Gözellik şuglasy...

Bir adalatly patyşa bar eken. Onuň deňsiz-taýsyz adalaty baradaky gürrüňler goňşy döwletlere hem ýaýrapdyr. Şol döwrülerde suratkeşleriň arasynda kimiň suraty has owadan çekip bilýänligi barada jedel döräp, bu jedel hem wagty bilen çözülmän, ahyr soňky çözgüdi tapyp bermegi adalatly patyşadan haýyş edipdirler. Patyşa munuň üçin olary synap görjekdigini aýdypdyr we synagyň nähili geçirilmelidigi barada bäsdeşleriň tekliplerini öwrenipdir, şeýle hem olary iki topara bölüpdir.

Birinji topardaky suratkeşler bäsleşýän toparlaryň her haýsysynyň aýratyn otagy bezemelidigini aýdypdyrlar. Şeýle bolanda, hiç kim hiç kimden göçürip bilmez diýen netijä gelipdirler.

Ikinji topardaky suratkeşler bolsa, tersine, iki tarap hem şol bir otagyň diwarlaryny bezemeli diýen karara gelipdirler. Ýöne otagda aradan ses we görnüş geçmez ýaly örtük bolmaly. Eserler tamamlanansoň, örtük aýrylyp, edilen işlere baha berilmeli. Şonda kimiň has gowy eser döredendigi mälim bolar.

Adalatly patyşa ikinji topardaky suratkeşleriň teklibini has oňaýly görüp, bäsleşigi bir otagda geçirmegi göz öňüne tutupdyr. Munuň üçin talap edilýän şekilde otag taýýar edilipdir. Edil aýdylyşy ýaly, otag galyň örtük bilen ikä bölünipdir.

Surat eserleri döredilýärkä, adalatly patyşa iki tarap hem näme gerek diýse, üpjün edip durupdyr. Esasan hem, dürli reňk sorap, hytaýly suratkeşler kän gelipdirler. Ýöne, näme üçindir, ikinji topardaky suratkeşlere reňk kän gerek bolmandyr. Hatda olar işlerini bäsdeşlerinden öňde-de tamamlapdyrlar.

Birinji topardaky suratkeşler işini tamamlansoň, patyşa döredilen eserleri synlamaga gelidpir. Aýdylyşy ýaly, otagy ikä bölüp duran örtük hem aýrylypdyr. Patyşa ilki bilen birinji toparyň suratkeşleriniň bezän diwaryny synlapdyr. Hakykatdan-da, diwaryň gözelligini synlamaga göz, wasp etmäge söz gerekmiş. Her kim owadan bezegleri agzyny açyp synlapdyr. Gözler garşydaky diwara düşende welin, hiç kim aýdara söz hem tapmandyr.

Ikinji topardaky suratkeşler diwar ýylmap, edil aýna ýaly edipdirler. Şeýlelikde, hytaýly suratkeşleriň döreden eseri garşydaky diwarda şöhlelenip, has owadan keşbe giripdir. Garşy diwardaky surat hakyky bolşundan-da owadanmyş.

Käte şuglanyň nädip emele gelýändigini kesgitläp hem gözellik döredip bolýar.

Taýýarlan: Şasenem HOMMAÝEWA,

Çeşmesi guramasa...

Arzuwlaryň hasyl bolmagy, haýyşlaryň bitmegi üçin çeşmäniň guramagy gerek» diýilse, birbada geň galmagyňyz mümkin. Ýöne, käwagt şeýle bolmagy zerur ekeni.

Dag üstünde bütin ömrüni ybadat bilen geçiren bir adam bar ekeni. Bir gün dili dogaly biriniň ýoly onuň üstünden düşüpdir. Ötegçi bu terkidünýä adam bilen hal-ahwal soraşypdyr. Terkidünýä oňa: «Bütin ömrümi Hakyň tagat-ybadatyna bagyş etdim. Şu dagyň depesinden düşmän, diňe adyny zikir edip ýaşadym. Şu ýerde tapanlarym bilen oňşuk etdim. Emma, her neneň jomart diýilse-de, Biribardan göwnümiň galan ýeri bar. Hernäçe dilesem-de, bir hajatymy-ha hasyl ediberenok» diýipdir. Şol wagt aýdany uzak garaşdyrman hasyl bolýan ýaňky ötegçi iki goluny ýokary göterip, Ýaradandan dileg edipdir: «Perwerdigär, sen ýer ýüzündäki janly-jandar, guş-gumry, mal-gara, her kesiň rysgyny ýetirýärsiň, haýyş-hajatyny hasyl edýärsiň. Seniň ryzaňy gazanmak üçin gije-gündiz ybadat edýän bu bendäň hem haýyşlaryny rowa et! Muny maksadyna ýetir» diýipdir.

