Tayler
15.09.2024 13:56
Ýagyşly säher
Şybyr-şybyr ýagyş ýagdy bu säher,
Ýada salyp geçen bahar aýdanňy.
Duýdum damjalaryň tolgunşyn synlap,
Ýaňja seniň keşbiň görüp gaýdanny.
Meňzeş gördüm bu damjalaň her birin –
Seniň yşkyň salnan düwünçejige.
Çalymdaş olaryň şabyrdysy-da
Meniň şat-şadyýan göwün sesime.
Synlap durun kalby nuruna ýuwup,
Kümüş dürleň gökden täsin dökülşin.
Bu ömürde bolan-boljak zatlara
Ne-hä howsalam bar,
ne-de ökünjim.
Asyl, dünýe döräp, gussa-gam, arman
Hiç bolmadyk ýaly,
bolmajak ýaly...
Göwnüňe, göwün deý açylan güller
Müň aňzak gelse-de, solmajak ýaly.
Adamlar hiç haçan ölmejek ýaly...
Bar zat, bar zat... häzir şeýle eziz-le.
Sen bar, men bar
hem tans edýän ýagyşlar...
Ýüregi suwluja bu giň Zeminde...
Kakamyrat Rejebow
14
140
Tayler
13.09.2024 18:33
1. Toýda tamada gürleýâr:
- Gadyrly toýa gelen myhmanlar! Durmuşa çykýan gyzymyzyň öňki söýgülisiniň klasdaşlarynyň islegi boýunça lezginka tans sazlary bilen toýumyzy dowam edýâris!
2. Sudýa:
- Günâkârlenýân! Siz nâme üçin satyjynyň kellesine daş bilen urup deşdiňiz?
Günâkârlenýân:
- Ol daş dâl. Ol onuň sweži diýip satýan bulkasy!
3.Çaga daýhan kakasyna ýüzlenýâr:
- Kaka nâme üçin liliputlaryň boýy kiçi bolýar?
- Azody ýetenok!
4. - Çopan geçiniň sakgaly hany?
- Sy:rdym. Ol entek çebiş ahyry!
5. - Sen öýüňde gaplaň saklaýarsyň diýýârler. Şol çynmy?
- Hawa. Ýöne, ol şuwagt atasy öýüne gitdi!
6.Ýaş ýigit gyza sowgat bermekçi bolýar:
-Ezizim sen haýsy güli halaýaň?
-Günebakary!
- O nâ?
- Oň çigidini çigitlâp bolýar!
7. Obaň içindâki bir howla uçýan tarelka gonupdyr. Onuň içinden üýtgeşik - üýtgeşik jandarlar çykypdyr. Öý eýesi ýüregi ýarylara gelip zordan olaryň ýanyna barypdyr:
- Siz kim bolarsyňyz?
- Biz başga planetadan geldik. Elimizden gelmeýân zat ýok. Nâme isleseň bitirip bilýâs. Ýöne bir şert bilen: eger sen bir zat dileseň goňşyňa ikisini berýâs. Aýdaly, sen bir jaý dileseň goňşyňa iki jaý berýâs, sen iki maşyn dileseň, goňşyň iki maşyny bolar.
- Hmm... - diýip öý eýesi birsellem böwrüni diňlâpdir. - Beýle bolsa onda siz meniň bir gözümi alaýyň!
8.Ýaş gelin jorasyna öwüt berýâr:
- Çagaňy ýokanç kesellerden goramak isleseň, onuň eşiklerini gaýnadyp durmaly, arlyjagynam, köýnejiginem şeýtmeli.
- Şeý diýsene!
- Hawa. Düýn görsem oguljygym diş ýarypdyr.
- Ogluň diş ýaranyny nâdip bildiň?
- Agyzjagazyna barmagmy salyp barlap gördüm.
- Barmagňy agzyna salmakaň, ony suwa salyp gaýnatdyňmy onsoň?
9. - Eý, sen nâme üçin eşikleriň bilen suwa düşüp ýörsüň?
- Şeýtmek bilen men olary ýuwýan!
- Nâme, kir ýuwýan maşynyň ýokmy?
- Bar welin, oňa girsem başym aýlanýar!
10. - Merjen, siz nâme üçin durmuşa çykaňzok?
- Düşünýâňizmi, meni aljak oglan meniň pullarym ýa-da bedenim bilen gyzyklanmasyn, diňe ruhum bilen gyzyklansyn!
- Size Ezraýyl gerekmi onda?
20
312
Tayler
12.09.2024 20:48
Wysal
Ýigit çykyp ogryn bakyp daşdan men,
Söýer diýip çaklapdymam başdan men,
Diýýärdim kalbymy bir gün aşsam men,
Şu gün-dä şo gün.
Çyn seň üçin Marsa-da uçjagym,
Aşyk bolup seslerine guşlaryň,
Üç boljagy bire biri goşmagyň,
Şu gün-dä şo gün.
Sallahlygy taşlap bile gaçaryn,
Tapdym men ýüregiň syrly açaryn,
Gutarmady seniň: "hany, haçanyň",
Şu gün-dä şo gün.
Diýipdiň "Geýerin fata köýnegem,
Bukjama syganok ýygnan öýmelem,
Haçan borus men gelin, sen öýlenen?".
Şu gün-dä şo gün.
Author: Kerimberdi Hakberdiýew
12
82
Tayler
09.09.2024 18:44
Süýnen ýyldyz
Ýadyňdamy, kän adymam tutmazdyň,
Ýa: «Bagtym» diýerdiň, ýa: «Bagt ýyldyzym».
