awesome
20.06.2022 15:43
Mark TWEN / Geñ-tañsy ogurlyk.
Gyşyň aňzak tüni. Satyjy dükanyň penjiresiniň daşky gözeneklerini ýapyp duran mahaly tötänden dükanyň içinde gezip ýören bir adama gözi düşdi. Daşara çykmazdan ozal dükanda adam galandygyny görmändi. Nätanyş adam tekjede duran birnäçe bölek mesgäny çakganlyk bilen alyp, başgabynyň içinde gizledi. Satyjy gapydan daşary çykmaga howlugyp gelýän ogryny synlap duran mahaly "Täsin iş boldy bul-a" diýdi. Aýny wagtynda oňa jeza bermegiň ýoluny hem agtarýardy. Çykyp gitmäge şaýlanan nätanyş adamyň eli gapyň tutawajyna degen wagty satyjy içerik girdi.
— Jenap, gidip barýarsyňyzmy? Sowuk doňduryp barýar-a. Görnişiňizden sizem gowuja üşäpsiňiz öýdýän. Bärik geliň, hany!
Nätanyş adam satyja alarylyp seretdi. Gözlerinden howatyrlanýandygy duýulýardy. Ol nämetjegini, näme diýjegini bilmedi, tizräk dükandan garasyny saýlamak isleýärdi, sebäbi başgabynyň içinde mesge bardy ahyryn… Emma bialaç satyjyň yzyndan ýöredi.
Dükanyň eýesi onuň egninden tutup, otagyň burçundaky pejiň gapdalynda oturdyp, mähribanlyk bilen:
— Bilýäňizmi, bular ýaly sowuk gijede az-kem ýylynmasaňyz doňup galjagyňyz anyk— diýdi.
Satyjy peje yzly-yzyna odun salyp başlady. Ogry oturan ýerinde mesgäň eräp barýandygyny duýdy. Birden ol böküp turup hökmäny gitmelidigini aýtdy.
—Nirä howlugýarsyňyz, ýene biraz oturyp gowuja ýylynyň! Meňem içim gysyp durdy. Gowusy, men size gyzykly bir hekaýa aýdyp bereýin.
Ogry takatsyzlandy.
— Ýok, ýok! Gitmesem bolmaýar. Mallaryma seretmeli, olar aç galan bolsalar gerek.
— Goýsaňyzlaň, yssyja otagda biraz gürrüňleşeris, soňurrak gidersiňiz-dä.
Biçäre adam bu wagt nämetjegini bilenokdy, çünki başgabynyň içindäki mesge ýüz-gözlerine akyp başlapdy. Satyjy bolsa bu ýagdaýy görmedik kişi bolup peje odun salmagyny dowam edýärdi.
Satyjy gepini dowam edip:
— Bu gün gowy gije boldy— diýdi— Başgabyňyzy çykarsaňyzlaň, otagyň içi juda yssy ahyryn.
Biçäre ogry çydap bilmän ahyry:
— Ýok — diýip gygyrdy— Meň gitmegim gerek! Rugsat beriň! Ýagdaýym erbetleşýär.
Bu wagta çenli mesge onuň boýnundan geýimine, geýimlerinden joraplaryna çenli akyp barypdy. Ol edil ýagly wanna düşen dek bolupdy.
Satyjy ýylgyryp:
— Eger siz çyndanam gitmegi isleýän bolsaňyz, ýoluňyz ak bolsun.—diýdi, ogry dükandan çykyp barýan wagty — Men dokguz pensi juda eý görýärin, emma başgabyňyzyň içindäki bir funt mesge üçin sizi günäkärläp bilmeýärin— diýip gepiniň üstüne goşdy.
7
39
awesome
20.06.2022 15:41
Hawa, şol gyza aýtmaly zatlarym hut şulardan ybaratdy… / Haruki Murakami, ýapon ýazyjysy
Ajaýyp aprel säheri Tokionyň şowhunly Harajuki etrapçasyndaky darajyk köçede birkemsiz gözel gyzyň deňinden geçdim. Dogrusyny aýtsam, ol o diýen owadanam däldi. Onda hiç bir babatda göze ilerlikli zadam ýokdy. Gyzyň egin-eşikleri-de sadajady, saçlaram ýaňy ukudan açylanyňky ýaly buýr-bulaşykdy. Ol gaty bir ýaşam däl, bolsa otuz ýaş töwerekleri bolup, ulugyza çalym edýärdi. Ýöne men şonda-da 50 ädim daşrakdan aňdym: ol meniň üçin birkemsiz gözeldi. Ony gören badyma gursagym galagoply gürsüldäp, agzymam, hamala diýersiň, çölde gezip ýören ýaly gup-gurudy.
Belki, siziňem zenanlarda aýratyn halaýan taraplaryňyz bardyr? Mysal üçin, aýdaly, inçemik goşarly, ýa aýdaly, okara gözli, sülük barmakly ýa-da bolmasa, naharyny howlukman iýýän zenanlara sebäpsiz ýere gyzyklanmaňyz bardyr. Meniňem, elbetde, öz göwnüme ýaraýanlary bar. Kämahal naharhanada garbanamda gapdalymdaky stolda oturan gyza biygtyýar bakanymy duýman galaýýan, sebäbi onuň burnunyň gurluşam göwnüme ýarap bilýär.
Emma hiç kim birkemsiz gözeli tanap boljakdygy hakda öňünden jedel edip bilmez. Olaryň burunlaryny möhüm hasaplasamam, şol gyzyň burny ýadyma düşmän biler – ýeke burnunyň bardygynam unudyp bilerin. Anyk ýadyma düşürip bilýän ýeke-täk zadym – bu gyzy beýle owadan hasaplap bolmajaklygydy. Nähili täsin!
– Düýn köçede bir kemsiz gözele duşdum – diýip, birine aýtdym.
– Şeýlemi? – diýdi. – Ýeri onsoň, owadan ekenmi?
