Kosmosdaky söýgi...

Mämmet otagynda ýeke özi ýatyrdy, gözüniň gögüni elläp gördi, bolan wakalar edil film ýaly aňynda aýlanýardy. Ýok! Mämmet öňem goňşy obalara swidaniýa gidip, köp depilipdi. Bulam şolaň biri borda. Ýok! Ol 5 sany nätanyş "ýabany mahluklar" tarapyndan depilip durka biri ony halas edipdi. Ol kimkä? Adammyka ýa adamdan a-zanmyka? Oň ýüz keşbini doly ýatlap bilenokdy. Edil düýş ýalydy. Düýşümdirdä diýse gözi gök, huşum diýsede köp zat ýadynda ýok. Ol arassa howada özüni dürsemek üçin daşary çykdy. Howa ümsümlik, utanjaň şemal ýüzüni sowup mylaýym öwüsýärdi. Howwa, bu howany diýsene, "gyzy nädip yrmaly" diýen mowzugy okap, ýanyňa dünýäň iň näzli gyzyny alyp, oň bilen gyzykly hümmürdeşip, assadan ýöräp, özüňi obadaky iň görmegeý ýigit hasaplap (Şahruk han bol-a zaňňar), bir-birege gysmyljyrap süýji-süýji gürrüňler edip, soňam şol obaň gije ýatmaýan "ýarganatlaryna" tutulyp, ajy-ajy gürrüňler eşidip, ýüzüň bilen ýeňsäňi des-deň edip gaýtmaly howady.

Ol pikire çümüp oturşuna uka gitdi. Düýşünde ony nähilidir bir güýç göterip alyp barýar. Edil huş ýaly. Bir gözüni çalaja açdy. Dogrudanam ony göterip barýarlar.

-Eý, waýeý, kömek ediň diýip gygyrjak boldy, gygyryp bilenok, sesi çykanok. Eý Allam, bu näme boldugy, meni nirä alyp barýarlar, şeýdip ýaş başyma gidibermeli bormukam? Bu gözüňi iýip gelýän ýagtylyk näme? -Eşidýäňmi dost, kyn görmeseň şol spiçkäňi öçüräýdä (şoňa edebi köçe dilinde "spiçke" diýilýär, menem bilýän telefonyň ýagtylygyna "wspyşka" diýilýänini, gel akylly bolsaňam köpçülikden saýlanmalyla dost).

Mämmedi ýagty bir zadyň içine alyp girdiler. Bir topar nätanyş, haýsy obaň oglanlarykan, bir ýerdä gördüm bulary, ýa şol gaýraky "çeçen obaň" oglanlary hyrsyz diýýärdiler şolarmykan.

-Wiý ýadyma düşdi nirde görenim, kinoda, başga planetalylar bular. Meň günäm nämekä?

Mämmet görgüli bilýän, bilmeýän dogalaryny okap ugrady. Şol wagt BP-laryň (başga planetalylaryň) içinden ýüzi nurlurak biri (ýüzi gursun bularyň) şeýle diýdi:

-Muň sesini açyň gürleşeli. Mämmediň sesi açyldy. Ol şeýlebir begendi. Tas ýaňky mahlugy ogşapdy. -Boldy et Mämmedius, özüňi ele al, sen bizi tanan dälsiň, meň adym Genetikus, bizi seň kakaň Awenius ugratdy. Biz Sirius galaktikasyndan.

-Aý Siz ýalňyşansyňyzam diýdimlaý, ýalňyşypsyňyz Siz, men hiç hili ..dius däl, men Atageldi kürşigiň ogly Mämmet gara. Siziň gözleýäniňiz gaýraky obada bolaýmasa, zyýany ýok, tanamadyk sylamaz diýipdirler. Men gideýin onda, Sizem azara goýdum.

-Ýok Mämmedius, biz seni kiçiligiňden bäri tanaýarys, gorap gelýäris. Sen Sirius galaktikasynyň dolandyryjysy Aweniusyň mirasdüşer ogly. Kakaň Awenius garrady, ol ýerine seni goýmak isleýär.

-Ýo Siz düşünmediňiz, meni biri bilen çalyşýaňyz öýdýän, men ol diýýaniňiz däl, meň kakam çopan, özümem bir bezdelnik, meni gynamaň, goýberäýiň.

