Mowzuklar barlagcy » Sahypa 6 » Öwrenmeli App

02.12.2022 09:24

Daglaryňyz beýik bolsun, bulutlary
lemmer-lemmer.
Daşlaryňyz lagyl-mermer, derýalarnyz tereň bolsun.
Seýkin basyp gelsin ýazlar,
kenizleri — näzik ýeller,
Çal dumanly jülgelerde umga bolsun, jeren bolsun.

Ýelden ýyndam bedew bile şan getiriň iliňize, Hiç kim dutaryndan gaýry ýanyna ýarag almasyn,
Biliňizden önen perzent kuwwat bolsun biliňize, Ýüregňizden önen gyzlar ýürege ýara salmasyn.

Gasyn düşse ýüzüňize, diňe ýylgyrmadan düşsün,
Gara gözler ýaksa eger ýylgyryp ýaksyn janyňyz.
Nanyňyz deý nurana Gün gögüňizden şugla saçsyn,
Tamdyrňyzdan tylla Gün deý lowurdap çyksyn nanyňyz.

Kalbyňyzda ene kimin otursyn päk ynsabyňyz. Dost dogandan zyýat bolsun, dogan dostuňdan zyýada,
Küpürsäp ýatan toprakda gögersin, goý, yhlasyňyz,
Guruň ajap şäherleri — meňzesin diňe hyýala.

Geçmişiňiz çuňdur siziň, geljegiňiz juda beýik, Türkmeniň adyn baýdak deý al asmana göteriň siz,
Gül diýarda ýaýrap-ýazlyp,
Gül diýarda söýlüp-söýüp.
Köpeliň siz,
Köpeliň siz!

Nobatguly Rejepow

56

30.11.2022 16:45

GEL,SYRYMY AÝDAÝYN… |
Näzijek göwnüňe degmekden gorkup,
Syrym saklap gezdim şu çaka çenli.
Bu gün bolsa bire baglap ýüregim,
Saňa bir zatlary aýdasym geldi.

Gel, janym, kalbymy açaýyn saňa,
Isle-hä ýaz eçil,
Isle-de ýazgar.
Barybir gözleňden gitme ýok maňa,
Bu söýgi kalbyma ebedi ýazlar.

Ynan, kän gezdim men bir özüm söýüp,
Indi ýürek bu ahwaldan iripdir.
Sen bilýärmiň, gara gözüň güldürip,
Öten agşam düýşüme-de giripsiň.

Şo-ol günem diýsene...
duşupdygam biz,
Gelipdem şo-ol sözi diýmeli halat.
Ýöne ýüzüm kesä sowanym üçin,
Şol gün ýygralygma okadym nälet.

Hawa, kän oýlandym,
ölçerdim,
dökdüm,
Ýöne muny sen birjigem aňmadyň.
Wiý, ýogsa-da, näbilýärsiň diýsene,
Belki, senem meňki ýaly haldasyň.

Hut şonuň üçinem giç dälkä heniz,
Bu söýgi armana dönmänkä bir gün.
Gyzgyn ýüregimi aýama alyp,
Gel, saňa bar zady bereýin gürrüň…

Kakamyrat Rejepow

42

30.11.2022 10:52

Perwana pursatlaň,
ýyndam ýyllaryň,
Aý-günleriň bir-birine ilteşip,
Ömür kerwenimi idip barmasy —
Maňa juda üýtgeşik!

Agyp-dönüp duran däli göwnümiň
Mahal-mahal ähli zatdan çetleşip,
Ýersiz-ýere özün ýalňyz duýmasy —
Maňa juda üýtgeşik!

Ýyndam atlaň beýge bökjek bolanda,
Bat almaga biraz yza süýşmesi —
Kä yza tesmeleň manysy dälmi,
Bu-da juda üýtgeşik!

Açylmadyk syr deý nätanyş günler
Durlar, honha, bosagamdan jyklaşyp.
Olaryň gujagna alňasap barşym —
Maňa juda üýtgeşik!

Gökden düňderilip gaýdýan ýagyyşlaň
Bu baglaryň anbaryna ys goşup,
Begenç gözýaşlarma meňzäp ýagmasy—
Maňa juda üýtgeşik!

Ynha, abşarylyp ýören adamlar,
Erte görseň, gumdur — ýeke üýşmejik.
Garaz, tutuş barlyk, bu uly dünýä
Juda-juda üýtgeşik!

Kakamyrat Rejepow

43

27.11.2022 11:17

Saralan surata seredip siňe,
Ýatlama çümersiň ýaprak gaçanda.
Köşeşer gidersiň- sen maňa jaň et,
Ýalňyzlyk başyňy tutsa haçanda.

Ýaz gelip, meýdana çykasyň geler,
Içiňi dökmäge asman astynda.
Çagyr meni, ýüregiňi diňle-de,
Gelerin bar bolsam ýeriň üstünde.

Hatyrasy üçin hoş geçen günleň,
Başarsaň, ýüregňe etme ikilik.
Özümi bir ömür bagyşlap bilmen,
Eşitsem gözlerňe gussa çekeniň.