– O diýen-ä däl – diýip jogap berdim.
– Eýse, sen nähili gyzlary gowy görýäň, hä?
– Bilmedim-dä. O hakda hiç zat ýadyma düşenok. Gözleriniň şekili ýa-da…
– Täsin-aý!
– Hawa, çyndanam täsin.
– Onda – diýip, ol mydyrdady. Birazajyk keýpi gaçan dek:
– Näme etdiň? Onuň bilen gepleşdiňmi? Yzyndan gitdiňmi? – diýip sorady.
– Ýo-o-o-k. Ýöne biri-birimiziň deňimizden geçdik.
Gyz-a günbatara tarap barýardy, menem gündogara… Dogrudanam, ajaýyp aprel säheridi. Käşgä onuň bilen gepleşip bilsedim. Munuň üçin ýarym sagadam ýeterlik. Ondan özi barada bir zatlar sorardym, özüm hakynda-da aýdyp bererdim. Bu durmuşdan nämä garaşýanymy aýdardym. 1981-nji ýylyň şeýle ajaýyp aprel säherinde Harajuki etrapçasyndaky darajyk köçede biri-birimiziň deňimizden geçmegimize sebäp bolan ykbalyň kötel ýollary hakda aýdardym. Bu-da dünýäni ümsümlik gurşap alýan wagty, gadymy sagadyň işleýişi ýaly, ýakymly syrlardan doly bir zat bolardy.
Biz azajyk gepleşenimizden soňra, bir ýerlerde nahar edinerdik. Biz belki-de, Wudy Alleniň filmine giderdik. Şonda bolup biläýjek bu zatlar ýüregimiň çalt-çaltdan gürsüldemegine sebäp boldy. Ynha-da, ikimiziň aramyzda on bäş ädim galdy. Oňa golaýlap bilermikäm? Näme diýsemkäm?
“Ertiriňiz haýyrly bolsun, hanym! Gürleşmek üçin maňa ýarym sagadyňyzy bagyş edip bilermisiňiz?”
Örän bimany. Edil ätiýaçlandyryş edarasynyň işgärine meňzärin.
“Bagyşlaň weli, şu töwerekde egin-eşik arassalaýan ýeri bileňizokmy? ”
Ýok, bu has-da gülkünç. Elimde bolsa, egin-eşigem ýog-a. Kim şunuň ýaly ýalana ynanar öýdýäň? Belki-de, sada hakykat jaýdar bolar. “Ertiriňiz haýyrly! Siz meniň üçin birkemsiz gözel…”. Onuň muňa-da ynanasy ýok-laý. Ynanaýsa-da meniň bilen gürleşesi gelmän biler.
Gynansak-da, ol “Men siziň üçin birkemsiz gözel bolup bilerin, emma siz meniň diýýänim däl” diýip biler ahyryn. Eger şeýle ýagdaýda galaýsam, megerem, asman depämden inerdi. Şol pursat çykgynsyz ýagdaýdan ugur-utga tapyp bilmezdim. Özümem 32 ýaşymda. Garrylyga sary ýönelmek şu zeýilli zat-da.
Biz gül satylýan dükanyň öňünden geçip barýarys. Meniň ýüzümi mymyjak şemal sypalaýar. Asfaltyň ýüzi çygly we men gülleriň hoşboý ysyny alýaryn. Men özümi onuň bilen gürleşmäge mejbur edip bilemok. Gyz ak ýeňsiz geýipdir. Ol sag elinde heniz möhür goýulmadyk ak bukja saklap dur. Ýagny, kimdir birine hat ýazypdyr. Megerem, uzak gije çirim etmän ýazandyr. Ony ukusyz gözlerinden hem aňmak bolýardy. Onuň ähli syry şol bukjanyň içinde bolup biler. Men birnäçe ädim ýöränimden soň, yzyma dolanýaryn. Ol bolsa, mähelläniň içinde ýitirim boldy. Men indi oňa näme aýtmalydygymy bilýärin. Dogrusyny aýtsam, gürrüň uzaga çekjek. Oňa özümi aýan etmekde çekjek kösençligim uzyn… Kelläme gelýän pikirleriň hiç birine-de tejribe eleginden geçen diýip bolmaz. Bor-da! Hekaýam “Bir bar eken” diýip başlanyp, “Nähili gynançly!” diýip gutarmagy mümkin.
Gadym zamanlarda bir gyz bilen bir oglan ýaşar eken. Oglan 18 ýaşynda, gyzam 16 ýaşyndamyş. Oglan o diýen görmegeý däl eken. Gyzda-da aýratyn bir görk ýokmuş. Umuman, olaram hemmeler ýaly, adaty oglan bilen adaty gyz eken. Emma olar özleri üçin dünýäniň bir ýerinde birkemsiz gözeliň, şeýle-de, birkemsiz ýigidiň ýaşaýandygyna çyn ýürekden ynanypdyrlar. Hawa, olar gudrata hem ynanýan ekenler. Şol gudrat bolsa, hakykat ýüzünde amala aşypdyr. Olar bir köçäniň künjünde biri-birlerine gabat gelipdirler.
Oglan : – Taýsyz, üýtgeşik maşgala – diýipdir. – Men seni ömürboýy gözledim. Sen muňa ynanman bilersiň. Emma sen meniň üçin birkemsiz gözel. Gyz hem: – Senem meniň üçin ähli babatda edil göz öňüne getirişim ýaly birkemsiz ýigit. Hamala diýersiň, bu bir düýş mysaly – diýipdir.
Juwanlar seýilgähde oturgyçda oturypdyrlar. Olar birnäçe sagatlap el-ele berip, biri-birine gyzykly gürrüňler beripdirler… Indi olar ýalňyz däl. Olar kemsiz taýlaryny tapypdyrlar. Bu bir gudrat, uly keramat! Emma olar şol ýerde şeýdişip otyrkalar ýüreklerinde kiçijik bir şübhe döräpdir. Heý-de, adamlaryň arzuw-hyýallary şeýle çalt amala aşarmy? Şeýlelik bilen, gürrüňleri bir pursat togtapdyr.
