Çagalyk

Gaflat perdesini syryp öňümden,
Geçipdirin çagalygyň deňinden.
Çagalygyň neneň süýjüdigini,
Gowusy, deň-duşlar, soramaň menden!

Alada ýok heniz tämiz başyňda,
Hemmeler perwana degre-daşyňda.
Şol perwana adamlaryň köpüsi
Çetleşäýýäň eken juwan ýaşyňda.

Derek deý bolmagy arzuw edersiň,
Ätmesiz ýerlere aýak sekersiň,
Öz özüňden mydam hoşal bolsaň-da,
Özgelere az wagtlyk zepersiň.

Şahyr, bu gün perwaz ursun ýüregiň,
Goý, perwazyň diňlesin ulus-iliň:
Ýagşy günlerde-de, ýaman günde-de
Mydam çagalygyň gadyryn biliň!