Ala gözleriňi söwdügim, dilber,
Saňa bir tenhada sözüm bar meniň.
Atlas ýüküm dost köýünde çözüldi,
Bir zülpi garaga näzim bar meniň.

Ak gollara al-al hynalar ýakar,
Ala göze syýa sürmeler çeker,
Dosty bolan dostyň ýolyna bakar,
Dosta gidýän ýolda yzym bar meniň.

Ýigit bolan gizlin syryn bildirmez,
Gözel bolan gül meňzini soldurmaz,
Her bolar-bolmaza meýil bildirmez,
Bir laçyn awlara bazym bar meniň.

Garajaoglan diýer, gonanalar göçmez,
Bu aýralyk bizden arasyn açmaz,
Bir däli köňlüm bar, gözelden geçmez,
Gözellerden doymaz gözüm bar meniň.


Garajaoglan