12-iň jaňyn urar sagadyň dili,
Dünýä höküm eder Ýanwaryň ýeli.
Ýoluna sepeläp arzuwdan güli,
Täze ýyla gadam uralyň, dostlar!

Bezesin törleri goňşylar, dostlar,
Şanyna aýdylsyn gutlaglar, tostlar,
Içilsin şerbetler, iýilsin tortlar,
Täze ýyly garşy alalyň, dostlar!

Täze ýyla şatlyk bilen ätläliň,
Geçen ýyly ýagşylykda ýatlalyň,
Gussalaň, gaýgylaň bagryn otlalyň,
Kinäni Sibire süreliň, dostlar!

Ýaşlarymyz – ekram, edenli bolsun,
Ýaşulular – sagat bedenli bolsun,
Işlerimiz batly gadamly bolsun,
Atlary dört nala goşalyň, dostlar!

Millet - bir daragtdyr,
Her kim - bir ýaprak,
Taýpa-tire - şaha,
Welaýat - baldak,
Atamyz – Watandyr,
Enemiz – toprak,
Hiç kimsäni ýetim saýmalyň, dostlar!

Dyzynda oglanjyk, gyzjagaz bile,
Öýňüzi bezesin – ata hem ene ,
Iki elti ýüz urmasyn jenjele,
Gelinleri – ýaşmak bezesin, dostlar!

Gyzlarymyz – erkli bolsun erkine,
Haýa, şerim – görmek goşsun görküne.
Türkmen aga gyzyn bermez her kime,
Söýgiň arkasynda duralyň, dostlar!

Ýaşy ýeten juwan öýlensin-çyksyn,
Ykbal ýüzlerine ynsaply baksyn,
Allam nikalarny arşda çatsyn,
Sallançagy bäbek bezesin, dostlar!

Bagtdan berk binýatly gurulsyn öýler,
Saglykdan berilsin tükenmez paýlar,
Rysgaldanam alyp dürli serpaýlar,
Bereket – saçagy bezesin, dostlar!

Döwlet – ojagňyza bolsun örkli,
Üstünlik hem şatlyk size söýekli,
Aýdanlarymyň hemmesine gerekli –
Agzybirlik hökmün ýöretsin, dostlar!

Ine, bäş minutdan 12 saz çalar,
Täze ýyl ýylgyryp nazaryn salar.
Köne ýylam bizden razy bolar,
Bizem oňa ak ýol diläliň, dostlar!

Ýurdumyzy äkideliň has öňe,
Gülledeliň,
Watan - güllesin diňe.
Adyny goşalyň aýdyma, heňe,
Türkmenistan –
dünýä ýaň salsyn, dostlar!