ÝAZMASY AGYR DÜŞEN GOŞGY (DOWAMY)

Ony aýalyndan başga
Görkezmedi hiç kime.
Är-heleý karara geldi:
“Barsak bor-la üçüne!”

...Bütin obañ gözi ýolda.
Garaşyp dur hemmeler.
Atasy pyşyrdaýar:
“Geler, geler, geler”.

Onýança-da “Gelýär!” diýip,
Ardyndy bir ýaşuly.
Göründi ýaşyl meýdanda
“Wolgalaryñ” ýaşyly.

“Geler diýdim ähbeti!”
Bir daýandy atasy.
Gara-köýük ýüzüniñ
Artyp gitdi ýagtysy.

Onýança-da ýaşyl “Wolga”
Aşak indi ýapydan.
Geljek adamyñ deregne
Şofýor çykdy gapydan.

“Şu gün gelip biljek däl.
Gyssagly bir iş çykdy...”
Birden atañ gözlerinden
Iki çogdam ýaş çykdy.

Ýetmiş ýaşyñ içinde
Aglamadyk ol goja,
Gözýaşyny süpürdi-de,
Bir ýylgyrdy çalaja.

Ol ýylgyryş ömürbaky
Çykmaz meniñ ýadymdan.
Beýle aýylganç ýylgyrşy
Görmändim men adamda.

...Göterdiler enäniñ
Ak guş ýaly tabydyn.
Ýaz şemaly ykjatdy
Üstündäki mawudyn.

Salladylar çukura
Ak saçly bir dünýäni.
Đçki öýüñ gapysyna
Eltilende enäni -

Iki omzuny diräp
Çukuryñ erñegine,
Hiç giresi gelmedi
Öz girmeli öýüne.

Đñ soñkuja pursatda-da
Öz ogluna garaşdy.
...Ýazsamam ýazdym weli,
Agyr düşdi bu goşgy.


Kerim.Gurbannepesow