-Özüňi ele al Mämmedius, häzir biz seni kakaň ýanyna äkideris, ol saňa hemme zady düşündirer.

Biz ýaňky ýumurtga meňzeş zadyň içinde ýokary göterlip ugradyk. Ep-esli uçdyk öýdýän, ahyryn şäher ýaly bir zada baryp gonduk. Eddil kinolardaky ýaly, ösen dünýä, owadan binalar, owadan baglar we betnyşan adamlar (adamlar diýäýýän, olara näme diýjegimem bilemok).

Ýöräp barýarys, hemmeler bize baş egip geçýär, men örän hormatly adamlar bilen barýan öýdýän. Genetikus:

-Olar Size tagzym edýär, hormatly şazadam. Olara baş atmak hökman däl, göni ýöräberiň. (Her baş egene kellämi kakyp: gurgunmyň, çagalar gowumy diýip gelýärdim gorkunjyma).

Ahyryn bardyk bir äpet köşgüň gapysyna. Gapy açyldy, içinden hasam gorkunç bir zat çykdy. Gelşine-de meni bagryna basdy.

-Wah oglum Mämmedius, gözümiň garasy, seni gujaklamaga zar boldum-a, seret Genetikus oglum edil özüme meňzäpjik durda.

-Howwa şahy Sirius, edil özüňiz. (Nätdiňaý, meni fotoşop edibem muňa meňzedip bolmaýar).

-Men saňa hemmesini başyndan gürrüň bereýin Mämmedius. Men toparym bilen ýere barlaga giden wagtym seň ejeňi gördüm, oňa aşyk boldum. Oňa özümi tanatdym. Biz halaşdyk, durmuş gurduk. Soň meň duşmanlarym seň ejeňi tanap oňa azar bermeginden gorkup, ony öz galaktikama alyp gaýtmakçy boldum. Ol göwnemedi, şol ýerde galdy we seň kakaňa durmuşa çykdy. Seň planetaňa howp abanýar. Ýowuz güýçler, Osirius galaktikasynyň basybalyjylary ýere hüjüm etmäge taýýarlanýarlar. Ýeriň geljekki ykbaly seň eliňde, saňa ynanýan, sen ýerem, siriusam gowy dolandyrjagyňa şübhäm ýok. Seň wagtyň az, tizräk söweşe taýynlan. Men saňa ýokary taýýarlykly kömekçi berýän. Indi bu gyz hemişe seniň ýanyňda bolar, taýynlanyberiň.

Eger ýeriň ykbaly meň elime galan bolsa, ýeriň dat gününe, hepde-de bir gezek goňşy oba gidip depilip gelýän oglana bu wezipe agyrrak dälmikä? Meň ýanyma ýene bir BP geldi. Oňa gyz diýdimi? Aý bularyň gyz ýa oglanlygyny nädip bilmelikä? (Ýerdäki ýaly tapawutly bolaýmala, kösenmez ýaly).

-Salam Mämmedius, sen doglanyň bäri bir sekundam sypdyrman, saňa gözegçilik edýän, men seni özüňdenem gowy tanaýan.

-Bir zat soraýynla, şunça wagtlap hemme wagt ýanymda bolan bolsaň, kä mahal agşam telefonda nauşnikli görýän kinolarymam gördüňmi?

-Howwa hemmesini.

-Gaty utandyrdyň şu wagt, aýdaýmalyda ýanyňda gyz maşgala bar diýip. Onsoňam Sizde neme nähili?

-Näme neme?

-Nemedä, söýgi-pöýgi, toý-poý, daýza-daýza, gaçdym-kowaladym, çaga-çuga. diýen ýalak ýagdaýlar.

-Näme maňa aşyk bolduňmy?

-Saňamy, ýogeý, ýöne soraýdym, senden gözümi aýryp täzeden seretsem zähräm ýarylýar.

-Biz onda söweşe taýynlanaýaly? Men birtopar plan düzdüm, haýsyny halasaň...

Goý bular öz planlary bilen galybersin. Indi habary kimden al, Osirius galaktikasynyň ganhor şasy Amadeusdan al...

Talaňçy aýal...

Mekdep döwründen ýatlamalar kän.

