Aýly gijelere gurban bolardym,
Sallanyp, ýanyma, ýar geler çagy.
Gara gözne içgin nazar salardym,
Sallanyp, ýanyma, ýar gelen çagy.

Ýyldyzlaram gökden bizi gözledi,
Mährem çynar — aý yşgyndan gizledi.
Bag — yranma:, ýel — öwüsmä: dözmedi
Sallanyp, ýanyma, ýar gelen çagy.

Boýnuna asardym arzuwdan monjuk.
Söýgünden gandarjak, mähirden ganjak.
Posa sanamazdyk, ýokdy san-sajak,
Sallanyp, ýanyma, ýar gelen çagy.

Inçe bilden golum salyp guçardym,
Gursagyndan aby-haýýat içerdim.
Ýaşlygymy — gül gujakda — geçirdim,
Sallanyp, ýanyma, ýar gelen çagy.

Söýgi bilen — ýaşlyk — juda süýjedi.
Kalbymyzda yşgyň ody möwjedi,
Aýdanlarym on ýedimiň güýjüdi,
Indi dolanarmy, ýar gelen çagy.

Awtor:Amangeldiýew Durdymyrat