Birnäçe wagtdan soňra ötegçiniň ýoly ýene ýaňky ýerden düşüpdir. Ötegçi gören zatlaryna geň galypdyr: Dagyň depesindäki baglar gurapdyr, çeşmäniň gözügi baglanyp, taňkyrap galypdyr. Dili senaly ötegçi ýene iki goluny ýokary göterip: «Perwerdigär, men bu bendäniň çeşmesini, bagyny gurat diýmedim. Onuň haýyş-hajatyny hasyl et! Ony maksadyna ýetir! Oňa has köp eçil!» diýip ýalbarypdym» diýipdir. Şol wagt asmandan bir seda eşidilipdir: «Eý, ötegçi, hut seniň dilegiňi hasyl etmek üçin bu terkidünýäniň bagyny hem, çeşmesini hem guratmaly bolduk. Sebäbi, bu bende bu ýerdäki rahatlyga şeýle bir öwrenişipdi. Onuň arzuw edýän zatlaryny, nesibesini bolsa, biz aşakda başga bir ýerde goýupdyk. Bag-çeşmäni guratmasak, bu bende bu ýerden asla gozganjak adam däldi. Her näçe öwrenişen hem bolsaň, bir rahatlyga daňylyp otursaň, nesibeli ýeriňe ýöremeseň, arzuwyňy görmek mümkin däldir. Bar, seret, ol terkidünýä pylan ýerdedir» diýipdir.

Ötegçi baryp görse, ol terkidünýä hakykatdanda şady-horramlygyň, hoş günüň içindemişin. Şonda ötegçi öz ýanyndan pikirlenip: «Her zat haýra çekýär. Her bir zady gowulyga ýormak gerek. Bagdyr çeşmesi guramadyk bolsa, dogrudanam, bu bende örkünden gozganmazdy. Rahatlyga daňylyp oturyp, nesibäňe tarap hereket etmezlik uly ýalňyşlyk ekeni» diýipdir.

Taýýarlan: Guwanç SUWHANBERDIÝEW,

1. Özgäniň kemçiligine bellik edip ýörmekden uly kemçilik barmyka?

2. Asla biriniň umydyny kesme! Belki-de ýeke-täk eýe bolan zady şoldyr.

3. Aýakgabymyň ýoklugyna gynanýardym, aýagy ýok adamy görenime çenli.

4. Ýitirjek hiç bir zady galmadyk adamdan özüňi gora.

5. Haçan-da ýazmagy başarmaýan çagyň ýazmak gerek.

6. Saňa edilmek islemedik zadyňy, başga birine etme.

7. Çykan gapyňy gaty ýapma, belki-de yza dönmek isläp bilersiň.

8. Dilden gelen elden gelse – çyn gedaý patyşa bolar.

9. Iki gezek ýaşaýan ýok, emma bir gezek hem ömür sürmegi başarmaýan köp.

10. Daşy deşen, suwuň güýji däl-de, damjalaryň yzgiderligidir.

11. Garny açlardan has hem kalby açlara gynanýaryn.

12. Adam öz ýalňyşyny, diňe özgeleriň gözi bilen görüp biler.

13. Ýalan at ýaly gider, hakykat ýöräp, ýöne wagtynda ýetişer.

14. Ylymy ogurlatsaň köpeler, maly ogurlatsaň kemeler.

15. Ýaman diýdi – başda ýagşydym menem!

Konfusiýniň paýhas bakylygy...

Asylly adam – il aladasy, pes adam öz gaýgysy bilen ýaşaýar.

Ownuk zatlarda özüni saklap bilmezlik – uly işleriň ýoguna ýanýar.

Özüňe islemeýän zadyňy özgä-de etme.

Öz nadanlygyny bilip, bilimiň gözlegine çykan adama öwüt bergin. Özüniň gymmatly pikirlerini aýdyp bilmeýäne öz kömegiňi ber. Öz dörtburçlugynyň bir burçuny tanap, galan burçlary hakynda bilmäge ukyply adamy okatgyn.