Bir güni rus dili mugallymym meni ýanyna çagyryp,

- Massimus öýde giren ýeriňde meň konspektim galypdyr, şony getirip beräý, öýde hiç kim ýokdur diýip öýüniň açaryny berdi. Öýlerem mekdepden uzagrakda. Gitdim sömpüldäp. Öýüne bardym, görsem gapysy çalaja açyk. Içeri girdim, konspekt dur, aldym. Gaýdyberdä yzyňa, gaýtmadym.

Gapy açyk bolsa diýmek öýde biri bolmaly, soňam öýlerinden bir zat ýitse menden görerler. Otaglara aýlanyp ogryny gözläp başladym. Içerki otagdan üýtgeşik ýakymsyz sesler eşidilip ugrady. Girsem bir nätanyş aýal mugallymymyzyň adamsynyň üstünde ony bogýarmy, bir zatlar edýär.

Özi aýal halyna ogurlyga girip öý eýesinem bogup öldürmäge hyýallanypdyr, muňa näme diýjek. Üstesine öz eşiklerinem, oň eşiklerinem çykarypdyr. Özüniňkä düşnükli, öldüren wagtym gan degmesin diýip çykarandyr, ýöne oň eşiklerini näme üçin çykarandygyna düşünmedim.

Men barybir köpi gören ugurtapyjy ýigit, beýle pursatda aljyramadym, göni aşhana girip elime skoworodka (saç) aldym. Otaga girdim, mugallymyň adamsam ölümi boýun alan ýaly üstündäki päliýamana garşylygam bildirenokdy. Menem saç bilen ýaňky saçy kesilmişiň kellesinden urdum.

Udarymam güýçlidä meň, ol bir tarapa ýykyldy. Şeýdip ol adamy ölümden halas etdim. Ol maňa şeýle bir minnetdarlyk bildirdi, hatda 200 müň manat pulam berdi, ýöne gören zatlarymy hiç kime, alada edip ýörmez ýaly hatda mugallymymada aýtmazlygymy haýyş etdi.

Men sözünde tapylýan oglanlardan, ýöne gahrymançylygymy barybir klasdaşlaryma gürrüň berdim...

Tanyşlyk saýty (dowamy)...

Ir bilen işe bardym. Türk firmada brigadirdim (bagyşlaň, gaty syrly bolup bilemok, ýöne şonda-da şahsy durmuşymyň diňe meň rugsat beren çägime çenli tanşyp bilersiňiz). Irden ofisde ýygnak bolýardy. Sekretar Elif hanym meni gowy görýärdi (bärde dost, jigi hökmünde diýip düşünersiňizdä). Ol ýaşy 35 töweregi bolan görmegeý zenandy. Ol barada ofisda her hili gybatlar aýdylýardy, ýöne meň üçin-ä mähirli, gowy zenandy. Ol maňa Massimus diýip ýüzlenerdi (Şonda halapdym şul ady, şoň üçin wirtualada şu nik bilen geldim).

-Massimus, gowumyň, aladaly görünýäňle, öňküligiňä däl, ýa birine aşyk bolaýdyňmy?

-Aý ýok, Elif hanym, maňa aşyk bolupdyrlar öýdýän.

-Kimkä, ol bagtly gyz?

-Aý entek belli zat ýok, ýöne Sizi toýuma çagyraryn.

-Ok, gürleşdik (Türkçe howlukman gürleseler düşünýärdim, ýöne kän gürläp bilemokdym, häzirem şeýle).

Ýanymdaky oturan kel brigadir maňa eşek näzini edip:

-Şu sekretaryň-a sende göwni bar, beýleki brigadirlere ýüzem berenok welin, saňa gezek gelse...

-Agam, aýdýanyň näme, utanaňokmy, eger biri seň bilen adam ýaly gürleşse, hökman bir zat hantama bolup gürleşýärmi? (Şeýle adamlara öňem düşünemokdym, häzirem düşünemok, eger bir zenan bulara çalaja ýyly söz aýdaýsa, boldy, bu meň bilen...eý kädikelle! seň ýalylar bilen adam ýaly gürleşmeli däl özi, gyzlaň köpüsi nedowolny gezýärler, dogry edýärler, eger şeýtmeseler bular ýalylaň näme pikir etjegi belli däl).

-Hezil etmelä sen, utanmalam bizmi?

