"Adaty söýüpdi" diýäýde, goýaý,

Özüňde günäni goýmazlyk üçin.

Wagtlaýyn duýgyňam yzyna alaý,

Täze söýgülere gönezlik üçin.

Söýüşmäge adam tapdy:r ahyry,

Gezibergin ýeňles duýgyň badyna.

Içiň gyssa ýatlamany çagyryp,

"Goşgam goşan bolýady" diý, adyma.

Adaty zatlaryň gadry bolmaýar,

Gadry bolmaýşy deý adaty günleň.

Gowy duşuşyga kaktus barmaýar,

Söýülýäni azdyr adaty gülleň.

Ýürekden diýmedik sözleriň kaýda?

Üýtgeşik dälleriň galarmy baky?

Eýsem, düşýädimi ýadyňa, heý-de,

Düýşleri bolmadyk adaty ukyň?!

...Gowysy, kynçylyk bolmazlyk üçin,

Aý, garaz, ýene-de öňkilik bolaý.

Özüňde günäni goýmazlyk üçin,

"Adaty söýüpdi" diýäýde, goýaý.

Ylham GURBANALYÝEW

Bar bolsa aýdaweriň)

Alýan suratlaryň üýtgeşik mydam,

Üýtgeşik sen - alýan suratlaryňdan.

Çagajyklar ýaly begenip gezýäň,

Her suratyň berýän pursatlaryndan.

Her bir zatdan üýtgeşiklik gözleýäň,

Gözlejek bolýarsyň bölek pürsdenem.

Daşyňdan görenler, içinden diýýär:

"Dälä meňzeş, gelen ýaly Marsdanam"

Bugün biri, erte başga biri sen,

Seni bilen, durup bilmez geňlemän.

Erkin ýaşamagyň lezzetin duýýaň,

Ýaşap bilýäň, asla ili diňlemän.

Sadaja ýylgyryş, owadan gülki

Şolar bilen has-da, bolýarsyň gözel.

Senden köp ýatlama ýadygär galdy,

Menden bolsa: "Saňa duşmazdan ozal"

...Sen-ä öňkiligiň dowam ediber,

Şonuň üçin muň soňuna geçeýin.

Üýtgeşiklik tapsaň bir gün mendenem,

Bir,

Iki,

Üç.

Şkyrt.

Menem düşeýin...

Ylham GURBANALYÝEW