KAKAÑ BAŞYÑ SYPAMASA

Ýeñsänden ýel kakyp geçer,

Kakañ başyñ sypamasa .

Ýöräp barýan ýollañ öçer,

Kakañ başyñ sypamasa.

*****

Durmuş saýlar öz merdini,

Başa täç etmez her kimi.

Iller götermez derdiñi,

Kakañ başyñ sypamasa.

*****

Gûnem gizlär ýagtysyny,

Hiç kim bermez artygyny,

Ykbal çalar şarpygyny,

Kakañ başyñ sypamasa.

*****

Ýitirip baýlyk sarpasyn,

Ah, seni kimler ýalkasyn?!

Özüñ-özüñe arkasyñ,

Kakañ başyñ sypamasa.

*****

Çözüşmez hiç kim ýumagyñ

Ýamanlar bolmaz ýamagyñ,

Dolup durar aç damagyñ,

Kakañ başyñ sypamasa.

Kerim Hallyýew

Nauşnikde aýdym diňlemek zyýanlymy?

Nauşnikde uzak wagtlap aýdym diňlemek ukubymyza zeper ýetirip, gulak bilen bagly näsazlyklaryň döremegine getirip biler. «Inwitro» lukmançylyk kompaniýasynyň hünärmenleri munuň gulakda gut dykysynyň emele gelmegine getirip, infeksiýa töwekgelçiligini ýokarlandyryp biljekdigini-de anyklapdyrlar.

Nauşnik ulanylanda erkek adamlaryň eşidiş näsazlyklaryna köp duçar bolýandygyny we bu töwekgelçiligiň ýaşyň ulalmagy bilen ýokarlanýandygyny görkezýär. Bütindünýä saglygy goraýyş guramasynyň (BSGG) görkezmelerine laýyklykda, hünärmenler aýdym-sazyň güýçlülik derejesini 85 desibelden geçirmezligi we şeýle güýçlülik derejesinde aýdym-sazy günde 60-80 minutdan köp diňlemezligi maslahat berýärler.

Mugallymçylyk hakynda parasatly aýtgylar

Mugallymyň iň ýokary sungaty döredijilikli aňlatmagyň we bilim almagyň şatlygyny oýarmak ukybydyr.

Albert EÝNŞTEÝN.

Mugallym talybyň akylynyň sapagy özleşdirip biljek mukdaryna görä ders bermek bilen çäklenmelidir we onuň akylynyň çatmajak zatlaryny sapaga girizmekden saklanmalydyr.

Muhammet GAZALY.

Öwredip öwrenýäris.

SENEKA.

Terbiýe üç zada mätäç: zehine, ylma, türgenleşige. Mugallymyň talapkärligi atanyň mährinden ýegdir.

Pars pähimi.

Mugallym üçin iň uly şatlyk öz okuwçysynyň öwülmegidir.

Şarlotta BRONTE.

Gaýtalamak bilimiň enesidir, ýöne döredijiligiň ganym duşmanydyr.

L.MARTYNOW.

Başgalara öwredeniňde has çalt hem gowy öwrenýärsiň.

Roza LÝUKSEMBURG.

Biz öwredýänlerimizden öwrenip bilýäris

J.HELEMENDERIS.

Eger mugallym diňe öz kärini söýýän bolsa, gowy mugallym bolar. Eger-de mugallym işini-de, okuwçylaryny-da söýýän bolsa, ol kämil mugallymdyr

N.TOLSTOÝ.

Aýdýan zatlary bilen edýän işleri çapraz gelmeýän mugallym gowudyr.

Katon SENZOR.

Telefon suwa gaçanda…

Suwa gaçan telefony özbaşdak guratmak iň gowy pikir. Ilkinji nobatda suwa gaçan telefony öçürmeli soňra batareýasyny aýyrmaly. Daşlygyny we gorag plýonkasyny aýyrmaly, SIM kartyny we çipini aýyrmaly, dinamigi, birikdirijileri barlamaly, pamyk taýajyklary ýa-da kagyz süpürgiçler bilen galan suw damjalaryny aýyrmaly.

