awesome
05.07.2022 10:32
,,Erkek" ,,erk" sôzûnden dôrànmiš baśda, ,,Aÿal" - ,, aÿalmaly" sôzûndenmišin.
Ahmet Halmyrat / Söz hakynda söz
"Suw" diÿen söz "guw" sözüne meñześdir,
"Suw" diÿen söz meñześdir "luw" sözüne.
Añlasañ bularyñ bary demdeśdir -
Alysdaky göm-gök "arzuw" sözüne.
"Ÿaz" diÿen söz "ÿar" sözüne meñześdir,
"Gyś" sözünden çisñäp durandyr "ÿagyś".
"Tomus" "yssy" sözün ÿadyña salar,
"Gûÿz" sözüniñ "küÿseg" manysy barmyś.
Söz sözleseñ, saÿlap sözle sözme - söz,
Söz sòze ÿakyndyr, söz söze daśdyr.
Söz aÿtmazdan sözläp durany üçin,
"Göz" diÿen söz "söz" sözüne meñześdir.
Kakamyrat Rejebow / ***
,,Gûlmek" ,,gûl" sôzûnden dôràn bolarly-
Gûlende gûllere meñzeÿàr adam.
Gûl!
Gûlkiñden gûller parç bolup gitsin,
Dûnÿà gözÿaśyña degmeÿàr, Adam!
Her zadyñ hikmeti, manysy bašga,
Dûśûnmàn, hiç bir syr çôzûlmezmišin.
,,Erkek" ,,erk" sôzûnden dôrànmiš baśda,
,,Aÿal" - ,, aÿalmaly" sôzûndenmišin.
,,Bagśy" - ,,bagyślamak" sôzûnden, belki,
Ômûr pida eÿlàp, bagśy bolunÿar.
Ÿagśylyk nem bolup ÿetmekdir teśnà-
Ÿagyś kibi ÿagyp, ÿagśy bolunÿar.
Alkyś altyn śalykmyka, aslynda,
Halas eder ôwrûmlerde azaśsañ.
Gargyś - ,,gar, gyś" diÿmekmikà, aslynda,
Ômrûñi doñdurar oña ÿanaśsañ...
,,Bagtyñ suraty" kitapdan. 134 sah...
Gurbandurdy GELDIÝEW. / Şowhunly söýgini halamaýaryn
Şowhunly söýgini halamaýaryn,
Halamok taryply aý aşyklygny.
Gije gelip örtse Zemine şalyn,
Ýaksa şäherleriň yşyklaryny.
Tukat ýatlamalar güýzüň ümri deý
Kalbymy gaplaýar şeýle bir ümsüm.
Dolan Aýda gyzlyk keşbiň göründi,
Dolan Aýyň jemalyna ymsyndym.
Ýene sämäp gitdi ýaşlyk ýelgini,
Parahat ýürege ýene ot düşýär.
...Ýigitlik ýalňyşýar terk edip seni,
Seni söýüp oglanlygym ýalňyşýar.
Senem dolan Aýa seredip käte,
Gyzlyk ýyllaryňa atýansyň owsun.
Indi düşünýänsiň: bagt diýýän zada,
Söýäniňden söýlüp,
Söýýäni söýseň.
Indi düşünýänsiň.
Indi giç boldy.
Düşünmeli ýyllar alysda galdy.
Şowhunlara pida boldy buýsanjyň,
Yhlasyň höwesiň esgide galdy.
Söýgi–nä, esgi–nä.
Indi duýýansyň
Hem çümýänsiň kä hal ham-hyýallara.
Şol güpbüli, mön ýigdekçä diýýänsiň.
,,Ýör gideli ýalňyşylan ýyllara"
Meniň ol ýyllarda näme körüm bar,
Atamyň habarny alan döwrüm bar,
(Enäniň bagryndan, gelni bozladan
Gysgajyk hatlardan düşen nagram bar)
Delmuran günlem bar
gören görgim bar.
(Bir-ä sen bilýänsiň,birem men bilýän
Ýadyňdamy?) Güpbä seňrik ýygran bar.
Sepil bolup sabyr bilen ýetenim,
Şükür dözmezim bar, bäş inerim bar,
Meniň ol ýyllarda näme körüm bar.
Asla bu gürrüňler nämäme derkar,
Herki zat özüniň wagtynda galsyn.
...Diňe men däldirin Aýa seredýän,
Esgini bagt bilýän diňe sen dälsiň.
Asla bu gürrüňler nämäme derkar,
Her kesiň binýady berkarar bolsun.
Howsala gaplanyp atyrlan daňlar!
Pukaraja yşkym!
Garypja güpbim!
Bir goşgujyk goşdum.
Ýadygär bolsun.
Çeşme: "Mart geler" atly kitabyndan.
1987 ýyl.
14
86
awesome
04.07.2022 00:50
Kemsinme, ezizim,
Kemsinme asla,
Geýýän geýimleriň sadalygyna.
Seni söýgim bilen bagryma basýan,
Melul men gözleriň jadylygyna.
Kemsinme, ezizim, durmuşda häli
Meň kärim utulmak,
Utup bilemok.
Hem käbir işewür adamlar ýaly,
Arzan alyp, gymmat satyp bilemok.
Kemsinme, ezizim, berme gama ýan,
Ir-giç seniň sargydyňy bitirin.
Häzir men bergimi üzmäge barýan,
Soň saňa köýneklik mata getirin.
Maňlaýdan der saçyp,
Dilden dür saçyp,
Işleýärin, baýlygym ýok, pulum ýok.
Ýöne men bir zady aýdaýyn açyk:
Meniň senden başga söýýän gülüm ýok.
Men seni söýýärin,
Söýýärin, ýöne
Söýgi köýnek ýaly geýilýän däldir.
Geýnüwli gelinler, Aý dek gelinler,
Belki, seniň ýaly söýülýän däldir.
Jumanazar ANNAORAZOW
*****
Ine, barýaň umydyňa büdüräp,
Egniň horlugyna utanyp çala.
Uzakda orkestr joşup-titiräp,
Tans edýär owadan gyzlary bile.
Hor ellerňi çykaraňok ýeňiňden,
Olar birden ýere ýetäýjek ýaly.
Geçip barýaň ýigitleriň deňinden,
Gulaga ýakymsyz bir saz mysaly.
Undup bilmän görmeksizje doglanyň,
Ýüregiňde hoş arzuwlar besleýäň.
Geçip barýan bir syratly oglanyň
Mylakatly söz aýdaryn isleýäň.
