Jennifer Lopez soňky 10 ýylda ilkinji albomyny çykarar.

Jennifer Lopez “This Is Me... Now” ady bilen soňky on ýylda ilkinji studiýa albomyny çykarar. Reliz 2024-nji ýylyň 16-njy fewralyna meýilleşdirilen diýip, Deadline neşiri habar berýär.

Dokuzynjy studiýa plastinkasynyň çykyşy aýdymçynyň 20 ýyl mundan ozal çykaran “This Is Me... Then” albomynyň ýubileýine gabat getiriler. Jeý Lonyň täze albomyna prodýuserlik eden Rojet Çaýeddir.
Çeşmäniň maglumatlaryna görä, reliz R&B, pop we hip-hop žanrlaryndaky kompozisiýalary öz içine alar. Plastinkadan ilkinji aýdymyň çykyşy 2024-nji ýylyň 10-njy ýanwaryna meýilleşdirilýär. Aýdym “Can’t Get Enough” ady bilen çykarylar.
Jennifer Lopeziň soňky albomy 2014-nji ýylda “A.K.A” ady bilen çykypdy. Oňa “So Good”, “Emotions” we Iggy Azalea bilen bilelikde ýazylan “Acting Like That” ýaly aýdymlar girdi. Şondan bäri aýdymçy Cardi B, DJ Khaled we Skrillex bilen hyzmatdaşlyk edip, bilelikdäki aýdymlary ýazdy. 

Täze Zelandiýa ýaşlara çilim çekmegi gadagan etmekden ýüz öwrer.

The Guardian gazetiniň habar bermegine görä, Täze Zelandiýanyň hökümeti "tutuş bir nesle" çilim çekmegi gadagan etmekden ýüz öwürdi. 2022-nji ýylyň ahyrynda kabul edilen kanunyň taslamasynda 2008-nji ýylyň 31-nji dekabryndan soň doglanlara çilim satmagy gadagan etmek girizildi. Ol 2024-nji ýylyň iýul aýynda güýje girmelidi.

Kanuna laýyklykda, nikotiniň temmäki önümlerindäki konsentrasiýasy hem azalmaly we temmäki satýan söwda nokatlarynyň sany tutuş ýurt boýunça 6 müňden 600-e çenli azalmalydy. Bu çäreler arkaly Täze Zelandiýanyň hökümeti ýurtda çilim çekýänleriň sanyny 2025-nji ýyla çenli 8% -den 5% -e çenli azaltmagy maksat edinýärdi.
Emma oktýabr aýynda ýurtda nobatdaky ählumumy saýlawlar geçirildi, netijede oppozision Milli partiýa häkimiýet başyna geldi we ýurduň parlamentine giren kiçi partiýalar bilen birleşen hökümetini döretdi. Milli partiýa daşary ýurt maýadarlarynyň ýerli gozgalmaýan emläk pudagyna maýa goýmagy üçin rugsady dikeldip, ýurtda salgytlary azaldyp biljekdigine umyt baglaýardy. Ýöne, hökümet birleşiginiň düzümine girýän populist New Zealand First partiýasy bu başlangyja garşy çykdy. Netijede, hökümet gaznany doldurmagyň beýleki çeşmelerini gözlemeli boldy we temmäki önümlerini satmakdan gelýän salgyt girdejilerinden ýüz öwürmegi maksada laýyk däl hasaplandy.
Täze maliýe ministri Nikola Willis 2009-njy ýylda doglan we ondan kiçi ýaşlylara çilim çekmek gadagançylygynyň we kanunyň beýleki birnäçe düzgünleriniň 2024-nji ýylyň mart aýyna çenli ýatyryljakdygyny aýtdy.

Söýmek — bu birek-birege däl-de, bilelikde bir ugra seretmekdir.



Söýmek — diýmek adamy Allanyň ýaradyşy ýaly bolşunda görmekdir.
Söýgini däl-de, size bagty berip biljek adamy gözläň.



Söýgi adamy döredijilige iterýär, täze-täze arzuwlara ýetmäge ganatlandyrýar.

Ýüregiň söýgä näçe baý bolsa, şonça-da ýaşaýşa höwesiň artýar.
Söýüp bagtly bolýana öýkünme, söýlüp bagtly bolmaga çalyş!

