Iki ädim öňe ätsem,
Yza iki ädim ätýäň,
Iki ädim yza ätsem
Öňe iki ädim ätýäň.
Hiç düşünip bilemok
Muny näme üçin etýäň?!
Sen muny nädip etýäň?!

Nazar saldym Jeýhuna,
Hazara nazar aýladym.
Nazar saldym Garaguma,
Köpetdaga, Köýtendaga
Baryna nazar aýladym.

Şu döwürleň barynda-da
Hem-ä maňa ýakyndyň sen,
Hem-em menden daşdyň sen,
Seň syryňy açjak boldum,
Meň syrymy açdyň sen.

Men-ä saňa, sen-em maňa
Hem näbelet, Hem belet
Yzda galdy menziller,
Hany tanyş sesýetim?!
Sen meniň hem-ä agyr
Hem-em süýji ezýetim!
Ýakynlaşsam daşlaşdyň
Ýakynaşdyň daşlaşsam
Ah sen, gözýetim!