Dünýä seni goýjak diýse,
Ynanma köňlüm ynanma!
Köňül berip söýjek diýse,
Ynanma köňlüm ynanma!
Bagt baýlygyn berjek diýse,
Ykbal ganat gerjek diýse,
Döwran bile ýörjek diýse,
Ynanma köňlüm ynanma!
Görküň baky bar men diýse,
Döwlet saňa ýar men diýse,
Şüm ajal bizar men diýse,
Ynanma köňlüm ynanma !
Ömrüň ýazy geçmen diýse,
Güýç kuwwatyň gaçman diýse,
Ýer agzyny açman diýse,
Ynanma köňlüm ynanma!
Ýaşyň ýetjek diýse ýüze,
Hijran gelmen diýse size,
Diýr Gylyjy her bir söze,
Ynanma köňlüm ynanma!
