sahet_ashyrov
24.02.2020 09:38
Seniñ adyñda...
Söwütli,
Söwütli,
Eziz diýarym,
In oňat zatlaryň undulşy ýaly.
Senden aýra düşüp on bäş ýyl ýarym
Ahyry üstüňden saldym men ýoly.
Nirde o ýyllaryň egri ýollary,
Jaýlar, baglar bary sumat bolupdyr.
Diňe bir topbajyk söwüt baglary
Hem mähriban degirmeni galypdyr.
Çagalaň unudan enesi ýaly,
Söwütliniň söwütleri giç-ertir:
«Haçan geler, gaýdyp geler balalam»
Diýip, ýollaryna seredip otyr.
Bagyşla, Söwütli! Adyňa gurban!
Eziz maňa söwütleriň ýapragy.
Ata-babalarmyň namysyn gorap,
Ata-babalarmyň ýatan topragy.
Ne kine bar, ne ahmyr bar göwnüňde
Çäjiňi harpykdan saýlap otyrsyň.
Ýalňyz galan garyp ene mysaly,
Köne degirmeniň aýlap otyrsyň.
Gurbannazar Ezizow
2
422
sahet_ashyrov
20.02.2020 08:53
"Maña - seniñ gözleriñden gitme ýok..."
Maňa —
seniň gözleriňden gitme ýok.
Maňa —
seniň sözleriňden gitme ýok.
Düşün, bu dünýede soňky güne çen
Seniň şatlyk hem gussaňa bagly men.
Seniň ýüpek gijeleňden gitme ýok.
Seniň aýdyň gündizleňden gitme ýok.
Bu garagol jahyllykdan giderin,
Ol hasaly gojalykdan giderin.
Çünki men olardan gitmän bilemok,
Emma seniň ykbalyňdan gitme ýok.
Men zemin.
Sen bolsa ullakan asman.
Saçyňy nur edip üstüme dökýäň.
Emma, düşün, läläm, şeýle gün dogar:
Saçlaryň gar bolup üstüme ýagar.
Şonda ak saçyňy sylyp ýüzüme
Gararyn belentden ýeriň ýüzüne.
Men bir gyzda gözleriňi görerin,
Men bir gyzda sözleriňi görerin.
Şapakda görerin — ýaňagyň alyn,
Gijede görerin — ýaňagyň halyn.
Synlap ýapraklaryň ýüzünde derin,
Onda seniň gözýaşyňy görerin.
Zemin aýlanyp dur,
Oňatlyk örän!
Hiç bir güýje oň ýoluny tutma ýok.
Dünýäň her gülünde men seni görýän,
Şonuň üçin bu dünýeden gitme ýok.
Gurbannazar Ezizow.
6
839
sahet_ashyrov
18.02.2020 16:28
Gijeki myhman.
Tümüň ýary penjirämiz kakyldy
– Salam!
– Salam. Kim borsuňyz, eý daýy?
Myhman jogap berdi örän akylly:
– Menmi? Ajal.
Has dogrusy — Ezraýyl.
– Gaty oňat.
Geliň, geçiň, oturyň.
Size haýsy gerek: kofemi ýa çaý?
– Maňa, gowsy, boş çüýşejik getiriň.
Ol seniň janyňy saklar örän jaý.
– Bagyşlaň:
Siz ýalňyşýan-a dälsiňiz.
Meniň keselim ýok. Özümem juwan.
Belki, jaý nomerim ýalňyşansyňyz,
Men-ä, walla, hiç düşünip bilmeýän.
– Ýok, men jaý nomerin ýalňyşamok,
ýok,
Men geldimmi — boş gitmäni halamok.
– Bilýän, ýöne meň ölesim gelenok,
Janym sagat, durmuşymdan nalamok.
– Sen ilk-ä aglama, soňam aldama,
Aldawyň köp bolsa, jezaňam artýar.
Onsoňam bilip goý, her bir adama
Meniň saýlap-seçen bir perişdäm bar.
Ine, seniň diýen sözleň barada,
Seredip gör, şunça fakt gowuşdy.
– Niçik? — diýip sorajakdym,
şobada
Bir kitap gütüläp öňüme düşdi.
Kitaby agyz däl, göz bilen iýýän,
Düşünýän, arada bar ullakan syr:
Ýokarsynda meniň adym, familiýam,
Iň aşakda bolsa «Ezraýylneşir».
Ýüregimde zat galmady hemleden,
Şo pursat ajalym ýakyn göründi.
Bu iş meniň bir kitaba jemlenen
Ölüm hakyndaky goşgularymdy.
– Ine, indi bildiň gerek, ýaş ýigit,
Neçün gelenimi tünüň ýarynda.
Seniň ahy-nalaň ýüregmi iýip,
Ýer tapmadym tünegimiň töründe.
Şatlykdan, begençden, ýaşlykdan ötüp,
Siz nämüçin beýle hala düşdüňiz?
Beýtmäň ahyr, işim özüme ýetik,
Meniň halys ýüregime düşdüňiz.
Juwan halyňyza gojadan beter
Çekýärsiňiz bu dünýäniň ahyny.
Her kimiň mütdedi wagtynda ýeter,
Siz bir entäk azar bermäň ahyry.
Wasp ediň ýaşaýşy, beýik şatlygy,
Gözelleriň elden ýeňil öýmesin.
Ýat ediň ölümi — çyn berbatlygy,
Wasp ediň çagalaň säher deý sesin.
Eger, walla, erkim bolsa özümde,
Taşlap şu kärimi allaowarra,
Ýaşardym şadyýan ýeriň ýüzünde,
Guwanyp ýaş ýigit, gözeldir garra.