Emeli aň adamzady aladalandyrýar!

Her gün yzygiderli ösýän emeli aň tehnologiýa pudagynda uly öňegidişlik gazanýar. Şol sanda emeli aň özi bilen uly howplary hem döredýär. Alymlar geljekde emeli aňyň kiber jenaýatlaryna, fiziki hüjümlere ýa-da sosial bozulmalara sebäp bolup biljekdigini duýdurýar.

Kiberhowpsuzlyk hünärmenleri emeli aňy nädogry ýagdaýda ulanylanda ýetirip biljek howplary barada duýduryş berdiler. Halkara hünärmenler topary AI dizaýnerlerini hyýanatçylykly peýdalanmazlyk üçin has köp iş etmäge çagyrdy.

Emeli aňyň geljekde döredip biljek howplaryny anyklamak boýunça geçirilen gözleglere Angliýanyň Oksford we Kembrij uniwersitetiniň hünärmenleri gatnaşdylar. Gözlegiň netijesinde ýazylan hasabatda emeli aňyň gözegçilik astynda saklanylmasa gysga we orta möhletde uly howplary döredip biljekdigi baradaky duýduryşlar bar.

Hasabatda gysga wagtyň içinde emeli aňyň adatdan daşary ukyply zehine eýe bolup, gözegçilikden çykyp biljekdigi duýduryş berilýär. Muňa mysal hökmünde, sürüjisiz awtoulaglaryň bilkastlaýyn heläkçilige sebäp bolup adamzada uly zyýan ýetirip biljekdigi aýdylýar.

Bulardan başga-da emeli aňyň hakyky zatdan tapawudy bolmadyk galp wideo we habarlar bilen köpçüligi dolandyryp biljekdigi mälim edilýär. Çäklendirilmedik hasaplaýyş ukyby bilen emeli aňyň hat-da iň ygtybarly maglumatlary hem aňsatlyk bilen alyp biljekdigi aýdylýar. Emeli aňyň kiber hüjümleri sebäpli şäherleriň infrastrukturasynyň çökmezligi hem mümkin.

Hünärmenler emeli aňyň öwrenmek ukybyna eýe bolandygyny mälim edýärler we ýurtlary zerur howpsuzlyk çäreleri görmäge çagyrýarlar. Hökümetler bu mesele boýunça bilelikde işlemese, bu we beýleki näbelli howplaryň hakyky bolup biljekdigi şübhesizdir.

Tebigatyna deňi-taýy bolmadyk-türkmen tebigatynyň tokaýlyklarynyň ýurdumyzda şertleýin birnäçe toparlara bölýärler. Olary toparlara bölenlerinde esasan olaryň ýerleşýän ýerlerini, agaçlaryň görnüşlerini, ösümlik we haýwanat dünýäsini, önümliligini hem-de hojalyk ähmiýetini göz öňüne tutýarlar we şu aşakdakylara bölýärler: dag tokaýlyklaryna, çöl tokaýlyklaryna, kenarýaka tokaýlyklaryna, tokaý zolaklaryna.

Geliň indi kenarýaka tokaýlyklary bilen tanyşalyň. Olar esasan derýa boýlarynda duş gelýärler. Amyderýanyň boýunda tokaý emele getirýän agaçlardan ýerli deregiň iki görnüşi- petde, toraňňy hem-de söwüt, igde we ýylgynn bolup, gür jeňňellikleri emele getirýärler. Murgap, Tejen we beýleki derýalaryň jülgesinde kenarýaka tokaýlary çäkli meýdanlary eýeleýärler. Ýerasty suwlary 1-1,5 metr çuňlukda ýerleşýän toýunsow topraklarda ösýän kenarýaka tokaýlary her ýyl suw basýar. Bu ýerde tokaýyň agaç düzümi, esasan toraňňydan ybarat bolup, onuň gürlügi pesdir. Toraňňynyň köki derman senagaty we himiýa önümçiligi üçin gymmatly çig mal bolup hyzmat edýär.

