sähere heň,
Senli gyşam bahara deň.
Ýadaňokmy bahanadan?
Yrylybam, yrylmadyk.

Bir çen boldy, goýaý indi,
Boýnuňajyk alaý indi,
Almasaňam hemme bildi...
Yrylybam, yrylmadyk.

Ylham GURBANALYÝEW

Dünýäň baýlygy näme,
Doýmasa garny ajam.
Bahar baharmy eýsem,
Gelmese garlawajam.
Dymyşlygy söýemokdym gürleýänçäm
Daşymda senden başga gürleýän kän
Içimde diňe sen, bilmeýän kän
Diýýäni kän, tapylar taýyň
Ýyldyzlar ornuny tutmaz-a ýekeje Aýyň
Bilýäňmi, arzuwda gaýyp
Oýun edip deňärdim süýtli çaýa
Ýa-da alaja
Sen-ä akjadyň, menem garaja
Ýatladyň-a, güläý çalaja
Aýralygyň bolsady emi
Dolsadym seni - günlerime,
Günlerimem gojalmaz soňra
Menem manysyz goşgy ýazmazdym,
Bolmazdym ýaňra
Bolmazdym telbe,
Isleseň bolşumy bir ömür geňle!
(Geň göreniň alnyňamyş...,
bolsunda hernä...)
Dünýäni bir minutjyk pauza goýup
meni diňle,
Haýyş!
Gussalara berme...!

Ylham GURBANALYÝEW

Al ýaňaklaň elwan güle çalymdaş,
Sada ýüregimiň arzylan gyzy.
Ikimizem şygyr ýazýas, galamdaş
Sada ýüregimiň arzylan gyzy.

Göwnüňe almagyn diýseler ýygra,
Käteler gyşyňam howasy çigrek,
Ýazyber, geziber sygynda şygra,
Sada ýüregimiň arzylan gyzy.

Tebigat beripdir bir ajap görki,
Beripdir - edebi, akyly, erki.
Bagtymyz bir ýere duşandyr, belki
Sada ýüregimiň arzylan gyzy.

Sen owadan,
owadan sen,
owadan,
Peri-peýkerdenmi,
Hüýrdenmi, aslyň!?
Seni gören bendäň bagty oýanar,
Seni gören bende ýitirer aklyn.

Ýaňy dogan Aýdan,
gyýkmajyk Aýdan
Seniň gaşlaryňa düşüpdir kölge.
Heser bile bulduraýan dideleň,
Garamyk gözleriň yşykdyr köňle.

Ýaňaklaryň aly—
säheriň agy,
Ysgadygyň melul eder ysyna.
Çalaja çyzylan gyrmyzy lebleň
Janym alýar meňzäp posaň yzyna.

Lal biçäre seni görse dil açar,
Dilli lal bor: owadan sen, owadan!
Saçlaryň goýberseň çeşme deý akar,
Göwherden jyga ol
Başa orasaň...

Nobatguly REJEBOW

Sen örän owadan,
Örän owadan,
Hatda saňa seretmäge çekinýän,
Utanýan dünýäniň bigörklüginden.
Seň şekiliň ýöne-möne şekil däl,
Bu gözellik çözüp bolmaýan matal.
Ony çözen azaşar öz aklyndan.
Sen adamyň ilki laýdan ýasalyp,
Megerem, soň jan berilen aslyndan.

Kemsiz gözel bolmaz diýleni dogry,
Ýöne ýeke gözel bar bolsa kemsiz,
Bir nusga bar bolsa Alla tarapyn,
Şol gözeliň ýalňyz nusgasy sensiň.

Saňa ynsam, jynsam, bu tebigatam,
Ýigitlerem, gyz-gelinlerem maýyl.
Sen dünýä inipsiň bütin ömründe
Ýalňyz gezek joşan wagty Hudaýyň.

— Atamyrat Atabaýew.

Sen «Söýgi» diýilse, nämä düşünýäň?!

Şeýle bir bilesim gelýär pikriňi.

