lavinya_
07.04.2024 14:54
Gorky hereketsizlige eltýär; hereketsizlik tejribäniň
bolmazlygyna sebäp bolýar; tejribesizlik nadanlygy döredýär; nadanlyk
gorkyny emele getirýär.***
Gorkynyň gözüne dogry bakmak bilen siz ony ýeňjeksiňiz.
***
Başdan geçirýän gorkylarymyzyň aglabasy hiç bir fakta (delile) esaslanmaýar. Olar biziň duýgularymyzyň önümleridir. Miçigan uniwersitetiniň geçiren barlag-seljermesi şu aşakdaky ýagdaýy ýüze çykarypdyr.
Gorkularymyzyň 60 göterimi hiç zada esaslanmaýar: biz hiç
haçan bolup bilmejek zatdan gorkýarys.
Gorkularymyzyň 20 göterimi biziň erkimizde bolmadyk geçmiş bilen baglanyşyklydyr.
Gorkularyň 10 göterimi durmuşymyza esasly täsir ýetirip bilmejek, oňly ähmiýeti bolmadyk zatlar bilen baglydyr.
Galan 10 göterimiň diňe 4 ýa-da 5 göterimini esasly diýip ykrar etmek bolar.
Bu statistika gorky sebäpli sarp edýän wagtymyzyň we
energiýamyzyň 95 göteriminiň bolgusyz ýere harçlanýandygyny
görkezýär.
Bu bir henegi ýada salýar. Gije. Aýaly ärini oýarýar:
— Bert, oýansana. Aşaky gatda talaňçynyň, aýak sesi eşidilýär.
Bert, oýan ahyry!
— Bolýar, bolýar, ine, turdum — diýip, on müňünji ýola
aýdylan Bert, krowatdan sallan aýaklary bilen çepegini sermäp tapyp, zoraýakdan otagdan çykyp, basgançak bilen aşaklygyna ýönelýär.
Düşen badyna özüne çenelip duran nagan nilini görýär.
— Dur, butnama, gardaş! Gymmatly zatlaryňyzy, puluňyzy
nirde saklaýanyňyzy görkez — diýip, ýüzi örtükli garakçy azmly heňkirýär.
Bert görkezýär. Talaňçy puldur gymmatbaha şaý-sepleri
haltasyna gapgaryp, ökjäni götermekçi bolanda Bert oňa ýüzlenip, şeýle
diýýär:
— Aýak çeksene. Gitmezden öňünçä ýokary çykyp, aýalyma bir görnüp gaýtsana. Ol indi 30 ýyl bäri her gije size garaşýar ahyryn.
***
Siziň arzuwlaryňyz gorka garşy iň bir netijeli melhemleriň
biridir.
***
Ahyr netijede nämäni saýlajaklygyňyz özüňize bagly. Siz ýa-ha gorkyňyzy iýmleýänsiňiz, ýa-da ony açlykdan ýaňa lagar düşüp ölmäge iterýänsiňiz.
Eger ynamly hereket etseňiz, bu sizi üstünlige ýetirer, eger gorka has köp ähmiýet berýän bolsaňyz welin, bu sizi şol bir duran ýeriňizi debsiläp durmaklyga elter.
***
Ýaryşlara gatnaşyp birinji bolup gelip bilmedik wagtyňyz her gezek ösüş derejäňizi ölçäň. Eger siz geçen sapar bäşinji, bu gezek bolsa dördünji bolup pellehana gelen bolsaňyz, bu ýeňliş däldir. Bu üstünlikdir. Bu ösüşdir. Ynha, şu-da ýykylsaň, öňe ýykylmagy we gerekmejek saklanmalardan gaça durmaklygy aňladýar.
***
Leňňeç tutujylar tutan leňňeçlerini bedrä ýa-da sebede atar
ekenler. Eger sebetde diňe ýekeje leňňeç bolsa, onda sebede gapak
ýapmaly bolýarmyş, emma iki ýa-da ondan hem köp bolsa, sebedi örtmäge zerurlyk galmaýar eken. Sebetde birnäçe leňňeç bolsa, olar çykmaga dyrjaşýana asgynçak bolup, birden biriniň çykmagyna päsgel berýär ekenler. Bişow adamlaryň hem aglabasy şeýle hereket edýärler.
Toplan we terjime: Orazmyrat MYRADOW
29
111
lavinya_
06.04.2024 12:40
Bagyşlansyn kir-kimirli hatalar,
Göwni ýykan, ötünjini sorasyn,
Bäş günlüjek sanalgyja ömürde,
Dert-beladan Allaň özi gorasyn.
Ýygy-ýygy sorap aman-esenlik,
Arka boluñ, ýykylana, ejize!,
Amanadyň alynmanka eliňden,
Berlewersin, bagtdan paýly nesibe.
Kine bilen garamasyn dideler,
Aladalar unudylsyn gursakdan,
Päk niýetler sabyr bilen dostlaşyp,
Lezzet bersin iň bir ýagşy pursatda.
Dilegmizi kabul etsin Hak Alla,
Rehimi inewersin guluna,
Köp ynsanyñ akly biraz kemäpdir,
Haky undyp, daýanýalar puluna.
Emma welin iñ bilmeli zadymyz,
Dowul bilen açylmasyn gapylar...,
Zikir bilen örüň, dogan säheri,
Saglyk bolsa galanlary tapylar
Awtor:Baýram Bejidow
19
26
lavinya_
13.03.2024 16:17
Şu gün meniñ günüm, üýtgeşik bar zat,
Meýdan al-ýaşyl, guşlar saýraýar,
Uzagyndan bolsun ähli zat gowy,
Durmuş eşret bilen başym aýlaýar.