Çägesow toýun gatlakly ýerlerde ownuk däneli çökündileriň galyňlygy 5-8 metrden 10-15 metre çenli bolup, ýerasty suwlary 2-3 metr çuňlukdadyr. Bu ýerleri dowamly suw basýandygy üçin söwüt igde seýrek duş gelýär. Söwüt we baglara dyrmaşyp ösýän agaç görnüşli çyrmaşyklar orta gürlükdäki tokaýasty gatlagy emele getirýär. Ol örtügi örän gür bolup, esasan kendir, peçek we çyrmaşykdan ybaratdyr. Has şorlaşan ýerlerinde toraňňylyklar duşýar.

Garagum derýasynyň ugrunda käbir ýerlerinde, esasan toraňňydan pajarlap ösýän tokaýlyklar duşýar. Käbir ýerlerinde söwütlik, ýylgynlyk we gür gamyşlyk ýaýrandyr.

Amyderýanyň, Tejen we Murgap derýalarynyň kenarlarynda, kölleriň töwereginde, Gündogar, Merkezi we Günorta-Günbatar Köpetdagda dag eteklerinde we jülgelerde ýerasty suwlaryň golaý ýerlerinde petde agajy giň ýaýrandyr. Çalymtyl reňkli, endigan bolmadyk agaç sütüni bolýar. Ol ýekeleýin ýa-da jeňňellikleri emele getirýär.

Toraňňy agaçlary kölleriň, derýalaryň, akabalaryň, şorlaşan peslikleriň, wagtlaýyn suw akabalarynyň, silleriň döreden jarlaryň ugrunda duşýar. Toraňňy ýurdumyzda deňiz derejesinden 400-1200 metr belentlikde hem gabat gelýär. Ol mart-aprel aýlarynda gülleýär, iýunda miweleýär.

Ýurdumyzda derýalaryň boýlarynda, jülgelerde, dag eteklerde we daglarda, çygly topraklarda derekler jeňňellikleri emele getirýär. Toprak howa şertlerinde laýyk gelýän ýerlerde derekleriň boýy 15-20 metre çenli ýetýär. Derekler çalt ösýärler we howanyň gyzgynlygyna we topragyň şorlaşmagyna çydanlydyrlar.

Ata- watanyzda derýalaryň jülgelerinde, dag eteklerinde we kölleriň gyrasynda tiz ösýän agaçlaryň ýene biri hem ýylgynlardyr. Ýylgynlaryň dürli görnüşleri mart- apreldan güýze çenli gülleýärler. Olar hem edil derekler ýaly howanyň gyzgynlygyna we topragyň şorlaşmagyna çydanlydyrlar. Ýylgyn agajy halk hojalygynda ýerli gurluşyk serişde hökmünde giňden ulanylýar.

Türkmenleriň milli senenamasyna görä gara gyş döwri başlady

Türkmenleriň milli ýyl senenamasyna nazar aýlasaň, ata-babalarymyz gyş paslyny dörde bölüpdirler. Akrabyň gutarmagy bilen howanyň sowamagy gara gyşyň gelendigini mälim edýär. Gara gyş noýabr aýynyň 23-inden başlap 7-nji dekabra çenli dowam edýär. Türkmen halkynyň baý döredijilik mirasyna nazar aýlasaň, her bir tebigy hadysalary öz parasatly pähimlerinde beýan edip, soňky nesillere miras goýupdyrlar. «Gyşyň güni kyrk tüýsli, kyrkysy-da gylyksyz» diýilmeginiň hem uly manysy bar.
Gyş paslynyň başlangyjy hasaplanýan garagyşda tebigatda bolup geçýän käbir ýagdaýlary synlap, ata-babalarymyz gyşyň nähili geljegini anyklapdyrlar. Meselem, gyşlamaga giren garynjalaryň hininiň agzyna köp gum üýşürmegi aýazly gyşa yşarat hasaplanypdyr. Meýdanlarda şemalyň ugruna uçuşyp, gaýyp ýören kereplere gözüň düşse, onda gyşyň gurak hem sowuk geljekligidir. Edil şu döwürde bize demirgazykdan gara gargalar, zakyjalar köp gelip başlasalar we gijelerine uly daragtlaryň üstüne gonup, gowur turuzsalar, munuň özi sowuk günleriň golaýdadygyna ýorulýar.
Garagyş – çolukdyr çopanyň synag döwri. Garagyşa çenli hemme hasyllar ýygnalyp gutarylýar, ýerler şüdügärlenip goýulýar. Bu döwürde galyň garyň düşýän wagtlaram seýrek bolmaýar. Türkmenistanyň hemme ýerinde howanyň we topragyň üstüniň sowuklygy nol derejeden aşakda bolýar.
Garagyş güýz we gyş pasyllarynyň arasyndaky gysga wagtlaýyn 15 günlük geçiş döwri diýsek ýalňyşmarys. Ol gyş bilen ýazyň arasyndaky alabahar sözi bilen asyldaşdyr.

