ilhano_va
22.06.2024 20:07
Gözleň bulut deý buglanar,
Buz bolar ýüregiň we soň,
Ajy geplerden duzlanar,
Geň görer adamlar gülseň.
Dymar dünýe, damagyňa
Agyr halyny sygdyrar.
Basyp inçe damaryňa,
Peltäňe gülki damdyrar.
Bokurdagyň bogular hem
Iner gözleriňe ünji.
Özüň sabyrly duý, şol dem
Ýeňersiň dymyp ökünji.
Kyndyr umytly ýaşamak,
Günleriň sudury öçer,
Aglama, dolsa-da damak,
Gözýaşyň gymmaty gaçar.
Gülnar Geldimyradovna
12
51
ilhano_va
22.06.2024 13:40
Men "Sen" diýip, Ýerden üzdüm aýagmy,
Gör, "Sen" diýip, telwas etdim göge men.
Geldim, bir bilbilem, şeýdaýy göwnüm,
Gül küýsedi Aý üstünde gögeren.
Söz ýok!
Sözlüge sygmadym indi!
Bak, baryny aýan eder didelem.
Ahyrsoňy şa gyzyny aparýan
Gadym ertekileň garyp ýigdi men.
Men gedaý göwnüňe wysal dälmidim,
Hanlaryň tamasyn tala daňmyşam.
Bitaýam, binesip bolup gämiden,
Nuhuň tupanyndan aman galmyşam.
Bir jyndym,
Çüýşäni etdiň kül-owram,
Maňa Hakdan berlen paýymmydyň sen?!
Diýdiň:
- Sen şolmudyň?!
Atdym başymy.
Owaldan baryna taýynmydyň sen?!..
Merdan Baýat
16
79
ilhano_va
21.06.2024 11:26
Boýun egdim,
Gije ebşitläp tutdy ýakamdan,
Girdaba itekleýär garaňkylyk arkamdan.
Gysýar, berenok dem,
Ýaňakdan syrygýar nem.
Indi, kükregme urup aýtmaga ýok mejal, ýok sesim,
Gelýär pyşyrdap gürleşesim.
Ýöne dymýan,
Gözümi ýumýan.
Dymmak − ýalan sözlemek, tüýs wagtyka diýmegiň.
Sözler birin-birin sönýär ýadymdan,
“Ýalňyz galdym” diýmäge biri bolsa ýanymda.
Musa Ýusup
21
59
ilhano_va
15.06.2024 02:54
Sözler sözlemäge berlen närsedir,
Oýnamak üçin däl,
Sögünmek üçin däl,
Ýoýmak üçin däl!
Dän, ýüregim, ýaman pälleriň nedir,
Heý, sözler bilenem oýun edip bormy?!
Ili oklar bilen oýnadyp bormy?!
Barmy ýalan sözden baýnaýan, baýan,
Aýan, ýanan sözden ýüregi gana:n.
Söz otdur, söz közdür, sözlerde ýalyn,
Söz bilen kalby däl, pisligi ýakyň,
Pesligi ýapyň!
Kakyň sözler bilen Hakyň dergähin,
Hakyn alyň ejizleriň, erkleriň.
Söz baldyr, söz güldür, gerekse, güldir,
Gerekse, ýekeje özi hem öldir.
Ýok, söz bilen öldürmäň siz, güldüriň!
Ýamana: «Ýagşy» diýiň, gaýtsyn pälinden,
Ýagşy sözläň, çyksyn ýylan hininden.
Diňläň hakykaty sözlän şahyry,
Hoş sözden suwarlan köňül solmaýar,
Hak sözleri ýazan şahyr ölmeýär.
Şygyrda sözleriň enweri ýatyr,
Hak sözde şygyrlaň serweri ýatyr.
Öýtmegin sözleriň täsiri ýetmez,
Aýdan sözüň senden daşlaşyp gitmez.
Gör, kimler hak sözi öçürip otyr,
Şahyr ykbalyny göçürip otyr...
Nury Sakçyýew
17
53
ilhano_va
13.05.2024 00:48
Sensiz ömürmi?,
Aý ýok, gözöñüme gelenok,
Bu birhili ,,topraksyz kök" diýen ýaly,
Kalbymda gan öýen ýaly,
Urunaryn, çyrpynaryn,
Unutmagy unudaryn,
Asmandan aşak gaçaryn,
Hawa, çynym.
Ho-ol arada az wagtlyk,
Tersleşdik ýadyñdamy?,
Zemin başaşak öwrüldi,
Çagba guýdy, buýdy göwnüm,
Duýgylam hossarsyz galdy,
Tapmadym islegmiñ göwnün.
Adatylyk senden daşda, alysda,
Aşyk bolan her kes düşmez bu taba,
Seni ýitimirmezlik üçin adyñy,
Ýazdyraýsammykam ,,gyzyl kitaba"?.
Baýram Bejidov
23
72
ilhano_va
12.05.2024 01:14
Ýazgydymy ýakyp, külün sowuryp,
Ýanyňa bararyn bir gün...
Sypatymy küýsän keşbiňe öwürip,
Ýanyňa bararyn bir gün...
Bozuk öýde abat gapyny açyp,
Mähriň siňen arak-şerapdan içip,
Mahluksypat ynsanlygymdan gaçyp,
Ýanyňa bararyn bir gün...
Aňşyrmaryn Arş nirde, Kürs nirde,
Ýüregmi agyrdýan duýgudan irdim.
Diýseňem: «Gyssanma, gowşara irdir».
Ýanyňa bararyn bir gün...
Utanarsyň didarymy gördügiň,
Saňa suwsap, teşne bolup ýördügim,
Gören düýşlerimi ýagşa ýorduryp,
Ýanyňa bararyn bir gün...
Gysganarsyň, gizläp nuruň, dideleň,
Ýüregim ýigrençde, kalbym kinede.
Meni ýalňyş ýazgydymdan ideme,
Ýanyňa bararyn bir gün...
Günälerim gülberimde haşlaýyp,
Ruhumy boşadyp, sowap başlaýyp,
Ahyrynda gargyş bilen da:şlanyp,
Ýanyňa bararyn bir gün...
Gurbanmyrat Saryyew
20
100