-Agamjan men heniz 17-em ýaşamok, ol bolsa 35 ýaşynda, ogly ýaly görýändirdä meni.

-Howwala, ýaş görüp nemedýändirdä seni.

Şol wagt ýüzüme urlan ýaly boldum, şonça medeniýetlisirejek bolsamam bolmady, aklym özüme boýun egmedi, edil dälirän ýaly bolup ýaňky kele topuldym. Bizi araladylar. Ofisden daşary çykdyk. Ol adam (adamam diýesim gelenok) burnynyň ganyny akdyryp:

-Näme, nemäňe degdim welin nemäň nemedäýdimi, ony nemedýän diňe sen däl...

-Eý.................., nämeler diýýäň-ow utançsyz (bu gep ýaňky zenanyň gulagyna ýeten bolsa, özüm utandym bu gürrüňlerden).

-Dogry sözliň dosty ýokda.

Bir ýerlerden Bega ýetip geldi. Ol uzakdan meni gören eken.

-Massimus, näme boldy, özüňi ele al, näme boldy beýle?

Ýaňky maňa seredip:

-Entek hiç zadam bolanok, agşam işden soň görersiň boljak zatlary, sen kime el galdyranyňy bileňok, bu gün diri galmarsyň sen.

Men oň yzyndan gygyrjak boldum, Bega saklady:

-Goýsanaý dost, goý gitsin, näme boldy düýnden bäri ugruň ýok, Mylaýymy gördüňmi, nähili boldy, agşamam giç gelipsiň, irdenem maňa garaşman işe ir gaýdypsyň, indem bu Kelekbaý bilen urşup ýörsüň, näme bolýa dost?

-Bolýan zatlara bul adamyň dahyly ýok, aý Mylaýymam soňky gezek görşüm boldy öýdýän.

-Näme halamadyňmy, şoň ýaly straşnymaý dost?

-Ýok, kukulka edil.

-Seni halamadymy?

-Menem halaman bormy?

-Onda näme boldy, agramyňyz dogry gelmedimi, menä düşünýän däldirin.

-Meň bilen diňe öýlenjek bolsaň gürleş, öýlenjegiň çynyň bolsa-da 3 şertim bar diýdi.

-Näme? Seni jyna meňzetdimikä, aýtmadyňmy, ýüzüm meňzesede, men hakyky jyn däl diýip?

Howwa, näme şertleri bar eken?

-Birinjiden men oň öýünde ýaşamalymyşym.

-Ol baýmy?

-Bilmedim.

-Ýaşaberdä öýünde, millioneriň giýewsi bolda, bagt guşy gonan eken, gel saňa maňlaýymy degireýin, "döwletliden döwlet ýoksun".

-Ikinji şerti ondanam gorkunç.

-Öýde men hojaýyn boljak diýdimi?

-Wah hojaýyn bolanam owarram, taryhda aşyklar öz söýen ýary üçin hemme zatdan geçipdirler, senem meni söýýän bolsaň, toýdan soň meň familiýama geç diýýär.

-Eý ýop......Ine sensasiýa. Hakyt şeý diýdimi. Familiýasy näme ekeni oň?

-Tapyndyýewa.

-Familiýasam-a familiýajan eken. Tapyndyýewa Massimus, bet gelişjek ekenaý, Tapyndyýewa Massimusgözel, hiç haçan beýle gülmändim dost........

-Howwa, gülüber sen, saňa derdini aýdan men sam.syk.

-Ýok dost, häzir gülüp bolaýyn, onsoň gürleşeli, Gowusy, ol gyzy maňa ber dost. Ol tüýs maňa laýyk gelýär. Aşgabatda ýaşamagy arzuw edýärin. Familiýamam Kürräýew.

-Howwa, Kürräýewden-ä, Tapyndyýewem gowy diýýäňmi?

-3-nji şerti nämekä, ol hanymyň?

-3-njini şu ikisine razy bolansoň aýtjak diýdi.

-Sen näme diýdiň?

-Aý ilk-ä oýun edýämikä diýdim, soň görsem görgüliň gara çyny, men-ä dost nätjegimem bilemok, arany üzäýmesem indi.