Arassa howadan dem alýan erkin,
Güneşem ýakanok yssysy bilen,
Bu gün bir ýerlerde bukulan ýaly,
Şumroý kinelerim gussasy bilen.
Bu gün hiçkim göwnüme-de degenok,
Şeýle bir mähirli, mylaýym herkim,
Dünýäñ düzelenin buşlasym gelýär,
Bogazymy gyryp, gygyryp çirkin.
Nirä baksam nurly ýüzi görýän men,
Ýylgyryş, gözellik hökmüni sürýär,
Hoşamaýlyk bilen kalbymy gozgap,
Ýakymly duýgylar gujagny gerýär.
Şu gün meniñ günüm, üýtgeşik bar zat,
Seýle bolaýanok bagtyñ şowmasa,
Gün uzak düýşürgäp ýatjak ekenim,
Jañ sagady oýarmadyk bolmasa...
Awtor: Baýram BEJIDOW"
25
53
lavinya_
07.03.2024 12:11
Bu dünýä inmänkäm giderdim her gün,
Ruhum bilen ykbalymy almaga.
Her baramda taýyn bolup durandyr,
Küle çökmäge ýa göge galmaga.
Ýöne şolaň hiç birinem başarman,
Aralykda durdy bolup serimsal,
Dogrusy gynandym hatda şoňkudan,
Küle çökenleňem ýagdaýy elhal.
Sebäp olar çöküpdirler ymykly,
Ganat kakanlaram gökde galgaýar.
A ol bolsa kelemenläp bir özi,
Aralykda däli ýaly aglaýar.
Ahyry hemmesin ýygnap bir ýere,
Arasyndan elin saýlaýyn diýdim.
Ýekän-ýekän seredýärin, birdenem,
Serimsal ykbala kaklyşdy didäm.
Ejizje göwresin titredip durdy,
Näumyt gözlerin gyrpyldadyplar.
Men hiç tagamyny bilip bilmedim,
Ajy-süýji ykballary dadyplar.
Çynym, ýene gözlem şonda eglendi,
Ruhumam: «Şol ykbaly al» diýdi.
Hemem meni ykballaryň içinde,
Üýtgeşik däldigi haýran galdyrdy.
Ol bir ýönekeýje göze ilmeýän,
Ykrar edilmedik ygrarly ykbal,
Hemem meniň saýlap bilmän kösenen,
Ykbalym meň bilen ykbaldaş ykbal.
Ine, indem ençe ýyldyr bileje,
Külterleýäs bu dünýäniň ýollaryn.
Göterip, iterip, süýräp ýörsem-de,
Ykbalymdan nägile däl, illerim!
Awtor: Laçyn Pürjäýewa
30
27
lavinya_
04.03.2024 08:51
Bu nä beýle täsin düýş-kä,
Köçäň ugry doly adam,
Birisi akyl satyp ýör,
Ýene biri bulgar-badam.
Alyjydan satyjy köp,
Eden söwdaň nagt ýaly,
Sorag etdim söwdagärden,
Agam satlyk bagt barmy.
Ýylgyrdy ol, maňa garap,
Her dürli bar haýsy gerek?,
Ynsaplysy, wepalysy,
Beýlekisi batyr ýürek.
Baha näçe, oňşuklymy,
Onsaň näden ynsaplysy?,
Açygy bar ýapygy bar,
Maňa geregi gaplysy.
Gözden gaýyp boldy birden,
Düýşe erk edip bolýamy,
Gyzyklydy maňa ýene,
Bärde nämeleň bolýany.
Köçäň ugry doly adam,
Bazar göçüp gelen ýaly,
Alňasaýar satyjylar,
Käşgä gaçyp gelen ýaly.
Men-menligi satýar biri,
Satylyp dur adamkärlik,
Alyjy az iki ýeke,
Satyjylar edýär känlik.
Geň däl eken utanmasaň,
Gorkaklyk satyp dur şir-em
Menem satsam boljak eken,
Artyk umytlarmyň birin
Awtor: Baýram Bejidow.
26
18
lavinya_
02.03.2024 17:18
MINIATÝURALAR
* * *
Bir goşgy ýazdy. Özüne düşündirdiler.
* * *
…we bir gün, adatdaky bolşy ýaly, öýe geldim: ýok ekenim.
* * *
Ýerzeminde, kyrk alty ýaşynyň içinde, ýetip gelýän ýigrimi üçünji doglan gününe bagyşlap goşgy ýazmaga başlady we arheologlara selfi düşüp ugratdy.
* * *
Şeýle bir çuň pikirlendi… Iň soňunda gitdi-de, mazardaşyndaky suratyny dyrnaçaklady, adyny pozdy.
* * *
Ýürekden ýaşady, kelleden atyldy, bagryndan asyldy, ruhundanam kowdular neressäni.
© Rahat Şyhyýew
* * *
Duralgadaky ýaş gelin telefonyny öçürip, begenjine: “Buşluk, oglum bolupdyr!” diýdi-de, mylaýym ýylgyrdy. Menem ýylgyrdym.
* * *
Olar älem giňişligine uçdular. Gelenlerinde dünýä ýerinde ýokdy.
* * *
Sapançany aýna çenäp, mäşäni gysdy we assadan ýere ýykyldy aýnadaky sudury.
© Begençgeldi Orazow
* * *
Pul ýagýar. Topulmaga adam ýok.
* * *
Ýene-de basyrganypdyryn. Düýşümde, oýanýamyşym.
* * *
Sagadyma seredýän, her gezek bir zat görkezýä. Aldagçy.
© Umyt Küle
BIR ÖMÜR
Neresse bary-ýogy alty gün ýaşady we bütin ömrüni aglap geçirdi.
Toplan: Mukam Muhamow
( Gowy gördüm paýlaşmak isledim)
32
68
