flowers_
20.08.2024 21:26
Hasap we netije.
«Eý nebsim, iliñ gülküsini, ýañsylamasyny, arkadan edilýän we günibirin ýetirilýän ýalan-ýaşryk gürrüñleri ýatlap, ýüregiñe agram salyp, her bir zady hasaplap oturma. Matematikadan ussat adam hem, durmuş meselesinde köp halatda gömük adam bilen des-deñdir. Hiç wagt öz aklyña, ukybyña, başarnygyña, baýlygyña, tanyşlaryña, ýakynlaryña, gara güýjüñe bil baglap, gözsüz batyrlyga esaslanma, özgeleri kemsitjek, gaýgylandyrjak, hasrata batyrjak sözleri aýtma, öz bähbidiñi, göwün islegiñi, nebsiñi ileri tutup, ýaşyrynlyk bilen ikiýüzli hereket etme, iliñ-günüñ şowsuzlygyna begenme, hesretli gününe heşelle kakma!
Döwran diýmek, aýlanyp duran döwür diýmekdir. Wagty gelende durmuş her kime gülüp bakar, şonda düýnki tekepbirler, şu günki ulumsylar har bolar, aýagyñdan çakan garynjany mynjyradyşyñ ýaly, ol päliýamanlary pelegiñ özi pyrlandyryp goýberer. Şonuñ üçin her bir zady hasaplap oturma, ýokarda biri bardyr, ähli zady şonuñ Özi hasaplap oturandyr. Ähli zadyñ dogry netijesini hem Şol çykarýandyr. Sen bolsa hiç zat hasaplama, birden hasabyñy ýitirip, hem bulaşyp, hem ähli zady bulaşdyryp oturma!
Ähli zady öz pikirñe muwapyk getirjek bolup, dünýäni düñderäýme. Hasabyñda bärden gaýtsañ, köp zat gözüñe artykmaç görüner, köp zady alnyñdan aýrasyñ geler. Emma Hudaýyñ ýaradan dünýäsinde artykmaç zat ýok-da, ýerli-ýerinde goýulmadyk zat köpdür. Hasabyñda öte geçseñ, köp zady gaýtadan ýugurjak bolarsyñ, göwnüňe jaýlamak islärsiñ. Emma, hiç haçan döräli bäri togalak bolan Ýer şaryny dörtburç şekile getirip bolmayar!
Ähli zady Hudaýa tabşyr!
Hudaýyñ hasaby örän takdyrdyr!
Ol örän adyldyr!
Şonuñ üçin hem, eý nebsim, meniñ ýalñyşlyklarymy hem, ýagşylyklarymy hem hasaplap oturma. Adamyñ edýän her bir işi , isle ýagşylyk, isle ýamanlyk bolsun, edil her bir söwdagäriñ banka goýýan goýumy ýalydyr. Uzak wagt geçmänkä Beýik hasapçy ony birnäçe esse göterimi bilen bize gaýdyp berýär welin, biz öz hasabymyzyñ öteräkdigini ýa-da kemterdigini añlaýarys. Gel gowusy, hasapsyz ýaşap bolmaýan bu durmuşda diñe özümize gerekli zatlary hasaplap ýaşabereli. Iñ dogrusy hem şudyr.»
Rahmet Gylyjow.
23
232
flowers_
15.08.2024 10:29
SAŇA AÝDASYM GELEN SÖZLERIM...
«Nireden ýadyma düşdüň?» diýme sen,
«Salam!» diýmek üçin düşdüm ýadyňa...
«Tallaryň boýnuna tama öýmesin
saraý» diýmek üçin düşdüm ýadyňa.
Ýogsa, men böljekmi ünsüň-üşügiň?
Tekepbir bolsamam, bilýän düşünip.
«Gül göwnüňden öýke buldun düşürip,
ýagaý» diýmek üçin düşdüm ýadyňa.
Göwnüňe degenin geň görüp ýören,
Göwnüm nämelere döz gelip ýörer?!
«Men — Adam bolmagy öwrenip ýören
zenan» diýmek üçin düşdüm ýadyňa.
Men maý tapsam, ugramakçy barybir...
Hiç bilemok adamlara garylyp.
«Bir gün ýarpy eser goýsam, ýarysyn
ýazaý» diýmek üçin düşdüm ýadyňa.
Biz bir gelýäs,
kepil ýokmuş ýenäge.
Bigadyrlyk bu gümanyň sebäbem.
Men welin, zat tapman seni deňäre,
«Halal!» diýmek üçin düşdüm ýadyňa...
© Aýgül Garaýewa.
19
50
flowers_
14.08.2024 11:20
Bir ýola asmana uçdum, ynanyñ,
Bagtyñ gapysyny açdym, bir ýola…
Şonda maña ganat berdi ynamym,
Yşk meni şol hala saldy bir ýola.