Emma ýigitleriň öz gaýgysy bar:
Ýörite ýag bilen saçlaryn darap,
Olar wagtdanam ozup barýarlar,
Özlerniň owadan gyzlarna tarap.
Ah, horja gyz, horlugyňdan horlanýaň.
Saňa hoş söz diýjek ýigit nirede?
Bu şäherde näçe diýseň ýigit bar,
Seni öýe ugradanok biri-de.
Gyzlaram ýanyňa delmuryp gelip,
Owadan gülüşip ýüregňe düşýär.
Olar görmegini artdyrjak bolup,
Gezegine seniň bilen tirkeşýär.
Öýe gelýäň. Gyýýar ýüregňi ünjiň,
Hasratdan çekilýär iki owurdyň.
Aglaýarsyň: «Ah, eje jan, nämüçin
Meni beýle betgelişik dogurdyň?»
Emma goňşy gelin — bir görmegeý dul
Atasyz ogluna günäli bakýar.
Hem seniň tersiňe,
Gussa-gam çekýär:
«Owadan dogulma,
Bagtly dogul!»
Aglama, gyz! Uýajygym, gam çekme,
Bilip bolmaz ykbalyňy öňünden,
Bu howlukmaç ýigitlere at dakma.
Kim geçenok öz bagtynyň deňinden.
Käte şeýle bolýar: görkdür-görmek
Gidip otyr il içinde at alyp,
Ýöne, nämüçindir, tylla ýüzük dek
Ýolda,
Gum içinde galýar sadalyk.
Tekepbir bol, çykyp bolmaz gaýa dek.
Sada bol, aýlaryň doguşy ýaly.
Şeýle ýigitler bar, (olar bar entek)
Sen dek gaýalarda olaň hyýaly!
Gurbannazar Ezizow
10
50
awesome
02.07.2022 12:44
Sen ölersiň.
Bu hakykatdan näçeräk habarlydygyňy bilemok, ýöne muny kelläňe sal. Wagt çalt geçýärkä, her sekundyň bugarýarka wagtyňy boş zatlara sarp etme. Okamak isleýän kitaplaryň, görmek isleýän filmleriň we ýazmak isleýän zatlaryň bardyr.
Daş-töweregiňdäki adamlaryň seni aldatmagyna ýol berme.
Olar hiç zady bilenoklar. Olaryň özlerini rahat alyp barmagynyň sebäbi: hiç zady bilmeýänligidir. Erbet tarapy, bilmeýän zatlaryndan habarsyzlygydyr. Senem bilmeýärsiň. Şeýle-de bolsa, sen bu bilmeýäniňi bilýärsiň. Bu seniň tapawudyň. Emma olar beýle däl. Şonuň üçin olara seredip aldanma.
"Mende geň zat barmy? Näme üçin hemmeler beýle bagtly we rahat?" diýme.
Yadyňdan çykarma, sen biynjalyk bolýan adamsyň we bu oňaýsyzlygyň sebäbi bar.
Durmuş, yzyňa bakyp nämäniň bolup geçýändigini synlamak üçin döredilen däldir. Öwrenmeli zatlaryň bar. Öwrenmegiň özi agyr bir prosesdir. Agyrylaryňdan gaçma we öwrenmezligiň öňüni al. Oýlanmaly we ýetmeli köp zat bar. Netijeleriňi galplaşdyrma. Şeýle hem her gezek hakykata ýakynlaşmak üçin wagt gerek. Ömrüň ahyrynda Amerikany öwrenmäge synanyşma.
Ir bilen başla.
Ýol gysga däl. Bu ýol aňsat we bagtdan doly däl. Bu faktlar üçin özüňi taýýarla we ir ýüzbe-ýüz bol. Ejeňi we kakaňy ýitirersiň. Işiňi ýitirersiň we azyndan bir ýyl iş tapyp bilmersiň. Söýgüliň ýa-da ýanýoldaşyň öňküsi ýaly ömrüňizi bile geçirmegi özüne çekiji görmez. Ýollar köplenç aýrylar we käwagt aýrylan sen bolarsyň. Bu işde özüňi ýa-da beýleki tarapy günäkärleme. Durmuşyňa gatnaşanlaryň hemmesi saňa bir zat goşdy. Çykýanlar hakda alada edip wagt ýitirme. Bu adamlardan näme alanyňa we näme berendigiňe düşünüp başla.
Wagtyň gymmatly. Gymmat bahaly hazynany her öňüňden çykana sarp etme. Senem başga biriniň wagtyny bilgeşleýin ýitirme. Eger şeýle edäýseň, başga birine etjek iň erbet zadyň şol boljakdygyny ýadyňdan çykarma.
Ýaz.
Zehinim ýok diýme. Ýazyjy bolmak başga bir zat diýip özüňi pes görme. Ilkinji makalalaryň näderejede erbetdigini bilýän bolsaň, şu wagt özüňi penjireden zyňmalydyň. Penjireden bökmek we ýazmagy dowam etdirmek arasynda karar bermeli bolarsyň. Şeýle bolanda, ýazmagyň has umytly tarapynyň bardygyna düşünersiň. Näçe erbet bolsa-da ýazmagy bes etme.
Başga adamlaryň okamagyna zerurlyk ýok. Ilki bilen muny özüň edersiň. Düşündirip bilmeýän zadyňy düşündirersiň we özüňi bejergä goýarsyň. Ýazsaň, şypa taparsyň we lezzet alarsyň. Düşünip bilmeýän zadyňy ýazyp düşünersiň. Ýazmagyň başga bir güýji bar. Sebäbini bilemok, ýöne onuň kömegi bilen içki dünýä aralaşýarsyň.
Durmuş senarýadyr.
Muny köplenç ýatdan çykararsyň.
Ýaşaýan her günüňi gorky we aladalaryňdan azat etmek üçin meýilleşdirilen mümkinçilikdigini bilip ýaşa. Seni halamaýan we işiňi hemişe kynlaşdyrýan biri bolar. Bu adamyň näme üçin durmuşyňda we saňa öwretmek üçin durmuşyňa goşan zatlary hakda derrew pikirlen. Ony göreniňde, ondan daşlaşma. Munuň tersine, oňa seredeniňde özüňden sora:
"Maňa näme öwretjek bolýarsyň? Näme üçin meniň durmuşymda? "Ýa-da başga biriniň edip bilmejek zadyny etmek üçin sen meniň ýanymdamy?"