Hakyky adamkärçilik bizden daşdamy? Eger isleseň, ol derrew seniň ýanyňda peýda bolar.

Bilim bolmasa, edepsizlk öz-özüňi gynamaklyga öwrüler. Bilim bolmasa, seresapsyzlyk hökman gorkaklyga öwrüler. Bilim bolmasa, açykgöwünlilik gödeklige öwrüler.

Eger döwletiň patyşasy ene-atasyny hormatlaýan bolsa, ýönekeý ynsanlary hem adamkärçilikli bolar.

Hakyky adamkärçilikli ynsan ähli zady öz güýjüne daýanyp etmäge çalşar.

Diňe hakyky adamkärçilikli ynsan söýmegi hem ýigrenmegi başarýar.

Kim könä ýüzlenip, täze zat açmany başarýan bolsa, şol mugallym bolmaga mynasypdyr.

Päk ahlakly adam ýalňyz bolmaz. Onuň töwereginde hökman özi ýaly tapylar.

Meniň maksadym – hakykat, kömekçim – päk ahlak, daýanjym – adamkärçilik, kalbyma basalyk berýän zadam – sungat.

Asylly adam ömründe üç zatdan gaça durmaly: güýji dyňzap duran ýigit wagty – yşkbazlykdan, kämillige ýeten wagty – bäsdeşlikden, garrylyga ýetip, güýç-kuwwaty azalan wagty – gysgançlykdan.

Alys geljekde ýüze çykmagy mümkin kynçylyklar hakynda pikir etmeýän adam ýakyndaky näsazlyklara büdreýär.

Mugallym şeýle diýdi: “Islendik obadaky öýleriň ondan birinden ýagşylyk etmekde yzyndan ýetdirmejek tapylar. Ýöne ylma, bilime bolan söýgide, teşnelikde welin, hiç kim menden ozduryp bilmez”.

Toplan: Maksat SERDA

Durmuş bir derýadyr...

Durmuş bir derýady. Men bolsa şol derýanyň goýnundaky balykdym. Bir gün derýanyň kenaryna eli «çeňňekli» biri geldi. Ol sendiň. Seniň gözleriň meni şol kenara sallan söýgi çeňňegiň ujundaky lukma bolup öz garysyna düşürdi. Ine indem, şondan bäri şol çeňňegiň lukmasynyň oýnaklaýan garaýyşlaryna maýyl bolup gezip ýörün. Men bu haty saňa ýollamanam bilerdim.Ýöne indi näçe wagtlar bäri men şol kenaryna çykan derýamyň boýunda umytlarymyň tüssesini al-asmana gaýdyryp otyryn. Derýanyň balyklary bolsa bir wagtky meniň düşen halymy görüp, suwa sallanan çeňňege ýanaşmaga gorkýarlar.Ýöne köpleriň tersine gidip, bir ýaş balyk çeňňege tarap ýöneldi. Men onuň bu herekedini geň görüp, onuň ilişen çeňňegine seretdim. Men oňa seretmesemem seretmezdim, emma ol görgüli balyjagyň towlanyp ah çekişi meniň birnäçe ýyl mundan öň çeken a:hymdy. Onuň halyna dözmän ýanyna bardym. Bu şeýlede bolaýmaly-da. Ol intejik ah çeker. Soňam ýaşaýşyny kenarda dowam etdirer. Sebäbi onuň aldanan şol lukmasy seniň gyzyň gözleri boldy. Ol häzir özüniň ähli hereketlerinden göwnühoş ýagdaýda derýa bakyp, balyklary synlaýardy. Ah, oglum, meniň söýenim ýeterlik dälmi diýsene…

Nurşat NARLYÝEWA.

PÄHIMDEN DÖRÄN SETIRLER…

“O tarapda iň kän ökünjek adam, aýdýan zatlaryna başgasy gulak asyp gutulan, emma olary özi etmändigi üçin heläk bolan alymdyr”.

Hatemül-Esam (r.a)

***

“Eý, naharyň duzy hökmünde bolan bir iliň alymlary,

Ähli zady bozman saklaýan duzuň özi bozulsa, ony näme bilen düzedip bolar?”.

