Ýolum düşdi geldim seniň gapyňa,
"Ýar, oýangyl!" diýdim, sen oýanmadyň.
It-guş ah eýledi kylan zaryma,
Ýatanlar oýandy, sen oýanmadyň...

Daň-säherde öwser sabanyň ýeli,
Men bilbilem, ýat eýlärem ol güli,
Deňim-duşum aýdar: nedir hyýaly?
Syrym paş eýledim, ýar, oýanmadyň.

Gije garaňkydyr, gözlerim görmez,
Hyýalym keç boldy, pikirim ýörmez,
Ýagşydan, ýamandan ýarym ses bermez,
Gulagyň ker boldy, ýar, oýanmadyň.

Bir guş geldi, gondy tüýnük üstüne,
Nazar saldy akja öýüň astyna,
Ganat ýaýdy, gitdi älem pestine,
Ýatan guş oýandy, ýar, oýanmadyň.

Gapysyna geldim, görsem diýp ýüzün,
Hassa men, eşitsem ol şirin sözün,
Dünýäge taý görmen, ýar gara gözüň,
Gözlerim kör boldy, ýar, oýanmadyň.

Şykyrt edip, ýel oýnaýar işigin,
Söndüripdir men pakyryň yşygyn,
Magşuk imdi ýada salmaz aşygyn,
Biwepa garaşdym, ýar, oýanmadyň.

Daň ýyldyzy dogdy, jahan ýagtyldyp,
Men pakyr durar men gapysyn alyp,
Oýatmaz ukudan daň ýeli çalyp,
Daň şemaly turdy, ýar, oýanmadyň.

Ne bolupdyr saňa, beýle ýatyp sen?
Pikir bilen gam laýyna batyp sen,
Öz söwdügiň ýowuz derde satyp sen,
Ýusup deý gider men, ýar, oýanmadyň.

Aşyk diýsem, kime gulagyn goýar,
Ýaşyrsam syrymny ulus il duýar,
Hudaýym, ýar haçan ukydan doýar,
Yns-jyns doýandyr, ýar, oýanmadyň.

Nepes diýer, imdi giderem mundan,
Daň şemaly öter bu ýektaý dondan,
Imdi gol göterdim, ýar, menem senden,
Uzyn gije ötdi, ýar, oýanmadyň...


Mollanepes