Wagty gelende bu adamlara sag bolsun aýdarsyň. Sebäbi seni ösdürip, güýçlendirjekler bu adamlardan çykar. Bu adamlara ýoluň soňuna ýetmänkä ilki bilen sag bolsun aýtmagy maslahat berýärin. Özüň içine çekilen oýnuňy ýigrenip, ýüzbe-ýüz bolup gutaryp bilmersiň. Bularyň hemmesiniň bir oýundygyny ýatdan çykarma we bu oýnuň ýeke-täk maksady seni gowy goragçy etmekdir. Sen tussag. Zynjyrlar aýagyňa urulan, agyr gandallarda we türmede oturan bu diwarlaryňy diňe sen ýeňip geçersiň. Sebäbi diwar seň özüň. Wagty gelende muny ýadyňa salarsyň we düşünersiň.
Içki sesiňi diňle.
Daş-töweregiňdäkileriň hemmesi özünden garaşylýan zatlary ýerine ýetirmäge synanyşarlar. Senem şeýle et. Bu ýer oýun meýdançasydygyny ýadyňdan çykarma. Bu hem oýnuň düzgüni. Oýuny gowy oýna, ýöne kemçilikli oýnaýan bolma. Diňe senden garaşylýan zady däl, isleýän zadyňy hem ýerine ýetir.
Kyn durmuşda doguldyňmy? Seniň şertleriň gaty amatly dälmi? Hemmeler ýaly bir ýerden başlamadyňmy? Munuň hakykatdanam möhümdigini ýatdan çykarma. Maksat ilki ýaryşy gutarmak däl, bu hem tizlik ýaryşy däl. Maksat diňe pellehana çykmak. Bu birnäçe ýüz metrde tamamlanjak ýaryş däl. Bu uzyn marafonda pellehanany görenleriň biri bol. Ýagdaýlaryň nähilidigine seretme. Pes däl-de, beýiklige üns ber. Özüňdäki palçygy däl-de, asmandaky ýyldyzlary nyşana al. Iň beýik daglaryň ýeriň düýbünden ýokary galýandygyny ýatdan çykarma. Bu ýaryşy aşakdan başlamagyň sebäbiniň ýokarsyna ýetmekdigi hemişe ýadyňda bolsun.
Aşyk bol.
Munuň ýaly söýgi filmleri halamok, beýle kitaplary okamok we beýle bolmagy halamok diýme. Mümkinçiligiň we hazynalaryň iň az görülýän ýerlerde bolandygyny ýatdan çykarma. Iň az zyýarat edilýän ýerlere zyýarat et we iň az ýörelen ýollardan ýöre. Iň esasy zat bolsa, içki sesiňi diňle. Sen bu älemiň bir bölegi. Içiňdäki aýdymy diňle we sözleriniň manysyny öwren.
Tans etmegi bil.
Durmuş tans sahnasydyr. Käwagt ol saňa tarap bir ädim äder we bu pursatlarda nädip yza çekilmelidigini bilmeli. Käwagt ol yza çekiler we bu pursatlarda sen nädip öňe tarap ädim ätmelidigini biljek bol. Adamlar köplenç oňa pursat ýa-da şans diýerler. Tans edeniňde, ädim ätmegiň nobadyny bilersiň we gorkmaly dälsiň. Durmuş seni her gün tans etmäge çagyrar, eliňi tutar we sen nädip gowy hyzmatdaşdygyňy höwes bilen görkezmäge synanyş.
Ýaşa.
Dynç almagy meýilleşdir. Seniň aňyň bolsa seni aldatmaga synanyşar. Gitme diýer, indi gezelenje näme gerek bar. Oturan ýeriňde otur-da diýer. Ony diňlemede git. Özüňi bu dynç alyşa, myhmanhana, bu basseýna mynasyp hasapla. Wagtal-wagtal özüňe bu gadyry berjek bol. Durmuşyň saňa sarp edenleriň 2 essesini gaýtaryp berjekdigine ynan.
Bu durmuşy ýaşamak üçin geldiň, ýaşaýan durmuşyňy näletleme. Gudrata şaýat bolmak üçin bu durmuşa geldiň we gudrat sensiň. Bu durmuşy öwrenmäge geldiň, sebäbi sen bilen we bilinen.
Bu durmuşy üýtgetmäge geldiň, sebäbi sen üýtgejek durmuşyň özi.
Bilim bilen gal…
Öz durmuşyň paýhasy bol. Bagt ýazda nädip gülläp, güýzde nädip dökülmelidigini bilmekdir. Paýhas, ýere dökülip gynanmagyň ýerine, indiki ýazda gaýtadan açyljakdygyna begenmegi aňladýar. Dolandyryp bilmeýän zatlaryň hakda alada etmegi bes et. Stoik üýtgedip bilmeýän zatlaryna gynanmaýar, sebäbi dolandyryp biljek zady ýok. Tebigatynyň öňünde ýene özüni tapýar. Başga birine garşy söweşýärin öýdýän bolsaň-da, özüňe garşy söweş yglan edýärsiň we ýeňdim diýen söweşleriňde utulýarsyň. Pikirleriňi türmeden çykar. Unutma, bu durmuşda ýitirmek ýok, yzyna bermek bardyr!
6
59
awesome
01.07.2022 21:05
Bu hatyň nireden we kimden gelendigi belli däl. Ony maňa Ýazyjylar soýuzynda goýup gidipdirler.
Hatda şeýle diýilýärdi: "Geçen asyrlaryň şahyrlary (Magtymguly-Pyragy, Durdy şahyr, Magrupy, Oraz han we beýlekiler) biri-birleri bilen sowal-jogap aýdyşypdyrlar. Şol aýdyşyklar okyjy köpçüliginiň arasynda uly hormatdan, islegden peýdalanýar. Emma biziň döwrümiziň şahyrlary näme üçindir şeýle goşgulary ýazmaýarlar. Şol häsiýetli goşgulary-da döwrümiziň hajatlaryna hyzmat etdirip bolardy ahbeti... Özüme gezek gelende, men şo zeýilli goşgular bilen hetdenaşa gyzyklanýaryn, olaryň hemmesini ýatdan bilýärin. Özüm goşgy ýazamok. Ýazsam-da diňe özüm üçin ýazýaryn, redaksiýalara azar berip ýörmeýärin... Şu aşakdaky goşguly sowallaryň ýetmez ýerlerini düzedişdirip, olara jogap bermegiňizi hem-de mümkin bolsa mawy ekranda okamagyňyzy haýyş edýärin..."
Hatyň soňunda gol deregine başbuh A.B. diýlip ýazylypdyr. Megerem, baş buhgalter diýildigi bolsa gerek.
