Aýtsana, ezizim, näme üçin geldiň?

Köýen ýüregimi täzeden daglap,

Meni küýsäp, görmek üçin geldiňmi?

Jadyly gözleriň mährine baglap,

Yşk ataşym dörmek üçin geldiňmi?

Aýtsana, ezizim, näme üçin geldiň?

Owadan gözleriň içimden geçip,

Meni çişe üzmek üçin geldiňmi?

Soňky ýola ugratmaga “don biçip”,

Gözýaşyma dözmek üçin geldiňmi?

Aýtsana, ezizim, näme üçin geldiň?

Jadyly gözleriň erkime goýman,

Ot içinde ýakmak üçin geldiňmi?

Ozalky ýakanyň az görüp doýman,

Ýene ömrüm ýakmak üçin geldiňmi?

Aýtsana, ezizim, näme üçin geldiň?

Ýene-de alnymdan Gün bolup çykdyň,

Yşk ataşda ýakmak üçin geldiňmi?

Jadyly gözleňde ýyldyrym çakyp,

Ýanan köze bakmak üçin geldiňmi?

Aýtsana, ezizim, näme üçin geldiň?

Her kese gözlermi söýmeklik höwes,

Aşyk göz aglasa, durlanar nepes,

Jadyly gözleriň, ýakmasana, bes,

Ýene oda atmak üçin geldiňmi?

Aýtsana, ezizim, näme üçin geldiň?

Şol günäňi ýuwmak üçin geldiňmi,

Gözýaş silim sowmak üçin geldiňmi,

Öz kerebiňe salmak üçin geldiňmi,

Dymma-da, garagöz, näme üçin geldiň?