(Şygyrdan)

***

“Adamlaryň jezasy olaryň kalblarynyň ölmegidir. Kalblarynyň ölmegi bolsa, ahyretlik amal bilen dünýälik zatlar islemekleridir”.

Hasan (r.a)

***

“Nije alymlar bardyr, olaryň hakyky ylymdan, hakyky magnydan habarlary ýokdur. Olar diňe maglumat göterijidir, ylym söýüji däl”.

Möwlana

***

“Ýarym okumyşlar nadandan howpludyr”.

I. Glein

***

ALLANY GÖZLEMEK

“Söýmegi başarýan adama juda ýakyn bolan Alla, akyly bilen düşünjek bolýana şonça uzakdyr, gizlindir”.

Aleksis Garrel

***

“Ýönekeý adamlar Allany Günüň ýylysyny duýuşlary, gülüň ysyny alyşlary ýaly tebigy ýagdaýda duýarlar”.

Aleksis Garrel

***

“Ynsan Ýaradana suw we howa deý mätäç”.

Aleksis Garrel

***

“Alladan daşlaşan, Allany gözlemeýän adam hakykaty we bagty ne öz içinde, ne daşky dünýäde tapyp biler”.

Paskal

***

“Iki zadyň gadyryny olary ýitirmezden bilmek kyndyr: saglygyň we ýaşlygyň”.

Hezreti aly (r.a)

***

“Adamlar ekiniň başlaryna meňzeşdir, içleri boşka başlary dikdir, içleri dolup ugradygy, başlary egilmäge başlar”.

Monten

***

“Adamlaryň mertebesini beýgeldýän iki häsiýet bardyr: erkeklerde mertlik, aýallarda namysyny saklamak.

Napolion

***

“Adamlar öz ýalňyşyna bagtlykalar däl-de, bagtsyzkalar düşünýärler”.

Daniel Defo

***

“Adamlaryň bagtly ýa-da bagtsyz bolmagynda, takdyryň paýy-da kändir welin, olaryň özüni alyp baryşlarynyň paýy-da az däl”.

La Roçefoukault

Ýalňyşlardan sapak alyň...

Meşhur oýlap tapyjy, alym Tomas Edison ýagtylyk lampasy üçin inçe simi ýasamakda iki müňden artyk materialy synagdan geçirdi. Emma onuň ähli synaglary puç boldy we hiç hili netije bermedi. Şonda onuň şägirdi arz etdi:

“Biziň ähli synaglarymyz başa barmady. Bu işlerimizden hiç zat öwrenmedik” – diýipdir. Edison şägirdine arkaýynlyk bilen ,

“Hawa, biz kyn ýollardan gitdik we şu işimizden köp zatlary öwrendik. Indi biz şuny bilýäris, şu iki müň elementi lampa ýasamak üçin ulanyp bolmaýan eken” – diýip, jogap beripdir.

Her işde bir haýyr bar.

Gazaply gyş günleridi. Kiçi bir obadan balykçy gämisi deňize tarap çykdy. Çykan wagty harasat zerarly deňizde güýçli tolkun emele geldi we garaňky düşdi, emma balykçylardan hiç biri yzyna dolanyp gelmedi. Gijesi bilen eneler, ýaş çagalar, aýallar ellerini galdyryp, ýitenleriň tapylmagyny sorap dileg edýärdiler we dost-ýarlaryny deňziň kenaryndan gözleýärdiler. Üstesine-de bir külbede ýangyn döredi. Erkek adamlaryň ýoklugy sebäpli külbe ýanyp kül boldy. Ertir irden bolsa balykçylaryň gämisi sag-aman kenara çykdy. Hemme begenýärdi. Emma bir aýal umytsyz garaýyşlary bilen ýola gözüni dikip otyrdy. Ol ýangynda öýi ýanyp kül bolan adamyň aýaly bolup, adamsy kenara çykansoň, şeýle diýdi.

– Indi näme ederis!? Öýümizdäki hemme zat ýanyp küle öwrüldi. Adamsy aýalyna şeýle diýdi:

– Şol ýangyn üçin şükür edýärin! Ýanan külbämiziň ýagtylygyndan gämi ýoluny tapdy we biz kenara sag-aman çykdyk.

❤️

Ýüregiňizi diňläň!

Baryň huzuryna päklenip kemsiz.

Uzyn gijelerde galyň ikiçäk.