Telefon Günüň aşagynda ýa-da saç guradyjyda guradylmaly däldir. Çünki ekrandaky pikselleriň ýa-da kamera matrisasynyň ýanmagy mümkin. Eger-de şeýle usullar arkaly guradylanda telefonyň käbir bölekleriniň eremegi we damjalaryň has çuňluklara aralaşmagy mümkin.

Suwa gaçan telefon azyndan bir gün ýyly otagda tekiz ýerde saklanylmalydyr.

Ýagşylyga tarap…

Ýagşy arzuwda ýaşamak adamyň tebigatyna mahsusdyr. Atalarymyz “Ýagşy niýet – ýarym döwlet” diýipdirler. Her bir şahsyýet durmuş maksatlaryny ukypdyr başarnyklaryna görä meýilleşdirmeli we olaryň hasyl bolmagy üçin çyn ýürekden yhlas etmeli. Maksada okgunly bolmaly we bilim derejäňi yzygiderli kämilleşdirip, özüňe bildirilen ynamy ak ýürekden ýerine ýetirmeli. Her bir işde halallyk bolmaly. Arzuwlaryň hasyl bolmagy seniň şüküriňe hem-de sabryňa bagly. Ýöne ynsan hiç bir ýagdaýda hem ruhdan düşmeli däldir, erjel we tutanýerli bolmalydyr.  Ata-babalarymyz şu durmuş hakykatlaryny göz öňünde tutup, “Yhlas bilen aglasaň, sokur gözden ýaş çykar” diýen bolmaly. Maksat tutunmaly, ýöne hiç haçan ýagşy umytsyz ýaşamaly däl.

Durmuşda her bir ýaş oglan-gyz ýokary mekdebe okuwa girmek üçin orta mekdepde bilim alýan döwründen şahsy mümkinçiliklerinden ugur alyp, geljekde öz höwes edip zähmet çekip biläýjek ugruny kesgitlemegi başarmaly. Maksadyna ýetmek üçin hem degişli okuw mekdebiniň synag tabşyrylýan dersleri boýunça ýörite taýýarlanan meýilnama esasynda bilimini ýyllaryň dowamynda üznüksiz artdyrmaly.

Eger-de geljekde okuwyny dowam etdirmäge höwesi bolmadyk ýaşlar öz ukyplaryna we başarnyklaryna laýyklykda yhlasly zähmet çekip biläýjek hünärini saýlamagyň hötdesinden gelmeli. Çekýän zähmetiniň netijeliligini ýokarlandyrmak maksady bilen, olar ýörite hünär okuw mekdeplerinde ýa-da gysga möhletli okuwlarda öz bilimlerini artdyryp hem bilerler.

Her bir ynsan öz ömrüni ýagşy umytlara baglap, il-güniň berekellasyny almaga çalyşmaly. Halkymyzda “Altyn alma – alkyş al” diýen pähim bar. Ynsan ömrüni jemgyýete, dost-ýarlaryna, il-gününe, Watanyna bagyş etmeli. Her halatda jemgyýetçilik bähbitlerini elmydama ileri tutmaly. Halk arasynda “Ilim-günüm bolmasa, aýym-günüm dogmasyn” diýen pähim bar. Diňe şeýle çemeleşme şahsy hem-de jemgyýetçilik bähbitleriniň sazlaşygyny üpjün edýär. Netijede her bir ynsan durmuşyň lezzetini görüp ýaşaýar, senden hem adamlaryň göwni hoş bolýar.

Ibn Sinanyň maslahaty: Bala nar goşup iýmegiň peýdasy

Halk içinde Lukman Hekim diýlip tanalýan Abu Ali Ibn Sinanyň lukmançylyk ylmyna degişli birnäçe maslahatlary we bejergileri bar. Şolardan biri hem bala nar goşup iýmegiň ajaýyp peýdasydyr.

