Agyrma ýüregim, agyrma beýle.

Agyrma ýüregim, agyrma beýle.
Ýör bile çykaly seýrana seýle.
Belki gussalaryň egsiler gider.
Bilýäňmi hol günem bolupdy şeýle.

Baý şonda kösäpdiň agyryp öte
Şonda-da ikimiz çykypdyk çete.
Derman-därä pisintdagam etmediň,
Kim bilýär nämeler düwdüň sen nete.

Gereginden artyk urjak bolduňmy?
Ýa urup ýadadyň durjak bolduňmy?
Bilmekligim üçin durmuş gymmatyn,
Ýa gorkuzup hile gurjak bolduňmy?

Siňesim gelenok ýeriň teýine,
Irden görenlerim ýogaldy öýle,
Entäk edilmedik işlerim ýatyr.
Agyrma ýüregim agyrma beýle.