Lawr ýapragy iýmitdir bejergi maksatlarynda ulanylýan hoşboý ysly otlaryň iň gadymysydyr. Dürli maddalara baý bolan lawr ýapragynyň adam bedenine peýdasy örän uludyr. Ondaky antioksidantlar we sowuklama garşy göreşiji maddalar dürli keselleriň öňüni almakda hem-de bejermekde diýseň täsirlidir. Derä ýeten zeperleri tiz gutuldyryjy häsiýeti sebäpli ol kosmetiki maksatlarda-da giňden ulanylýar.

Dermanlyk häsiýetli lawr ýapragy irki döwürlerden bäri halk lukmançylygynda sowuklamanyň dürli görnüşlerinde hem giňden ulanylypdyr. Onuň ýapragynda kesel dörediji mörjewleriň peýda bolmagynyň we ösmeginiň öňüni alýan işjeň maddalar kän. Onuň düzümindäki efir ýagy bolsa deri örtügine düşen ýaralaryň, ýanyklaryň tiz gutulmagyna-da oňyn täsirini ýetirýär.

Täze lawr ýapragy C witamine örän baýdyr, ýagny 100 gramynda 46,5 milligram bolup, bu bolsa gündelik kabul edilýän mukdarynyň 77,5 göterimine deňdir. C witamini bolsa immuniteti güýçlendirýär, wiruslara garşy täsiri bar. Şeýle-de ol DNK-nyň sintezi üçin möhüm bolan foli kislotasyna hem baý bolup, 100 gramynda 180 milligram saklanýar. Lawr ýapragy A witamininiň hem ajaýyp çeşmesidir, 100 gramynda 206 milligramy saklanýar. Hoşboý ysly ýaprak piridoksin, pantoten kislotasy, riboflamin ýaly witaminleriň hem ammarydyr. Bu B witaminler topary bolsa bedende fermentleriň sintezine, nerw ulgamynyň işjeňligine, metabolizmiň kadalaşmagyna goşant goşýar.

Şeýle-de onda mis, kaliý, kalsiý, marganes, demir, selen, sink, magniý ýaly minerallar hem saklanýar. Kaliý beden öýjükleriniň we beden suwuklygynyň düzüm bölegi hökmünde, marganes hem-de mis fermentleriň işjeňliginde, demir gyzyl gan öýjükleriniň emele gelmeginde esasy faktor bolup çykyş edýär.

Ine, ýene birnäçe günden Täze 2024-nji ýyly uly şatlyk-şowhun bilen garşy alarys. Siz hem Täze ýyl baýramçylygyna uly taýýarlyk işlerine başlan bolsaňyz gerek?! Biziň halkymyzda Täze ýyl baýramçylygy maşgala baýramçylygy hasaplanýar. Şol sebäpden hem biz bu baýramçylygy bereketli saçagyň daşyna bütin maşgalamyz jemlenip belleýäris. Dünýä ýurtlarynda-da Täze ýyl güni edilýän dürli adatlara duş gelmek bolýar. Geliň, olaryň käbirleri bilen tanyş bolalyň.