Gaýgyly bolmasyn aýdýan aýdymlaň,
Täleýde şonsuzam ýeterlik gam bar.
Soňky duşuşykda aýdyp gaýdanlam,
Saňa kyn günüňde bolsun howandar.

Gijeler düýş görüp, gorkup oýansaň,
Ynan onuň ýönekeý bir düýşdügne.
Bilýän, kem- kem ýatlamaňam goýarsyň,
Göz ýetirip indi ýanmaň giçdigne.

Barybir, geçmişe seredip siňe,
Başyňy ýaýkama duşdan geçenne.
Açylar gidersiň, sen maňa jaň et,
Ýalňyzlyk başyňy tutsa haçanda.

Aşyr Hanow

86

barlagcy

barlagcy

26.11.2022 10:17

Gitmesene “Gitmesene, Gitseň onsoň bulutlary kim synlar.,, L .Pürjäýewa Gitmesene Gitseň onsoň gara başym dumanlap Gara güni gapdalyma getirer Gitseň onsoň,görülmedik gün aglap Kemsinmezmi ýazylmadyk

86

barlagcy

barlagcy

24.11.2022 20:10

Sag bol, durmuş! Sag bol bereniň üçin. Şükür, saçagymda kemenok çörek. Ýöne adam Çörek bilen, adam däl, Oňa başga-da kän, Kän zatlar gerek. Sag bol, durmuş! Sag bol bereniň üçin, Ýagyşlaryň üçin,

67

23.11.2022 21:45

Ynsana bagt uçin nämeler gerek?
At gerek, ýol gerek hoş hyýal bilen.
Her goşgymda kämil bolmana derek,
Onuň barha kyn düşýänne razy men.

Razy — çynym bilen sadany söýýän,
Razy — halal saçagymda çöregim.
Razy — çalarypdyr saçlarym eýýäm,
Razy — hernä üýtgemändir ýüregim.

Razy — günler ýüpek sowsana döndi,
Razy — ýüregimde özgäň agysy.
Razy — «Mydam Güneş bolsun-a» doldy,
Asman bilen şu zeminiň arasy.

Razy — köp büdredim çaga mysaly,
Ýalňyşdym, ökündim ilkibadalar.
Şonda gökden inen perişde ýaly
Duşdy maňa oňat-oňat adamlar.

Razy — köçelerim, ýüregim ýagty,
Razy — kükregimde diňenok owaz.
Berdi maňa bir ömürlik bu bagty
Geçip barýan ýaşlyk, geçip barýan ýaz.

Razy — joşdum topragymyň toýunda,
Duzuny syladym, sowuşdym ýasyn.
Eziz maňa şu topragyň goýnunda
Wysal bolan hem bolmadyk yhlasym.

Gerekli pursatym indim äleme,
Begendim, söýüldim, çekdim men zary.
Ine, şu zatlaryň meniň täleýme
Miýesser edenne müňde bir razy.

Gurbannazar Ezizow

104

22.11.2022 12:15

Tümüň ýary penjirämiz kakyldy
– Salam!
– Salam. Kim borsuňyz, eý daýy?
Myhman jogap berdi örän akylly:
– Menmi? Ajal.
Has dogrusy — Ezraýyl.

– Gaty oňat.
Geliň, geçiň, oturyň.
Size haýsy gerek: kofemi ýa çaý?
– Maňa, gowsy, boş çüýşejik getiriň.
Ol seniň janyňy saklar örän jaý.

– Bagyşlaň:
Siz ýalňyşýan-a dälsiňiz.
Meniň keselim ýok. Özümem juwan.
Belki, jaý nomerim ýalňyşansyňyz,
Men-ä, walla, hiç düşünip bilmeýän.

– Ýok, men jaý nomerin ýalňyşamok,
ýok,
Men geldimmi — boş gitmäni halamok.
– Bilýän, ýöne meň ölesim gelenok,
Janym sagat, durmuşymdan nalamok.

– Sen ilk-ä aglama, soňam aldama,
Aldawyň köp bolsa, jezaňam artýar.
Onsoňam bilip goý, her bir adama
Meniň saýlap-seçen bir perişdäm bar.

Ine, seniň diýen sözleň barada,
Seredip gör, şunça fakt gowuşdy.
– Niçik? — diýip sorajakdym,
şobada
Bir kitap gütüläp öňüme düşdi.

Kitaby agyz däl, göz bilen iýýän,
Düşünýän, arada bar ullakan syr:
Ýokarsynda meniň adym, familiýam,
Iň aşakda bolsa «Ezraýylneşir».

Ýüregimde zat galmady hemleden,
Şo pursat ajalym ýakyn göründi.
Bu iş meniň bir kitaba jemlenen
Ölüm hakyndaky goşgularymdy.

– Ine, indi bildiň gerek, ýaş ýigit,
Neçün gelenimi tünüň ýarynda.
Seniň ahy-nalaň ýüregmi iýip,
Ýer tapmadym tünegimiň töründe.

Şatlykdan, begençden, ýaşlykdan ötüp,
Siz nämüçin beýle hala düşdüňiz?
Beýtmäň ahyr, işim özüme ýetik,
Meniň halys ýüregime düşdüňiz.

