FRONTDAN GELEN HAT

“Düşmeris ahyry aýra biz baky...
Diýipsiň:”Bir eýýäm bugdaýlar bişdi”.
Hatyňy okamda gaýramyzdaky
Bugdaýly meýdanlar ýadyma düşdi.

Ýada düşýär düzde saman dek akan
Aý nury, irmezdik orak ormadan.
Indi göz ýetirdim, şol meýdan eken
Süňňümize öz reňkini ornadan.

Aramyz daş , ýöne ýüregmiz daş däl,
Umytda bol mydam, ölüm ýok merde.
Munda ýanýan diňe ot ýa agaç däl,
Suwlaram, topragam ýanýar bu ýerde.

Or, ýygna bugdaýy, unut gyssaňy,
Eglenmen, bararyn tamamlansa toý,
Bir haýyşym , ilki bogan dessäňi
Men barýançam dulumyzda asyp goý”

Garaşdyk, saraldyk köp ýatan suw deý,
Kyndy galkyndyrmak aç galan ýurdy.
Saçak boşdy, ýöne bir desse bugdaý
Kepbäň bir burçunda asylgy durdy.