Darkaşyndan başly – barat duýgulaň

Ýürek – size sypalgadyr ýeke-täk.

Ähli hossarlardan, dosty-ýarlardan

Golaýdyr ol, iňňän golaýdyr size.

Öwrüm-öwrüm, aýlaw-aýlaw ýollaryň

Haýsynyň nireden çykarjagyny

Şol aýdar size.

Şol aýdar müşgilleň asan çözgüdin,

Şol aýdar –

Şoňkudan özge ýalandyr.

Alla owal-başda ynsan ogluny

Ýere gönderende nurundan ýasap,

Dolap ýürek atly düwünçejige

Özündenem birje bölek salandyr –

Ýürekde bolýandyr iň uly hasap.

Iň owadan ýazlar ýürege gelýär,

Iň ýowuz kyýamat gopýar ýürekde.

Ol ymgyr ummanda ýalňyz gämidir –

Jan-jedel bol – yhlas bilen kürekle!

Ýürek tämiz bolsa, ýollar tämizdir.

Ol çäji harpykdan saýlap durandyr.

Diňe gül bedeniň gülgün ganyn däl,

Ykballaryň kültem-kültem ýollaryn

Öz-özünde sazlap, aýlap durandyr.

Ýüregňizi diňläň!

Ýürek – öz dünýäňe ýalňyz gapyňdyr!

Ýüregiňizi diňläň! Syrdaşdyr size,

Size sizden ýakyndyr!

Kakamyrat REJEBOW

Ynam ömrüň şamçyragy.

Durmuş nähili owadan! Munda käte asla garaşmaýan, göýä ertekilere çalymdaş hyýallaryň hem hasyl bolaýýar. Şeýle günlerde adam özüni juda bagtly duýýar, şol bagtly günleriň uzak we hemişelik dowam etmegini isleýär. Ýöne biz käte bagtly durmuşy salgy berýän zadyň nämedigin unudyp, göwnüçökgünlige orun berýäris. Ine şu waka “Azapsyz ýeriň ady ýok” diýen jümläniň doly şaýady bolsa gerek.

…Ol wagtlar men çagalar bagyna gatnaýardym. Bize terbiýeçiler goşgulary, aýdymlary, ýönekeýje matematik amallary öwredýärdiler. Bir gezek maňa terbiýeçimiz baýramçylykda aýtmaly goşgymy ýazyp berdi. Ol goşgyny ertir labyz bilen ýerine ýetirmelidi. Sebäbi biziň çagalar bagymyz bilen hoşlaşmaly günümizde aýdym-sazly baýramçylyk dabarasy guralypdy. Terbiýeçi: “Özüne ynanylan işi haýsyňyz üstünlikli ýerine ýetirseňiz, ýörite baýramçylyk sowgatlary gowşuryljakdyr. Hany, göreli, kimler sowgat alarka?!” diýip, hemmämizde höwes döretdi. Çaga wagtyň sowgat almaly diýilse, hemmeler gözjagazlaryny tegeläp, sowgadyň özüniňki bolmagyny isleýändigi düşnükli bolsa gerek.

Agşam ejemjan meni çagalar bagyndan öýe alyp gaýtdy. Men bolsa ýatlamaly goşgumy öwretmegi ejemden haýyş etdim. Sebäbi özüm bu jogapkärçilikli işi başarjak däldim. “Durnaň üstüne urna” diýlişi ýaly öýümize daýzam geldi. Ejemiň gyz jigisi şäherde, bizden uzakda ýaşansoň, ol öýümiziň iň arzyly myhmanydy. Ejem daýzam bilen uzak gije gürrüňdeş bolup oturşyna, maňa öwretmeli goşgyny hem ýadyndan çykardy. Ýok, ýadyndan çykarmady, nahar-şor, soňam çagalyk döwrüniň ýatlamalary bilen goşgyny öwretmäge wagty bolmady. Men garaşyp, garaşyp gijäniň bir wagtynda uklap galdym.

Ine, daň säher şapak gyzardy. Guşlaryň sesi, horazlaryň aýdymy ýaňlanyp ugrady. Böküp diýen ýaly ýerimden turup, ejemiň ýanyna bardym. Ejem bolsa ertirlik taýýarlamak bilen başagaýdy. Men aglamjyrap: “Eje!..” diýenimden, “Wah saňa döneýin balam! Hany, öwreneli, getir goşgyňy” diýdi. Goşgy! Beýik goşgy. Maňa köp zady öwreden goşgy. Çagalar bagyna gitjek däldigimi aýdyp, aglap başladym, sebäbi men goşgyny az wagtyň içinde ýatlap biljek däldim. Ejem meni bagryna basdy.