-Ýok dost, razy boluber, belki, ol seni synajak bolýandyr, meň üçin hemme zada taýynmyka diýip. Gaýtam, pasportymam çalyşjak, adyma-da Tapyndy goýjak diý.

-Beýdibem bir synamok bormy?! Birden razy bolsam, olam serýozny aýdan bolsa, soň näme bolar?

-Aý soň Tapyndyýew Tapyndy bolarsyňda, ýöne bir riskowat edip gör dost. "Kto ne riskuýet, tot ne pýot goşa çynar" diýýäler.

-3-nji şertinem primernyrak çak edýän özüm. Sen-ä meň eşiklerimi geý, menem seňkileri geýeýin diýer.

-Aý bu döwürde geňem däl-ä. Aýal-gyzlar biziň balaklarymyzy geýip ýör-ä. Senem uzyn köýnek geýmäge utansaň gyzlaň ýubkasyny geýäý. Seni kim tanap dur. Giýewimiz şotlandiýaly diýerler, wessalam.

Bu gün oň bilen ýene duşuşmalydym, ýöne näme diýmeli, bu ýagdaýdan nähili baş alyp çykmaly? Tapdym! Gowusy oň ýaragy bilen oň özüni awlamaly...

Tanyşlyk saýty...

Mobimeet gyzyklydy.

Imo, watsap, skype, in100gram bular başga dereje, elbetde.

Ýöne mobimeet gyzyklydy.

Aňryňda ýazyp oturanyň kimdiginem bileňok, aždarhamy, wampirmi ýa döwüň çagasymy, ýöne ýazyşýardyk (eh byli wremena).

Ol döwüriň modasy şoldy, knopkaly nokialaryň moda döwri. Bizem şondan internede girýädik (nirde gören zadymyz).

Internetde gyz bilen tanyşyp bolýar, gowuja gyzlar barmyş diýseler, biz ýaly durmuşda özüni oňarman ýören görgüliler çozýarlar internede. Wah, oňa barybam öňki boluşlary ýaly bols-a boljagam, aýal dogan, ýöne olaryň girýän niklerine bir sered-ä: "Men möjek, söýmeseň iýjek", "Gyzlaň islegi, daýzalaň arzuwy", "Içýänim kola, pul seçýän ýola", "Daşoguzyň çeti, Köneürgenjiň beti", "Köpçülige bolamak, gyzlar ýeke-ýekeden geliň".

Indi düşünensiň aýal dogan, meň nämä jan ýandyrýanyma. Özüň nähili nik bilen girýädiň diýýäňmi, aýal dogan, aý biziňki prostoýdy-laý "Dünýaň şazadasy".

Mobimeetde gezip ýörkäm bir gyzyň niki ünsümi çekdi. "Içýänim sok, söýgülim ýok". Gel söýgülisi ýok bolsa şuňa bir ýazyp göreýin, belkem bu salýonny maňlaýym açylyp gider diýip pikir etdim.

Öň obaň ýaşululary bilen salamlaşyp, saglyk amanlyk soraşyp ýören oba oglany bu gün şäheriň iň sowremenniý gyzlarynyň birine hat ýazýar.

-Salam gözel gyz, bimaza eden bolsam bagyşlaň, siz bilen tanyşmaga rugsat berermisiňiz?

-Slm (Şälämme diýdigimikä?).

-Adyňyz kimkä, eger mümkin bolsa, syr bolmasa.

-Sizkm?

-Meniň adym Massimus, A Siziňki, siziňkinem biläýjekdim.

-Nam un

-Bagyşlaň, Siz türkmençe bileňizokmy?

-A?

-Adyňyzy aýdaýyň haýyş, Siziň nikiňize aşyk boldum.

-Nädip.

-Ýazyp bilýän ekeniňizä, men-ä Size täjikmikä diýip otyrdym.

-Ýokla.

-Onda nä beýdip ýazýaňyz?

-Aý özüňiz bilýäňizä, bu mobimeediň modasy, gyzlar şeýdip ýazsalar sowremenniý görünýärler.

-Aý meň gözüm-ä sam.syk görünýärler, şeýtseler.

-Kim samsyk?

-Wiý bagyşlaň, günämi geçiň, men Size diýjek däldim, tötänden elimden çykyp gitdi bu söz. Siz beýle däl, Siz sam.syk däl, olar sam.syk, men olara diýdim, ýaňy bir gyz ýazyşdym, şoňa diýdim.