Elbetde, beýle häsiýetli goşgulary hiç haçan ýazmandygym, asla ýazjak-da bolmandygym üçin ýa-da başga bir sebäpdenmi - bu hat arhiwimiň içinde esli wagtlap ýatypdyr... Arada başga bir kagyzymy gözläp ýörkäm, ol hat ýaňadandan meniň elime düşdi we bu gezek näme üçindir jogap ýazmaga höwes döretdi.
- O nämedir, şo bolmasa gülki ýok?
Şahyr bolsaň, jogap tapmak borjuňdyr.
O nämedir, görki bar-da reňki ýok?
Şahyr bolsaň, jogap tapmak borjuňdyr.
- Agzybirlik - şo bolmasa gülki ýok.
Başarşymça jogap bermek borjumdyr.
Ol mähirdir, görki bar-da reňki ýok.
Aňlaýşymça jogap bermek borjumdyr.
- O nämedir, ygtybarly galadyr?
O nämedir, başa gelen beladyr?
Ol ne gudrat, mis hem bolsa tylladyr?
Şahyr bolsaň, jogap tapmak borjuňdyr.
- Sowet ýurdy ygtybarly galadyr.
Jeňparazlar başa gelen beladyr.
Halal gazanç - mis hem bolsa tylladyr.
Başarşymça jogap bermek borjumdyr.
- O nämedir, her gün ýola bakdyrar?
Kä agladar, kä şatlykdan bödürer?
O nämedir, ýygnanyňy dökdürer?
Şahyr bolsaň, jogap tapmak borjuňdyr.
- Ol poçtadyr, her gün ýola bakdyrar.
Kä agladar, kä şatlykdan bökdürer.
Haramhorlyk ýygnanyňy dökdürer.
Başarşymça jogap bermek borjumdyr.
- Ol kim bolar, ynsanlaryň belendi,
(Belentligi, wah, gijiräk bilindi)?
O nämedir bir söz bilen bulandy?
Şahyr bolsaň, jogap tapmak borjuňdyr.
- Ol enedir, ynsanlaryň belendi.
(Belentligi ölenden soň bilindi).
Ol ýürekdir, bir söz bilen bulandy.
Başarşymça jogap bermek borjumdyr.
- O nämedir, ömürbaky ölme ýok?
O nämedir, hemmesini bilme ýok?
Ol kim bolar, dili bar-da kelle ýok?
Şahyr bolsaň, jogap tapmak borjuňdyr.
- Ol abraýdyr, ömürbaky ölme ýok.
Ol ylymdyr, hemmesini bilme ýok.
Ol serhoşdyr, dili bar-da kelle ýok.
Başarşymça jogap bermek borjumdyr.
- Ol kim bolar, arzuw bilen ýetiler?
Bir aý geçip-geçmän demiň tutular.
O nämedir, bir söz aýtsaň gutular?
Şahyr bolsaň, jogap tapmak borjuňdyr.
- Ol gelindir, arzuw bilen ýetiler,
Käte bir aý geçmän demiň tutular.
Ol göwündir, hoş söz aýtsaň gutular.
Başarşymça jogap bermek borjumdyr.
- Ol kim bolar, seň mähriňden emen zat,
Soň tomzak dek emenini gömen zat?
O nämedir, dünýäde iň ýaman zat?
Şahyr bolsaň, jogap tapmak borjuňdyr.
- Şägirtler bar, seň mähriňden emen zat,
Soň tomzak dek emenini gömen zat.
Ol töhmetdir, dünýäde iň ýaman zat.
Saýgarşymça jogap bermek borjumdyr.
- Ol kim - ne-hä ataň, ne ejeň ogly,
Ygtyýary başga birine bagly?
Ol kimiň ogluka ýa kimiň guly?
Şahyr bolsaň, jogap tapmak borjuňdyr.
- Biweçler - ne ataň, ne ejeň ogly,
Ähli erki "saçlak" birine bagly.
Hem-ä şonuň ogly, hem şonuň guly.
Synlaýşymça jogap bermek borjumdyr.
- Ol kim bolar, içi doly garaňky,
Käte daşyna-da çykar reňki?
Ol kim bolar hem özgäňki hem seňki?
Şahyr bolsaň, jogap tapmak borjuňdyr.
- Ol göripdir, içi doly garaňky,
Käte daşyna-da çykar reňki.
Ol gyzyňdyr, hem özgäňki hem seňki.
Oýlanşymça jogap bermek borjumdyr.
- Ol ne myhman, gonup geçer bir gezek?
Onsoň gelmez çagyrsaň-da müň gezek.
Kim ol däli - oňa diňe sen gerek?
Şahyr bolsaň, jogap tapmak borjuňdyr.
- Ol ömürdir, gonup geçer bir gezek.
Onsoň gelmez çagyrsaň-da müň gezek.
Ol aşykdyr - oňa diňe sen gerek.
Aňlaýşymça jogap bermek borjumdyr.
- O näme, gyz üçin iň gerekli zat?
O näme, dünýäde iň görmekli zat?
O nedir, gözleri gara äýnekli zat?
Şahyr bolsaň, jogap tapmak borjuňdyr.
- Ol uýat, gyz üçin iň gerekli zat.
Ol edep, dünýäde iň görmekli zat.
Ol aldaw - gözleri gara äýnekli zat.
Oňarşymça jogap bermek borjumdyr.
- Ol kimdir, dünýäde iň bagtly oglan?
Ol kimdir, dünýäde iň betbagt dogan?
Ol kimdir, her säher gül bolup doglan?
Şahyr bolsaň, jogap tapmak borjuňdyr.
- Gyz uýaly oglan - iň bagtly oglan.
Uýa sansyz bolsa - betbagtdyr dogan.
Tämiz gyz her säher gül bolup doglar.
Düşünşimçe jogap bermek borjumdyr.
- O näme, taňry hem dilinde sena?
O näme, kast etseň - ýumrular dünýä?
O ne iş, dünýäde iň elhenç günä?
Aşyk bolsaň, jogap tapmak borjuňdyr.
- Ol Söýgi, Allaň hem dilinde sena.
Söýýäne kast etseň - ýumrular dünýä.
Söýgä böwet bolmak - iň elhenç günä.
Öwrenşimçe jogap bermek borjumdyr.
- Bir gyzyň yşkynda örtenip oda,
Söýeniňiz çynmy? Ýalanmy ýa-da?
Şoňa meňzeş gyz duşdumy dünýäde?
Şahyr bolsaň, jogap bermek borjuňdyr.
- Murgapda duşupdyp gara gözüne,
Lebapda duşupdym güler ýüzüne,
Şabatda sataşdym şirin sözüne,
Kaspide sataşdym täsin näzine.
