garlawac
26.03.2024 16:43
Ýanyňda bolmasam, ýadyňda borun,
Men bir pikir borun ýüregňe düşýän.
Gijeler meň adym düýşüňden çykmaz,
Barlygym gündizem huşuňda düşlär.
Çemin tapman menden sypyp gitmegiň,
Özüňi günäläp, çekersiň yza.
Bir görseň, ähli zat ýalan ýaly bor,
Bir görseň, ähli dert üstüňe dyzar.
Aňymda yza bar seniň adyňdan,
Ony ýürek arasynda daşadýan.
Ant içýärin seniň gorkýan zadyňdan,
Menden saňa dönüp gitmek başartmaz.
Derdiň men bolaryn, dermanyňam men,
Ýöne men seň üçin lukman bolmaryn.
Giň dünýäni dar eýleýip başyma,
Söýgüsin ýygşyryp-bukýan bolmaryn.
Gözýaş bolar käte derdiň egisjek,
Käte öten günler bolar teselli.
Sen bu derdi satyn aldyň meýletin,
(Asyl, söýgi seň çakyňdan ýesermi?).
Her ynjyk pikiriň göwnüňe deger,
Özüňe özüň deý tapmarsyň duşman...
...Ýanyňda bolmasam, ýadyňda borun,
Men bir pikir borun ýüregňe düşýän...
PARAHAT MÄMMETNUROW
32
85
garlawac
25.03.2024 20:21
Gel, baryny başlaly biz başyndan,
Öýke-kine düýne siňsin ebedi.
Ykbal bagtyn gysganybam durmaýa,
Bozulmasa ýaşamagyň edebi.
Kim günälidigniň parhy ýok indi,
Göwünler döwlensoň tutmasa ýama.
Bilýäňmi, bagtymda adyň göründi,
Palçy daýza bakanynda aýama.
Diýipsiň hatyňda: "Bozmak aňsatdyr,
Gel, ikimiz täze haýat guraly.
Durmuş bir-de bahar, bir-de aňzakdyr,
Biz mydama sözümizde duraly.
Diýýärler: "Söýginiň kadasy şeýle,
Uruş-dawa kän ilipdir bellige.
Ýok, göwne degmeklik kada bolmasyn,
Öýkeleşmek öwrülmesin endige.
Uzak menzillere ýoldaş bolmaga,
Sarsmasyn kalpdaky ynamyň saly.
Umyt, ynam ganat berse kalplara,
Şonda söýgi bagtly eder ynsany.
Annabeg AÝMAKOWA,
31
77
garlawac
25.03.2024 04:51
Başagaý günlere ýükläp günäni,
Şygyr ýazman hem okaman geçilen.
Gijeleriň, gündizleriň jemini,
Gündeligme bellemedim, eje, men.
Bilgeýşleýin ýazman gündeligimi,
Örtjek boldum ýaltalygmy ýene-de.
Kast etdigim bolýamy bu özüme,
Ýa ikilik bormy beýik senede.
Eje men ulaşyp derde, alada,
Gözlerime soňky çäredi-uky.
Ukymda görmedik gorkunç düýşlerden
Oýalykda gorkup gözledim buky.
Özgelere ýükläp ähli webaly,
Şygyr ýazman hem okaman geçilen.
Gije-gündiz tutuş ömrüň hasabyn,
Gündeligme bellemedim eje men.
Annabeg AÝMAKOWA,
29
67
garlawac
24.03.2024 22:03
Diýme: «Gözleriňde asmany görýän»,
Asmandan Zemine gaçaýma birden.
Diýme: «Barlygyňda alawlap ýanýan»,
Soňundan kül bolup öçäýme birden.
Humar bolup diňlän sazlaň hakynda,
Bendi bolup synlan ýazlaň hakynda,
Menden ozal söýen gyzlaň hakynda
Ýanymda agzyňy açaýma birden.
Kiçelsem kiçi bol, beýgelsem — beýik,
Ýarama melhem bol, döwügme — seýik.
«Bul-a maňa indi ýüz berdi» diýip,
Mertebämden ätläp geçäýme birden.
Tämiz bolsun niýetleriň, pälleriň,
Aýdyň bolsun ýodalaryň, ýollaryň.
Bilip bolmaz, aglap, ejizlän günüm,
Menden ýüz döndürip uçaýma birden.
Parahat Batyrow
35
153
garlawac
24.03.2024 07:28
Ikimizi duşurypdyr bu ykbal,
Birmeňzeş şäherde, meňzeş köçede.
