Bagyşlamak

Bir-birege kine etdik ýene-de,
Indi dünýäň özem bizden öýkeli.
Ýürekden ýürege ýol çeken söýgiň
Terpinipdir gursakdaky heýkeli.

Kineli bolsamam, halyňy her çak
Gökden uçan durnalardan soradym.
Gabanýaryn seni özge gözlerden
Hemem seni öz gözümden goradym.

Hatar gurap geçip barýar günlerem,
Ýol bolupdyr düýnki inçe ýodalar.
Men-ä seniň barlygyňda ýaşadym,
Senem meni ýatlaýansyň käteler.

Uzaklardan sözleşeli ikimiz,
Şemallary çapar edip arada.
Ýöne bolsun gürrüňmiziň ählisi
Bir-biregi bagyşlamak barada...

Allanur ÇARYÝEW