lavinya_
23.04.2024 09:52
Asman neçün beýle zaryn aglaýañ?,
Ne-hä gije diñýäñ, ne gündiz diñýäñ,
Gussalarma gussa goşup hamala,
Daman her bir damjañ gursagma siñýär.
Bulut bilen büräp dursuñ depämiz,
Ýaz ýagşydyr goýar diýdik goýmadyñ,
Ýa-ha seniñ asyl goýma netiñ ýok,
Ýa-da toprak señ suwuñdan doýmady.
Ýuwmakçymyñ ýalan doly zeminiñ,
Kir-kimirli keleplerniñ ählisin,
Aýt, eger-de şeýle bolsa niýetiñ,
Menem goşant goşardym-a ähbetin.
Her bir sözler barar ýaly gursaga,
Peýkam etdim elimdäki galamdan,
Senden bir dogrulyk eşidäýmesem,
Gulagymam poslaşyşypdyr ýalandan.
Dursana eý asman gürleş meñ bilen,
Soraglarym kän ahyry diñleseñ,
Ikimiziñ söhbetimiz özgeler,
Eşitmesin,diñlemesin, bilmesin.
Ah bilýäñ-ä senden başga dostum ýok,
Syryñ berseñ dost diýenleñ aldaýar,
Dyngy bermän ýagyp dursuñ her wagt,
Asman neçün beýle zaryn aglaýañ?!...
Awtor :Baýram BEJIDOW
29
32
lavinya_
20.04.2024 09:01
"Daglar, maňa goýnuňyzdan ýer beriň!
Sygamok men, uç-gyraksyz giň sähra...
Ýazdyraýyn, ýagyrnymda gülberim,
Gujak açyň, enem ýaly giň, mährem.
Daglar, maňa goýnuňyzdan ýer beriň!
Dag şemaly sypalasyn saçlarym!
Goý, gözläpler öňki ýerden tapmasyn,
Meni taşlap giden garlawaçlarym...
Daglar, maňa goýnuňyzdan ýer beriň!
Derdinşeris, senem derdiň aýdarsyň.
Baý, meňzeşlik köpdür ykballarmyzda,
Öňler bir men dertlidirin öýderdim.
Daglar, maňa goýnuňyzdan ýer beriň!
Paý-pyýada ýodalarňy sökeýin.
Goý, bir saňa aýan bolsun seçeläp,
Saçlarym deý gözýaşymy dökenim.
Daglar, maňa goýnuňyzdan ýer beriň!
Dyrmyşaýyn gerişlerňe, zawlarňa.
Uzak garaşmarys ýuka ýürekli,
Gol uzadan perişdäniň aglarna.
Kömeginden ýüz dönderip perişdäň,
Şatlanaýyn, daşlar degen hamyna.
Garlawaçlarym deý taşlap gitmejek,
Güýçden gaçan şol perişdäň halyna...
...Ana, şonda....
...Ana, şonda
meni mäkäm gujaklap,
Daglar güler, daglar güler jak-jaklap...
Awtor: Laçyn Pürjäýewa
30
20
lavinya_
17.04.2024 14:29
Görsene şeýlebir garaşly dünýe,
Otlyçöp öz ýanaryna garaşýar,
Buzlar erärine garaşýar Ýazda,
Jadyly mukamyn ýañ edip,
Näler,
Çalynaryna garaşýar sazlar.
Asmanda garalan bulutlañ bary,
Çagba bolup ýagaryna garaşýar,
Tümlükler bürese gündiziñ agyn,
Säher güneş dogaryna garaşýar.
Ömürem garaşýar soñlanaryna,
Men bolsa gowluga garaşyp ýörün,
Durmuşyma girip-çykan herkimi,
Hemem derdimi,
Geljegime goşup, çolaşyp ýörün.
Hyýallaram ýan berenok şugünler,
Bilemok näme üçin bulaşyk zemin?,
Ýer tapamok ýama doly göwnüme,
Duşamok heniz.
Garşyña çykyp dur garaşmadyklañ,
Garaşýas arzuwlañ oñ bolaryna,
Ynamyñ, sabyryñ ujyndan kertip,
Ömürem garaşýar soñlanaryna,
Gowy bolar-la...
Awtor:Baýram BEJIDOW
35
43
lavinya_
14.04.2024 13:45
Meň hiç aklym çatanok,
Ýaşamakdan iripmiş.
Bu dünýe öň bir gezek,
Oň düýşüne giripmiş.
Terkidünýä bolupdyr,
Ýaşamakdan lejigip.
Has kejine tutupdyr,
Keç ykbalam kejigip.
Men çekinip, hamala,
Özüm ýaly ýazykly.
Diýýän: «Ýaşamak — hezil.
Bu dünýe-de gyzykly».
Ol diýýär: «Bu ýalançy
Alasarmyk düýş dämi?!»
— Ýylgyryp, doňup dursuň,
Näme, surata düşýäňmi?!
Men: «Saňa haýpym gelýär,
Saňa nebsim agyrýar.
Seret, 20 ýaşda,
Eýýäm saçyň agarýar.
Hany, badyhowalyk,
Weý-weý, ruhdan düşýäňmi?!
Ýa dünýede ýaşamak,
Saňa agyr düşýämi?!
Ýa ýüregňe düşýämi?!»
— Sen nä sömelip dursuň,
Aýnaň öňüne geçip?!
Bu sese hälki pursat,
Gitdi gözümden öçüp...
Awtor:Laçyn Pürjäýewa
30
67
lavinya_
11.04.2024 09:45
Göwünler ýognapdyr, inçelip hoş söz,
Salamy berlenok öñküler ýaly,
Ynansañ satýalar, barysy boş söz,
Geñem görülenok öñküler ýaly.
Gürletseñ namazly, täretli kişi,
Emma sabyrynyñ käsesi deşik,
Şeýtana uýallar, ýalan sözleşip,
Alla el serlenok öñküler ýaly.
Tagamyn datsañam, datmasañam bir,
Hak sözi aýtsañam, aýtmasañam bir,
Gümany öýtseñem, öýtmeseñem bir,
Namyssyz dymanok öñküler ýaly.
Gum ýaly seçýäler, zer ýaly wagty,
Puldan gözlenilýär, ömirlik bagty,
"Şükir şu günüme, geljegim ýagty!", -
- Neçün diýilenok öñküler ýaly.
Minnetli edilýän sogabyñ soñy,
Birahat edenok o dünýäñ gamy,
Gaýta, şygar edip hileli heñi,
Duýgyñ duýulanok öñküler ýaly.
Gije-gündiz diläp, iliñ saglygyn,
Indi bildim d:aş diýenmiñ daglygyn,
Tobam bagt, sabrym uly baýlygym,
Men gowsy dymaýyn öñküler ýaly...
Awtor: Baýram BEJIDOW
28
51
