Ýuwaş-ýuwaşdan

Gelinlerde haýa bilen birlikde,

Ýaşmak ýitip barýar ýuwaş-ýuwaşdan.

Köp gelinler şer gözlänsoň her gepde,

Jenjel utup barýar ýuwaş-ýuwaşdan.

Eneden-atadan daş edip ärin,

Indikiler şeýdip alýarmyş aryn.

Gül ýaly maşgalaň agzybir törün,

Gybat ýykyp barýar ýuwaş-ýuwaşdan.

Her kim gelin alar garaşyp ýyllar,

Soňam bir çaý üçin ogluňa ýalbar.

Gelin hyzatyndan geçdi gaýynlar,

Hormat ýatyp barýar ýuwaş-ýuwaşdan.

Nirde dokma dokan türkmen aýaly,

Tamdyr boş durmazdy toý bolýan ýaly.

Indi her kim gözläp iň aňsat ýoly,

Işgär tutup barýar ýuwaş-ýuwaşdan.

Zeýrenip otyrma mähriban ene,

Söz geçirmek kyndyr gelinlerňize.

"Alma biş agza düş" diýilen ýere,

Indi ýetip barýar ýuwaş-ýuwaşdan.

Kuwwat Ýazmuhammedow