Ispaniýa: her sekuntda bir üzüm iýmek adaty

Özüne mahsus adatlary bilen dünýä ilatynyň gyzyklanmasyny özüne çekýän ispan halky Täze ýylda hem başga halklaryňkydan tapawutly adata eýedir. Eger siz Täze ýyl baýramçylygynda Ispaniýa gitmekçi bolsaňyz, onda Täze ýyl gijesi sagat 24-den ozal her sagat zaňy kakylanda bir üzüm dänesini iýmeli bolýarsyňyz. Ispanlaryň ynanjyna görä, bu adaty 12 gezek etseňiz we sagat 24-e çenli üzümleri agzyňyzda saklamagy başarsaňyz, bütin ýylyň dowamynda üstünlik siziň hemraňyz bolar. Çünki ispanlarda 12 sany üzüm dänesi ýylyň 12 aýyny alamatlandyrýar.

Hytaý: gapylary gyzyl reňke boýamak adaty

Hytaý halky bagtyň we şatlygyň simwoly hökmünde Täze ýyl baýramçylygynda gapylaryny gyzyl reňke boýaýarlar. Mundan başga-da, Täze ýyl güni hytaýlylar öýdäki pyçaklary ýaşyryp goýýarlar. Olar munuň sebäbini Täze ýyl güni öýde pyçak bilen bir zat kesilse, geljek ýyl şowsuzlyk bilen geçýär diýip düşündirýärler.

Russiýa: islegler ýazylan kagyzy ýakyp, içmek adaty

Rus halky Täze ýyl güni geljek ýyldan garaşýan ähli isleglerini bir kagyza ýazyp, ony ýakýarlar. Ýakylan kagyzyň küllerini bolsa, içgä goşup, Täze ýyl girende, has dogrusy, ýarygije sagat 00:01-de içýärler.

Çehiýa: almany ikä bölmek adaty

Çehler Täze ýyl güni bazardan alma satyn alyp, şol almalary ortasyndan deň ikä bölýärler. Olar Täze ýylyň şowly boljakdygyny ýa-da bolmajakdygyny şol almalaryň çigitlerine seredip, pal atýarlar.

Danimarka: gapynyň öňüne döwlen tabaklary goýmak adaty

Danimarkalylar 31-nji dekabrdan öň ähli ulanmaýan tabaklaryny gapynyň öňünde goýýarlar. Bu adat olarda Täze ýylyň bereket getirmegi üçin edilýär.

Gresiýa: gapa sogan asmak adaty

Grekler Täze ýyl güni gapylarynda sogan asýarlar. Hatda maşgalalar Täze ýyl güni öz çagalarynyň kellesine sogan bilen urup, olary oýarýarlar. Sogan grekler üçin gaýtadan dogulmagyň simwolydyr.

Türkiýe: gapynyň öňüne duz dökmek adaty

Türkler Täze ýyl güni gapylarynyň öňüne duz dökýärler. Bu adat olarda ýylyň bereketli gelmegini isleýändikleriniň alamaty bolup durýar.

Şwesariýa: ýere buzgaýmak zyňmak adaty

Şwesariýa şokoladyň watany hasaplanýar. Bu ýurtda Täze ýyl güni ýere bir top buzgaýmak zyňylýar. Munuň sebäbi ýere zyňlan şol top buzgaýmak Täze ýylda bolluk we bereket getirýändigine ynanylmagydyr.

Rumyniýa: sygyrlar bilen aragatnaşyga geçmek adaty

Rumyniýanyň ilatynyň esasy bölegi maldarçylyk bilen meşgullanýar. Şol sebäpden hem olar Täze ýyl girmezinden ozal sygyrlar bilen aragatnaşyga geçýärler. Olar eger muny başarsalar, Täze ýylyk bereketli geljekdigine ynanýarlar. Şuňa meňzeş adat Belgiýada hem bar. Ýagny olar hem sygyrlar bilen aragatnaşyk gurup, olar bilen gürleşip, olara Täze ýyl gutlaglaryny aýdýarlar.

Braziliýa: okeana ak gül zyňmak adaty

Braziliýada her ýyl ilat okeanyň kenaryna ýygnanşyp, okeana ak gül zyňýar. Olar munuň arkasynda duran sebäbi “Deňiz taňrysyna” berilýän bu sowgadyň netijesinde onuň halkyň dileglerini kabul edýändigi bilen düşündirýärler. Şol bir wagtda, braziliýalylar Täze ýyl güni ak eşik geýýärler. Olar şol geýýän ak eşikleriniň Täze ýylda bolup biljek ähli ýamanlyklardan we şowsuzlyklardan goraýandygyna ynanýarlar.