Oglan gyza: – Hany, özümizi bir gezeklik synap göreli. Hakykatdanam, biri-birimiz üçin birkemsiz jübüt bolýan bolsak, şol wagt başga bir zaman, gaýry bir ýerde täzeden duşuşarys. Bu amala aşanda bolsa, ýagny biziň birkemsiz aşyk-magşukdygymyza doly ynansak, arkaýyn durmuş gurup bileris… Sen muňa nähili garaýaň? – diýipdir.
Gyz: – Hawa – diýip, jogap beripdir. – Hakykatdanam, biz şeýtmeli. Onsoň olar aýrylyşypdyrlar. Gyz gündogara, oglanam günbatara tarap ötä gidipdir…
Şeýle hem bolsa, olaryň bu synag hakdaky pikirleri ýerliksizmiş. Beýtmeli däl ekenler. Sebäbi olar biri-birleri üçin birkemsiz taý ekenler. Olaryň duşuşmaklarynyň özem bir gudrat ekeni. Ýöne gaty ýaş bolansoňlar, muny aňmandyrlar. Olary ykbalyň yzgytsyz, sowuk tolkunlary rehimsizlik bilen aýra salypdyr.
Köp wagtdan soň, gyş günleriniň birinde gyzam, oglanam möwsümiň iň agyr dümewi bilen dümewläpdirler. Şonda olar ýaşaýyş bilen ölümiň arasynda çarp urup, öňki başdan geçiren wakalaryny unudypdyrlar. Ýaşlar aýňalsalar, göýä diýersiň, aňlary ýaş D.G.Lourensiň pul gutujygy ýaly boş eken.
Şonda-da iki juwan, örän akylly we aýgytly bolupdyr. Olar wagt ýitirmezden, ýadawsyz tagallalary arkaly ýene-de jemgyýetiň doly hukukly agzasy bolmak üçin ýeterlik bilim we tejribe edinipdirler. Janlary sag bolsun! Olar metro geçelgesinden beýleki tarapa nähili geçjekdiklerini, poçta baryp haty nädip iberjekdiklerini bilýän adamlar bolup ýetişipdirler. Hatda ýigit bilen gyz täzeden halaşypdyrlaram. Olaryň söýgüsi kämahal-a ýetmiş bäş göterimlik, kämahalam segsen bäş göterimlik derejede bolupdyr…
Aýlar-günler geň galdyryjy tizlik bilen geçip, basym oglan-a 32, gyz bolsa, 30 ýaşapdyr.
Ajaýyp aprel säheri şol gyz Tokionyň Harajuki etrapçasynyň darajyk köçesinde eli hatly gündogardan günbatara tarap ýöräp barýarka, özüni rastlamak üçin bir bulgur kofe içesi gelen oglanam günbatardan gündogara tarap ýöräp başlapdyr. Olar köçäniň orruk ortarasynda biri-biriniň deňinden geçip gidipdirler. Gysga pursatlygam bolsa, olaryň huşdan uçan ýatlamalarynyň sähelçe uçgunlary ýüreklerini ýagtyldypdyr. Olaryň ikisi hem gursaklarynda güýçli gürsüldi duýupdyrlar.
Olar bilýän ekenler: – Ol meniň üçin birkemsiz gözel… – Ol meniň üçin birkemsiz ýigit… Emma ýatlamalarynyň yşygy örän körek bolupdyr. Olaryň aňlary 14 ýyl mundan ozalky ýaly dury dälmiş. Olar ýeke agyz hem gürlemän, biri-biriniň deňinden geçip, mähelläniň içinde ýitirim bolupdyrlar. Müdimilik…
Gynançly hekaýa. Şeýle dälmi?
Hawa, şol gyza aýtmaly zatlarym hut şulardan ybaratdy…
6
57
awesome
07.06.2022 00:00
🦋
Hemişe bermek bilen bolanok. Käwagt almagam gerek….
***
Adamyň dostlary bolmaly.
Gämileriň portlary ýaly wagtal-wagtal durjagyň, ýüküňi düşürjegiň, gursagyňdaky tolkunlar gutarýança garaşjak…
***
Durmuş meni saýgylap-saýgylap, demir darak bilen daraklap,sümek edip sozdy. İkde egrip-egrip, ýumak edip taşlady. Jana-janym! Menden bir kilim doka, belki ýörâňde aýajyklaryñ galtaşar.
Oraz Ýagmyr.
***
" Âhli deňizleň suwy syýa bolsa, saňa hat ýazyp tüketsem," şonda duýgularym egsilermikä?!
Oraz Ýagmyr.
***
Gündiz Gün bolup, gije Aỳ bolup, ỳoluňa yşyk berdim, köňlüňe yşk berdim. Maňa bolsa ỳumruk ỳalyja ỳürek gerek, ỳüre-ek!
***
Sen ýatlamalarymyň açarysyň.
Oraz Ýagmyr.
***
“A men bu şagalaňly, şowhunly dünýede öz paýyma düşen ömrüň iň bir gymmatly bölejigini jahan bazarynyň tozap ýatan çola künjegine elinje çykaryp, düme gawunyň pazyly deý saralyp ugraýança hyrydarsyz saklap ýatyşyma juda haýpym gelýär”
Şiraly Nurmyradow
***
Döwrüň gysga düşündirilişi: bagtsyz ynsanlar, bagtly suratlar...
Adama ýaşamak üçin, edil ýangyç ýaly nähili ýatlama bolsa-da ýatlama gerek. Kipling
Soňky sözüm şeýle bolar: «Alla jan! Söýgülime duşurmadyň. O dünýäde, dowzahda duşursaňam razydyryn.»
Oraz Ýagmyr
Hiç kimiň çaýynda çemçe bolma, şeker eräp gutaransoň siziňem işiňiz gutarar.