Meň baran ýerimde ýatýar şagalaň,
Aýdym aýdylanok, çalnanok dutar.
Eger adam bolsa Allatagalla
Meni beýle jeza etmezdi duçar!
Birden onuň gözlerine ýaş gelip,
Bolşy meniň jigerimi daglady.
Hasratdan müzzerip,
Bir gysym bolup,
Titräpler ykbalyndan aglady.
Dözmedim men ol pahyryň halyna
Kärini unutdym bu şum apatyň.
Emaý bilen baryp onuň ýanyna,
Onuň bedibagt başyn sypadym.
Diýdim: — Besdir, bozulma sen ýaşuly
Men-ä asyl höwrügäýdim seň bilen!
Köne ülpetler deý, köne dostlar deý,
Onuň bilen hümürdeşdik daňa çen.
– Äý — diýdi — bolsa-da aralarmyz daş
Içimi bir dökeýin diýip gaýtdym.
– Bir gören tanyş bor, iki — garyndaş
Kyn günüňde geläýgin — diýp aýtdym.
– Ýamanlyga duşmaweri ylaýym.
Derdim egsiläýdi diýen sözüňden,
Siz bir işli adam.
Zyýan bermäýin.
Işläň! — diýip,
Sumat boldy gözümden.
Gurbannazar Ezizow
9
837
sahet_ashyrov
18.02.2020 16:26
Çagalyk.
Bir enaýy günlerdi,
Şatlyk bilen geçýärdi,
Nirä gitdiñ aýrylyp,
Ah çagalyk, çagalyk?
Ýaltanmany bilmezdik,
Ýadawlygam duýmazdyk,
Bizi taşlap gitdiñ nirä,
Ah çagalyk, çagalyk?
Şalardan hökmi zordy,
Diýen zadyñ bitýärdi,
Gaýdyp gelmezmiñ indi,
Ah çagalyk, çagalyk?
Günler şeýle ajapdy,
Geçip gitdi sepleşip,
Dolanaýda bir salym,
Ah çagalyk, çagalyk!
Awtory: özüm
Sähet Aşyrow.
8
671
sahet_ashyrov
17.02.2020 09:25
Aýal.
Owadan dünýäniň syry azaldy.
Düýnki syrlar bu gün eýýäm aýandyr.
Açyşly eýýamda açylman galan
Syr bar bolsa meger, ol hem
Aýaldyr.
Galjak gümany ýok garaňky zadyň
Zamanyň baky gündizliginde.
Alys Aýy gözýetime göterdik,
Aýal bolsa galdy gizlinliginde.
Ýyldyzlar syryny saklap bilmedi,
Pähimiň-paýhasyň kesgirliginde.
Ýöne ýyldyz gözli zenan öňünde,
Galdy akyl öňki asgynlygynda.
Bu gülýän gözleriň näme diýýänin
Bir özünden başga aňlap biljek ýok.
Aýal deý apalap söýüp biljek ýok.
Aýal dek owadan aldap biljek ýok.
Bu jadyly gülkiň nämedigine
Düşünmeklik bize baky gadagan.
Bir seretseň, üstümizden gülüp ýör,
Hem-de bize özün edýär sadaga.
Ýyladyp bilýärkä, bezäp bilýärkä,
Mydam müňkür erkekleriň dünýäsin,
Men jomartlyk bilen geçýärin onuň
Bir günäden başga barja günäsin!
Ol günä-de bardy-geldi ýok bolsa,
Ne hezillik, onda özüm günäli.
Eý tebigat, beýle jadyly zatdan
Sen nädip döredip bildiň Aýaly!
Dünýäň syryn ýorgan kimin sypyrýas,
Düýnki geňlik bu gün eýýäm aýandyr.
Bu açyşly zamanada açylman
Galan syr bar bolsa, ol hem megerem,
Aýaldyr.
Awtor: Berdinazar Hudaýnazarow
8
653
sahet_ashyrov
17.02.2020 09:24
Doly okamagyňyzy maslahat berýän we goşgynyň sizde galdyran täsirini teswirlerde ? ýazmagyňyzy haýyş edýärin!
"Sag salamat sermest bolup gezen jan,
Dört belanyň birisinden iglärler"
Magtymguly.
Sag salamat gezip ýören jalaýlar,
Neşe bilen aýallardan iglärler!
Elli ýaşan çal gulpakly heleýler,
Saçlaryny gara bilen ýaglarlar!
Ýaşarlyk galmady hüşgär bolmasaň,
Bir hile gurana oýun gurmasaň,
Tanyş tapyp, bermeljesin bermeseň,
Bitjegiňem bitmez, gury eglärler!
Sklatçy, dükan sürýän almasa,
Şol gije uklamaz, ýonup ýolmasa,
Söwda ugurda bir ileniň bolmasa,
Alla diýip ugran ugruň baglarlar!
Bir bada bir imrikdiler Gurhana,
Ynandylar tebip bilen porhana,
Gazanç tapman açyp kiçi kärhana,
Nebis itin samolýotly kowlarlar!
Agyzdan çykmaka synýar öwütler,
Bizdä şeyle, neneň siziň sebitler,
Ak halatly, arap reýhan ýigitler,
Araklary, piwolary suwlarlar!
Kimi görseň bir birinden gylawly,
Hajathana girseň şolam tölegli,
Öwlüýä gidilýär indi ulagly,
Tüýkülige gözlerini çyglarlar!
Ýaman bolup çykýar ýagşy öýdenlem,
Kändir aydabilmän bärden gaýdanlam,
Aman Sary ýalan bolsa aýdanlam,
Üýşüp gelip gulajygmy towlaňlar!
Awtor: Aman Sary.
9
1 108