Nar immun ulgamyny güýçlendirip, köp kesellerden, esasanam düwnük keselinden goraýar. Flowanidleriň, witaminleriň, polifenollaryň, antosýaninleriň we taninleriň üsti bilen holesterini we şekeri deňleşdirýän nar, diňe bir ýürek-damar saglygyny goraman, eýsem rak öýjükleriniň döremeginiň hem öňüni alýar. Lukman Hekim nary bal bilen bile iýmekligi ynsanlara hemişe maslahat beripdir.

Nar bilen baly garyp iýmegiň peýdalary:

Nar goşulan bal ilki bilen bokurdak ýokançlyklaryndan dynmaga kömek edýär. Esasan hem bokurdagy ýumşadyp, aşa iriňli bokurdak ýaralaryndan dynmaga kömek edýär.

Nar goşulan baly iýmek ýürek bulanmasyndan ejir çekýänler üçin hem peýdalydyr. Şeýle hem aşgazanda döreýän gastrit keselini gowulaşdyrmakda esasy bejergileriň biridir.

Nar goşulan bal iýilse, içege funksiýalarynyň kadalaşdyryjy täsirini ýokarlandyrýar. Içege kesellerinden, esasanam içegäniň rak keselinden goraýar. Nar däneleri bal bilen garylyp ýaralara ýapylanda täsirli bejeriş güýjüne eýedir.

Söý­gi­niň hemralary

Bir ze­nan öýü­niň eý­wa­ny­na eşik ser­mä­ge çy­kan­da, how­lu­sy­nyň ag­zyn­da­ky ke­se otur­gyç­da dyz­la­ry­ny epen üç ýa­şu­la gö­zi düş­ýär.

– Eger-de siz ýa­daw bol­sa­ňyz, içe­rik gir­ip, çaý-suw içiň! – di­ýip, göw­na­çyk ze­nan mü­rä­het ed­ýär.

– Bi­ziň hem­mä­miz bi­le­lik­de öýe gi­rip bil­me­ýä­ris – di­ýip olar jo­gap ber­ýär­ler.

– O nä­me üçin? – di­ýip, öý bi­ke­si geňirgenýär.

Ýa­şu­lu­la­ryň bi­ri: – Onuň ady “Baý­lyk”, mu­nyň­ky “Sag­lyk”, me­niň adym bol­sa, “Söý­gi” – di­ýip, öz­le­ri bi­len ta­nyş­dy­ran­soň, şeý­le diý­ýär:

– In­di bol­sa, ýan­ýol­da­şyň bi­len bi­ziň haý­sy bi­ri­mi­zi myh­man al­jak­dy­gy­ňyz ba­ra­da mas­la­hat ediň!

Ga­py­dan be­ge­nip gi­ren aýa­ly, adam­sy­na bo­lan zat­lar ba­ra­da gü­rrüň ber­ýär. Adam­sy mu­ňa ga­ty be­ge­nip:

– Bü-ýä oňat bo­laý­dy. Saý­la­ma­ly bol­sa nä­me, oza­ly bi­len “Baý­ly­gy” ça­gy­ra­ly. Goý, ol öýü­mi­zi baý­lyk bi­len dol­dur­syn! – diý­ýär.

Aýa­ly pi­kir­le­nip:

– Ga­dyr­dan, “Sag­ly­gy”, ça­gyr­sag-a has-da göw­ne­jaý bo­lar­dy – diý­ýär.

Ola­ryň gür­rüň­le­ri­ni diň­läp otu­ran ki­çi­jik gy­zy:

– Ýog­sa-da, biz nä­me üçin “Söý­gi­ni” ça­gyr­ma­ly däl? Goý, bi­ziň öýü­miz­de he­mi­şe söý­gi hö­küm sür­sün! – di­ýip, şat­ly­gy­ny ýü­ze çy­kar­ýar.