Kim gaty söýýän bolsa, gatam urýandyr.
Gabanjaňlyk söýýäni köseýär, söýülýäni bolsa kemsidýär.
Dünýäniň iň owadan, baý we edermen oglany bolsaňda, bir gyz seni çagalarynyň kakasy hökmünde arzuw etmeýän bolsa hiç kimsiň.
Ýürek lukman üçin gan ýöredýän aparat, şahyr üçin welin, ol başgarak zat.
Megerem garrylyk – seniň üçin dermanhanada nätanyş ýazgylaryň barha azalmagy bolsa gerek.
Bilim beýik adamy ümsüm edýär, adaty adamy geň galdyrýar, adamçylygy pes adamy bolsa hondanbärsi edýär.
Tolstoý
Gybat görüpler tarapyndan çykarylýar, binamyslar tarapyndan ýaýradylýar, lar tarapyndan hem ynanylýar.
Öz wagtyňy, “Çüýşegüle” aldyryp
Öçdüň meslik, keýpe aňyň çildirip.
Men bulgur galdyrman ýokary galdym
Sen peseldiň her gün bulgur galdyryp.
/Paýzy Oraz/
"Goý, özleri paýlaşsynlar gyrlyşyp,
Wezipäni, baýraklary, baýlygy.
Biziñ çagalaram aç ölesi ýok,
Kesmeseler berilýänje aýlygy."
Dok horaz gygyrýa haýata çykyp,
Aç towuk düýşünde dary çöpleýär.
Hernäçe az etdigiçe pikiri,
Adam pahyr şonça-da köp gepleýär.
Şarl Monteskýe
(Terjime eden: Şiraly Nurmyradow)
Bir zady bek belläýsedi adamzat:
Kä çyna berimsiz aldanýandygyn.
Aýdymlaryň dürli dilde ýaňlanyp,
Agynyň bir dilde aglanýandygyn.
Şiraly Nurmyradow.
Diýmedigimi diýdirýäňiz,
Saldyrsyňyz, gara padwal astyna.
Diri günüm, dirilerden haýyşym,
Gül ekiň jaýlaňyzda,
Gül ekiň, mazarymyň üstüne.
Güller gülýänleri ýada salsynlar,
Ruhy göýdükleri oda salsynlar.
Kimler dirikä-de ölä meňzäp ýör,
Güller bakylygy ýada salsynlar.
Nurmuhammet Nazarow (Nuryşka)
Baş näçe egilse aşak,
Şonça-da syrt galýandyr.
Ýurt haraba öwrülende,
Diňe baýguş gülýändir.
Şiraly N.
Dünýäniň iň owadan, baý we edermen oglany bolsaňda, bir gyz seni çagalarynyň kakasy hökmünde arzuw etmeýän bolsa hiç kimsiň.
14
141
awesome
03.06.2022 17:25
Dünýäniň ýüzünde gözeller köpdür.
Emma bir gözel bar:
Saçlary – tokaý.
Gözleri – okean
Lebinden öpseň,
Mähriniň gyzgyny
Lebleriň ýakar.
Onuň saçlaryndan bir gezek öpseň,
Dünýäň ýüzündaki ähli agaçlar –
Dublar, garagaçlar,
Narlar, alçalar...
Hemmesi-de birden
Ysyny saçar.
Onuň gözlerine bir gezek baksaň,
Dünýäň ýüzündäki ähli derýalar –
Wolgalar, Dunaýlar,
Amyderýalar Seni götergiläp,
Alyp barýarlar.
Onuň aşygy men dogalym bäri.
Men onuň aklyna, mährine aşyk,
Görmedik görgim ýok onuň ugrunda.
Moskwadan ugrap, Berline aşyp,
Men onuň namysyn gorap sakladym,
Goradym men ony otdan, ýalyndan.
Käteler ol meniň golumdan çekdi,
Derýalar hem seniň teniň dälmidir?
Goradym men ony gülleden, okdan,
Oňa degjek oka bagrymy tutdum.
Bagrymdan geçensoň sogrup aldym-da,
«Indi ýygnaý!» diýip öňüne atdym.
Olam ýylgyrdy-da ýygnady oky.
Dört ýylda ýygnandy şeýle bir köp ok.
Ol diýdi: «Bulary eredäýseň sen,
Milýon çekiç, milýon traktor çykjak».
...Okuň sesi ýatdy.
Men öýe gaýtdym.
Oklardan ýasandym müň milýon orak.
Ýene-de ýasandym müň milýon çekiç,
Soň sährany söküp çöllere çykyp,
Çöllerden ugradym daglara tarap.
Perhat Şirin diýip dag ýaran bolsa,
Menem onuň üçin daglary ýardym.
Emma diňe ýaryp oňaýmadym men,
Men dagy owratdym,
Gum bilen gardym.
Onsoň men olardan kerpiç ýasadym.
Kerpiçlerden bolsa jaý gurdum gat-gat.
Diýdim: «Mähribanym, dynjyň al indi,
Gündiziň parahat! Gijäň rahat!»
Şondan bäri ony besläp ýörün men,
Ynha, şu günlerem
şol besläp ýörşüm...
...Emma bir ýerlerde däri ysy bar,
Ýene bir ýerlerde ereýär gurşun.
Ýene ol gözele wehim abanýar.
Ýene mahal-mahal howsalaly men.
«Meniň Ýerjemalym parahat bolsun!»
Diýip, garşylaýan her bir ýyly men.
Bagrym badaşykly ol gözel bile,
Ol bolmasa – men ýok,
Men bolmasam ol.
Eziz Ýerjemalym – mähriban Ýerim,
Ýene aşygyňdan
şeýle KASAM al:
Sen bir zady gömmekligi ynansaň –
Men ol zady göwräm bile gömerin.
Sen bir zady dymmaklygy ynansaň –
Agzym, burnum, hamym bile dymaryn.
