Aramyzda bir söz galdy aýdylman,
Ahmyr bolup siňip gitdi leblere.
Arzuwlarmyz siňen süýji aýdymlar
Uçdy gitdi, dönüp akja leglege.

Aramyzda bir saz galdy düzülmän —
Perdeleri aýamyza döküldi.
Neneň galdy ýürek tarym üzülmän,
Bogun-bogun onki süňňüm söküldi?!

Aramyzda bir düýş galdy ýorulman,
Ýat illerde ýitip gitdi ýorgudy.
Toý kejebäň yşk mülkünde gurulman,
Özgä çekdi yşkymyzyň ýazgydy.

Aramyzda bir syr galdy kerep deý,
Boýna dakdy ykballaryň emrini.
...Enteklerem saklap ýörüs ýürekde
Aýdylmadyk ýeke sözüň jebrini.

Akmyrat Meredov