Sen-ä bir ojagyň ýetişen ogly,
Menem bir maşgalaň gyzy ýekeje.
Sen örän az sözli, şeýle bir agras,
Menem çalt öýkelek, näzik göwünli.
Bilmedim, ozaldan birmi ýolumyz?!
Bolduk bir-birege aşa göwünli.
Göwünmi, ýürekmi, bilemok anyk,
Düşünerden duýgularym horaşan.
Gözleriňe baksam özümi görýän,
Ýa sen meň bagtymmy uzak garaşan
Garaşylan ýyllar bagt bolup gelsin,
Günler dowam etsin şeýle rejede.
Şükürim bihasap saňa duşanma,
Birmeňzeş şäherde, meňzeş köçede.
Nurgözel Ýazberdiýewa
29
109
garlawac
22.03.2024 22:09
Eje haçana çen bukup saklaýyn,
Söýgi hakda ýazan setirlerimi...
Kän temmi alanym - seniň eliňe
(Jigim tarapyndan ýetirlenlermi?)
Şol gün nokat goýdurypdyň soňuna,
Ýadymda, men jigim bilen jetleşdim.
Eltip okadypdyr goşgularymy,
Şondan soňam söýgüden has çetleşdim..
Başga alajam ýok, kim islär dagy,
Olaryň tutaşdy:r bolmagny peje.
Gyzyň häli çagalykdan saýlandy,
İndi beri garşy bolmagyn eje...!
Bazardan zat satyn almakçy bolup,
Göwnüme ýetýänçe esli aýlamda
"Kejirligiň galman geçjek" diýerdiň,
Gyzyň şol gylygyn gaýtalar ýene,
Ýalňyşmaz ol asla ýigit saýlanda.
awtory näbelli
31
102
garlawac
21.03.2024 22:44
Enşalla!
Şu gün uzynly gün ýanyňda boljak,
Ähli işleriňi goýup, gel, senem.
Maňa ilki bilen, şo-ol öňkiň ýaly,
Günüň dogşy hakda gürrüň bersene.
Gürrüň ber baglaryň oýanşy hakda,
Hem oýarşy hakda ýazlaryň bizi.
Kä gürrüňler dagy sygmasyn akla,
Nämemiş, jadyly saçaga, hakyt,
Äkidýämişinler ýalbaryp bizi.
Gowy, hä,
Şol köne ýol bilen düýşleň gelişi.
Ýadyňa düşýärmi, öýkeläp gidip,
Soňam ýene öz-özümiň gelişim.
Aýtsana, bilýäň-ä, garlawaçlaryň
Çagalarna aýdýan ertekisini.
Gürlesene, dymma, göresim gelýär,
Men düýnki, şu günki, erteki Seni
Laçyn PÜRJÄÝEWA
33
442
garlawac
08.03.2024 13:00
1). "Şemler bir sönenson, hemme aýallaram owadan..."
(Plutarh)
2).On sany agzym, on sany dilim bolsa-da, aýallaryň erkeklerden pul çilmek üçin edýän oýunlaryny sanap ýetişip bilmerin".
(Owidiý)
3). "Gabanjañ aýalyň gahar-gazaba ýugrulan gargyşy adamy guduzlan itden has beter zaýalaýar".
(Uilyam Şekspir)
4). "Aýallaryň gözýaşyndan has çalt kepeýän zat ýok".
(Jon Uebster)
5). "Ar-namysly zenanlaryň köpüsi idelmänson, üstünden barylman ýatan hazynalara meñzeýär".
(Fransua de Laroşfuko)
6). "Zenanlar mydama çakdan aşmaga meýilli, olar erkeklerden ýa has gowy, ýa-da has erbet".
(Žan de Labruýer)
7). "Zenan size ýüregini bermänem görsün, şonda onuñ teninin beýleki ýerlerinden özüñizi hiç haçanam halas edip bilmersiñiz".
(Jon Wanbru)
8). "Erkek bagtly durmuşdan lezzet alýar, aýal bolsa berýän bagtyndan".
(Pyer Şoderlo de Laklo)
9). "Urkaçy jandaryň in uly ýalñyşy adalat duýgusynyň ýoklugydyr".
(Artur Şopengauer)
10). "Zenanlar düşünmek üçin däl-de, söýülmek üçin ýaradylypdyr".