– Beý­le bol­sa gy­zy­myz bi­len ra­zy­la­şaý­mak gal­ýar. Bar-da, “Söý­gi­niň” bi­ziň myh­ma­ny­myz bol­ma­gy­ny so­ra – di­ýip, ho­ja­ýyn aýa­ly­na ýüz­lenýär. Aýaly da­şa­ryk çy­kyp, üç ýa­şu­la garap:

– Si­ziň haý­sy bi­ri­ňiz “Söý­gi” bol­sa­ňyz, içe­rik gir­iň, myh­ma­ny­myz bo­luň – diý­ýär. “Söý­gi” at­ly ýa­şu­ly içe­rik ýö­ne­len­de, beý­le­ki iki ýa­şu­ly hem onuň yzy­na dü­şü­be­rip­dir. Geň ga­lan ze­nan ýa­şu­lu­la­ra ýüz­le­nip:

– Ha­ny si­ziň di­ňe bi­ri­ňiz içe­rik gi­rip bil­ýän­di­gi­ňi­zi aý­dyp­dy­ňy­z ahy­ryn? – diý­ýär.

– “Baý­ly­gy” ýa-da “Sag­ly­gy” ça­gy­ran bol­sa­ňyz, beý­le­ki iki­miz da­şar­da ga­lar­dyk, ýö­ne siz “Söý­gi­ni” ça­gyr­dy­ňyz. Biz bol­sak, “Söý­gi” ni­rä git­se, el­my­da­ma onuň ýa­nyn­dan aý­ryl­ýan däl­di­ris. Biz onuň hem­ra­la­ry­dy­rys. Ni­re­de söý­gi bar bol­sa, şol ýer­de-de baý­lyk we sag­lyk mes­gen tut­ýan­dyr – di­ýip, ýa­şu­lu­lar işikden ätläpdirler.

2 = 98

Beýni adam bedeniniň 2 göterimini eýeleýär, emma galan 98 göterimini dolandyrýar, şonuň ýaly hem bedene sorulýan kislorodyň 20 göterimini ýeke özi harçlaýar. Munuň şeýledigini nazarda tutup, beýnä gerek bolan kislorod mätäçligini gandyrmak üçin suwsamasak hem wagtal-wagtal suw içmek, dogry dem almak wajypdyr.

Bedene sorulyp alynýan kislorod burundan girip, gan ýoly bilen beýnä ýetýär. Beýni kisloroda bagly bedendir, onuň öýjükleri kislorodsyz diňe 6-7 minut çydap biler.

Onuň agramy barada aýtsak: ýaňy dünýä gelen çaganyň beýnisiniň agramy 350-400 gram, uly adamlaryňky bolsa 1,4 kg-a golaýdyr. Daşky täsirlerden goranmasy üçin bolsa kelleçanagy bilen örtülendir.

Bilşimiz ýaly, beýni sag we çep ýarymşarlaryndan ybarat bolup, sag ýarymşary hyýal etmek, aýdym-saz hem-de sungat eserlerini döretmekde, çep ýarymşary bolsa okamak we ýazmak meselesinde, matematiki aňlatmalary çözmegimizde, wakalaryň beýnide seljerilmeginde bizi goldaýar.

Beýnimizde 100 milliarda golaý neýronlar, ýagny nerwi öýjükleri bar. Olar biri-birleri bilen ýakyn baglanyşykda bolup duýgy we düşünjelerimizi emele getirýärler. Täze zatlary öwrenmäge meýilli bolmagymyz, öň gidilmedik ýerlere gidip görmegimiz,

dürli kitaplary okamagymyz, özümizde bar bolan ukyp-başarnyklarymyzyň üstüni açyp, ösdürmegimiz, dürli kitaplary okamagymyz, özümizde bar bolan ukyp-başarnyklarymyzyň üstüni açyp, ösdürmegimiz şol neýronlaryň arasyndaky baglanyşygyň artmagyna belli bir derejede täsirini ýetirip, beýni güýjüni ýiteldýär. Şol zatlaryň gaýtalanyp durmagy beýnini ýadadýar.