Juwan halyňyza gojadan beter
Çekýärsiňiz bu dünýäniň ahyny.
Her kimiň mütdedi wagtynda ýeter,
Siz bir entäk azar bermäň ahyry.

Wasp ediň ýaşaýşy, beýik şatlygy,
Gözelleriň elden ýeňil öýmesin.
Ýat ediň ölümi — çyn berbatlygy,
Wasp ediň çagalaň säher deý sesin.

Eger, walla, erkim bolsa özümde,
Taşlap şu kärimi allaowarra,
Ýaşardym şadyýan ýeriň ýüzünde,
Guwanyp ýaş ýigit, gözeldir garra.

Meň baran ýerimde ýatýar şagalaň,
Aýdym aýdylanok, çalnanok dutar.
Eger adam bolsa Allatagalla
Meni beýle jeza etmezdi duçar!

Birden onuň gözlerine ýaş gelip,
Bolşy meniň jigerimi daglady.
Hasratdan müzzerip,
Bir gysym bolup,
Titräpler ykbalyndan aglady.

Dözmedim men ol pahyryň halyna
Kärini unutdym bu şum apatyň.
Emaý bilen baryp onuň ýanyna,
Onuň bedibagt başyn sypadym.

Diýdim: — Besdir, bozulma sen ýaşuly
Men-ä asyl höwrügäýdim seň bilen!
Köne ülpetler deý, köne dostlar deý,
Onuň bilen hümürdeşdik daňa çen.

– Äý — diýdi — bolsa-da aralarmyz daş
Içimi bir dökeýin diýip gaýtdym.
– Bir gören tanyş bor, iki — garyndaş
Kyn günüňde geläýgin — diýp aýtdym.

– Ýamanlyga duşmaweri ylaýym.
Derdim egsiläýdi diýen sözüňden,
Siz bir işli adam.
Zyýan bermäýin.
Işläň! — diýip,
Sumat boldy gözümden.

Gurbannazar Ezizow

86

20.11.2022 19:39

Gum-gukluk bar, başga zat ýok,
Ak derekleň arasynda
Janly zatdan men ýeke-täk,
Ak derekleň arasynda.

Synlap durup, ylla, däli
Ýaprak basan inçe ýoly,
Gezmeleýär güýz şemaly,
Ak derekleň arasynda.

Dymýar ýoda... dymýar howa...
Ne guşlar bar, ne-de owaz.
Humar göwnüm urýar perwaz,
Ak derekleň arasynda.

Bakýan Köne ýola bakýan,
Biri geljek ýaly hökman,
Yz-yzyna çilim çekýän
Ak derekleň arasynda.

Ýatlamalar kalby gyýýar,
Ýürek aglamaga taýýar...
Agyr geçen ýaşlygym bar
Ak derekleň arasynda.

Berdinazar Hudaynazarow

25

19.11.2022 20:48

On üçmi
Ýa on dört ýaşap,
Çepek geýip, ile çykdyň.
Galamyňy dula taşlap,
Çep gulakly pile çykdyň.

Ataň öldi. Towlanmadyň.
Möňňürmediň. Togalanmadyň.
(Ýa-da juda oglanmydyň?
Ne sebäpden beýle çykdyň?

Aga ýitdi, ata öldi,
(Gezermikäň hülli-hülli!)
Ýöne Seniň bagtyň geldi –
Eneň bilen ýola çykdyň.

Kabul etdi agras Tejen,
Bugdaýlary goňras Tejen.
Burugsa, burugsat, Tejen.
Bir ot gözläp, seýle çykdym.

Alym Tejen oda derek
Berdi ot dek bugdaýorak...
Dabanlaryň darak-darak,
Sagdan orduň, sola çykdyň.

Ýer ýüzüni bugdaý edip,
Her dessesin bogdak edip,
Bogdagyny baýdak edip,
Ýeňiş üçin ýola çykdyň.

Gazdyň gazy, çyzdyň goşgy.
Ýesir etdi gyzlaň yşgy.
Haýsyn görseň – şol hem ýagşy.
Bir täsinje Owlajykdyň.

Mälediň sen, mälediň sen
Birin hasam haladyň sen.
Barmy puluň, haladyň seň?
Ýokdy. Derrew nola çykdyň.

Başky Söýgiň ýykdy aldap.
Böküp turduň... Bolduň soldat.
Gaýdyp geldiň. Dostlaň goldap,
Bir gözeli dula çekdiň.

...Sapak berdi alym, hatdat.
Öýüň kitap, ýüküň kitap,
Gündiz ýanyp, gije tütäp,
Şahyr bolduň, «molla» çykdyň.

Iller saňa diýdi şahyr.
Azda-kände adyň zahyr...
Diri wagtyň bolma pahyr,
Çyksaň lowlap ile çykgyn!

Şahyrlyk bir jaňly kerwen.
(Ýolda diňlen, öýde diňlen!)
Diňlenmeseň ýene derrew
Çep gulakly pile çykgyn...

Kerim Gurbannepesow

94