gokgi
20.12.2023 15:00
Günlerde bir gün mugallym okuwçylara durmuş barada sapak alarlykly tejribe geçirip görmegi teklip edýär. Okuwçylar bu teklibi ikirjiñlenmän kabul edýärler. Mugallym:
- Diýmek, gepleşdik. Ertir ähliñiz ýanyñyz bilen bir kilogram kartoşka getiriñ!- diýýär.
Okuwçylar bu ýumuşa hiç hili düşünmedik bolsalar hem mugallymyñ tabşyran ýumşuny ýerine ýetirýärler. Mugallym synpa girende okuwçylaryñ hersiniñ partasynyñ üstünde düýnki sargydyñ taýýardygyny görýär. Mugallym olaryñ bilesigelji gözlerine mähirli seredip:
- Indi bolsa şu güne çenli bagyşlamadyk her bir jorañyzyñ ýa-da dostuñyzyñ adyny bir kartoşka ýazyp torba salyñ! - diýýär.
Käbir okuwça üç-dört sany kartoşka ýeterlik bolan bolsa, käbiri getiren kartoşgalarynyñ ählisine at ýazypdyr. Mugallym özüne bakýan soragly nazarlara seredip, tejribäniñ ilkinji şertini düşündirýär:
- Bir hepdäniñ dowamynda bu torbalary ýanyñyzdan aýyrmaly däl, öýde, okuwda, ýolda hemişe ýanyñyzda bolmaly.
Aradan bir hepde geçýär. Mugallym synpa giren badyna , ýumuşybir kemsiz ýerine ýetiren okuwçylar ýerli-ýerden närazylyklaryny aýdyp başlaýarlar.
"Mugallym bu torbany hemme ýere alyp gitmek örän kyn" diýýäni haýsy, "Kartoşkalar çüýräp başlady" diýýäni haýsy. Mugallym okuwçylaryna ýylgyryp, şeýle ündew beripdir:
- Görşüñiz ýaly biz başgalary bagyşlaman, aslynda özümizi jezalandyrýarys. Ruhumyzda agyr ýük götermäge mejbur bolýarys. Bagyşlamaga garşymyzdaky adama eglişik etmek diýip düşünýäris. Bagyşlamak, ilki bilen, özümize edýän ýagşylygymyzdyr!
Öýke - duşmanyñ,
akyl - dostuň.
35
143
gokgi
14.12.2023 16:40
Zenan mähri bilen ýyladar öýüñ,
Şoñ üçin olary ýürekden söýüñ.
Zenanlar bolmasa şaý-sep satylmaz,
Zenan ýok ýerinde şatlyk tapylmaz.
Zenan höwesinden dörän keçeler,
Zenandyr biz üçin ýaşan ejeler.
Zenanlar bolmasa dokalmaz haly,
Zenansyz tümlükdir erkegiñ haly.
Zenanlar bitmejek ýaraña emdir,
Zenanlar garañky ýoluña şemdir.
Zenanlar bolmasa pikir güýjemez,
Zenanlar bolmasa, dilem süýjemez.
Hudaý bize ýeñletmek üçin derdi,
Her öýe azyndan bir zenan berdi.
Zenanlar bolmasa ekilmez şaly,
Zenanlar pyrlaýar goja ýer şary.
Zenanlar ýok bolsa, älem döwülsin,
Zenan ýokka erkek kime görünsin?!
Zenanlar bolmasa, bolmazdy ene,
Zenanlar bolmasa, geçmezdi sene.
Zenandyr dünýäniñ ençe aşpezi,
Zenandyr kösenip ulaldan bizi.
Zenanlar bolmasa ýiterdi kärler,
Zenansyz dünýäden giderdi ärler.
Sebäpsiz ýykañda zenan göwnüni,
Kiçeler gözüñde dünýäñ göwrümi.
Olaryñ gözýaşy ýürek daglatsyn,
Goý, zenany diñe sogan aglatsyn.
28
43
