garlawac
19.12.2023 21:50
Ilkinji söýgümi ýatladan gyza.
Gyzlaryň içinde oturan peri,
Aýtsana, şol gyzyň nämesi borsuň?!
Sen şol gyza meňzäýmelimi ýeri,
Aýtsana, şol gyzyň nämesi borsuň?!
"Giñ alnyňam tanyş, dişiñem tanyş,
18-19 yaşyňam tanyş"*
Aýajygyňdaky köwşüñem tanyş,
Aýtsana, şol gyzyň nämesi borsuň?!
Meñzeş gördüm gara saçyň taryny,
Meñzeş olaň uzynlygy, örümi,
Näçe ýyldyr çekip ýörün zaryny,
Aýtsana, şol gyzyň nämesi borsuň?!
Doglan güni, aýy, ýyly sendedir,
Hatyma hat ýazan eli sendedir,
Meger dodaklarnyň baly sendedir,
Aýtsana, şol gyzyň nämesi borsuň?!
- "Haý-haý şahyr bilip sözle jaýyňy"
diýip maña gezäberme ýaýyňy,
Ýa sen şol kejiriň ekiz taýymy,
Aýtsana, şol gyzyň nämesi borsuň?!
Ýaý diýip ýazanym gaşyň şonuňky,
Ýakaña bejeren nagşyň şonuñky,
Utanyp başyňy egşiň şonuňky,
Aýtsana, şol gyzyň nämesi borsuň?!
Bägül gunçasy deý açylyp ugran,
Seniň saña meňzeş barmydy joraň,
(Aўyp däl-ä muny bilmegim sorap)
Aýtsana, şol gyzyň nämesi borsuň?!
Ýylgyrşyň çalymdaş, sözün çalymdaş,
Gabagyň çalymdaş, gözüň çalymdaş,
Meni bir ýaşadan ýüzüň çalymdaş,
Aýtsana, şol gyzyň nämesi borsuň?!
Ýada saldyň ýaşlygymyň ýazyny,
(Munuň üçin ýöňkemerin ýazygy)
Sen şol gyzyň ruhumy ýa özümi,
Aýtsana, şol gyzyň nämesi borsuň?!
Ýöräniñde gördüm: ädimiň meňzeş,
Bir ýigidi çoýjak oduňam meňzeş,
Ýüregim duýup dur - adyňam meñzeş,
Aýtsana, şol gyzyň nämesi borsuň?!
Aşygny aldadyp, agladyp giden,
Şu günlere çenli betbagt eden,
Bir gyzy ýatlatdyň şu pursat, şu dem
Aýtsana, şol gyzyň nämesi borsuň?!
Lebleri şekerli, künjüli halwa,
Saña bir sözüm bar - göwnüñe alma,
Söýgüde bir şoña meňzejek bolma,
Meñzemeseň, gyzlaň danasy borsuň!
Aýtsana, şol gyzyň nämesi borsuň?!
Oraznepes Baýramow
38
106
garlawac
18.12.2023 23:56
“Salam, dostum, ýagdaýlaryň nähili,
Ejeň, kakaň, maşgalaňyz gowumy?
Şowhun bilen sowduňyzmy, sag-aman,
Aradaky iniňiziň toýuny?
Aý, meniňkem näsaglaryň haly-da,
Bir görseň-ä gowy, bir görseň erbet,
Men-ä, walla, dermandanam ýadadym.
(Şoňa baglydygmam çekdirýär ezýet)
Aramyzyň uzaklygna garaman,
Gaýta-gaýta gelýäň bilmäge halym...
Men bolsa diýipdim, birmahal saňa:
“Men sensizem öz başymy çararyn!”
“Unut geçenleri men-ä unutdym!”
Diýseňem geçmişi undup bilmedim,
Ah, dostum, bir pursat lezzet berse-de,
Sütem berýär halym sorap gelmegiň...
Geleňde, bir pursat giňeýär dünýäm,
Gubarly ýüregim barkaň gysanok.
Ýöne saňa edenlerimden ýaňa,
“Sag bol!” diýmäge-de bognum ysanok.
Eden dönükligmi bagyşlap bilmän,
Näletden gursagym baglady gemre
Maňa düşünýänsiň, (öňem düşerdiň...)
Haýyş edýän, dostum, yzymdan gelme!”
Şeý diýdi-de, sojap-sojap dem aldy,
Gözýaşlary çykdy dertleň kastyna,
Soňam hassa ýüzün berip aglady
Keselhanaň ysy siňen ýassyga.
© Gurbanmyrat MEREDOW
34
236
garlawac
18.12.2023 14:54
Ýaşap bir dem ýyldyrymly didede,
Ne-hä yşkdan,
ne hesretden gandyk biz.
"Söýýänem" diýipdik birek-birege,
Ýöne köne dostlar bolup galdyk biz.
