Gözýetimiň aňyrsynda gözleriň,
Menä seni, senem bagty gözlediň.
Saňa gowuşmajak hatyma siňdi,
Saňa aýdyp ýetişmedik sözlerim.

Gitdiň... Gaçdy söýgimiziň mazasy,
Bozuldy söýginiň ähti, wepasy.
"Bize höküm edip bilmez" - diýipdiň,
Aýralygyň hemişelik jepasy.

Ynsan ejiz eken, ykbal öňünde..
Muny maňa öwredipdiň bir kemsiz.
Gitdiň sen-ä, öz bagtyňy agtaryp,
A men bagty tapdym,
Ýöne ol sensiz.


Amangeldiýew Durdymyrat