Beýnä has köp täsiri bolan duýgy bedeni gözdür. Görmek bilen baglanyşykly nerwi öýjükleri beýnide beýlekilere garanyňda has köp orun eýeleýär. Şonuň bilen baglylykda diňlemek arkaly kabul edilen maglumatyň 10 göterimini ýatda saklaýan bolsak, görmek arkaly kabul edilen maglumatyň 65 göterimini ýatda saklap bilýäris. Täze tanyş bolan adamlarymyzyň atlaryny unutsak-da, olaryň ýüz keşbiniň ýadymyzda galmagy munuň netijesidir.

Maglumatyň beýnide uzak möhletli saklanmagy üçin ukynyň zerurlygy hem ýokarydyr. Çagalaryň we ýetginjekleriň öwrenmek meselesinde has işjeňligi sebäpli olar uka köp mätäçlik çekýärler.

Saçyňyza atyr sepseňiz…

Saçyňyza atyr sepmek dogrymy? Saçyňyza atyr sepmek hakda köp myş-myş eşiden bolsaňyz gerek. Saçyňyza atyr sepmek saçyňyza edip biljek iň erbet zat bolup bilmez, elbetde bu gowy zat hem däl. Parfýumeriýa saçyňyza zeper ýetirip biler. Ilki bilen onuň düzüminde haýsy maddalaryň bardygyny gözden geçiriň. Parfýumeriýa we beden spreýleriniň köpüsi etil spirti we agyr sintetiki hoşboý yslar ýaly gaty spirtlerden alynýar.

FDA-nyň habaryna görä, etil alkogoly deride we saç guradylanda erbet täsir edip biler. Şol sebäpli käbir kompaniýalar köp kosmetiki önümleriň formulalarynda beýleki spirtli içgileri ulanmagy makul bilýärler.

Saçyňyza atyr sepmegiň ýerine… Parfýumeriýanyň alternatiwasy hökmünde saçyňyzyň bitewiligini gorap, ony arassalap we nemlendirmegiňiz üçin birnäçe usullar bar:

Saç spreýlerini iň ygtybarly usul hökmünde göz öňünde tutuň. Bu spreýler saçyňyzy guratmazdan ýa-da başga bir zeper ýetirmezden güýçlendiriji, dowamly ys galdyrmagy maksat edinýär.

Gury şampun. Saçyňyzy wagtlaýyn arassalaýan we ýakymly ys goşjak önüm gözleýän bolsaňyz, gury şampuny saýlap bilersiňiz. Bu formulalardaky önümler artykmaç ýagy aýyrmaga we saçyňyza zyýan bermezden ýakymsyz yslary siňdirmäge kömek edýär. Şeýle-de bolsa, gury şampuny gaty köp ulanmaly däl. Sebäbi saçyňyz gözenekleriňizi dolduryp, howasyz bolmagyna sebäp bolup biler.

Hoşboý ysly ýaglar. Gury saçlary çuňňur iýmitlendirmek isleseňiz, ysly saç ýagyny synap görüň. Saçlara ideg aýratynlyklary bar bolsa, bu önümler bilen saçyňyzy has sagdyn edip bilersiňiz. Ahyrynda, ýagly görünmezlik üçin saçyňyzyň ortasyndan ujuna çenli çalyň.

Mazmuna üns beriň. Goşundylar babatynda etil we izopropil spirtlerinden uzak durmak isläp bilersiňiz. Tebigy ýaglar bilen baýlaşdyrylan islendik saç dökülmeleri üçin gury şampun almak, süýümleri bejermäge we hoşboý ys goşup biler. Efir ýaglary adaty sintetiki atyrlara alternatiwa hödürleýär.

Ynam – ömrüň şamçyragy

Durmuş  nähili  owadan!  Munda  käte  asla  garaşmaýan,  göýä ertekilere  çalymdaş  hyýallaryň  hem  hasyl  bolaýýar.  Şeýle  günlerde  adam özüni juda bagtly  duýýar,  şol  bagtly  günleriň  uzak we  hemişelik  dowam  etmegini isleýär. Ýöne biz  käte  bagtly  durmuşy  salgy  berýän zadyň nämedigin unudyp, göwnüçökgünlige orun berýäris. Ine  şu  waka  “Azapsyz ýeriň ady ýok”  diýen  jümläniň  doly  şaýady bolsa gerek.

