1962-nji ýylyň Ferrari 250 GTO ýaryş awtomobili Nýu-Ýorkda geçirilen Sotheby’s auksionynda rekord 51,7 mln dollara satyldy. Bu barada çäräniň resmi saýtyna salgylanyp, Report habar berýär.

Satylan Ferrari 250 GTO 60 ýyldan gowrak wagt mundan ozal “Le-Manyň 24 sagady” sport ýaryşyna gatnaşdy, ýöne ol güýç gurluşynyň aşa gyzmagy sebäpli 24 sagatlyk ýaryşy tamamlap bilmedi. Muňa garamazdan, awtomobil Germaniýanyň Nýurburgring ýaryş ýolunda geçirilen 1 müň km aralyga başga bir ýaryşda öz klasynda ilkinji bolup pellehana geldi.

Ilkibaşda awtomobil dört litrlik V12 hereketlendirijisi bilen üpjün edildi. Soň güýç gurluşy adaty üç litrlik enjam bilen çalşyryldy.

1985-nji ýylda awtomobil Birleşen Ştatlara geldi we häzirki ýyla çenli biriniň elinde saklandy. Soňky 38 ýylyň dowamynda bu 250 GTO dünýäniň awtoşoularyna we wintaž ulaglarynyň sergisine gatnaşdy.

Awtomobil bilen birlikde onuň täze eýesi awtoulagy Nýurburgrindäki we Le-Mandaky ýaryşlara taýýarlamak üçin asyl nusgadaky resminamalary aldy, bu hem tassyklanan taryhy gymmaty sebäpli lotuň bahasyny ep-esli ýokarlandyrdy.

Hatikonyň doglan ýeri bolan Akita prefekturasynyň Odate şäherinde onuň doglan gününiň 100 ýyllygy mynasybetli iki günlük dabaralar geçirildi. Sibuýa demirýol menzilinde ýubileý petekler satuwa çykaryldy, Hatikonyň heýkeliniň golaýynda ite we Sibuýa etrabyna bagyşlanan pawilýon guraldy.

Akita-inu tohumyna degişli bolan Hatiko 1923-nji ýylda Akita prefekturasynyň Odate şäherinde dünýä indi, 50 gün soň Tokio uniwersitetiniň professory Hidesaburo Ueno sowgat berildi. Hati eýesini işe ugradyp we işden gelende garşylap başlady. 1925-nji ýylda professor Ueno işe gitdi we gaýdyp gelmedi – ol professorlaryň mejlisinde tarpataýyn aradan çykdy. Hati eýesiniň aradan çykandygyny bilmeýärdi we günde iki gezek – irden we agşam Sibuýa demirýol menziline gelip, eýesine garaşdy. Hatiko eýesine adatça Sibuýada däl-de, uniwersitetiň golaýynda garaşýardy. Emma professor köplenç iş saparlaryna gidýärdi we bu ýagdaýlarda Sibuýa menzilinden peýdalanýardy. Hatiko Sibuýa demirýol menziline günde iki gezek, irden we agşam professor iş saparyndan gaýdyp geler diýen umyt bilen gatnap başlady. 1932-nji ýylda Hatiko hakynda gazet makalasy çap edildi. Şeýlelikde, ol uly meşhurlyk gazanyp, 2 ýyldan soň haýyr-sahawat serişdeleriniň hasabyna «Wepaly it Hatiko» ýadygärligi guruldy; Hati ýadygärligiň açylyş dabarasyna gatnaşdy. 1935-nji ýylda Hatiko Sibuýanyň golaýynda aradan çykdy we şol ýylda onuň hatyrasyna ýene bir ýadygärlik guruldy.

Şondan bäri Hatikonyň ýadygärligi Tokioda duşuşyk üçin iň meşhur ýerleriň birine öwrüldi. Hatikonyň doglan senesi 10-njy noýabr hasaplanýar, ýöne onuň doglan güni mynasybetli çäreleri hepdäniň ahyrynda geçirmek kararyna gelindi.

Türkmenistanyň Daşoguz welaýatynyň Görogly etrabynda Şahymerdan Şammyýew bilen Sülgün Töräýewanyň maşgalasynda üçem perzentler dünýä indi. Bu şatlykly waka etrapda soňky ýüz ýylda ikinji gezek hasaba alyndy diýip, «Nebit-Gaz» elektron neşiri habar berýär.