Paýtagtda sataşdym körpe gyzyna -
Emma bir göwrede tutuş özüne
Sataşmanym habar bermek borjumdyr.
- Iň soňky haýyşym, etseňiz gaýrat:
Erbet zat köpmükä ýa-da ýagşy zat?
Şu sowaly çözmek düşenok aňsat!
Şahyr bolsaň, jogap tapmak borjuňdyr.
- Sowal sizden bolsun, bizdenem gaýrat.
Köpdi, köpdür erbet zatdan ýagşy zat.
Ýogsa dünýä birçak bolardy berbat.
Ynanşymça jogap bermek borjumdyr.
- Şahyrym, bereýin ýene bir sowal:
Dünýäde kim köpkä - erkekmi, aýal?
Şonam aýtsaň, başga sowal berjek däl.
Şahyr bolsaň, jogap tapmak borjuňdyr.
- Bir dana diýipdir: "Aýal-a aýal,
Aýalyň gepine gidýänem aýal".
Emma men ol sözi gaýtalajak däl,
Täzeçeräk jogap tapmak borjumdyr:
Il-güne ýaýrapdyr şeýle bir gürrüň:
Kä ärden aýallar merdräk bu gün.
Çotuň kakyp, özüň hasaplap görgün,
Başbuh bolsaň, jemin tapmak borjuňdyr.
Düzedişleri köpräk girizendigimi, goý awtor bagyşlasyn. Men ony sowallyň-da, jogaplaryň-da edebi derejesiniň deňräk bolmagy üçin şeýtmäge mejbur boldum.
Kerim GURBANNEPESOW
10
57
awesome
30.06.2022 21:27
GEÇMIŞDEN BIR SAHYPA
Ine, uç-gyraksyz söweş meýdany,
Gidipdir agyr jeň kyrk gije-gündiz.
Heniz siňmändirem pidalaň gany,
Kyrk günüň tozanam ýatmandyr şindiz.
Sowap ýetişmändir sansyz jesetler,
Lüt bolan Ezraýyl dynç alyp otyr...
Ýap-ýaňy bir-birin parçalan jetler,
Indem bir-birini gujaklap ýatyr.
Naýza yrgyldap dur näçe gursakda,
Näçe kükrekde-de gögeren peýkam.
Bu «gazy» bolmadyk «şehitler» hakda
Gadym aýdymyna hiňlenýä şeýtan.
Namart garaguşlar heşelle kakýa:
«Rysgymyzy ýetirip dur Ýaradan».
Öz halal awy deý arkaýyn çokýa
Öñ jan çykyp, soň gan çykan ýaradan.
Eýmenç owaz bilen haýkyrýa atlar,
Akyl käsesi deý gözlerde — düwme.
Saralmanka gyzarypdyr gök otlar
Bir sapar çeýnän at on sapar düwner.
Nägile ene deý çytylýa asman,
Ýere ýyldyzlardan salam aýdanok.
... Bu meýdany synlap, hiç ýerde asla ;
Diri adam galandyram öýdeňok...
A başga meýdanda, başga bir ýerde,
At toýnagy elendirýä topragy.
Tutýa günüň öňün bir gara perde,
Bialaç möňňürýä ýöriş-depregi...
Şiraly NURMYRADOW
7
62
awesome
30.06.2022 00:02
Depder sahypasyndaky ýazgylar
DEPDER SAHYPASYNDAKY ÝAZGYLAR
Eziz okyjym! Men bu kitapçany kyrk ýylyň dowamynda ýazdym. Bular meniň pikirlerim... Oýlarym... Başymdan geçirenlerim... Olar armanly,
joşgunly, duýguly, käbirleri gülküli ýazgylar. Netijelerim... Aslynda, olaryň her birinden aýratyn bir eser döretse-de bolardy... Men bulary uzak oýlara çümüp ýazdym. Haýyşym, siz hem ýazgylary howlukmazdan, oýlanyp okasaňyz...
(Ötgür Haşymow)
Ýazyja obanyň kalby, şäheriň akyly gerek.
***
Çeper döredijilik şeýlekin daragt, onuň şahalarynda umumadamzat miweleri ýetişýär, köki bolsa millilige siňýär.
***
Ýazyjy haýsy dilde eser ýazsa, şol halkyň ýazyjysy hasaplanýar. Muňa milletiň baglanyşygy ýok.
***
«Ýazyjylyk — iki göterim zehin, togsan sekiz göterim zähmet» diýleni hakykat bolsa, dünýädäki garynjalaryň ählisi ýazyjy bolardy!
***
Hakyky deňizçi ummanda özüni näçe erkin duýýan bolsa, hakyky ýazyjy hem sözler ummanynda şonça erkin ýüzmeli. Dört jümle ýazyp, dowamyna söz tapyp bilmeýänden ýazyjy çykmaz.
***
Azap çekilip ýazylan eser rahatlyk bilen okalýar.
***
Göz öňüne getiriň: siz şekillendiriş sungaty muzeýine girdiňiz. Diwarlyklardaky şekilleri, suratlary, dürli keşpleri öz gözüňiz bilen görüp, täsin duýgulary başdan geçirýärsiňiz.
Göz öňüne getiriň: siz saz diňleýärsiňiz. Ýakymly heňi, aýdymçynyň misli jadylaýjy owazyny diňläp, ýenede duýgular ummanyny gulaçlaýarsyňyz.
Indi göz öňüne getiriň: siz kitap okaýarsyňyz. Ak kagyzda gara harplardan başga hiç zat ýok, hiç kim saz hem çalanok. Emma eseri okamaga girişeniňizden, üýtgeşik peýzaž göz öňüňizde janlanýar. Sizi söz bilen beýan ederden ejiz duýgular gaplap alýar...
...Muňa hiç hili şekşübhe ýok, çeper edebiýat — dünýädäki sekizinji gudrat!
***
Öz halky tanamaýan, öz halkynyň söýgüsini gazanyp bilmedik ýazyjyny dünýä okyjylarynyň söýüp biljekdigine ynanmaýaryn.
***
Kagyzyň aklygy üçin oňa söz ýazýarlar. Kagyz päk bolany üçin oňa zerre ýalyjak uçgunjyk düşsede, ýanyp gidýär.
Ýazyjy bolmak üçin diňe zehiniň özi bärden gaýdýar. Kalby kagyz deý ak, kagyz deý alawly ýanýan adamdan hakyky ýazyjy kemala geler.
