ilhano_va
19.01.2024 12:16
Adamkärçiligiň derejesi hem ylmy derejäňden pes bolmaly däl.
Ýürek hem sagadyň togtaýşy ýaly togtaýar.
Sözüň gutaran ýerinden saz başlanýar.
Duşmanyň öz ajalyna ölenine gynanmaly.
Talapyňy gowşatdygyň, tanapyny gowşatdygyňdyr.
Ýer togalagynyň çat atandygyny bilýärmiň?
Dostlugam edil agaç ýaly şahalanmaly.
"Çepiňe ýatyp turan ýaly..." diýibersinler, oňat dynç aljak bolsaň, sagyňa-çepiňe öwrülip ýatmaly.
Edilmeýän ynamy ödäp bolanok.
Jenaýatçyny yzarlamak ýolbarsy yzarlamakdan hem howply.
Sögüşmek – uruşmaga görülýän taýýarlykdyr.
Akyl satmak samsyklygyň alamaty.
Birçak gulluga alynjak oglanlaryň görüş derejesini olaryň ýyldyzlary saýgarşy bilen kesgitländiklerini bilýärmiň?
Aty nallaňda toýnagyny galdyrýan eşegiň toýnagyny almaly.
Iki ýüzli adamy ýüzleşdirmek üçin iki ýüz gram ýeterlik.
Adygaňsoň, a:t ýitiren diýdirmeli däl.
Hiç kimiň oda ilki urasy gelenok.
Talanyp alnan tanalyp alnanok.
Hudaý gerek zadyny berseňem alýar, bermeseňem.
Almany göge oklaňsoň, gapmaly.
Ömür bäbekhana bilen öwlüýäniň arasynda ýerleşýär.
Bendesinden haýyş etmeli, Haka ýalbarmaly.
Hudaýdan ilki dilemeli zat – zürýat.
Öleniň öňüne düşmeli däl.
Aslyna bakma, aklyna bak!
Derman ýetmeýän zadyň öwezini dolmak üçin içilýär.
Alty aý puryja aýalyň bilen aýrylyşmaga taýynlyk üçin berlenok.
"Bir aýaly bejerdeniňden, üç aýal alanyň amatly” diýýäniň degişmesiniň aňyrsynda hakykat ýatan bolaýmasyn?!
Tejribe hem edil baýlyk ýaly, ýuwaş-ýuwaşdan toplanýar.
Garawul saklamaga gurbuň çatmasa, it saklabermeli.
Aw eti gurbanlyga ýaranok.
Ýanýoldaşy ýogalan aýal dokuz aý on gün geçýänçä äre barmaly däl.
Öýleneňde ägä bol! Seniň bagtdyr öýdüp ýapyşanyň başga biriniň taşlap giden betbagtlygy bolaýmasyn.
Halypa dörediji bolmaly, şägirt halypasyndan ol ýogalansoň ozdurmaly.
Jan girensoň gyrksaň, üzümem aglaýar.
Burun kesmeseňem ganaýar.
Ekin ekseň, ilki bugdaý ekmeli.
Baýamak üçin akylly bolmaly, ýöne akylly bolmak üçin baýamak hökman däl.
Diňe iliň hakyny däl, öz hakyny hem az iýen arassa bolýar.
Semrejek mal gysyr galar.
Gijesini gündiz edip işleýän gündiz jaýyny garaňkyladyp ýatmaly.
Gelin agzyndan ýel berlen ýaly boluberse gowy.
Göz-gulak, el-aýak... ýaly agzalaram deňdeş agzalara degişli dälmi?
Ataňdan gorkmaýan bolsaň, ikisi hem çagyranda, ilki eneň ýanyna barmaly.
Bir ýakynyňy ynjatmak on ýady ynjadan ýalymyş.
Bakylygy bakyýetden gözlemeli.
Iki aşdan galany bir gazana salyp gyzdyraýmaly.
Gülkä gülmeseň, güldürjek bolýanyň göwni galýar.
“Iki göç – bir talaň” diýilýäni kireýine ýaşaýana degişli däl.
Halal aşyňa ýeter, haram başyňa.
Çykdaýjyň girdejiňden kän bolmaly däl.
Äriňe ýalynmagyň aýby ýok.
It ýylgyrşy ite ýagşy.
“Bagşy bolsun” diýme, “Bagtly bolsun!” diý.
Torgaý çöpe-de çykanok, köpe-de.
Merdiňem, derdiňem gaňryşyna gaýtmaly däl.
"Öňüm gelenden soňum gelsin!” diýleni goşga-da degişli.
Gedaýdan maslahat däl, ýol soramaly.
Ar almak hyjuwy hem, edil söýgi ýaly, gaýduwsyz edýär.
Edebiýat meýdany kärendesine berlenok.
Talantyňy mazamlap duşman gazanmaly däl, dost gazanmaly.
Toýa – jüp, ýasa – täk.
Tosty basyp almaly däl.
Dile çolanjak ýagşylyk edilmese gowy.
Il bähbitli işleriň hemmesi ömrüňi bagyşlanyňa degýär.
Ýaşkam “Ýaş şahyr” diýdirmejek bolup ýazdym, indi bolsa “Sen şahyr däl ekeniň!” diýdirmejek bolup ýazýaryn.
Baýlygyny ýitiren saglygynam ýitirýär.
Hezreti Dawudyň kyrk oglunam “Men-menlik” öldürýär.
Ýazykly öýüň gapysy gara.
Bäri bakana “Bärisinden aňyrsy ýakyn” diýlenok.
Oňat şahyr köplük edenok.
