Kwadrat we ýürek görnüşli garpyzlar
Gök we bakja ekinleriniň arasynda iň ähmiýetli bolan ekinleriň biri hem garpyz hasaplanylýar. Ol kädililer maşgalasyna degişli bolan bir ýyllyk ösümlikdir. Garpyzyň watany Günorta we Merkezi Afrikadyr.

Garpyzlaryň dürli görnüşleri bolup, olara tegelek, süýri, kwadrat, romb, ýürek şekillerini aýtmak bolýar. Gyzyl etli we ýaşyl derisi bolan adaty bolmadyk garpyzlar bar. Ösümligiň gögermeginden doly bişmegine çenli 90 gün gerek. Miwäniň soganlygy şireli we ysly. Togalak görnüşli garpyzlardan dürli şekilli garpyzlary ösdürip ýetişdirmek bolýar. Kwadrat garpyzlar köpler üçin geňdir. Ýöne aslynda bu garpyzlar beýle däl. Sebäbi genetikleriň, seleksionerleriň gudraty bilen bu görnüş alyndy. Aslynda, olar miwelerden emele gelýär. Garpyz çigitleriniň gögermegi üçin +15, +16 gradus ýylylyk gerek.

Kwadrat garpyzlar 1980-nji ýyllarda oýlanyp tapyldy. Bu garpyzlaryň ýaýran ýeri Ýaponiýa hasaplanylýar. Kwadrat garpyz 6 — 10 santimetre ýetende diametri aýdyň ýerde ýerleşdirilýär we plastik kub gutuda ornaşdyrylýar. Bu garpyzyň ähmiýetli tarapy köp daýhanlaryň ünsüni we köp güýjüni talap edýär. Suwarymly şertlerde ýokary hili agrotehniki çäreler geçirilende 180-200 sentnere çenli hasyl alyp bolýar. Ýürek görnüşli garpyzlar edil kwadrat garpyzlar ýaly ösdürilýär. Olar ýürek şekilli gutularda ösüş döwründen plastik gutularda ýerleşdirilýär. Aýna we tagta gutulardan peýdalanylanda belli wagtdan soň olar döwülýär we belli şekili almakda kynçylyk döredýär.

Kwadrat we ýürek şekilli garpyzlaryň ösmegi üçin topragyň düzümi mehaniki taýdan ýeňil çägesow topraklarda ösdürilip ýetişdirilýär. Bu görnüşe degişli garpyzlar el güýji bilen ýygnalyp alynýar. Onuň bişenligini daýhanlar daşky görnüşinden tanaýarlar. Kwadrat we ýürek şekilli garpyzlar, esasan, bezeg we owadanlyk üçin satyn alynýar. Dünýä bazarlarynda bu garpyzlaryň bahasy gymmat pula durýar. Içiniň etlek bölegi kän bir süýji bolmasa-da, daşky şekili boýunça has ähmiýetlidir. Olaryň agramy dürli-dürlüdir. Sowadyjylarda kwadrat garpyzlary togalak garpyza seredeniňde kän bir ýeri tutmaýar. Dürli toý baýramlarda garpyzyň kwadrat we ýürek görnüşi hemmäni özüne çekýär. Bu garpyzlar her bir adamyň esasy harydyna öwrüldi.

Türkmenportal