Bir käkilik aldyrsa türpe balasyn,
Saýraý-saýraý, yzlamaýan bolarmy?
Bir bilbil ýitirse gyzyl lälesin,
Hasratyndan sözlemeýän bolarmy?

Kürresi elinden gitse eşegiň,
Telmirip tört ýana gözlär uşagyn,
Akmaýa aldyrsa elden köşegin,
Bagryn bozup, bozlamaýan bolarmy?

Bala sesin diňlär, asyp gulagyn,
Döke-döke göz ýaşynyň bulagyn,
Ak jeren aldyrsa elden owlagyn,
Mäleý-mäleý, gözlemeýän bolarmy?

Agsagyň elinden alsaň agajyn,
Ýaman derde düşer, tapmaz alajyn,
Bir güýçli duşmana duşsa mekejin,
Jojugyny gizlemeýän bolarmy?

Aýralyga adam ogly neýlesin?
Kim galar, görmeýen ajal hilesin?
Magtymguly, haýwan bilse balasyn,
Ynsan bagryn duzlamaýan bolarmy?



Magtymguly Pyragy