Şahyr obada halanmaly, şäherde dalanmaly.
Ekinçi eşek temegine kakdyrar.
Söwdaňam, gudaçylygyňam arasyna düşmeli däl.
Alňasan siňek aşa gaçar.
"Düwdüm!” diýme, “Bişdim!” diý!
Erk erkegiň elinde bolmaly.
Towşanyň dogduk depesini tekizlemeli däl.
"Dynç başyňy depirjik äre berensoňlar”,
“Depegenden daşyrak” bolup bolanok.
Şahyr bolmak üçin adyň aşagyndan “Şahyr” diýip ýazmak ýeterlik däl.
Döwür öz ýalňyşyny öleňsoň düzedýär.
Nebsiň öňüňe düşensoň, yzyňa gaýtmaly.
20
64
ilhano_va
19.01.2024 02:09
Ýyllary suw deýin äkitdi günler,
Geçen möwsümleri ýaşadym tenha.
Unudyp bilmeýän duýgulam bilen
Men geldim, ynha!
Seni her küýsämde dörän goşgulam
Depe bolup ýatyr beýlämde, hanha.
Gönüläp gözlerňe garamak üçin
Men geldim, ynha!
Saňa barýan ýol tapmadym elenip,
Hezil etdi şor täleýim bulanyp,
Şu ýaşymda ilki söýgä sygynyp,
Men geldim, ynha!
Sudur bolup geçmişime siňipsiň,
Aýralygy ne tär bilen ýeňipsiň,
Diýme maňa: «Wah, näm üçin gelipsiň»,
Men geldim, ynha!
20
29
ilhano_va
18.01.2024 01:52
Ýüregim kirläpdir, durlanar ýaly,
Tämiz ýagyşlara dulanar ýaly,
garaz, biraz pälim gowulanar ýaly,
Eje, meniň üçin dileg etsene.
Ýedi-ýigrimi dört arşu-pelekde
her sözüňe «Amin!» diýer melekler.
Maňa başga derman-däri gerekmez,
Eje, meniň üçin dileg etsene.
Sen dileg et,
boş gaýtarmaz Ýaradan,
ýogsa dünýäm besse-besse ýaradan.
belki adam borum ýaly ýaňadan,
Eje, meniň üçin dileg etsene.
Ylhamymdy jandan soňky amanat,
Kän hyýanat etdim, etdim gabahat,
Dogry ýola düşerim ýaly magat,
Eje, meniň üçin dileg etsene.
Aňlasaň, bir sen aňlamaly halymy,
Sözleriňden tapdym herne barymy.
Ol hökman eşider ahy-zaryňy,
Eje, meniň üçin dileg etsene.
20
28
ilhano_va
17.01.2024 15:31
Men kän ýerde ýüregiňi duýaryn,
Men bar zatda düşünerin halyňa.
Ömrümi yşkyna girew goýanym,
Duýgularym alyp barar ýanyňa,
Sen hemişe gara meniň ýoluma!
Asman tüme dönse, ýyldyzlar öçüp,
Baglara gyş gonsa, guşlary uçup,
Ynan, geler diýip, bar zatdan geçip,
Şol ynamyň alyp barar ýanyňa,
Sen hemişe gara meniň ýoluma!
Kinniwanja şatlyk bolsam gussaňa,
Zemin göwnüm telwas eder Asmana,
Menziller kär etmez bagra basmaga,
Söýgim meni alyp barar ýanyňa,
Sen hemişe gara meniň ýoluma!
Bu bir durmuş, käte dünýäň daralsa,
Üşeseň, ýyljajyk mähre zar bolsaň,
Men ýeterin, şu jahanda bar bolsam,
Söýgim meni alyp barar ýanyňa,
Sen hemişe gara meniň ýoluma!
Gülşirin Hanowa
21
45
ilhano_va
17.01.2024 01:58
Bagyşla, eger-de hataly bolsam,
bu günler erkimi aklym kesmeýär.
Içim gybyr-gybyr –
Ýazasym gelýär şygyr
Seniň ezeldäki galamyň bilen.
Şybyr-şybyr ýanyp duran ýagyşlaň
oduna ýanasym gelýär.
Hem göwnümde bir hoş hyýal besleýän –
Saňa meňzemek isleýän.
Ýok zat ýok,
bar zatlaň welin
ählisin söýesim gelýär.
Eý göresim gelýär ähli barlygy.
Ýigrenmek, ýazgarmak, kem baha bermek
ýaly duýgulary undasym gelýär.
Söýüp döredesim gelýär bir zatlar,
ýok, ýok,
edil sen deýin
ýaradasym gelýär söýüp bir zatlar.
Söýmekde many.
Her näçe günäkär, a:sy-da bolsa,
bagyşlasym gelýär ähli ynsany.
Bir söz bilen düzläp biljek halyma,
sabry, muhabbeti boljak bu dünýäň,
çünki herki zadyň teýkaryn bilýän
Saňa meňzäsim gelýär.
Biziň üçin ähli zadyň çägi bar,
çykyp bolmaz,
ýykyp bolmaz diwaryn,
çykman welin görüp bolmaz didaryň.
A meniň çykasym, ýykasym gelýär,
ne sogap, ne günä, oýnanok maňa.
Meniň bir maksadym,
bir niýetim bar:
Görsem bor seni,
hem-de sen ýaly
hiç hili bähbitsiz, gorkusyz – zatsyz
söýsem bor.
Bilmedim näme üçin muny islemäm,
ýöne,
Saňa meňzemek isleýän.
Süleýman.H.
18
40