Bir ýola bar zadyñ deñinden ötdüm,
Ýapdym gaýgy-hasratlaryñ işigin.
Bir ýola ykbaly serpaýdyr öýtdüm,
Düşüp ýorgudyna süýji düýşümiñ.
Bir ýola ynandym, ynandym çyndan,
Söýeniñe degýä diýip ömrümi.
Şol gezek, bir ýola… Bagt gapysyndan,
Ogurlatdym gaýyp ýören göwnümi.
Ähli zat kem-kemden geldi durkuna,
Oýandym, ynanyñ, ynanmañ hala…
Ömrüm gussa ýesir aldy durşuna,
Şondan soñ gam baky myhman hulkuma,
Ynamym bürendi şar gara şala,
Sebäp…
Yşk meni unutdy birden, bir ýola.
Gülşirin Hanowa.
21
29
flowers_
12.08.2024 18:28
Salam Öwrenmeliň ajaýyp agzalary!
Bu gün Öwrenmelide 1 ýaşapdyryn, ýagny 1ýyl bolupdyr şu programma agza bolanyma🤗.
Gar, ýagyş diýmän, yssy, sowuk diýmän, arman-irmän, ýaltanman öwrenmelide bir ýyl bäri ýaşapdyryn:)
Uly ýaşly, kiçi ýaşly Ynsanlar bilen söhbet etmek ýa-da sessizje oturyp teswirleri okamak meniň üçin gyzyklydy.(dawalyrak günler has hem gyzyklydy😁).
Indi, Sizden men baradaky pikirlerinizi teswirlerde galdyrmagyňyzy islesem köp zat isledigim bolmazla:)
(Gowy, erbet umuman garaýşyñyzy bilmek isledim, bu hem bir ýatlama bolardy maňa))
29
339
flowers_
06.08.2024 18:16
KERIM GURBANNEPESOW: “WESÝETLER BOÝUNÇA”
Çagakak «Aglamak utanç!» diýdiler.
Jahylkak «Aldamak utanç!» diýdiler.
Şeýdip endik etdik aglamazlyga.
Şeýdip endik etdik aldamazlyga.
Diýdiler: «Köplükde gägirmek aýyp».
Diýdiler: «Köçede sygyrmak aýyp».
Diýdiler: «Meýlisde geçmäkäň töre,
Hakyň barmy? Törüň özünden sora!»
Ýene-de diýdiler: «Ulalyp ýaşyň,
Garaja gyl bilen basyrlar döşüň».
«Döşüňe bitýänçä şol gyl – diýdiler.
Günäňi geçerler, ogul!» diýdiler.
«Döşüňe bitensoň şol gyl – diýdiler,
Döşüňe mynasyp bolgul!» diýdiler.
Diýdiler: «Dünýäde nämedir gyt zat?»
Üç gezek diýdiler: «Ussat! Ussat! Ussat!»
«Näçe gyt bolsa-da ussat – diýdiler,
Çyn şägirt ondanam gyt zat!» diýdiler.
«Öwrenip ilkinji harpy – diýdiler,
Gomalar şägirdiň galpy!» diýdiler.
«Galp şägirtden boluň hüşgär!»
«Emer-de, emjegňi dişlär!» diýdiler.
Ýene-de diýdiler: «Ulamy-kiçä,
Öljegňi bilseň-de, ýalbarma kişä!»
«Diňe bir adama ýalbar!» diýdiler.
Onuňam adyna dilber diýdiler.
«Aýyp däl näzini çekmek – diýdiler,
Näzden ýüzün sowan – akmak!» diýdiler.
«Ýene iki merde ýalbarmak bolar –
Diýdiler – ene hem atadyr olar».
«Ataňa ýalbarsaň – galkynar ruhy».
«Eneňe ýalbarsaň – kemeler ahy»,
«Kim etse şolara tagzym – diýdiler,
Işi rowaç, ýaşy uzyn!» diýdiler.
...Ýene kän edepleň tutdular adyn.
Diýdiler: «Gabanma özgäň şöhratyn!»
«Gabanma zehiniň ezelligini!»
«Gabanma öz joraň gözelligini!»
«Gabanma öz äriň gerçekligini!»
«Gabanma öz gelniň alçaklygyny!.
Ne näzlerin, ne-de sözlerin gaban,
Diňe oýnaklatsa...
gözlerin gaban!»
Diýdiler: «Erkekden belentdir aýal!»
«O nämüçin?» diýip berdiler sowal.
Jogabyn berdiler: «Gutaryp ömrüň,
Ýagty dünýä bilen hoşlaşsaň bir gün –
Aýal är ojagyn saklar – diýdiler,
Söýgiňi müň kerem haklar!» diýdiler.