Seni gorap ýörkäm sataşsa bir ot –
Men ol oda göwräm bile uraryn.
Ot meni ýandyrmaz. Ýandyraýsa-da,
Ot içinde baýdak bolup duraryn.
Ýykylman duraryn. Lowlar duraryn.
Birden öläýsem-de ýetip ajalym,
Meniň Senden gaçyp gitjek ýerim ýok –
Ýene ýatjak ýerim
mele gujagyň.
Kerim Gurbannepesow
11
118
awesome
03.06.2022 16:23
🦋🦋🦋
Iner ogul, tumar gelin! Eger az salymlyk ünsüňizi berip, ulyňyzy diňlemegi özüňize müwessa bilseňiz, size diýjek kelam agyz sözüm bar.
Ogul, saňa diýjek sargytlarym.
Sen indi öýlendiň, öýli-işikli bolduň. Bir bendäniň göz guwanjy, dünýäsine deňäp oturan gyzy bolsa seniň duluňy bezäp otyr. Ol indiki galan ömrüni seniň bilen geçirmäge, seniň ýagşyňa-ýamanyňa şärik bolmaga kaýyl. Ol öz bagtyny saňa baglady. Indi seniň boýnuňda diňe öz gara başyň aladasy däl-de, ýene bir kişiniň garamaty bar. Durmuş arabasyny ýoldan dogry tigirläp gitmek diýilýän zat adam saýlaýan närsedir. Bu ýolda sähelçejik ýalňyşlyk arabaňy sandan çykaraýmagy ähtimaldyr. Şonuň üçin-de bu ýolda öňüňden çykjak kötelliklerden aman-sag geçmäge taýýar bolgun. Bu ýolda özgelere ýagşy görelde bolmagy özüňe borç edingin.
Şeýtdigiň öz ogullyk borjuňy-da berjaý etdigiňdir. Sähel ýerde özüňi ýitirme, äden ädimiňi oýlanyp ätgin, pederlerimiziň paýhasyna daýan, ýalňyşmazak bolarsyň! Kynçylyk barada aýdylanda Kerim şahyryň:
«— Her bir kynçylygyň dört tarapy bar.
Üçi ýapyk bolsa, biri açykdyr» diýeni hakydaňda bolsun!
Gelin, saňa diýjek sargytlarym.
Ine, indi senem hak öýüňe düşdüň. Belki uzagyndan bolsun... «Döwletimiziň başy» — diýip ýören dogmamyza ömürlik ýan-ýoldaş bolmagy özüňe mynasyp gördüň. Sen onuň uzak ýyllar boýy arzuwlanyp ýeten bagt guşy bolsaň-da, «depesine çykybermäge» hakyň ýokdur. Hyzmata hyzmat bilen, sylaga sylag bilen jogap bermek seniň borjuňdyr. Onuň abraýy-seniň abraýyň, seniň abraýyň bolsa onuň abraýydyr. Durmuş göräýmäge, elpe-şelpelik ýalydyr. Emma ýeňmesi juda kyn garşylyklardan doludyr. Garşylygyň, kynçylygyň öňünde müzzermek ejizligiň alamatydyr. Diňe ejizlemeýän kişiler maksadyna ýetýändirler.
Ol maşgalanyň başy bolsa, sen maşgalanyn sütünisiň! Maşgala binýadynyň mäkämligi köp derejede saňa baglydyr. Saňa yraň atmak bolmaýar.
Hawa, gelin, örän agyr ýüküň, ullakan jogapkärçiligiň gerdeniňe düşendigine dogry düşün. Maşgala ojagynyň abat saklanmagynda türkmen zenanlarynyň görkezip gelýän gereldelerine eýerip, indiki nesillere-de nusga alarlykly görelde görkezjekdigiňe ynamym uludyr.
Ikiňize-de bilelikde diýjek sargytlarym.
Ozaly bilen ikiňizi kemala getirip, şu derejä ýetirenleriň hatyrasyny belent tutuň. Olaryň ýüzüne gelmäň. Olary köp diňläp, olara sala salaganlardan boluň.
Sizden önen perzentlere, goý, öz islän atlaryny daksynlar. Enşalla, size-de gezek geler. Olaryň gaňryşyna gaýtmaň, sebäbi olar näme etseler diňe siziň üçin edýärler ahyry. Size ýamanlyk etmäge olaryň bogny ysmaz. Çünki siziň barmagyňyza batan tiken ilki bilen olaryň bagryna çümýändir. Gaýyn ata-gaýyn eneňizi edil öz ata-eneňiz ýaly görüň! Diňe nadan kişiler öz gaýynlaryny bigäne saýýandyrlar. Janyndan jan bölüp beren perzendini saňa ynanar-da saňa bigäne bolarmy, eýsem. Ata-eneňi, gaýynlaryňy ynjytmajak boluň! Olary ynjydanyň, olary agyrdanyň günäsi kyýamata galýan däldir! Görkezenjäňi bu dünýäde germeli bolarsyň. Şu ýerde bir tymsal aýdyp bereýin. Arada bir ýerde dostlarymyň biri ogluny öýerdi. Bir saý-sebäp bilen toý güni baryp bilmedim. «Toýa garrama ýok» diýenlerini edip, soň bir gün dostumyň täze «goňşusyny» gutlamaga baranymda şu zatlary uly guwanç bilen gürrüň berdi.
Könelerimiziň, ata-babalarymyzyň aýdan sözleriniň yrýa ýeri ýok eken. «Görkezenjäňi gerersiň» diýen nakyly kän eşidipdim weli, edil munuň ýalydyr öýtmezdim. Hudaýa şükür, indi menden bagtly adam ýok. Biler bolsaň, täze
gelnimiz öz gaýyn enesiniň «täze gelinligini» gaýtalaýar. Säher turup, ilkinji salamyny bize berýär. Ilkinji demlän çaýyny meniň öňümde goýýar. Tüweleme, Hudaý köp görmesin, oglumyz hem daşymyzda kökenek. Hawa, dost, bizem şeýdipdik. Bizä-hä şulardan «gerkezenjämizi görsek» müňde bir gezek razy. Ýeri gelende bu babatda bir rus rowaýatyny hem gürrüň bereýin.