Kanada: buzly suwa çümmek adaty

Gyş howasy örän sowuk bolan Kanadada adamlar Täze ýyl günleri buzly suwda ýüzýärler. Olarda bu adat 1920-nji ýyllardan bäri dowam edip gelýär.

Estoniýa: şowly sanlarça nahar iýmek adaty

Estoniýalylar 7, 9 we 12 sanlaryny şowly hasaplaýarlar. Şol sebäpden hem Täze ýyl güni şonça gezek nahar iýýärler. Olaryň beýle etmekleriniň sebäbi şol gün olar şonça nahary iýmegi başarsalar, Täze ýylyň olar üçin şowly boljakdygyna ynanýarlar.

Awstriýa: doňuz mowzukly sowgatlar bermek adaty

Awstriýalylar doňzy şowlulygyň simwoly hökmünde kabul edýärler. Şu sebäpden hem, awstriýalylar Täze ýyly bir-birlerine doňzuň şekiljikleri çyzylan sowgatlar berip gutlaýarlar. Munuň ýaly sowgatlar, esasan, şokolad, köke we ş.m. süýjülikler bolýar. Şeýle hem şol gün Täze ýyl saçagynda doňuz etinden taýýarlanan naharlar goýulýar.

Ermenistan: ýörite çörek bişirmek adaty

Ermenistanda Täze ýyl güni şol gün üçin ýörite çörek bişirilýär. Olar bişirilen çöregiň Täze ýylda bereket getirjekdigine we edilen ähli dilegleriň amala aşmagyna ýardam berjekdigine ynanýarlar.

Ýaponiýa: ybadathanalarda 108 gezek zaň çalmak adaty

Ýaponiýada buddizmden gelýän yrym-ynançlara görä, arassalygyň we şypanyň hatyrasyna ýurduň ähli ybadathanalarynda Täze ýyl güni 108 gezek zaň çalynýar. Olar şeýle hem Täze ýyla girilýärkä ýylgyrmagyň hem şowlulyk we şatlyk getirjekdigini aýdýarlar.

Meksika: öýi dürli reňkler bilen bezemek adaty

Meksikalylar Täze ýyl baýramçylygy ýakynlaşanda öýlerini dürli reňkler bilen bezemäge başlaýarlar. Bu adatyň aşagynda şeýle sebäp ýatyr, ýagny reňkler Täze ýyldan edilýän umydy alamatlandyrýar. Meselem, gyzyl reňk – söýgini, sary reňk – işi, ýaşyl reňk bolsa – puly alamatlandyrýar.

Filippinler:
Täze ýyl güni tegelek şekilli zatlary iýmek adaty

Filippinlerde bar bolan bu adat bütinleý maddy islege baglydyr. Olar Täze ýyl saçagynda diňe tegelek görnüşli iýmitleri goýmagyň Täze ýylda baýlyk getirjekdigine ynanýarlar. Olarda tegelek iýmitler teňňeleri aňladýar.



Mähribanlar täze 2024-nji ýyl rysga bereket getirsin, janyňyz sag başyňyz dik bolsun, maşgalaňyzda agzybirlik höküm sürsün!


@IMISSYOU
 

Telbe boldum, indi halym harapdyr,
Eý, agalar, meni şol ýar öldürdi;
Müşk alyban käkillerin darapdyr,
Jan agalar, meni şol ýar öldürdi.

Boýnuna gol salsaň barly, semerli,
Altyn-kümüş tamam endamy zerli,
Lagly-ýakut gerdeninde, tumarly,
Eý, agalar, meni şol ýar öldürdi.

Arzuw edip, aý jemalyn görmeli,
Ýüzde gülap, gözi-gaşy sürmeli,
Bir peridir, saçy sekiz örmeli,
Jan agalar, meni şol ýar öldürdi.

Kemine diýr, tagt üstünde jaýydyr,
Derýa düri, asman kuýaş-aýydyr,
Gyzlar hany, gözelleriň şaýydyr,
Jan agalar, meni şol ýar öldürdi.