***
Il arasynda: «Şahyr her günde bir goşgy ýazmaly, ýazyjy her günde bir sahypany boýun egdirmeli» diýen gürrüňler bar. Hakykatdanda, tikinçi her günde bir gowy köýnek tikip biler. Aşpez her günde bir gazan tagamly nahar bişirer. Çörekçi her günde bir tamdyr çörek ýapar. Şeýle bolansoň, şahyr näme üçin bir günde bir goşgy ýazmaly dälmiş?!
Aslyýetinde, tikinçi dükandan taýýar mata alyp, taýýar biçüw bilen köýnek tikýär. Aşpez bazardan taýýar önümleri alyp, taýýar gazanda nahar bişirýär. Çörekçi taýýar un alyp, taýýar tamdyrda çörek ýapýar...
Döredijilik adamsy bolsa, ol isle ýazyjy bolsun, islede şahyr, «mata» bilen «biçüwi», «önüm» bilen «gazany», «un» bilen «tamdyry» hem özi ýaradýar. Munuň üçin ylahy zehin, ylham gerek!
***
Ýazyjy özüniň hemme duýgularyny ýekmeýek kagyza geçirip bilmez. Kitaphon kagyzdakylaryň hemmesini duýup bilmez. Şonuň üçinde, ýazyjynyň duýgusy okyjynyňkydan on esse güýçli.
Okaýan eseriňiz sizi çalaja ýylgyrtsa pugta belläň, ýazyjy şol sahypany joşup, gülüp ýazandyr. Kitap okanyňyzda, gözüňize bir katra ýaş gelse, ýazyjy şol sahypany aglap ýazandyr.
***
Çeper eser misli bina mysaly. Bir tapawudy: bina kerpiçden gurulýar, eser sözden. Indi bir zady göz öňüne getiriň: gurlan binadan ýekeje kerpiji
sogursaňyz, onuň görküne zelel ýetýär. On sany syny sogursaňyz, binadan derek galmaz...
Şeýle bir eserler bar, bütin-bütin jümleleri aýyrsaňyzda, ýüz sözi öçürseňizde, müňüsiniň ornuny çalyşsaňyzda, hiç zat özgermeýär... Beýle eser «bina» dälde, harabadyr.
***
Zehinsiz ýazyjyny towuga meňzetmek mümkin. Ýumurtgasy hoz ýalydyr welin, käkeläp çar künjege beleň berer.
***
Döredijilik — ýüz metrlik aralygy ylgap geçmek ýaryşy däl. Döredijilik — uzak we muşak gatly ýol.
***
Bir kärdeşim derdindi:
— Bu günki okyjy sowatsyz eken. Meniň gadyryma ýetjekler ýene ýüz ýyldan doglar.
Men göwünlik berdim:
— Dogry aýdýaňyz... Ýöne ony notarial edarada tassykladyp, polat sandykda saklamak gerek. Ýüz ýyldan soň sözüňize şaýadyň tapyljagy gümana...
***
Iki sany adalatly eminiň — Okyjynyň we Wagtyň synagyndan geçen esere hakyky eser diýse bolar.
***
Ol üç perzendi bilen ýanýoldaşyny taşlap gitdide, «Balalaryň bagtyny oýla!» diýip, şygyr ýazdy.
Nähili gaýratlylyk!
***
«Edebiýat atomdan güýçli, onuň güýjüni odun döwmäge sarp etmezlik gerek!».
Ýazyjy-şahyrlar özleriniň döredijiliginde beýik özbek ýazyjysy Abdylla Kahharyň şu sözlerini ýörelge edinseler, tüýs jüpüne düşerdi.
Edebiýatçylar bolsa halypamyz Ozod Şarafiddinowyň aşakdaky jümlesini özlerine şygar edinsediler...
«...Tankytçy döredijilik bagyna palta bilen dälde, gaýçy bilen girmeli!».
***
Daýhanyň tejribesi artdygyça, ýumşy ýeňilleşýär, bol hasyl alýar. Binagäriň tejribesi artdygyça, ýumşy ýeňilleşýär, owadan ymaratlar gurýar. Hirurgyň tejribesi artdygyça, ýumşy ýeňilleşýär, operasiýalary şowly geçýär.
Döredijilik adamsynyň tejribesi artdygyça, ýumşy agyrlaşýar. Çünki onuň özüni tekrarlamaga haky ýok!
***
Hakykat howa çalymdaş: reňkini görmersiňiz, owazyny eşitmersiňiz, ysyny duýmarsyňyz... Emma az salym howasyz galsaňyz, boglup başlarsyňyz. Bu kitap babatynda-da şeýle: ýalana duş gelen okyjy howasyz galar.
***
Zehinli ýazyjy ýyldyza meňzeýär: her bir ýyldyzyň öz düzümi bolýar. Ýyldyzlar biribirini inkär etmeýärler, biribiriniň düzüminede girmeýärler.
***
— Zehinsiz zehinsizi halamasa nähili bolar?
— Hiç zat bolmaz!
— Zehinsiz zehinlini halamasa?..
— Hiç zat bolmaz!
— Zehinli zehinsizi?..
— Hiç zat bolmaz!
— A zehinli zehinlini halamasa neneň bolar?
***
Ol ýabany güllerdendi: sährada doguldy. Baharyň ýagmyryna ýerden dömüp, ýagty älemi gördi. Ýaprak çykardy. Emma... Gurakçylyk başlandy-da, ýer daş deý gatady. Ol bir gysyma öwrülip, saralyp-solup ugrady. Üstesinede, ol nähilidir bir jandara azyk bolup, asla toprakdan saýlanmady...
Awara ýeller öwüsdi, tupan turdy. Gar ýagdy... emma ol diridi!
Ýene bahar geldi. Ýaz ýagyşlary ýagdy. Ol täze güýç bilen başyny galdyrdy. Özüni tutup, ýene-de gol ýaýradyp ugrady. Gunça açdy. Alaw parçasy ýaly ýalawlap, göreniň gözüni egledi. Şonda... Ony göçürip getirdilerde, gymmatbaha güldana salyp, öýüň töründen ýer berdiler. Neneň
ajaýyp! Hiç hili gurakçylyk ýok. Şemal bedenini galdyradanok. Başyna gar ýaganok... Hemmeler oňa guwanyp bakýar. Ýöne... Näme üçindir, ol indi ösmesini bes etdi. Aradan gün geçdi... Hepde geçdi... Aý geçdi...
...Ony alagada zyňdylarda, gymmatbaha güldana başga gül getirdiler...
***
Palta bilen galam biri-birine meňzeş gurallar däl, emma wezipeleri çalymdaş.
Palta: odunçynyň golunda zähmet guraly, hünärmendiň golunda senet guraly.