2023-nji ýylyň 10-njy oktýabrynda 10 sagat 10 minutda dünýä inen perzentlere Dünýä, Dursun, Abat diýip at dakyldy.

Maşgalabaşy Şahymerdan Şammyýew «Türkmennebit» döwlet konserniniň «Türkmennebitönümleri» baş müdirliginiň «Daşoguznebitönümleri» kärhanasynda on ýyldan gowrak wagtdan bäri sürüji bolup zähmet çekip gelýär. Sülgün Töräýewa bolsa 2010-njy ýyldan bäri obada öý hojalykçy, ussat pileçi, edermen ýygymçy hökmünde tanalýar.

Belläp geçsek, Şahymerdan bilen Sülgüniň agzybir maşgalasynda öňem iki çaga bar. Maşgalanyň ilkinji perzendi — Altynaý Görogly etrabynyň 19-njy orta mekdebiniň 4-nji synpynda, Jöwher bolsa şol orta mekdebiň 2-nji synpynda okaýar.

“Titanigiň” birinji derejeli ýolagçylary üçin agşamlyk naharynyň menýusynyň bir nusgasy Beýik Britaniýada geçirilen Henry Aldridge and Son auksionynda 84 müň funt sterlinge satyldy. Bu barada Sky News teleýaýlymyna salgylanyp, rbc.ru habar berýär.

Menýu 1912-nji ýylyň 11-nji apreli bilen senelenýär. Şol gün agşamlyk nahary üçin gäminiň ýolagçylaryna ustrisa, sygyr eti, guzy we ördek hödürlendi.

Satylan menýuda suwuň ýetiren zeperiniň yzlary bar diýip, Sky news belleýär. Nusga taryhçy Len Stiwensonyň 1960-njy ýyllardaky fotoalbomynda tapyldy. Teleýaýlymyň maglumatlaryna görä, menýuny oňa diri galan ýolagçylaryň biriniň beren bolmagy ähtimal.

Menýunyň ölçegi 6,25/4,25 dýuým (takmynan, 16/11 sm) bolup, “Titanigi” guran White Star Line kompaniýasynyň gyzyl baýdagy bilen bezelipdir.

Lot üçin başlangyç baha 60 müň funt sterling boldy.

2016-njy ýylda Ilon Mask we alymlar topary tarapyndan esaslandyrylan Neuralink kompaniýasy diňe bir mümkinçiligi çäkli adamlaryň daş-töweregindäkiler bilen aragatnaşyk etmek ukybyny bölekleýin dikeltmän, eýsem ysmaz bolanlary aýaga galdyryp biljek beýni implantlaryny döretmegi maksat edindi. Adamlarda synagdan geçirmäge rugsat almak bilen, Neuralink eýýäm geljek ýyl 11 hassany operasiýa etmekçi bolýar diýip, 3dnews.ru belleýär.

Bloomberg agentliginiň materialynda bellenilişi ýaly, Ilon Mask Neuralink implantlarynyň adamlardaky kliniki synaglaryna rugsat bermek işini çaltlaşdyrmagy başardy, sebäbi adaty tertip ilkinji hassanyň üstünlikli operasiýadan soň hünärmenleriň elinde bir ýyl gözegçilikde bolmagyny we diňe şondan soň kompaniýa indiki operasiýalary geçirmäge rugsat berilmegini göz öňünde tutýar. Şeýle-de bolsa, FDA agentligi Neuralink kompaniýasyna implantlary birbada 11 hassada synagdan geçirmäge rugsat berdi we olar eýýäm geljek ýyl operasiýa ediler.

Kompaniýa her bir operasiýanyň bahasyny 10 500 dollar bilen bahalandyrýar, ýöne ätiýaçlandyryş kompaniýalary her bir hassa üçin 40 000 dollar tölemeli bolarlar. Startapa eýýäm müňlerçe hassa ýüz tutdy, ýöne indiki ýyla çenli synagyň ilkinji tapgyry üçin 11 meýletinçi saýlanar. Bellenilişi ýaly, tejribä gatnaşyjylaryň her biri 40 ýaşdan kiçi hem-de el we aýak ysmazyndan ejir çekýän bolmaly.