-Bolýa, bolýa, zyýany ýok, ýaňam bir gyz bilen ýazyşdyňyzmy?

-Ýo men ýazyşmadym, ýöne meň telefonymda Akmyrat ýazyşdy. Akmyrat ol, men däl, men ol gyza söýüşeli diýmedim, ony Akmyrat aýtdy, oň telefonyna pul salanam Akmyrat, ynanmasaň Akmyratdan sorap göräý.

-Bolýa nomerini ber Akmyratdan soraýyn. (Samsyga duşdum, oýnaýynla diýdi öýdýän).

-Ýo Akmyrat ýok, ol oba gitdi, ýolda telefonynam gaçyrypdyr, indi telefonam ýok, nomerem ýok, özem agyr ýatanmyş, ölen bolmagam ahmal.

-Oýun etdim how, gerek däl Akmyrat.

-Adyňyzy aýtmadyňyza?!

-Adym Mylaýym.

-Ooooo, gowy adyňyz bar eken, owadan adyňyz bar eken, meň iň gowy görýän adym eken.

-Siz nireli?

-Aslym Daşoguz, häzir Aşgabatda ýaşaýan, kwartirada, Bekrewe häkimlik köçe, Sona daýzalarda bolýan, pişikleň ýanynda (Şol wagtlar Bekrewede "pişik" diýip bir palažens bardy, häzirem bar bolsa salam aýdyň).

Garaz öýüme barýan karta çenli çyzyp berdim. Bir hepde ýazyşdyk. Ahyrynam ony duşuşyga çagyrdym. Özümem 1 gün öňünden özümi soda gaýnadyp, taýýarlanyp ugradym. Sakalymy dagy ömür çykmaz ýaly edip aýyrdym. Bega gördi:

-Dost senä ýuwunsaň adamada meňzeýän ekeniň. Kim ol gyz?

-Aşgabatly bir gyz tapdym, göräýdä, adam Mylaýym, özem Mylaýym, takoý zad-ow.

-Özüni nirde gördüň?

-Ine şu gün görmeli, nesip bolsa, gelse.

-Üstünlik, aw ganly bolsun!

Belleşilen ýer, belleşilen wagt. 1 sagat öňünden baryp, garaşyp oturdym. Jaň etdi:

-Geldiňizmi?

-Howwa, iň soňky oturgyçda otyryn.

-Birden meni halamasaňyz?

-Wah men halarynla, eger Siz halasaňyz.

-Ony göräýeris.

Bir seretsem 2 sany gyz maňa tarap ýöräp gelýär, ikisiniňem gulagynda telefon, ikisem telefona gürläp gelýär.

-Şu gelýänler Sizmi?

-Howwa, ýöne haýsymyz Mylaýymlygyny biljek bol, haýsymyz diýip pikir edýärsiň? Seň arzuw edýän gyzyň haýsy?

Ikisem ýanyma geldiler, ikisem maňa seredip dur, Size aýtsam aýal dogan, ömrümde bular ýaly, iki oduň arasynda galmandym.

Haýsyny saýlajak, bir-ä Aişwariýa, birem Merlin Monro. Wah men iki sany bolsam bolmaýamy? Indi näme etsemkäm? Birden ýalňyş saýlasam, ikisem gidip galar. Özüňi ele al körpe, sowukganrak bol, gowja seret, haýsyna seredeňde ýüregiň üýtgeşik urýar, ýüregiňe gulak as!

Gözümi ýumdum, ýüregimi diňledim, bir karara geldim, ahyram Aişwariýa seredip:

-Siz Mylaýym diýdim.

Gyzlar gülüşdiler. Merlin Monro Jon Kennediň ýanynamy, garaz, bir ýerlerä ugrady. Aişwariýam meň bilen galdy. Men öz söýgimi tanapdym.

-Meni nädip tanadyňyz?

-Sizi düýşümde görüpdim.

-Hä şoň üçin gözüňi açyp-ýumup durduňmy?

-Siz meni haladyňyzmy?

-Muny soň aýdaryn.

Biz biraz gezim etdik. Ol şadyýan, alçak gyzdy. Meň ýaly tormoza gerekli gyzdy. Ýöne arman...