…Ol  wagtlar  men  çagalar  bagyna  gatnaýardym.  Bize  terbiýeçiler goşgulary,   aýdymlary,  ýönekeýje  matematik  amallary  öwredýärdiler. Bir gezek maňa  terbiýeçimiz  baýramçylykda  aýtmaly  goşgymy  ýazyp  berdi. Ol  goşgyny  ertir  labyz  bilen  ýerine  ýetirmelidi.  Sebäbi  biziň çagalar  bagymyz  bilen hoşlaşmaly  günümizde  aýdym-sazly  baýramçylyk  dabarasy  guralypdy.  Terbiýeçi: “Özüne  ynanylan  işi haýsyňyz  üstünlikli  ýerine  ýetirseňiz, ýörite  baýramçylyk  sowgatlary  gowşuryljakdyr.  Hany, göreli,  kimler  sowgat  alarka?!” diýip,  hemmämizde  höwes  döretdi.  Çaga  wagtyň  sowgat  almaly  diýilse,  hemmeler  gözjagazlaryny  tegeläp,  sowgadyň  özüniňki bolmagyny isleýändigi  düşnükli  bolsa  gerek.

Agşam  ejemjan  meni  çagalar  bagyndan öýe  alyp  gaýtdy.  Men  bolsa  ýatlamaly  goşgumy  öwretmegi  ejemden  haýyş  etdim.  Sebäbi  özüm  bu  jogapkärçilikli  işi  başarjak  däldim. “Durnaň  üstüne  urna”  diýlişi  ýaly  öýümize  daýzam  geldi.  Ejemiň  gyz  jigisi  şäherde,  bizden  uzakda  ýaşansoň,  ol  öýümiziň  iň  arzyly  myhmanydy.  Ejem  daýzam  bilen  uzak gije  gürrüňdeş  bolup  oturşyna,  maňa  öwretmeli  goşgyny  hem  ýadyndan  çykardy.  Ýok,  ýadyndan çykarmady, nahar-şor,  soňam  çagalyk  döwrüniň  ýatlamalary  bilen  goşgyny  öwretmäge  wagty  bolmady.  Men  garaşyp,  garaşyp  gijäniň  bir  wagtynda  uklap  galdym.

Ine, daň  säher  şapak  gyzardy.  Guşlaryň  sesi,  horazlaryň  aýdymy  ýaňlanyp  ugrady.  Böküp  diýen  ýaly  ýerimden  turup,  ejemiň  ýanyna  bardym.  Ejem  bolsa  ertirlik  taýýarlamak  bilen  başagaýdy.  Men  aglamjyrap: “Eje!..”  diýenimden,  “Wah  saňa döneýin  balam!  Hany, öwreneli, getir  goşgyňy”  diýdi.  Goşgy!  Beýik  goşgy. Maňa  köp  zady  öwreden  goşgy.  Çagalar  bagyna  gitjek  däldigimi  aýdyp,  aglap  başladym,  sebäbi  men  goşgyny  az  wagtyň  içinde  ýatlap  biljek  däldim.  Ejem meni  bagryna  basdy.