Öý bikesi günortanlyk nahar taýýarlap, maşgaladakylaryň hemmesini nahara çagyrypdyr. Hojalykbaşy stoluň başyna geçipdir-de ýanyndakylary telläpdir. Görse, körpe ogly stoluň başyna gelmändir eken. Ol aýalyndan:
Hany, körpe ogul nirede? — diýip, sorapdyr.
Onda aýaly:
Ol daşarda eline palta alyp nämedir bir zatjagaz ýasap otyr — diýipdir. Oglunyň «ýasaýan» zadyna gyzygan hojalykbaşy daş çykyp:
Sen nämejik ýasaýarsyň? — diýip oglundan soranda. Ol: «Ejem bilen kakam» atam ýaly garryja bolanlarynda olara nahar guýup berer ýaly kersen ýasaýaryn» — diýip jogap beripdir. Oguljygynyň paýhasyna aňk bolan kakasy dolanyp içeri girse, hakykatdan hem, öz garry atasynyň ýerde oturyp ullakan kersene guýlup äberilen şorruk çorbadan tamşanyp oturandygyny görüpdir. Bu ahwalaty az salym aňynda aýlan öý eýesi gelnine:
Şu günden beýläk garry atamyzy eliň aýasynda sakla. Öz iýýäniňden gowy tagam iýdir. Geýýäniňden gowy geýdir. Öz oturan stolumyzyň başynda, iň ynjalykly ýerinde oturt. Goý, garry göwün ynjamasyn. Ýogsam ertirki gün garran mahalyň körpe ogluň, çüýrük töňňeden oýup ýasan, şol kersenine guýlan tagamyndan garbanmaly bolarsyň» diýipdir.
Hawa, şu zady berk bellegin. Özgeleri näçe gowy görseň, sylasaň, özüňem şonça gowy görlersiň, sylanarsyň. Dünýe- de bihasap zat ýokdur. Adam öz edýän işinden, öz görýän gününden göwni hoş mahaly bagtlydyr. Ol bagta hem seniň özüň ýetmelisiň. Özgäniň ýetiren bagty amanat don geýen ýalydyr.
Eger-de öz ýanýoldaşyň bilen uzagyndan süýjülikde ýaşamakçy bolsaň şulary ýatda sakla!
Onuň sözüni ünsli diňle, sözüne dogry düşün.
Onuň hossarlaryny özüňki saý.
Keseki saýyp nämährem bolma.
Nähak göwnüne degme, ony aýa.
Möhümini bitir.
Özgeden haraý gözlemesin.
Oňa bolan yhlasyň halys ýürekden bolsun.
Süýji dilli, mähirli bol!
Adamyň sähelçejik göwni bardyr.
Hiç haçan, hiç haçan oňa ikilik etme!
Şonuň ýaly-da maşgalada är-aýallygyň birek-birege bolan borçlary barada hem bilip goý.
Birek-birege wepadar bolmak.
Birek-birege goldaw bermek.
Birek-biregiň aýbyny ýaşyryp saklamak.
Birek-biregiň göwnüni tapmak.
Birek-biregiň derdini deň paýlaşmak.
Birek-biregiň abraýyna şärik bolmak.
Ömür dowamaty bolan nesil öndürmek.
9
134
awesome
27.05.2022 22:30
Çekýän şekillerimiz biziň duýgy ýagdaýymyzy belli edýän iň esasy alamatlardan biridir. Bilmän çyzýan zatlarymyzyň manylary bar. Sapakda, ýygnakda ýa birine garaşyp otyrkak ýa-da telefonda gürleşip otyrkak, stressli wagtymyzda stolyň üstündäki duran garalama kagyzy elimize alyp birzatlar çekip başlamagymyz edýän iň aňsat işimiz. Meýletin çyzgylara many bermek bilim alymlaryň şahsyýet gözleginde baran iň soňky nokadydyr. Alymlara görä dünýäniň ähli ýerinde meňzeş şekilleriň ulanylmagy tötänlik däl. Sigmend Freudyň açan psihologiki synaglaryny nazarda tutsak, garalamalaryň hem manysynyň barlygy hakykatdyr. Tötänleýin çyzgylar, geometriki şekiller, ýyldyzlar, üçburçlyklar, üç ölçegli gutular, ok alamatlary, agaçlar, jaýlar, ýürekler, gollar we ş.m hakykatdanam örän täsin we ynanmak mümkin däl ýaly bolup görünse-de, dogrudygy subut edilen bir maglumat hökmünde öňümizden çykýar. Çynlakaý düşünmän eden garalamalarymyz, instinkt we beýiniň ugrukdyrmagynda ýüze çykýar. Manysyz ýaly bolup görünýän çyzan şekilleriňiz siziň şahsyýetiňizi belli edýär.
Üçburçlyk.
Kyn karar alýan, emma bir karar alanda şol kararyndan asla geçmeýän adamlar yzygiderli üçburçlyk çyzýarlar. Şeýle-de gözlegi we öwrenmegi halaýan, batyrgaý adamlaryyň hem bilmän çekýän şekilleri esasan üçburçlyk bolýar.
Bulaşyk nagyşlar.
Bular ýaly nagyşlar çyzýan adamlar duýgylaryny belli etmekden gaça durýarlar. Obsessiýaly (obsessions,takıntı) ýa-da obsessiýaly bolup başlan adamlar kagyza garyşyk nagyşlar çekerler.
Tötänleýin çyzyklar.
Ýokaryk, aşak, saga-çepe, iç-içe ýa-da garşylykly çyzgylar siziň pikirlenmäge meýillidigiňizi we azajygam bolsa birahat bolýanyňyzy aňladýar. Muňa sapak wagty sapak diňlemän depderlerimiziň gyrasyna çyzýan şekillerimizi mysal getirip bileris.