Men üçin-ä söýgi — seniň gözleriň,

Söýgi — seniň şol gözleriň kirpigi.


Söýgi — seniň aýaklaryň ädimi.

Söýgi — seniň gol uzadyp durmagyň.

Men dünýäň gurluşyn geň görüp ýörkäm,

Gelip, öz kalbymda dünýä gurmagyň.


Söýgi — seniň oýa batyp oturşyň.

Söýgi — seniň aýdýan, aýtjak sözleňem.

Men «söýgi» diýdim-de, saňa düşündim,

Mümkin, muny geň görýändir özgeler.


Mümkin, olar öz ýanyndan «Söýgi has

beýik ahyr!» diýýändirler, ähtimal...

Ýöne, menem peseldemok söýgini,

Sen söýgi dek beýge galdyň, Mähriban!

Aýgül Garaýewa (Baýadowa)

Sada sözleň gurluşy deý sada sen,
Durnukly sen söz düzümi mysaly,
Gözellik şährine logiki basym,
Hem goýlan, ajaýyp sitata ýaly,

Görküňden utanyp gizlendi aýam,
Meniň bu aýdanlam giperbola däl,
Seniň gül keşbiňi deňesem aýa,
Onda bu litoda bolmagy ahmal.

Gaşyňy çytma sen, ýüzüňi sowup,
Söýgüde pauza janyma ýakmaz,
"Başganyň sözüne" ynanmasaňam,
Awtoryň sözünden ikilik çykmaz.

"Goşma sözlemler" deý bile bolaly,
"Tirkeş sözler" deýin bolaly jebis,
Aramyzda "aýyrgyçlar" gerek däl,
Gelmesin söýgüde oturlar teris.

Syrly bolup ýörme, "köp nokat" ýaly,
"Hallar" bar ahyry gaçyp kowmaga,
Goý sen, "geljek zaman" işligi bolaý,
Ýöne geçmäweri "öten zamana".


Astangeldi Orazow

Jan amanat, yşk sadaka, bagş etdim

kalby hem teni.

Aýlanyp-aýlanyp özüme ýetdim,

Gözleýip seni.



Gujagymda örlän bakyşyň, näziň

mylaýym örän.

Bu bakyşlar ýasama däl, owalda

döräňde dörän.



Gaşyň — galam, hat ýazadyr bagryma,

Sünnäläp elin.

Menem jogabyny bejit ýazardym,

emma ki welin,



Bu dünýäni tutsam diýmän, diýýän men:

Tutsam eliňden!

Maňa yşkdan gutulma ýok, bilýän men

hemem ölümden!

Şu yssyda basseýn bilen buz içinde duran içgiler bolsady diýip arzuwlap ýören, "Oňarsaň öýden çykma" şygar astynda ýaşap ýören Öwrenmeliniň gaýnaýan agzalaryna buz ýaly salam ýollamak bilen "Tanyşmak aýyp däl" söýgüli virtual tanyşlyk gepleşigimiziň 20-nji sanynda hemmejäňiz hoş gördük. Gepleşigiň myhmany türkmen ýigitleriniň arasynda 76-njy bolup dogulan agzamyz bolan @tmyigit76 myhmançylykda. Hoş geldiňiz.
Şu diýýä öňem bir türkmen bir orsa diýýämiş, siz -40°C da nädip doňdurma iýip bilýäňiz, geň galýarys diýse, ors: beterinden beteri bar, siziňkiler 50°C yssyda nädip çaý içýär " diýýämiş. Soň üçin gysgajyk reklama çenli çaýjagaz içip duruň)
Reklama:
Maýk Taýson: "Gün urgusyndan başga ähli urgular jogapsyz galmaly däl" diýýär. Siz gün urgusyna-da jogap beriň. Lipton ice tea - Buz içinde ýaşa!
Başladyk onda.