“Gyzym!  Meni  diňle…”  men  sesime  has-da  bat  berip  agladym.  Ejem  düşündirip  bilmejegine  gözi  ýetensoň,  goňşy  otaga  gitdi-de,  eline  iki  sany  dört  eplenen  meňzeş  kagyz  bölegini  getirdi.  Soňra  şeýle  diýdi: “Ine,  seret!  Meňzeş  kagyz  bölekleri.  Ynha,  birini açyp  görkezeýin,  munda  günüň  suraty  bar.  Beýlekide  aýyň  suraty  bar.  Sen  häzir  gözüňi  ýumýaň-da  şularyň  birini  saýlaýaň. Eger  seniň  saýlan  kagyzyňda  günüň  suraty  bolsa,  onda sen  hökman  goşgyny  aýdyp,  sowgat  alarsyň.  Eger  saýlan  kagyzyňda  aýyň  suraty  bolsa,  onda çagalar  bagyna gitmeseňem  bolar.  Seret!  Gaty  ünslüje  bol!”  diýdi-de, kagyz  bölejikleriniň  ýerini  çalasynlyk  bilen  çalşyrdy.  Men gözlerimi ýumdum-da, ejemiň  sag  elindäki  kagyz  bölejiginini  aldym. Alsamam  aldym  welin,  ýüregim agzymdan  çykjak  bolýardy.  Birdenkä, kagyzda aýyň  suraty  bolsa  näme?!  Kagyzy  açdym,  ine,  günüň  suraty.  Meniň begenşimi  bir  görsediňiz.  Ejem: “Gyzjagazym,  gördüňmi?  Sen  muny  başararsyň!  Hany  işe  girişeli…” diýdi.  Goşgyny  ejem okaýa,  yzyndan  men  gaýtalaýan,  ejem  okaýa, men gaýtalaýan, gaýtalaýan, gaýtalaýan…

Älemiň  soltany,  zeminiň  şasy,

Enelere ömür  diläň  adamlar!

Uzak  bolsun  ýaşy,  belentde  başy,

Enelere  bagt  diläň  adamlar!

Sebäp  günüň  çogy  enäň  keşbinde,

Sebäp  dünýäň  keşgi  enäň  egninde,

Azdyr  eneleri  görseň  her  günde,

Enelere  bagt  diläň  adamlar!

Bary-ýogy bäş  gezek  gaýtalanan  goşgy,  nädip  ýadymda  galsyn  diýsene.  Ejemiň  aýdan  sözleri  maňa  güýç  berdi.  Sebäbi  ejemjanyň  sözlerine  çyn  ýürekden  ynanypdym. Meniň  alan  kagyz  bölegimde  günüň  suraty  bardy.

Ine,  çagalar  bagy.  Baýramçylyga  taýýarlykly  sowgat  almakçy  bolýan  körpejeler  şadyýandy.  Men has  beter  ruhubelentdim. Sebäbi men  hökman  sowgat  almalydym.  Günüň  suraty…  Men  asmana  seretdim.  Gün  şöhlesi  gözüme  düşdi.  Ynamym  güýçlidi.  Baýramçylyk  dabaramyz  başlandy.  Men  goşgymy  aýtdym,  goşgyň  sözleri  öz-özünden  dilime  geldi  durdy.

Sowgatlar  barada  aýdylanda,  çagalar  bagynyň hemmejesi  şol  sowgatlaryň  eýesi  boldy.  Sowgat  alman   galan  ýekeje  körpeje-de  ýokdy.  Aslynda,  terbiýeçimiziň  sözleri  bizi  höweslendirmek  üçin  aýdylan  ekeni.  Şol  gün  öýe  guş  bolup  geldim.  Keýpim  kökdi.  Ejemiň  begenşini  söz  bilen  aýdyp  biljek  däldim.  Bagtly  çagalyk.  Şol  çagalygyň  öz kiçijik  aladasyny  ejemjan söz  bilen  aýyrýan ekend-ä…  Ine,  bu  gün  ejem  ýok,  sözleri  bolsa  henizem  gulagymda  ýaňlanyp  dur:  “Balam!  Ynam  hemme  zatdan  güýçlüdir”.

Ynam – ömrüň  şamçyragy,  bagtyň  görkezijisi.  Ynsanlarda  ynamy  döredip  bilýän  bolsak,  ömrümizi  nurlandyrýarys. Özümizde  ynamy  döredip bilsek,  durmuşymyzy  gözelleşdirýäris.  Ynam –  durmuş  aty  bilen  pellehana  ýetmegiň  beýik  ýoly. Ynam – ömrüň  parçasy.  Biz  bu  gün  ynam  bilen  bagtly  geljege  barýarys.