Kub ýa-da guty.
Ýagdaýyna gözegçilik etmek isleýän adam kub ýa guty çekýär.
Agaçlar.
Şahaly, pudakly we miýweli agaç çyzaňyzda ol agaçlar siziň deňsiz-taýsyz hyjuwly we ýokary ego eýedigiňizi aňladýar. Egoňyza dykgat ediň.
Güller.
Romaşkalar, bägüller… haýsyna eliňiz meýilli bolsa, tebigata bolan höwesiň we tebigylygyň nyşany.
Üç ölçegli (3D çyzgy).
Bir tema dürli tarapdan seredýäňiz.
Ýürek.
Aýratyn birine ýakynlyk ýaly duýgulary belli edýär.
Portret.
Bulaşyk çekilen ýüz howpsuzlygy, gülkünç çekilen surat bolsa, üns çekmek islegini görkezýär.
Guş.
Güýçli hyýallary bolan adamlar kagyza uçýan guş çekýärler. Elmydama uly arzuwlary kowalaýan bu adamlar syýahat etmegi gowy görýärler.
Basgançak ýa-da merdiwan.
Ambisiýa we erki isleýän adamlar kagyza basgançak ýa-da merdiwan çekýärler. Aýratynam has bagtly we rahat ýaşamak isleýän adamlaryňam bu şekilleri çyzýandygy kesgitlenildi.
Ok.
Göni we dik ok, bir maksada görkezilen möhümi, nagyşly ok bolsa islegleri kesgitleýär.
Gämi/ Uçar.
Adamlaryň gämi ýa uçar çekmegi şol wagtky bolýan ýagdaýlaryndan gaçmak isleýändigini görkezýär.
Öý.
Ynamly howpsyz ýerde bolmaga zerurlygynyň alamaty. Gyşyk-myşyk öý bolsa ýaşaýan öýündäki bagtsyzlygy aňladýar.
Gollar.
Gol çekýänler wagtlarynyň köpüsini özlerini kämilleşdirmek üçin sarp edýändikleri subut edildi. Eger gol düşnükli bolsa, bu ol adamyň açyk sözlüdiginiň alamatydyr. Bulaşyk we düşnüksiz bolsa, şahsyýetiniň hem çylşyrymlydygynyň alamatydyr. Bu adamlar şol bir wagtyň özünde parahatçylygyň tarapdary. Bäsdeşlik we adamlaryň arasynda söweş çykmagynyň öňüni almak üçin ellerinden gelenini ederler. Elmydama özlerini kesgitlemäge çalyşýarlar. Biraz daş-döwregindäkilere hem üns berseler gowy bolar.
At.
Öz adyňy ýazmak, ünsi çekmegi gowy görýän, başga biriniň ady bolsa, kelläň, ünsiň şol adamdadygyny belli edýär.
Inedördül.
Çynlakaý, durnyklylygyň nyşany. Ýönekeýje maksatlara meýilli, özi, sözi dogry adamlar. Durmyşyny howpsyz ýaşamaga çalyşýanlar.
Tegelek.
Soňsuzlygyň, bütinligiň, birligiň we goramagyň nyşany. Ýüregi söýgüden doly bolan degişgen adamlar tegelek çyzmagy halaýarlar. Özlerini esasan ikinji planda saklaýarlar.
Parallel çyzyklar.
Sowuk ganly, gyssagly pursatlarda derrew herekede geçmegi başarýan adamlardyr. Näme isleýändiklerini gowy bilýärler. Eger çyzyklar diagonal bolsa, ol adamyň lider bolmaga meýillidigini aňladýar.
Göni çyzyklar.
Esasan aç-açan, az we manyly gürleýän adamlar.
0 (nol) ýa-da x
Bäsdeşlige ukyply adamlar.
Ýyldyz.
Bilesigeliji, öwrenmäge ukyply, temany çuňňur analiz edýän adamlardyr. Esasanam Idealist bolanlar ýyldyz çekýärler.
Zigzag (tolkun-tolkun)
Togalak içindäki zigzaglar romantizm duýgulary agdyklyk edýänler. Dik we ýiti zigzaglar bolsa gaharly adamlar.
Çöpden adam.
Duýgylaryna gözegçilik edip bilýän adamlar.
9
91
awesome
13.05.2022 15:18
Adam ýaly adam bolmak umydy bilen…
Biz bir çyg süýt emen barlyklar. Görenlerimizden kän, eşidenlerimize ynanýas. Gybat etmegi gowy görýäris.
Gadyr bilemzok, köplenç söýmeli ýerimizde göwne degýäris, ýürekleri döwýäris. Elimizdäki bilen kaýyl bolmagy bilmän, elimizdäkiň gadyryny ýitirenimizde bilýäris. Ilkinji pursatda has berk düwün etmegiň ýerine, hemme zady has inçe ýerinden ýyrtýarys.
Bäş minut soňumyzyň garantiýasy ýok welin, ynsanlaryň ýapyşan şahasyny, arzuwlaryny ýykýas. Biz hemişe bilelikde gülüp bilsek hem, aglamagyň tarapdary. Gürlemeli zadymyza lal, eşdilmeli zatlara ker biz.
Bu durmuşda hemme zadyň başlangyjynyň bolşy ýaly, soňam bar. Her ynsanyň ölüm ajysyny dadyşy, her yşkyň aýralygy dadyşy ýaly…
Baky bolan zat bolsa, merhemet we wyždan.
Merhemet ynsandan gitmesin, galan zat näme-de bolsa çözüler. Garşyňyza kim çyksa çyksyn, söýen bolsaňyz, ýerine başgasy goýulsa-da, merhemediňizden we wyždanyňyzdan uzaklaşmaň. Çünki uzaklaşanlar ýoluny tapanoklar…
Sizden gidenlere gargynmaga gerek ýok. “Allajan göwnüňe görä bersin” diýip, gidiş biledini kesiň. Bu oňa-da ýeter, size-de. Gün geler yşkyň geçijisi däl-de hakykysy girer kalbyňyza. Şeýlelik-de bir ömür iň owadan söýgi bilen bile galarsyňyz.