(Oskar Waýld)
11). "Bir zenan öz ýaşytdaş erkeginden hemişe yaş görünýändir".
(Elizabet Barrett Brauning)
12). "Zenan - Hudaýyň ikinji ýalñyşlygydy".
(Fridrih Nişse)
13). "Garakçylar ýa puluñy alar ýa janyñy, aýallar onuñ ikisinem alar".
(Semýuel Batler)
14). "Hakyky ýaşyny aýdan aýala hiç haçan bil baglamañ. Ýaşyny dogry aýdan aýaldan her zada garaşyberin".
(Oskar Waýld)
15). "Otuz ýyllap zenan ruhy bilen gyzyklanandygyma garamazdan häzirki wagta çenli jogabyny tapmadyk bir soragym bar: Aýal näme isleýär?"
(Zigmund Freýd)
16). "Ne gözellik, ne-de dilewarlyk. Käbir aýallar seýkin basyp şeýle bir yöreýärler welin, adamyň aklyny başyndan uçurýarlar".
(Redýard Kipling)
17). "Owadan aýallary hyýaly güýji bolmadyk erkeklere berip görsek näder?"
(Marsel Prust)
18). "Hudaý erkegi ýaradanda onuň ýeterlik derejede ýalñyz däldigini gördi we özüni hasam ýalñyz duýsun diýip oña bir taý ýaratdy".
(Pol Waleri)
19). "Köp zenan suratlandyrylyşy ýaly ýaş däl".
( Maks Birbom)
20). "Kyrk bäşinde owadan aýaldy, soñam uzak wagtlap şeýleligine galaýjak ýalydy".
(Anita Brukner)
21). "Erkek bilen bagtly ýaşajak bolsañ, oña köpräk düşünip azrak söýjek bolmaly. Ayal bilen bagtly ýaşajak bolsañ ony köpräk söýüp düşünmezlige çalyşmaly".
(Elen Roulend)
22). "Zenanlar rewolýusiýanam, rewolýusionerlerem ýigrenýär. Olar yuwaş gylykly, bankda işleýän we nahar wagtyndan gijä galman öýe gelýän erkekleri gowy görýärler".
(Genri Luis Menken)
23). "Aýallar bilen erkekler in bolmanda bir meselede birleşýärler: Olaryň ikisi-de aýallara ynanmaýar".
(Genri Luis Menken)
24). "Zenanlar ençeme asyrlardan bäri erkegi tebigy keşbinden iki esse uly görkezme güýjüne we jadysyna eýe aýna mysalydyr".
(Wirjiniýa Wulf)
25). "Aýallar erkeklerin tersine ilki söýýärler, soñ isleýärler".
(Anri de Monterlan)
26). "Aýal bolup dogulmaýar, aýal bolunýar".
(Simona de Bowuar)
27). "Ayal bilen diñe üç zady etmek mümkin: Ony söýüp bilersiniz, onun zaryny çekip bilersiniz, birem ony edebiýatlaşdyryp bilersiniz".
(Lorens Darrell)
28). "Zenana menden beter bendiwan bardyr öýdemok: munuñ elimde birnäçe delili bar".
(Alan Jeý Lerner)
29). "Sudda ýüzbe-ýüz bolýançañyz bir aýaly hiçem tanap bilmersiñiz".
(Norman Meýler)
30). "Erkeklerin derdi aýallarynkydan has köp. Olar hemme zatdan ötri aýallaryň näzine çydamaly".
(Fransuaza Sagan)
31). "Aýal adamsynyň ýygy-ýygydan atýan ýomaklaryna her sapar gülen bolup oña dönüklik edýär. Aýalyna garap: "Men sensiz nädip oñaryn?" diýýän erkegiñ bireýýäm işi gaýdandyr".
(Žermen Grir)
32). "Menden sorar bolsañ, azgyn heleýi diñlemän. Aşygyna sözlänin suwa, şemala yazmañ".
(Gaý Waleriý Katull)
33). "Aýallaryň hemmesi iru-giç ejelerine meñzeýär. Bu olaryň tragediýasydyr. Hiç bir erkek ejesine meñzemeýär. Bu hem onuñ tragediýasydyr".
(Oskar Waýld)
Toplan we terjime eden: Has TÜRKMEN.
Çeşme: https://kitapcy.ru/news/meshur_yazyjylaryn_we_akyldarlaryn_ayal_gyzlar_hakynda_aydan_sozleri/2020-03-09-10738
36
212
