Mowzuklar Hatyja 04 » Öwrenmeli App

27.12.2019 17:54

Durmuş

Durmuşdaky ähli zadyň gadryny,
Elden giderimizden soň bilýäris.
Bilibem şolaryň bardyklaryny,
Arkaýyn, azarsyz geziberýäris.

Ähli zada duşsak sabyr etmeli.
Durmuşyň her synagyny geçmeli.
Diýmäkäň, etmäkäň pikir etmeli.
Ýaşap ýöreniňe şükür etmeli.

Hatyja A.B.

1 788

26.12.2019 00:28

Hasratlar gursun

Ganat ýaýyp gök asmana,
Guşlar dek uçasym gelýär.
Begenjimi gana-gana,
Illere seçesim gelýär.

Ýaşamaga berlen ömür,
Bizden daşlaşýar sogrulyp.
Geçen günleriň hijisem,
Yza dolanmaz öwrülip.

Goý, hemişe ýalan dünýä,
Begenje, şatlyga dolsun.
Adamlary ýeňip barýan,
Gam-gussa, hasratlar gursun.

Awtory:Hatyja A.B.

589

25.12.2019 00:08

Göwün
Adamzadyň bagtly bolmagy üçin,
Aşa köp zatlara geregi ýokdur.
Çünki adamyňky bir kiçi göwün,
Göwün süýji söze mydam mätäçdir.

Käte gamgyn bolýaň, içiň daralýar.
Keýpiň gaçyp, güler ýüzüň saralýar.
Şonda biri saňa göwünlik berse,
Şol bada aladaň zym-zyýat bolýar

Awtory: Hatyja A.B.

1 011

24.12.2019 00:04

Ejem
Durmuşymyň manysy mährem ejem,
Çagalaň üstünde mydam sen hakly.
Her islegiňe ýok diýmerin hijem.
Meniň beýik borjum seni etmek bagtly.

Şatlygyma begendiň, agyma dymdyň.
Meň çekýän ajyma gizlin gynandyň.
Çagalaryň üçin bagryňy ezdiň.
Bildirmejek bolup, ýylgyryp gezdiň.

Syrkawlamda ýanymdan gitmän durduň.
Çökgün bedenimi, ruhum galdyrdyň.
Aýaga galamda, ýüzüm gülende,
Kiçi zatlara-da sen monça bolduň.

Seň saýaňda ýetdim men şu derejä.
Ýaşaýşyma çäksiz söýgüňi gatdyň.
Eden aladalaň çykarman puja.
Durmuşymda öz ýerim-ornum tapdym.

Seniň bilen bagly ýeke arzuwym,
Esasy zat gowy bolsun saglygyň.
Seni bize köp görmesin Hudaýym.
Bize uly bagtdyr seniň barlygyň.

Awtory:Hatyja A.B.

869

23.12.2019 00:03

Geç

Bagtyňy gabanýan bahyllaryňa,
Hiç zadam diýme-de, diňe gülüp geç.
Geljegiňdäki süýji arzuwlarňa,
Höwes bilen, umyt bilen ýüzüp geç.

Durmuşyň gülküsin, şowhun-şatlygyn,
Öz ömrüňe,geljegiňe süzüp geç.
Dert-aladaly ýaşaýşyň datdygyn,
Akyl-pikiriňe bir-bir düzüp geç.

Durmuşyň her dürli synaglaryny,
Ejizlemän, güýçli bolup, ýeňip geç.
Saňa gönükdiren soraglaryny,
Aljyraman, dogry bilip, çözüp geç.

Awtory:Hatyja A.B.

1 542

22.12.2019 18:38

Wagt
Wagt edil akyp barýan suw ýaly,
Ýatlamalar goýýar-da, derrew geçýär.
Durmuşymyz ertekiler mysaly,
Gynançly, begençli günleri seçýär.

Wagt käbir adamlary üýtgedýär.
Durmuşyň her tarapyny öwredýär.
Üýtgeşik-üýtgeşik zatlar döredýär.
Ýaşap ýören dünýämizi ýöredýär

Wagt hiç haçanam dolanmaz yza.
Adamlaň öňünde çökmezem dyza.
Onuň berip biljek peýdasy bize,
Durmuşa düşünmegi öwretmek diňe.

Az pursatlyk, dolanmajak durmuşda,
Gowy ýaşamaga hökman gerek bagt.
Bagta eýe bolup ýaşamaga-da,
Ýakynlarňa sarp etmeli biraz wagt.

Awtory: Hatyja A.B.

970

21.12.2019 01:00

Gülüp gez
Ertir boljagy näbelli durmuşda,
Gynanyp ýörmeklik hiç zada degmez.
Adama bir gezek berilýän ömür,
Näçe isleseň-de dolanyp gelmez.

Ýaşa durmuşyňy, sowurma ýele.
Arzuwňa ýet, isläniňi al ele.
Belki düşseň gep-gürrüňe ýa dile,
Gidiber ýoluňa, seretme ile.

Ýüzüň gülüp dursun, dostuň begensin.
Ejizleme duşmanlaryň gynansyn.
Gamlanaňda durmuşyňdan synarsyň.
Gülüp gezseň dertleriňden dynarsyň.

Kelläňde her hili pikir ýöretme.
Hyýalyňda erbet zatlar döretme.
Geljegiň hakynda arzuwlar et-de,
Hemme zatlaryňy gowluga seple.

Awtory:Hatyja A.B.

1 287

20.12.2019 00:47

Ýok, meňzäň diýemok Zöhre-Tahyra, Olaň güni başyňyza düşmesin! Ýöne welin, eý, erkana aşyklar, Siz arassa saklaň söýgiň çeşmesin. Men akyl bermekçi bolamok size, Men akyl bererden entek juda ýaş. Ýöne ýatlaýaryn: Mukaddes zatdyr, Säher çygy bilen zakgun dek gözýaş. Şasenem-Garyba meňzäň diýemok, Olaryň takdyry düşmesin başa! Ýöne azat söýgüde-de synag bar — Äsgermezlik eden çeker endişe. Hemme zat üýtgeýär dünýäň ýüzünde, Aşyklaň kanuny üýtgänok diňe: ...Wepadar bol — maňa ýar boljak bolsaň, Ine, merdanalyk diýerler muňa! Ot ýaly oglanlar öňüňden çykar, Gözleri ataşdyr, sözleri şeker. Üç gezek bükülip dyzyna çöker — Buýsanç bilen üstlerinden gülüp geç! Ýalan aşyk bardyr entek dünýäde, Ýalan sözem bardyr entek dünýäde. Baýramda, ballarda ýary sal ýada, Başgalaň ýanyndan başga bolup geç! Ýüzüň açyk bolsun, tutuk bolmasyn, Gaşlar gülsün dursun, çytyk bolmasyn. Duşuňdan garaman ötüp bolmasyn — Ýere bakma, ile nazar salyp geç!.. Goý, mukaddes kasam bolup ýaňlansyn, Ýaryň ýaňagyndan alnan ogşuklar. Bir-birine berçinlensin kalbyňyz, Bagtly boluň, bagtly boluň Aşyklar!

Awtory:B.Hudaynazarow

2 320

19.12.2019 17:48

Owadan täsin dünýä,
Sende köpdür gowy zat.
Ýöne iň erbet ýeri,
Azdyr sende adalat.

1 458