Ýaşlygym ötensoň, meňzim solansoň
Geleniňde näme, gelmäňde näme?!
Meniň indi senden göwnüm sowansoň
Söýeniňde näme, söýmäňde näme?!

Sen diýip, ugryňda boldym perwana,
Söýmediň, otlary saldyň bu jana.
Üýtgänden soň derýaň ugry ters ýana,
Akanynda näme, akmanda näme?!

Nazarym düşensoň özge bir güle,
Bagtymy baglamsoň, men, şol gül bile,
Mundan soň gaşymda dönüp bilbile,
Saýramaňda näme, saýraňda näme?!

Gözlerimde saňa söýgi sönensoň,
Eden azabymy ýere gömensoň,
Daň ýyldyzy – ömrizaýa dönensoň,
Doganynda näme, dogmanda näme?!

Senden bir haýyşym, gelme sen indi!
Bagtyma badagyň urma sen indi!
Saňa ýazan şygrym görme sen indi,
Göreniňde näme, görmäňde näme?!

Awtor:Amangeldiýew Durdymyrat