Dözmezim sen,
gözleriňden syrykdym.
Dõnmezim sen — saňa gurban bolaýyn.
Goýnuma däl,
sen düýşüme giripsiň,
Söýgüden ezizim, dostdan golaýym!
Seniň penje-penje çasly gülküleň
Gül kimin galypdyr garyň astynda.
Neýlär söýmän aýralyga duş gelen?!
Söýgi diýmek aýrylykmy aslynda?!
Sen günleriň hesret bilen ötürdiň,
Göwnümi göterdiň duş gelen wagtyň.
Sen gaýdyp gelmejek yşkym ýitirdiň,
Men ýitirdim tapyp bilmedik bagtyň.
Duýýan indi seň dünýäňde ýatdygym
Hem bagrymy gyýýar bagty keç dide.
Jahyllyga aýlanypdyr ýaşlygym,
Haremhanam aýlanypdyr metjide…
32
94
garlawac
16.12.2023 23:53
Oýalygmy ogurlatdym oýlara,
Ukymy utdurdym, duşdum-da saña.
Sähel ýerde kölegäme büdredim,
Körlükden ýaña.
Gözelligñe ýesir düşdüm,
Şeýdip sen
Kalbyma bagyş etdiñ ruhy terlenme.
Saña duşan günüm düşünipdim men,
Gözleñ maña näme üçin berlenne.
Duýdurmazdan pany dünýäñ darlygyn,
Ylham berdiñ, ylham bilen ýaşatdyñ.
Ýöne ilki ganat berip uçmaga,
Soñ näme üçin ganatlarma daş atdyñ?
Indi ömrüñ öwrümlerne öwelip,
Käte göwnüm bolup özümden geçjek.
Ellerimi boş gaýtarma, bolmanda,
Gussa tutdur bir ýürege ýerleşjek.
Kölegäñe dönüp, bile galaýyn,
Öz okunda aýlanýarka entek Ýer,
Söýmeseñem, bir görümsiz myhman men
Senden gitmek niýetim ýok entekler!
Mukam MUHAMOW
26
66
garlawac
16.12.2023 17:47
Gijelerne uklamaýan düňle men,
Ýüregmiň gussasyn syýa egisýär.
Soňsuz aladalar, soňsuz pikirler
Däli serde iki ýana towusýar...
Ylhamyň atyna garaşlydan men,
Boroşlydan men!
"Ýitirip öz ýalňyşlarmyň sanyny",
Soňkulara sapak etdim ökünjim.
Bir adam şat bolsa, gör, neneň ýagşy!
Dost öýkesin ýazýan bolsa ötünjim,
Sözlerimi başlap "Bagyşla"-dan men,
Dostlarma özümi bagyşladym men...
Atam diýrdi: "Sabyr bilen ýetilýär
Bu dünýäniň ähli gowulyklarna..."
Gerek bolsa, sabyr käsäm jam bolar,
Ejizlemerinem, howlukmarynam
Pursatyň gelerne garaşmadan men,
Boroşlydan men!
Ýönekeý zatlara begenip ýörün,
Öňem köp syndy — diýp — göwün pyýalam.
Özgeleň sözüne çekmän ünsümi,
Gijelerne ak kagyzy syýalap,
Köňlüniň dertlerin taraşladan men,
Boroşlydan men!
Göz ýetirdim ýetip on ýedi ýaşa:
Adam adam bolýan eken ýenjilip.
Soňky döwür ejizlänok ýüregim
Ýeňişlere ýetirýär — diýp — kynçylyk.
Hiç haçan doýmaryn göreşmeden men,
Boroşlydan men!
Türkmenistan diýrler meniň ýurduma,
Dünýä tanar.
Sora, kimden sorasaň!
Baş arzuwym: şu mukaddes topragy
Janym, tenim, sözüm bilen gorasam.
Şuňa şek ýetirseň, oňuşmaryn men!
Lebap welaýaty, Hojambaz etrap,
Bäş şirleň döreden geňeşliginden —
Boroşlydan men!
Sülgün BAZAROWA
30
79
garlawac
15.12.2023 18:05
“Abonentiň telefony öçürilendir...”
Sen nirede,
şu hal dara-direde
Şeýle bir sesiňi eşdesim gelýär.
Sen bolsa arzymyň ýeterinden daş.
Aşyk bolan ömrüň eşretin bilýär,
Diňläsim gelýär seň saz ýaly sesiň,
Dem alşyňy, aýnaýşyňy, gülkiňi.
Sen bolsa ret edip, yşkym tütedip,
Meň aşyk pälimi, şahyr küýümi
Bitaý kapyýa deý özüme goýýaň.
Ah, şol telefonňam ebedi öçük.
Men bolsa bir seniň sesiň küýseýän,
Bar zatlaň, ýok zatlaň baryndan geçip.