Ýyldyz süýndi, ýakdy ýeriň bagryny,
Asuda asmanda çakdy ýyldyrym.
Şondan soň setire bagrymy oýkap,
Gijelerne goşgy ýazdym kän gezek.
Ýakyp ýüregimiň bir bölegini,
Aýylganç ýylgyrdym aglama derek.
Arzuwy, aýdymy aramyzdaky
Unutdym, ýuwutdym lebiz-ygrarym.
Sen hakynda bolan ýatlamalary
Ýadymdan çykaryp, alypdym arym.
Indi maňa deň sen özgeler bilen,
Huşumdan uçupdyr görmegiň-görküň.
Ýolda sataşsaňam diýäýjek zadym:
«Sen kim?».
Author: Ilmyrat BABAÝEW
14
68
Tayler
09.09.2024 08:48
RUGSAT
Besdir indi öz-özüňi gynama,
Galaýyn men senden umydym üzüp.
Çyk-da git, bes maňa batmasaň gama,
Çyg düşen gije deý gözleriň süzüp.
Göreçleňde görüp durkam aç-açan,
Nämä gerek nadyllygyň gizlemek.
Düşün, bagtsyz üçin giç däl hiç haçan
Bu durmuşdan öz bagtyňy gözlemek.
Giç däl,
Giç däl şindi, kükregin gerip,
Çoýunjak tapylar öçmedik oda.
Çykalga tapýarkaň galma süllerip,
Däl ahyr bu ykbal çykgynsyz ada.
Görmesem-de indi zülpüň ýaýanyň,
Ýaýar zülplerini çyrpynýan üzüm.
Nämä örteneýin, nämä ýanaýyn
Seň bagtly boljagňa ýetýärkä gözüm.
Öz şatlygyn gözlän tapar, dilberim,
Dogulýan ýok hasrat üçin, gam üçin.
Ýok, men seni gamda goýup bilmerin
Öz bagtly bolmagym, şatlygym üçin.
Duşuşygam, aýralygam bizden öň
Bolupdyr,
bolupdyr söýmek-söýülmek.
Şatlygyna şatlanmak bor özgeleň,
Bor özgeleň hasratyna gyýylmak.
Author: Atajan Annaberdiýew
14
43
Tayler
08.09.2024 21:19
SOWUKLYK
Gowluk hakda tutarygy az bolan,
Ýamasy köp “ynsan” diýen eşigmiň.
Gyryp ençe arzuwlarmyň ganatyn,
Göge bakyp ýerdeligme düşündim.
Öňýeteni ýakyn saýdym, ynandym,
Şeýdip başym kän degipdi daşa-da.
Ýöne ýene rowa görmän özüme,
Men ömrümi özge üçin ýaşadym.
Ýetilmedik menzillemde arman bar,
Uçup bilsem, düşlemezdim ýerde men.
Tapmak üçin asmanda bir çäresin,
Zemin içre derman gözlän derdimiň.
Gözlerimde ahmyr bolan ýaşlaram
Owasynda ýöne ýere doňmady.
Gussasy kän sowuklykdy, sowukdy
Maňa dünýäň bar eçilen sowgady.
…Nirä baksam, mähir küýsän dideler –
Arzuwlarny gussalarna düşeýän.
Halys indi ýadatdy bu sowuklyk,
Halas ediň, men şeýlebir üşeýän.
Author: Allanur Bathyz
16
64
Tayler
08.09.2024 18:14
SOŇKY GEZEK
Soňky gezek görüşeli,
Atyşaly...
ㅤㅤㅤㅤㅤ...birki nazar.
Galam deý ýiti kirpikleň
Belki-de, kalbyma ýazar
Bar soraglaň bellisini,
Ýa goýar garagmy oýup,
Gyzyl nokat belgisini.
Soňky gezek sataşaly,
Tutaşaly alaw ýaly,
Bolsa-da şunça ýaşalan
Zatlaň bary ýalan ýaly.
Açaly ähli syrlarmyz,
Sebäbi biliner ir-giç.
Synlaýyn görmedik ýaly
Men seni şu çaka deňiç.
Soňky gezek duşuşaly,
Uçaly birdemem bolsa.
Alaýyn razylygyňy
Eger göwne degen bolsam.
Şatlyklary alyp git sen,
Goý-da maňa gaýgylary.
...Görüşeli soňky gezek,
Soňky gezek aýrylaly.
Author: Mukam MUHAMOW
12
60
Tayler
07.09.2024 23:22
Gamgyn gözleň bilen bakmagyn maňa,
Ýüregiňem gyýylmasyn - hiç sapar.
Sen bagtyňa basymrajyk gowuşsaň,
Meň bagtymam senden ir däl, giç tapar.
Meňzeşiňi tapjagymam gümanly,
Arzysydyň ähli dörän gülleriň.
Alanyňy duýmandyryn gideňde,
Şatlygyny, şowhunyny günleriň.
Gözlemedim özgelerden sapany,
Wepany-da tapmadygma gynanman.
Begenipler toý tutjagmam belli däl,
Höwürdeşim, ýalňyzlykdan dynanma.
Toprak üçin mydam gowsy bolýar-a,
Ýagýan ýagyş siňňitli hem giç diňse.
Emma sen bir gözýaşyňy dökmegin,
Diňe sen däl, gyýylmasyn hiç kimse!
Author: Ylham Gurbanaly
9
31