Galam: sowatlynyň golunda zähmet guraly, ýazyjynyň golunda senet guraly.
***
Gadymy himikler gyzylyň saplygyny barlamak üçin mähekdaş ulanypdyrlar. Ýazyjynyň sözüni mähege meňzedeliň: bir jümle hakykaty beýan etse, müňleriň alkyşyny alýar, bir jümle ýalany üçin müňleriň gargyşyna galýar...
Ýazyjynyň ulug bagty hem, ulug bagtsyzlygy hem şonda!
***
Mekdep mugallymynyň sözi otuz okuwça ýetýär. Uniwersitetiň mugallymynyň sözi ýüz talyba ýetýär. Nutukçynyň sözi müň diňleýjä ýetýär. Ýazyjynyň sözi bir ýola on müň, ýüz müň okyja ýetip barýar. Diýmek, onuň söz ussatlygyda, özgeleriňkiden müň esse artyk bolmaly.
***
Talantsyzlar ýowuz niýetde biri-biri bilen birleşýän ekenler. Talantlylaryň hem ýagşy niýetde birleşmegi zerur.
***
Ulug zehin owal halkyň ünsüni çekmegi başarmaly, soňra halkyň söýgüsini we halkyň ynamyny gazanmaly. Aslynda, şu üç tapgyryň her biri bir ömre deň...
Özbek ýazyjysy: Ötgür HAŞYMOW
Özbek dilinden terjime eden: Atamyrat ÝAZWELIÝEW
6
48
awesome
29.06.2022 09:22
AÝRALYK MUKAMY
Tamdyraň agysy, gyjagyň zary —
Ine, maňa bar ýeten zat Watandan.
Gowy dälmi ýat ülkede erkinlik
Öz iliňde gözenekde ýatandan?!
Ýa gabyrda ýatandan,
Ýa dereksiz ýitenden...
Aç ölen ýagşy dälmi
Mertebäňi satandan?!
Utulan gowy dälmi
Haram oýnap utandan?!
Tamdyraň agysy, gyjagyň zary —
Dogduk mekanymdan maňa ýeten paý.
Ýeriň ol ujuna zyňsa-da ykbal,
Gursagymda — Watan, depämde — Hudaý.
Gara dagyň gaýasy,
Ak sähranyň düýesi,
Garagumuň towşany,
Köpetdagyň ýowşany,
Atlaň haýkyrýan sesi,
Ömrüň düýni, ertesi
(Şu güni, şu wagty däl,
Düýni bilen ertesi).
Gelin deý tebigatyň
Ýaşyl mahmal kürtesi,
Dogan-gardaş, dost-u-ýar,
Maňa garaşýan diýar...
Baryny jemländir bu goşa senet,
Bu goşa gudratyň zoruna seret!
Sag bolsaň däliretjek,
Däli bolsaň sagaltjak,
Aýyrjak, dert az bolsa,
Köp bolsa hasam artjak.
Sazy gulak däl-de, gursak diňleýär,
Sazy ýürek çalýar, barmak çalanok.
Erkek bolsaň, aglamagam gelşiksiz,
Adam bolsaň, aglamanam bolanok...
Şiraly NURMYRADOW
5
45
awesome
29.06.2022 06:25
"Ýekeje haýyşym: ölmejek boluň!"
"At üstünde eşek gördüm,
Namys ýüzün aşak gördüm."
(Täze nakyl)
Men size hiç haçan sögmerin paýyş,
Men sizden hiç zady etmerin haýyş,
Men sizden hiç haçan hiç zat dilemen,
Köçäňizden ýöräp baýdak bulaman,
Ne dilärin sizden bir döwüm çörek,
Ne dilärin sizden bir käse arak,
Ne-de sogan ysgamana yzyndan,
Derýa topugymdan, deňiz dyzymdan.
Saýraň!
Haýyş etmen gapylarňyzy,
Haýbatly, haşamly gapylarňyzy
Kakmana hiç haçan uzamaz elim,
Çünki meň elimden has uzyn dilim.
Duz ýerne ulanyp maňlaýmyň şorun,
Men sizi bimaza etmejek borun.
Akja penjäňizden akdyryp ýagy,
Palaw iýýäkäňiz Gully han ýaly,
Işigňizden Artyk bolup barmaryn,
Keýpiňizem, işdäňizem bozmaryn.
Depeläp bimahal ýorgan-düşegňiz,
Girew alyp ýörmen oglan-uşagňyz.
Ýaragy dolduryp gara gülleden,
Siziň ýoluňyzam garawullaman.
Azajyk garaşyň, ýygnaýançam güýç,
Topulardan irräk, bukulardan giç.
Häzirlikçe gözün baglap neslimiň,
Dowam ediberiň şagal mesligin.
"Ýerden tapsaň sanap al" diýp nakyl bar.
Sanamasaň, soň tumşugňa kakylýar.
Ýerden-ä däl, garyp iliň elinden
Gaňryplar alýaňyz, çekip dilinden.
Ýaman ýüwrük, ýagşy eli hasaly.
Alan bilmez, beren biler hasaby.
Men sizden hiç haçan hiç zat dilemen.
Sizden haraý isläp, telpek bulaman.
Düşüniň, men size haýbat atamok,
Bir ünjim bar: gijelerne ýatamok.
Behişt gülün çirtip, gunçasyn ýoluň,
Ýekeje haýyşym: ölmejek boluň!
Şiraly NURMYRADOW
4
88
awesome
29.06.2022 00:16
Mynajat
Eger, bir ýaman söz sypsa dilimden,
Alla jan, sen mendan etme aýyp-syn.
Çünki, bu dünýäde gören-eşdenmi
Paýyş söz agzaman beýan etmek kyn.
Sen — Hudaý isleseň, islemeseňem,
Menem, özüň bilýäň, ýazykly bende.
Emma mundan beýläk sejde kylmaga
Jinnek ýalam takat galmandy mende.
Sebäbi bäş ýyl öň, gyşyň bir güni,
Hak söz üçin tyg urdular bedenme.
Sen Hudaý halyňa utanmadyňmy
Meni şol günlere duçar edenňe?
Kisäm kör-köpüksiz, ýat dilde gepläp,
Kömek sorap ýada boldum hemşeri.
Bir gögele oglan on sekiz ýaşly
Huzuryňda durmanmydym kemşerip?
Başym ýaşdy, ýagşy pälimden başga,
Ýokdy meniň ýaşamaga serişdäm.
Niredediň şonda, Gudraty güýçli,
Nirededi on müň sany perişdäň?