“Gyzym! Meni diňle…” men sesime has-da bat berip agladym. Ejem düşündirip bilmejegine gözi ýetensoň, goňşy otaga gitdi-de, eline iki sany dört eplenen meňzeş kagyz bölegini getirdi. Soňra şeýle diýdi: “Ine, seret! Meňzeş kagyz bölekleri. Ynha, birini açyp görkezeýin, munda günüň suraty bar. Beýlekide aýyň suraty bar. Sen häzir gözüňi ýumýaň-da şularyň birini saýlaýaň. Eger seniň saýlan kagyzyňda günüň suraty bolsa, onda sen hökman goşgyny aýdyp, sowgat alarsyň. Eger saýlan kagyzyňda aýyň suraty bolsa, onda çagalar bagyna gitmeseňem bolar. Seret! Gaty ünslüje bol!” diýdi-de, kagyz bölejikleriniň ýerini çalasynlyk bilen çalşyrdy. Men gözlerimi ýumdum-da, ejemiň sag elindäki kagyz bölejiginini aldym. Alsamam aldym welin, ýüregim agzymdan çykjak bolýardy. Birdenkä, kagyzda aýyň suraty bolsa näme?! Kagyzy açdym, ine, günüň suraty. Meniň begenşimi bir görsediňiz. Ejem: “Gyzjagazym, gördüňmi? Sen muny başararsyň! Hany işe girişeli…” diýdi. Goşgyny ejem okaýa, yzyndan men gaýtalaýan, ejem okaýa, men gaýtalaýan, gaýtalaýan, gaýtalaýan…

Älemiň soltany, zeminiň şasy,

Enelere ömür diläň adamlar!

Uzak bolsun ýaşy, belentde başy,

Enelere bagt diläň adamlar!

Sebäp günüň çogy enäň keşbinde,

Sebäp dünýäň keşgi enäň egninde,

Azdyr eneleri görseň her günde,

Enelere bagt diläň adamlar!

Bary-ýogy bäş gezek gaýtalanan goşgy, nädip ýadymda galsyn diýsene. Ejemiň aýdan sözleri maňa güýç berdi. Sebäbi ejemjanyň sözlerine çyn ýürekden ynanypdym. Meniň alan kagyz bölegimde günüň suraty bardy.

Ine, çagalar bagy. Baýramçylyga taýýarlykly sowgat almakçy bolýan körpejeler şadyýandy. Men has beter ruhubelentdim. Sebäbi men hökman sowgat almalydym. Günüň suraty… Men asmana seretdim. Gün şöhlesi gözüme düşdi. Ynamym güýçlidi. Baýramçylyk dabaramyz başlandy. Men goşgymy aýtdym, goşgyň sözleri öz-özünden dilime geldi durdy.

Sowgatlar barada aýdylanda, çagalar bagynyň hemmejesi şol sowgatlaryň eýesi boldy. Sowgat alman galan ýekeje körpeje-de ýokdy. Aslynda, terbiýeçimiziň sözleri bizi höweslendirmek üçin aýdylan ekeni. Şol gün öýe guş bolup geldim. Keýpim kökdi. Ejemiň begenşini söz bilen aýdyp biljek däldim. Bagtly çagalyk. Şol çagalygyň öz kiçijik aladasyny ejemjan söz bilen aýyrýan ekend-ä… Ine, bu gün ejem ýok, sözleri bolsa henizem gulagymda ýaňlanyp dur: “Balam! Ynam hemme zatdan güýçlüdir”.

Ynam – ömrüň şamçyragy, bagtyň görkezijisi. Ynsanlarda ynamy döredip bilýän bolsak, ömrümizi nurlandyrýarys. Özümizde ynamy döredip bilsek, durmuşymyzy gözelleşdirýäris. Ynam – durmuş aty bilen pellehana ýetmegiň beýik ýoly. Ynam – ömrüň parçasy. Biz bu gün ynam bilen bagtly geljege barýarys.

Bibi TAGANOWA,