2025-nji ýylda kompaniýa adamlara 27 implant oturtmagy, 2026-njy ýylda ýene 79 hassada operasiýa geçirmegi, 2027-nji ýylda 499 operasiýa, 2030-njy ýyla çenli bolsa her ýyl 22 204 operasiýa geçirmegi meýilleşdirýär. Bäş ýyldan kompaniýa operasiýalardan ýylda 100 mln dollar möçberde girdeji almagy göz öňünde tutýar. Öz işläp düzen robotyndan başga-da, Neuralink ýarym geçiriji komponentleri özbaşdak işläp düzýär we taýýarlaýar. Implant iş wagty gyzmaly däldir ýa-da haýsydyr bir sebäp bilen hassany biynjalyk etmeli däldir, şonuň üçin bu tapgyrda komponentleriň köpüsini kompaniýa öz güýji bilen işläp düzýär we öndürýär.

2021-nji ýylda, takmynan, 12 hirurgiýa roboty 155 haýwana çip oturtdy, geçen ýyl operasiýalaryň sany 294-e ýetdi.

Google Chromium-y işläp düzüjiler topary Google Chromium brauzerine soňky birnäçe ýylda onuň gowulaşmagy üçin edilen işler barada blogda ýazdylar.

Windows 11-de, esasanam, Windows 11-iň Efficiency Mode “netijelilik režimi” diýlip atlandyrylýan üçin goşmaçalar girizildi. Aýratynam, Firefox, Chromium-a däl-de, Gecko hereketlendirijisine esaslanýan bolsa-da, bu režimi goldaýar.

Google-yň belläp geçişi ýaly, Chrome-da sahypa ýüklemek öňküden ortaça 166 ms çalt amala aşýar. Munuň ujypsyzja gowulaşma ýaly bolup görünmegi mümkin, ýöne ownuk üýtgeşmeler jemlenip, internete ep-esli täsir edip biler.

Işläp düzüjileriň batyrgaýlyk bilen aýdyşy ýaly, Chrome ulanyjylaryň sahypalaryň ýüklenmegine garaşmaly boljak 10 000 ýyldan gowrak wagtyny tygşytlady, şeýle hem saýtlaryň jogap bermegine-de olar 1200 ýyl garaşmaly bolardy. Mundan başga-da, bu san maglumaty Windows kompýuterlerinde we Android esasly enjamlarda 2023-nji ýyldaky görkezijileri göz öňünde tutýar - Windows-da 2 müň ýyl, Android-de 8 müň ýyl tygşytlanýar.

Amerikanyň Birleşen Ştatlarynyň lukmanlary adama tutuş bir gözi oturtmak boýunça taryhda ilkinji operasiýany geçirdiler. Degişli metbugat relizi Nýu-Ýorkyň Langon uniwersitetiniň (NYULH) saýtynda ýerleşdirildi diýip, TASS habar berýär.

“Nýu-Ýork uniwersitetiniň Langon lukmançylyk merkeziniň hirurglar topary Arkanzasdan 46 ýaşly harby weteranyna tutuş bir gözi we ýüz bölegini oturtmak boýunça dünýäde ilkinji operasiýany geçirdi” – diýip, lukmançylyk merkezi habar berýär.

Bellenilişi ýaly, bu adama iş ýerinde ýokary basyş astyndaky sime tötänleýin degenden soň ýokary derejede güýçli tok şikes ýetirýär. Netijede, ol çep gözüni, burnuny, dodagyny, öň dişlerini, çep ýaňagynyň bir bölegini we süňke çenli eňegini ýitirýär.

Operasiýa 21 sagada golaý wagt dowam edýär, oňa 140-dan gowrak hirurg, şepagat uýasy we beýleki lukmançylyk işgärleri gatnaşýar.

Relizde hassanyň täze göz bilen görüp biljekdiginiň ýa-da ýokdugynyň entek kesgitlenmändigi, ýöne organyň transplantasiýadan bäri “ajaýyp saglyk alamatlaryny” görkezýändigi bellenilýär. Mundan başga-da, hirurglaryň bu üstünliginiň “görüşi bejermekde geljekki ösüşler üçin täze mümkinçilikleri döredýändigi” bellenilýär.