Imissyou
21.04.2024 07:17
Ýaşa..!
Al şapak görmese göwnüňde hoşuň,
Ir säher dogmaga ýaýdanarmyşyn.
Gama däl, gudrata ýaýka-da başyň,
Ýaşa ak günleriň göwni galmasyn!
Heý, gulp ýasalypmy ýany açarsyz,
Heý, gyş görüpmidiň soňy baharsyz?!
Öz bagtyňa haýran-haýran bakarsyň —
Umytly bol, şere şine galmasyn!
Düýnüňde eglenseň, şu günüň galar,
Dünýe bir göç.. Söýlüp-söýeniň galar.
Tebsiremez göwni göwünden ganan...
Ýaşa, ak ertirler düýne galmasyn!
Hümmet bardyr ak ýagyşlaň ýagşynda,
Hikmet bardyr ak daňlaryň çogşunda.
Boljak bolar, geljek geler wagtynda...
Umyt utanmasyn, müýne galmasyn!
Durmuş—gözel, bolmaweri bigeleň,
Göwni giň tut, dünýe şonça giňeler.
Söýüp, ömür paýlap birek-birege,
Ýaşalyň! Göwünde kine galmasyn!
© Kakamyrat Rejepow
21
21
Imissyou
20.04.2024 22:22
Gijelerime rahat bergin,
Gündizime takat bergin,
Ertir irden oýanamda,
Günüme şatlyk garylsyn,
Başlygym işe gelýärkä,
Ulagnyň tekeri ýarylsyn.
Ýigitler köpüräk öýlensin,
Hemraňky ýaly toý gelsin,
Çuwal-çuwal gülki bergin,
Begenmäne çaga ýaly,
Gürlesemde toýda gürläýin,
Diktor Mergen aga ýaly,
Ýüregmize hruç ber,
Aýalmyza без звук ber,
Ýazylsyn gelse gaharym,
Mugut tapylsyn naharym,
Pul soramasyn goňşular,
Galan zat bilen oňşular,
Baş bugalterimiz ýalňyşypjyk,
Aýlygymyzy ir geçirsin,
Bergidarlam köle ýa derýa,
Bellik depderini gaçyrsyn,
Günortan çaýa gelemde,
Hemme zatlar taýyn bolsun,
Ertir ýolda galsa biri,
Onuňam ady gaýyn bolsun!
🤲🤲🤲🤲🤲🤲🤲🤲🤲🤲
Aýdylan dileglermiz kabul bolsun Allajan, howpdan hatardan bela-beterden Aýal belasyndan gaýyn belasyndan özüň gora jan Allajan.
Omin🤲
28
252
Imissyou
20.04.2024 09:11
Gördüňmi?
Eliňden gidirip arzyly zadyň,
Dünýäň derdi bilen aglap gördüňmi?
Gözden gam inende,
Soralsa halyň
"Aý, gowu-la" diýip aldap gördüňmi?
Gijelerne ýalňyz galyp gördüňmi,
Ýyldyzly köýnegin synlap asmanyň?
Gülkiňe gussany garyp gördüňmi,
Bendi bolup em tapylmaz ahwala?
Gördüňmi, ýodany yzarlap ýüp deý,
Nämedir bir zady küýsän mahalyň?
Awunyp gördüňmi minnetli gepden?
Gyş bolup gördümi ýaşyl baharyň?
Käte-käte adam gözläp gördüňmi?
Elewräp gördüňmi ýüregiň gysyp?
Uzak menzillere ugrap gördüňmi,
Kiçijik haltaňy arkaňa asyp?
Daňylyp gördüňmi soňsuz soraga,
Jogap tapman, ýüregiňi çişirip?
Garaşyp gördüňmi kimdir birine,
Gije-gündiz garap ýatyp işige?
Bulutdan syrygyp, ýagyş ýaganda,
Gussalaň bar zatdan çykýarmy üstün?
Çyndanam şeýlemi?
Gutlaýan onda
Bir meňzeş ekenik,
Hoş geldiň, dostum!
©Aşyr Hanow
30
22
Imissyou
19.04.2024 20:11
Gürlemezden ozal oýlan!
Jana tenekar, güneşli günleriň biridi. Demirýol menzilindäki adamlar otlynyň gelerine garaşyp, gaýda-gaýmalaşyk bolup ýördüler. Olaryň içinde ýaş ýigitleriň – dostlaryň şadyýan sesleri aýratyn saýlanýardy. Otlynyň gelýändigi habar berlenden soň, oňa münjekler taýýarlyk görüp başladylar. Dostlar otlynyň gelenine mähetdel, hemmelerden öň diýen ýaly uly şowhun bilen otla münüp, öz orunlaryny eýelediler.
Otly ýaňja ýöräp başlady welin, bir gartaşan adam bilen on dört-on bäş ýaşlaryndaky ýetginjek aýagaldygyna ylgaşlap otla mündüler. Olar dostlaryň ýanyndaky boş ýerlere geçip ornaşykly oturdylar.
Ýetginjek her bir zada haýran galmak bilen seredýärdi. Ol otlynyň içine öwrenişenden soň, kakasyna ýüzlendi: “Kaka, otly ýöräp başlady we biziň yzymyzda galan zatlar hem ýöräp başlady”. Kakasy ýylgyryp, oglunyň başyny sypady.
Otly öz hereketini çaltlaşdyranda bolsa: “Kaka, ýaşyl agaçlar biziň yzymyzdan ylgaýar” diýip, tolgunyp seslendi. Kakasy: “Hawa, gadyrdanym” diýip ýylgyrdy.
Ýetginjegiň çagajyk ýaly ähli zada uly täsin galma bilen seredýändigini onuň sesinden hem bilmek bolýardy.
Otlynyň içindäki miwe satyjy bularyň deňine ýetende ogly: “Meniň alma iýesim gelýär” diýdi. Kakasy oňa alma satyn alyp berdi. Ýetginjek: “Beý-bä, almalar tagamyndan has ajap görünýär” diýdi.
Hälki dostlar bolup geçýän ähli hereketlere gülümsireme bilen seredip otyrdylar. Ýetginjegiň kakasyndan: “Siziň ogluňyzyň saglygynda mesele barmy? Näme üçin özüni beýle alyp barýar?” diýip sowal beren ýigit we onuň dostlary gülüşdiler. “Bagyşlaweriň, siziň ogluňyz sag däl ýaly”.
Ýetginjegiň kakasy agraslyk bilen jogap berdi: “Oglum kör bolup dünýä indi. Sanalgyja gün mundan öň onuň gözlerini bejertdik. Şonuň üçinem ol bu synlaýan zatlarynyň ählisini ömründe birinji gezek görýär”.
Dostlaryň sesine suw sepilen ýaly boldy. Olar ýetginjekden we onuň kakasyndan ötünç soradylar.
Hawa, gürlemezden ozal oýlan!
Iňlis dilinden terjime eden
Ogulsuraý MEDEDOWA
26
82