Men soňra kem-kemden içgä imrindim,
Höwes etdim zährimanly bokala.
Elbetde, şol günleň ajysy hakda
Ýazyp bordy kitap ýa-da makala.
Emma men ýazmadym, elim degmedi,
Ile diýmäge-de barmady dilim.
Ýeri, diýdimem-dä, peýdasy näme?
İç kimem kireýsiz kakmaýar kilim.
Dogry içen wagtym teselli tapýan,
Ýöne uzak çydap bilmen beýdibem.
Aý, näm bolsam, şol bolaýyn, owarram,
It çeýnesin, garga çoksun meýdimem.
Barybir, ynamsyz ömür sürenden
Ile meňzeş bolup ölenim ýegdir.
...Her niçigem bolsa, unutmaryn men,
Nämüçin sen meniň göwnüme degdiň!?
Çary Ýegenmyradow
7
118
awesome
28.06.2022 15:41
DÖRTLEMELER, RUBAGYLAR
• Durmuşyň ýoly
Kimse barýar ot göterip bu ýoldan,
Kimse ýeke gysym kül alyp barýar.
Kim ýarag göterýär ýagşy net bilen,
Kim gara päl bilen gül alyp barýar.
* * *
Ýyllar gurçuk deýin barsa-da süýşüp,
Ömür gülle kimin sygyryp geçýär.
Durmuş meýin äwmän owurtlan adam
Ajalyň badasyn bir demde içýär.
* * *
“It üýrer — diýipdirler — kerwenem geçer”,
Ondan bäri üýtgäp gitdi bu dünýä.
Ne-hä itiň sesi gelýär alysdan,
Ne yranyp barýan kerwen görünýär.
* * *
• Türkmeni gepletme
Häkimiýet nyrh kesdi, geçmedim sana,
Ýürejigmi çöwrüp başa geýdiler.
Öz öýümde döndürdiler myhmana,
Myhmanhana bardym — “Ýer ýok” diýdiler.
* * *
Gutarýan alada sataşmadym hiç,
Birem gutarmaýan pula duşmadym.
Täze dörän gul bazarna aýlanyp,
Azatlyk isleýän gula duşmadym.
* * *
Bilebilmen, ne döw çaldy türkmene,
Argyşdan gelen dek süýnüp ýatyr ol.
Için hümledip ýör ýeke-ýekeden,
Üýşürseňem, el çarpyşyp otyr ol.
* * *
Bu ne asyr, rahat oturan ilden
Janhowluna urnup ýören bosgun kän.
Bu ne döwür, duşmanyň köp dirikäň,
Ne zamana, öleňden soň dostuň kän.
* * *
Bäş wagtyna eglip galan türkmenim,
Näme beýle egildiň-de, galmadyň?!
Ýasda aglap, toýda gülen türkmenim,
Ähli günüň ýas boldy-la, gülmediň.
* * *
Gör, kime şam boldy baýlygyň-aşyň,
Galdyr ýüzüň, gara töwerek daşyň.
Diňe ar-namys diýp goýupdyň başyň,
Nätjek, bu gün namysdanam ölmediň.
* * *
Öleýin diýib-ä ölüp bolmasa,
Ýaşaýyn diýibem, ýaşap bolmasa,
Eýsem öljek bolup ýaşamalymy
Ýa ýaşajak bolup, öläýmelimi?!
* * *
Bogýar meni ak berýozaň tokaýy,
Huşumda, düýşümde ýowşanly meýdan.
Indi diňe ýere bakyp gezýän men,
Bilip gökden maňa ýokdugyn peýdaň.
* * *
Gara garga ýerde poh dörjeläp ýör,
Al-asmanda aşyr atýar kepderi.
Pohy dörmeg-ä däl, iýseňem bolýar,
Soňra ýazaýmaly toba depderi.
* * *
Ähli kişi düşünmese bir zada,
Bir kişi bar zady bilýän bolmaly.
Ýurduň içi agy bolsa durşuna,
Hol ýokarda biri gülýän bolmaly.
* * *
Hasap ýitdi: at känmi ýa eşek kän?
Eýeriň gaňňadan tapawudy ýok.
Dirikäň bolanok gybat eşitmän,
Öleňsoň öwgini eşdip bolanok.
* * *
Kimiň ýüki namys, wah, ýöne gedaý.
Kim wyždana gedaý, ýöne deýýus baý.
Berjek bolsaň garyba-da ber bir zat,
Baý doýar, dirä garaşma, Hudaý!
* * *
Bolmaýar Watanyň uly-kiçisi,
Ilin terk edene giň jahan dardyr.
Bir ýat ülkäň bilbilinden irenler
Aňňyrýan eşegiň sesine zardyr.
* * *
Adamlaň deň ýary kitaphanada,
Galan ýary meýhanada meý içýär.
Bir-birin görende iki tarapam
“Heý, betbagt” diýip, gynanyp geçýär.
* * *
Bir düşnükli sözüň ýeterlik wagty
Kime gerekmişin ullakan eser?!
Kämahal näz bilen towlanan zülpüň
Täsiri aýalyň özünden ýeser.
* * *
• Mazar daşyna mynasyp ýazgy
Günde bäş wagtyna namaz deregne
Bäş ömür ýaşaýjak dek bir egne,
Bäş şaýyň ugrunda zorladym jany,
Giç tanadym, bäş günlükmiş bu pany.
* * *
• Gelin we şahyr
— Garrap ýörmüň, çöküp ýörmi göwünler,
Soňky wagtlar söýgi hakda ýazaňok.
— Belki-de şeýledir, ýöne bu günler
Söýşüp ýörün, goşga elim degenok.
* * *
Eý, ýa Taňrym, ne beýle biz türkana,
Ýaraňjaňlyk edip bir köwekhana,
Ne ýatyrdyk merhumlary arkaýyn,
Ne ýaşatdyk dirileri erkana.
* * *
Durmuş sapagynyň bolmaz artygy,
Pelek — elek, saýlar çäji-harpygy.
Daş ýaly ýumrukdan gaty bor eken
Halal gazanylan aýal şarpygy.
* * *
Hiç kim bolsaň, hiç kim gujak gerenok,
Garyp bolsaň, algylyňam berenok.
Türkmeniň-ä sesi ýetenok Taňra,
Taňryňam türkmeni gözi görenok.
* * *
Bu ne millet, bir-birinden ürkmeli,
Ýüzüňe ýylgyryp, awy pürkmeli.
It uruş diýerdiň ozallar, türkmen,
Indi itler uruşdyrýar türkmeni.
Şiraly NURMYRADOW
7
88