Aýlanyp-aýlanyp özüme gelýär
Gulaga öwrülip diňleýän jaňlam.
“Abonentiň telefony öçürlen..”
Wah, şu wagt ýüregmi şu jaňa daňsam,
Telefonňy açyp goýar el bile.
Diňe saňa duşup ejizledim men,
Sözüm ýele berdim, ömrüm ýelgine.
Bir ädim ýanymda dem alan günleň,
Düýşüňe girýänim gürrüň bereňde,
Günler zybrym mensiz duşuňdan geçip,
Mahal-mahal “SMS”-lem göreňde...
Bir gün eşiklerim eýesiz galyp,
Senem özüň ýetim ýaly duýmasaň,
Isleýşimçe söýen dälsiň, ezizim,
Eden jaňlaryma hormat goýmasaň!
Aýtmadyk sözleriň ýürege sygman,
Soňky deme çenlem ýetmän takadyň,
Agy bolup bokurdagňa direse,
Pyşyrdylaň barar maňa jaň bolup:
“Sen nirede, sen nirede, nirede?!.”
Seýitmyrat GELDIÝEW
33
207
garlawac
15.12.2023 11:37
Ýaz ýaňaklym, güýzüm ýaly sada sen,
Tomus mähriň gyş deý açar göwnümi.
Ýygrylsaň ýyldyrym urar dünýämi,
Ýylgyrsaň duýguçyl dünýäň göwrümi
giňän ýaly, gaýyp bolup gözýetim,
Ähli ýerde görerin men dideleň.
Ynan,ynanmasaň syna-da göräý,
Barkaň bagtym özge ýerden idemen.
Bir sen belet bir sen diýýän ýüregme,
Bir sen sebäp çemen eýlän güllerme.
Ökünmerin saňa soňsuz hat ýazyp,
Uky bilen öýkeleşen günlerme.
Gözüň ugratmasyn hiç ýere meni,
Eliň hoşlaşmasyn, bagtdan galgasyn.
Duşundan geçirip durmuş otlusyn,
Bagtymyz bihabar ýatyp galmasyn.
Ganmasyn gözlerim bakyp roýuňa,
Ygraryň sönmesin beren wadaňa.
Özüň sebäp munda meniň saglygma,
Saglygyňa meý guýsam-da badama.
Seniň bilen artar kalbymyň yşky
Sen bolaňsoň howlugamok bakyýa
Durmuş – adamlardan düzülen goşgy
Bu goşguda bir sen maňa kapyýa!
Mukam MUHAMOW.
30
86
garlawac
14.12.2023 00:06
Ýarty Aý gutaba çalym edýärdi,
Hatda men şol gije şamymam iýmän,
Ýolboýy Aý synlap teatra bardym,
Yşk buran boýnuma şarfymy iltäp.
Teatr, teý ahyr, ýene sataşdyň,
Ýere degrip gök köýnegiň etegin.
Süýt reňkli gijede elde galgadyp,
Sygryň dili ýaly oýnuň petegin,
Seň duşundan geçip gitdim tolgunyp.
Sahnada Leýli gyz, göz öňümde sen,
(Söýseňem söz gatyp bolmayan eken,
Çekinjeň ýürege dözebilmeseň) ❤️
Sahnaň perdesi deý çala buýraly,
Saçlaryňy goýberipsiň daraklap.
Ähli yigitleriň nazary sende,
A men, gözlerimi derde ýaratman,
Ýüzüm sallap, ses-sellemsiz örtendim.
Örtendim men äşgär owadanlyga.
Aglaýjak-aglaýjak bolan günlemem,
Ýasda-da mertligi oňaran owa,
Erkimden egsilip, bagtdan basylyp,
Artykmaç görkünden kemsinip galdy.
Iki owurdymdan agyr ýuwdunyp,
Aýtmadyk sözlerim kemşerip galdy
Düşünýän, Üýtgedip bolmajak zatlar,
Gynananňa jinnek ýalam degmeýär.
Ýöne şol gijede meniň ünsümi,
Başga bir zat, başga bir zat egleýär.
Gutaba meňzeýän Aýam däl ol zat,
Sahnada däl, Mežnunam däl, Leýlem däl.
Gözleňem däl ogryn-dogryn garaýan,
Saña bolan höwesem däl, meýlem däl.
Henizem ýadymda şu günki ýaly:
Süýt reňkli gijedi, daşary aýdyň,
Sowukdy, bu-da hiç, ýöne barybir,
Şol gije näm üçin saçyňy ýaýdyň?!
Sebäbine meň özümem düşünmän,
Seni söz gatmasyz keseki saýdym.
Diňe bir ullakan sorag ýadymda,
Ak ýüzüňi ýarty Aya meňzedip,
Näm üçin,
näm üçin saçyňy ýaýdyň? 🍁
Seýitmyrat Geldiýew
2
468