Ýylgyrmagyň hem sadaka bolan bu durmuşynda, gowy niýetli ynsanlaryň, erbet niýetli ynsanlara baryny bermesi, zyýan däl, Allaň gatynda bereketdir. Netijede söýgi aňsat gazanylýan zat däl.
Ýagşylyk barada şeýle bir hekaýa bardy.
“Günleriň birinde Hz. Musa bir itiň ýarasyndan syzlanyp ýatyşyny görüp oňa ýakynlaşýar. Muny gören ynsanlar, itiň we Hz. Musanyň ýanyna gelýärler. Hz. Musa itiň aýagyna tiken çümenini görýär. Ol ynsanlar: “Eý Musa ol itdir, ýagşylyk bilmez, dişlär seni, goý şeýle galsyn” diýerler. Emma Hz. Musa itiň bu naýynjar ýatyşy üçin, ol ynsanlary diňlemän, itiň aýagyndaky tikeni çykarjak bolýar. It janynyň ýangyjyna Hz. Musany dişleýär. Emma tikeni çykarmagy başarýar. Soňra ynsanlar özlerini hakly çykarjak bolup: “Itiň ýagşylyk bilmejegini, seni dişlejegini aýdypdyk. Näme üçin bizi diňlemediň?” diýip soraýarlar.
Hz. Musa: “Ol it, men ynsan. Ol itligini etdi, men hem ynsanlygymy…”
Ýagny, ýagşylykdan geçmäň. Hemişe duýgularyňyzyň yzyndan gidiň. Ajysyny çekmelem bolsa, yşka ajy bilen serediň. Gynanjagyňyzy bilip söýüň. Ajysy bol yşkyň, ömri uzak bolar…
Ynsan köplenç yşkdan uzaklaşan wagty, duýgularyndaky ol ýylylygy gözleýär. Itleriň hem itligini eden, gynansakda ynsanlaryň ynsanlygyny etmeýän bir gök asmanyň aşagynda dem alýarys. It ýaly wepadar bolmaýan ynsanlaryň ýaşaýan dünýäsinde, itiň itligine edişini geň görülmez. Söýmekden çekinmäň. Her näme bolsa-da, erbetlige gowulyk bilen serediň. Alla bize bir sežde, iki elimiziň aýasy ýaly ýakyn. Durmuşyňdaky ýoklar üçin gynanma. Alla biz bilen. Niýetimizi gören Alla iň haýyrly gapylary açar kalbymyza…
15
62
awesome
12.05.2022 23:21
Adam Fewer'iň "Mümkinçiliksiz"(Improbable)atly kitabyndan 10 sitata
1.“Asyrlar boýy oýnasa-da, hiç bir tomaşaçy sahna çykyp Romeonyň zäherli içgini içmegine garşy bolmady. Gäminiň ahyrsoňy gark boljakdygy belli bolsa-da, “Titanik” -e birnäçe gezek tomaşa edildi. Gutarar gorkysy bilen söýgüden gaçsaň, durmuşdan lezzet almarsyň.Çünki, Romeo ölmeli “Titanik” batmaly, ýöne söýgi hemme zada garamazdan ýaşamaly. ”
2."Küşt durmuş ýalydyr, David"-diýdi kakasy . “Her bölegiň öz wezipesi bar. Käbirleri ejiz, käbirleri güýçli. Käbiri oýnuň başynda, käbiri ahyrynda peýdaly. Emma ýeňiş gazanmak üçin hemmesini ulanmaly. Durmuşda bolşy ýaly, küştde-de hasap ýok. On bölek ýitirip, ýene-de oýunda ýeňiş gazanyp bilersiň. Ine, küştüň gözelligi. islendik wagt hemme zat düýbünden üýtgäp biler. Ýeňmek üçin etmeli ýeketäk zadyň, tagtada bolup biläýjek hereketleri , olaryň manylaryny bilmek we garşydaşyň näme etjekdigini öňünden bilmekdir. "
3.“Geljek , görýänçäň şekilsizdir. Bir teňňäni zyňanyňyzda iki sany geljek bar, biri dükge(орёл), beýlekisi jikge (решка), ýöne sen ony görýänçäň ikisi hem däl. ”
4."Näme üçin saňa ogurlygy öwretdikä ? “Fýodor: -agentiň iň möhüm ussatlygy, bolmaly däl ýerlerden almaly däl zatlary alyp bilmegidir. Aslynda agent bolmak bilen ogry bolmak arasynda kän bir tapawut ýok. Maksat ogurlamak. Ogry gymmat bahaly zatlary ogurlar, agent syrlary. ”
5."Mümkin däl diýen zat ýok , diňe käbir wakalaryň bolmak mümkinçiligi has pesdir"
6."Kararlar dogry ýada ýalňyş däldir.Kararlar karardyr.Sen özüňe görä iň gowsyny saýla."
7."Ýagtylykdan has tiz zat pikirleniş tizligidir."
8.“Her bir saýlawyň ýaramaz netijeleri bolup bilerdi. Esasy töwekgelçiligi bahalandyrmak we azaltmakdy. Töwekgelçilik faktoryny hiç wagt ýok edip bolmaz, doly ýok edip bolmaz. Munuň ýaly zat hiç wagt hasaplanyp bilinmezdi. Bu durmuşyň iň gowy bölegi; islendik zat bolup biler. Her näçe mümkinçiliksiz bolsa bolsun. Bolmajak bir waka hökman bolardy "
9."Durmuşda iň möhüm zat paýlanan kartlar we oýunda bolup bolmazlykdy."
10.Adamlar tutulanda hijem batyrgaý däldi ".
14
55