«Çagalaryn iýdir, geýdir – diýdiler,
Şeýdip ýaş ömrüni köýdir!» diýdiler.
«Emma beýdip bilmez erkek – diýdiler,
Bu babatda pesdir entek!» diýdiler.
«Altmyşdan, ýetmişden geçse-de saly,
Gözlerin ýumdumy eziz aýaly –
Ýatdan çykyp wepa, ygrar – diýdiler,
Ikinjiň gözlegne ylgar!» diýdiler.
...Diýdiler, diýdiler, diýdiler kän zat.
Käbirisi aňsat. Köpüsi kyn zat.
Aňsadyn – hemmeler başar – diýdiler,
Kynyn başarmakda iş bar – diýdiler.
Kyn hem bolsa,
Şudur wesýet – diýdiler.
Diňe kyn zat –
Şol mukaddes! – diýdiler.
20
50
flowers_
05.08.2024 22:20
Bilýäňmi nämeler üýtgedi?!
Gülşirin Hanowadan...
Bilýäňmi nämeler üýtgedi?!
Hiç zat…
Ne-hä, bagtly boldum, ne-de betbagt.
Goşgulam diňlenýär gözleri ýaşlap,
Ýene ýaşamaga tapamok wagt.
Seýpelmelek boldum, Methaljemalyň,
Yşky bilen ýüregimi dagladym.
Munda hiç kim üçin gyzyksyz halym,
Bagtly goşgy ýazyp göwün awladym.
Arz etdim Asmana, seniň adyňy,
Dileg bilen bagladym her demime.
Düýşmidi… duýanym söýgiň dadyny,
Ýa ömürmi ynamyndan kemilen?!
Goşgyňda ýüregi ezýäň diýdiler,
Senden galan peşgeş bu üýtgeşik at…
Öňkiňden has gowy ýazýaň diýdiler…
Bilýäňmi nämeler üýtgedi?!
Hiç zat…
21
125
flowers_
05.08.2024 19:39
Haýaldan gyssan.
(tymsal)
— Mugallym, näme üçin maňa kän ýumuş bereňizok, beýleki okuwçylara bolsa täze ýumuşlary yzygiderli berýäňiz? — diýip, okuwçy mugallymdan sorapdyr.
— Saňa jogap bermezden ozal, gel, ikimiz naharlanaly. — Mugallymyň bu teklibine okuwçy höwes bilen razylaşdy. — Ýöne meniň özüm seni naharlajak — diýip, mugallym sözüniň üstüne goşdy.
Okuwçy mugallymyň bu sözüni geňlese-de razylaşdy, sebäbi beýleki okuwçylara seredende mugallym özüne hormat edýändir diýip öz ýanyndan pikir etdi.
Orta saçak ýazyldy, mugallym palawdan bir çemçäni dolduryp, okuwçynyň agzyna saldy. Okuwçy tagamy bal ýaly süýji palawy işdämenlik bilen iýip, ýaňy bir nähili süýji bolan palaw diýip-diýmänkä, mugallym ýene bir çemçäni dolduryp okuwçynyň agzyna saldy. Okuwçy agzyndaky palawy doly çeýnäp ýetişmänkä, agzy ýene palawdan doldy. Näçe çalt iýjek bolsa-da, şonça-da mugallym agzyna çalt palaw saldy. Ahyry okuwçy çydaman agzy doly palaw bilen mugallyma ýüzlenip:
— Mugallym, biz bir ýere gyssanýasmy? — diýdi. — Agzymdakyny iýip ýetişmänkäm, ýene agzyma palaw salýaňyz. Özara gürrüň başynda gyssanman naharlansak bolmazmy?
— Bolýa, ýöne sen beýle bolanda halaňoga — diýip, mugallym jogap berdi.
— Men? Size aýtdymmy? Beýle diýip aýdan däldirin.
— Hawa, ýarym sagat öň aýtdyň.
— Men?
— Elbetde sen. Ýaňy sapakdan soň meniň ýanyma gelip, täze ýumuş soran sen dälmidiň? Öňki beren ýumuşlarymy özleşdirmedik ýeriňe ýene saňa täze ýumuş bersem, edil nahardan doly agza ýene nahar bermek ýaly bolýar. Kän ýumuş almaga gyssanma. Birden ählisini özleşdirip bilmersiň. Akyldarlaryň aýtmagy boýunça, haýaldan gyssan. Şonda durmuşa düşünersiň. Her bir berilýän ýumşy yhlas bilen howlukman ýerine ýetir. Durmuşy kowga öwürme. Durmuşyň tagamyny bil we ondan lezzet al.
Terjime eden Arzuw RAHMANOWA.
20
59
