Döner-kebabyň gelip çykyşy baradaky jedel gyzyşýar.


Germaniýa bilen Türkiýäniň arasynda milli naharlar, aýratyn hem döner-kebabyň gelip çykyşy barada jedeller gyzyşýar. Olar öz milli aşhanasyna juda aýawly garaýarlar diýip, «Bloomberg» neşirine salgylanýan «rg.ru» ýazýar.

Iýulda Stambuldaky Dönerleriň halkara federasiýasy Ýewropa Bileleşigine dik gowrulýan we kese kesilýän etli kotletleriň taýýarlanyşy boýunça berk ölçegleri girizmek baradaky talapnama bilen ýüz tutdy. Eger garbanyşhanalar we dükanlar bu tagam taýýarlanyş düzgünlerini berjaý etmeseler, olar öz önümlerini döner ýa-da döner-kebap diýip atlandyryp bilmezler.

Germaniýa muňa garşylyk bildirdi, sebäbi bu ýurtdaky etniki türkler döneri meksikalylardyr grekler ýaly al-pastor we giros diýen atlar bilen dürli görnüşde müşderilere hödürläp, meşhur tagama öwürdiler.

Hünärmenleriň köpüsi döner-kebabyň Germaniýanyň milli tagamyna öwrülendigini aýdýarlar. Ýurtdaky etniki türkleriň birnäçesi bolsa, Türkiýede has belli bolan çörege dolanan etli kebapdan tapawutly bolan kebaply sendwiçi (doner im brot) özleriniň ilkinji bolup tapandyklaryny aýdýarlar. Germaniýada bu sendwiç 1970-nji ýyllarda ýaýrap başlady. Kopengagende, Londonda we beýleki german däl şäherlerde “nemes dönerlerini” satýan dükanlar bar.

Şunuň bilen baglylykda, Türkiýäniň talapnamasy oňlanan ýagdaýynda nemes döner-kebap dükanlarynyň müňlerçesi adyny üýtgetmeli bolar hem-de bu pudagyň her ýyllyk 7 mlrd ýewro girdejisine täsir edip biler. Şunda mahabat we dükanlaryň adynyň üýtgedilmegi üçin köp pul sarp etmeli bolar.