1. Özüňiz barada gysgaça gürrüň beräýiň. (awtobiografiýa, başardygyňyzdan doly aýdyň, at, familýa, doglan ýer, ýyl).
2. Nikiňiziň döreýşi barada kelam agyzjyk...
Näme üçin imenno 76? 76 türkmen bolduňmy, ýa ýaryşda 76njy geldiňmi.. bla bla bla
3. Öwrenmelä haçan we näme maksatda geldiňiz?
4. Öwrenmelide iň ýakyn dostuňyz/joraňyz kim?
5. Siziň üçin durmuşyň manysy bir sözde näme?
6. Türkmen söýgüsi bolanda nähili söýgi?
7. Gowylar köpmi ýa-da erbetler? Özüňize gowylyk bal sistemada 1den 10a cenli aralykda näçe bal bererdiňiz?
8. Hindi kinolar bilen araňyz nähili? Anjelina Jolini saýlardyňyzmy ýa Aýşwarýa Raýy
9. Harry Potteriň görünmeýän edýän ýapynjasyny berseler , ilkinji edäýjek 3 zadyňyz näme?
10. Ikä üçi goşup bäşi aýranyň gowumy ýa ikä üçi goşman bäşi aýryp dördi goşanyň gowumy? ("Çorbaň çorbasy" atly soraglar kitabyndan)
11. Wampir bilen zombiniň näme tapawudy bar? Ikisinden biri bolmaly bolsa haýsy bolardyňyz?
12. Boş wagtyňyz näme bilen meşgullanýaňyz?
13. Haýsy multfilmi halaýarsyňyz?
14. Öwrenmeliniň agzalaryna möhüm aýtmaly zadyňyz barmy?
15. "Öwrenmeli" programma nähili garaýşyňyz bar? Programmany ösdürmeklige nähili pikirlerňiz bar?
16. Gepleşigiň indiki sanynda haýsy agzanyň bolmagyny isleýäňiz?
17. Goý, Siziň janyňyz sag, başyňyz dik bolsun. Dumuşda üstünlik! Saglykda gõrşeliň!

Agzalar siziňem @tmyigit76 agzadan gyzyklanýan soragyňyz bar bolsa, arkaýyn teswirde sorap bilersiňiz!

Sen meniň çagalyk dostumam däl, klasdaşymam, kursdaşymam däl, obadaşymam. Hatda işdeşimem däl sen. Ýakyn-u-uzak garyndaşlygymyzam ýok. Saý-sebäp bilen birek-biregem ýaňy tanadyk. Ýöne sen şonda-da maňa hemmelerden ýakyn, mähriban. Käbir dini maglumatlarda “Adam bu barlyga azyndan 6-7 gezek gelip, her döwürde her tüýsli ýaşap geçermiş” diýen düşünje bar. Meniň üçin, megerem, bu düşünje dogry ýaly. Sebäbi men seni öňden tanaýana meňzeş. Seniň bilen döwürdeşdigime arassa howadan bile dem alyp, durmuşyň süýjüsini dadyp bilýändigim üçin ykbalymdan örän razy men. Eger-de maňa ýene-de bir ýaşaýyş beriläýse, şol durmuşda-da saňa duşmagy ýürekdeş bolmagy islärdim. Men seni ýitirmekden gorkýan. Sebäbi sen ýitseň meniň saňa bagly bolan arzuwlarymam ýiter. Arzuwsyz adam bolsa jansyz göwre ýalydyr.

Öz bagtymy aýaýyn men janym deý,
Galanyny Allaň özi ýetirer.
Sen bolmasaň güli solan bag kimin,
Meniň ömrüm manysyny ýitirer.

Arzuwlarym laýa gaçan guş ýaly,
Uçup bilmän perwaz urar iki ýan.
Ünjilere gark bolmasyn gözleriň,
Men gözleňden öz bagtymy okaýan.

Sen dünýäde iň köp ýaşly zenan bol,
Menem joşup tarypyňy ýazaýyn.
Ýalňyzlyk derdinden goran penam bol,
Barlygyňy bagtym saýyp gezeýin.

Ýoklugyňda ýakym bolmaz dünýämde
Ýüregimi kesen ýaly bu tenden.
Ebedilik gitme meniň dünýämden
Ýürek dursun ýürekdeşiň ýitenden